Indlela Lesingakhombisa Ngayo Kutsi Siyabatsandza Labanye

Njengesitukulwane sa-Adamu, indvodza yekucala, sonkhe singumndeni munye. Ngisho noma emalunga emndeni alindzeleke kutsi atsandzane futsi ahloniphane, kulamalanga lesiphila kuwo sekulukhuni kutfola lutsandvo lolunjalo. Loko akusiko lokufunwa nguNkulunkulu wetfu lonelutsandvo.

LOKO LOKUSHIWO YIMIBHALO LENGCWELE NGELUTSANDVO

“Uyawutsandza makhelwane wakho njengobe utitsandza wena.”—LEVITHIKHUSI 19:18.

“Chubekani nitsandza titsa tenu.”—MATEWU 5:44.

LOKO LOKUSHIWO KUTSANDZA LABANYE BANTFU

Naka indlela liVi laNkulunkulu lelichaza ngayo lutsandvo ku-1 Khorinte 13:4-7:

“Lutsandvo luyabeketela futsi lunemusa.”

Cabanga nganaku: Utiva njani nangabe labanye bakubeketelela futsi baba nemusa kuwe baphindze bangakutfukutseleli nawente emaphutsa?

“Lutsandvo lute umona.”

Cabanga nganaku: Utiva njani nangabe labanye bahlale bakusola futsi bakudlela umona?

“Lutsandvo alutifuneli kwalo.”

Cabanga nganaku: Utiva njani nangabe labanye bayihlonipha imibono yakho futsi bangahlohlobeteli imibono yabo ngaso sonkhe sikhatsi?

“Lutsandvo lute emagcubu.”

Cabanga nganaku: Nkulunkulu ukulungele kucolela bantfu labonile futsi baphendvuka. “Akatsetsi ngaso sonkhe sikhatsi, futsi akahlali atfukutsele kuze kube phakadze.” (Tihlabelelo 103:9) Siyajabula nangabe umuntfu lesimonile asicolela. Kufanele sihlale sikulungele kutsetselela labanye nabasona.—Tihlabelelo 86:5.

“Lutsandvo alujatjuliswa kungalungi.”

Cabanga nganaku: Siphatseka kabi nangabe labanye bajabula ngekuhlupheka kwetfu. Ngako asijabuli nangabe labanye bahlupheka ngisho noma ngabe bebasiphatsa kabi.

Kuze sijabulele sibusiso saNkulunkulu, kufanele sitsandze labanye ngaletindlela letikhonjisiwe ngisho baneminyaka, buve noma inkholo lengafani neyetfu. Lenye indlela lesingakhombisa ngayo lutsandvo kutsi sisite labo labeswele.