Tibusiso Talabo Labalalela Nkulunkulu

Umphrofethi Mosi watsi nasilalela imiyalo yaNkulunkulu sitawutfola tibusiso. (Dutheronomi 10:13; 11:27) Asimlaleli Nkulunkulu ngoba nje sesaba sijeziso sakhe. Buntfu lobuhle baNkulunkulu busenta sifune kumlalela ngobe simtsandza futsi singafuni kwenta tintfo letitamvisa buhlungu. “Ngobe nguloku lokushiwo kutsandza Nkulunkulu, kutsi sigcine imiyalo yakhe.”—1 Johane 5:3.

Kodvwa kulalela Nkulunkulu kungasenta njani sitfole tibusiso takhe? Naka nati tindlela letimbili.

1. KULALELA NKULUNKULU KUTASENTA SIHLAKANIPHE

“[NginguJehova] Nkulunkulu wenu, longuyena anifundzisa kutsi ngukuphi lokuncono, . . . lonilayela indlela lekufanele nihambe ngayo.”—ISAYA 48:17.

Nkulunkulu Jehova, uMdali wetfu usati kahle futsi usiniketa ticondziso lesitidzingako. Nangabe sifuna lasifundzisa kona kusisite sente tincumo letihlakaniphile, kufanele sifundze loko Nkulunkulu lafuna sikwente emiBhalweni Lengcwele bese siyakusebentisa ekuphileni kwetfu.

2. KULALELA NKULUNKULU KUTASENTA SIJABULE

“Bayajabula labo labeva livi laNkulunkulu futsi baligcine!”—LUKHA 11:28.

Tigidzi tebantfu letilalela liVi laNkulunkulu lamuhla, titfola injabulo sibili. Nasi sibonelo, Cabanga ngendvodza letsite yase-Spain lebeyinelulaka, isheshe icansuke, futsi ibaphatsa kabi labanye bantfu ngisho nemkayo. Ngalelinye lilanga, yafundza ngaloko lokwashiwo ngumphrofethi Mosi mayelana nemoya lophansi Josefa indvodzana yaJakobe labenawo. Josefa watsengiswa njengesigcila futsi waboshwa angenacala, noma kunjalo, wachubeka anemoya lophansi, anekuthula futsi atsetselela. (Genesisi sehluko 37-45) Lendvodza yase-Spain yatsi: “Kucabanga ngesibonelo saJosefa kwangikhutsata kutsi ngibe nemoya lophansi, ngibe nemusa futsi ngitibambe. Umphumela ube kutsi nyalo senginemphilo lejabulisako.”

ImiBhalo Lengcwele isiniketa naletinye ticondziso letinyenti endleleni lokufanele siphatse ngayo labanye. Loko kutawuchazwa kabanti esihlokweni lesilandzelako.