Indlela UMdali Wetfu Lembula Ngayo Tetsembiso Takhe Telutsandvo

Kusukela ekudalweni kwebantfu, uMdali wetfu usebentise tingilosi nebaphrofethi kuze akhulume nebantfu. Ngetulu kwaloko, ukhetse kutsi lomlayeto wakhe kanye netibusiso lasetsembisa tona kubhalwe phansi. Letetsembiso taNkulunkulu tiyalitsintsa likusasa lakho. Ngako-ke ungatitfolaphi letetsembiso taNkulunkulu lamuhla?

Lomlayeto waNkulunkulu singawutfola emiBhalweni Lengcwele. (2 Thimothi 3:16) Nkulunkulu wabasebentisa njani baphrofethi kutsi babhale umlayeto wakhe? (2 Phetro 1:21) Nkulunkulu wafaka imicabango yakhe etingcondvweni tebabhali, lababese bayibhala phansi. Kwenteka lokufanako nalamuhla. Nangabe somabhizinisi asebentisa mabhalane wakhe kutsi ambhalele umlayeto, sonkhe siyati kutsi lomlayeto usuke uvela kusomabhizinisi. Ngendlela lefanako, nanobe Nkulunkulu asebentisa bantfu kutsi babhale lomlayeto wakhe, nguye umBhali walemiBhalo Lengcwele.

LIVI LANKULUNKULU LITFOLAKALA EMHLABENI WONKHE

Umlayeto loseVini laNkulunkulu ubaluleke kangangekutsi ufuna bonkhe bantfu bawufundze futsi bawucondze. Namuhla “letindzaba takhe letimnandzi taphakadze” titfolakala kuto “tonkhe tive, tinhlanga kanye netilwimi.” (Sembulo 14:6) Ngesibusiso saNkulunkulu, lemiBhalo Lengcwele itfolakala iphelele noma iyincenye ngetilwimi letingetulu kwa-3 000, lokwendlula nobe ngabe nguyiphi lenye incwadzi lekhona emhlabeni.