Incenye yencwadzi ya-Isaya letsetfwe eMculwini weLwandle Lolufile, ivetwe ngenhla kwelihumusho lakamuva lencwadzi ya-Isaya ngelulwimi lwesi-Arab. Umlayeto weliVi laNkulunkulu awuzange ushintje
LiVi LaNkulunkulu Lashintjwa Yini?
Labanye bantfu bayatibuta kutsi liVi laNkulunkulu lashintjwa yini? Umphrofethi Isaya watsi: “Livi laNkulunkulu wetfu limile kuze kube nguphakadze.” (Isaya 40:8) Singaciniseka njani kutsi tetsembiso taNkulunkulu tigcineke tiliciniso?
Nkulunkulu unemandla ekulondvolota liVi lakhe nekulivikela kutsi lingonakaliswa. Etikhatsini tasendvulo nakukopishwa imibhalo yesandla, bakopishi bebacikelela kutsi babala tonkhe tinhlavu temagama kuze baciniseke kutsi kute lokwengetwako, lokushintjwako, nobe lokukhishwako. Nobe kunjalo, bantfu banesono, futsi labanye bebakopishi benta emaphutsa lamancane.
SINGACINISEKA NJANI KUTSI IMIBHALO LENGCWELE YALAMUHLA ICUKETSE UMLAYETO WANKULUNKULU WASEKUCALENI?
Kunetinkhulungwane temakhophi emibhalo yesandla yasendvulo yemiBhalo Lengcwele. Ngekucatsanisa lamakhophi lehlukahlukene, kungaba melula kutfola emaphutsa. Kuze utfole lokunyenti ngaloku, fundza sihloko lesitsi, “Has the Bible Been Changed or Tampered With?” lesiku-jw.org.
Ngekwesibonelo, cabanga ngemibhalo yasendvulo lebitwa ngekutsi Yimiculu Yelwandle Lolufile, leyatfolwa lilunga lema-bedouins emihumeni ledvutane neLwandle Lolufile nga-1947. Lemibhalo yasendvulo icuketse tincenye temiBhalo Lengcwele letindzala ngeminyaka lengetulu kwa-2 000. Tati temibhalo tacatsanisa lemibhalo yesandla yasendvulo nemiBhalo Lengcwele lesinayo lamuhla. Yini letayitfola?
Letati tatfola kutsi umlayeto loseVini laNkulunkulu lesinalo lamuhla, uyafana naloyo lobowusemibhalweni yekucala.a Kuhlolisisa ngekucophelela lemibhalo yesandla yasendvulo, kufakazela kutsi loko lesikufundza emiBhalweni Lengcwele lamuhla kungumlayeto waNkulunkulu wasekucaleni. Singaciniseka kutsi Nkulunkulu usilondvolotele ngekucophelela umlayeto lonembile wemiBhalo Lengcwele.
Ngako, singalifudza liVi laNkulunkulu siciniseka kutsi linembile. Sinaloku engcondvweni, akesihlole kutsi yini lesingayifundza ngaNkulunkulu kubaphrofethi bakhe.
a I-The Complete Dead Sea Scrolls ngesiNgisi, ya-Geza Vermes, likhasi 16.