Tikhombo Tencwajana Yekubhalela Emhlanganweni Wekuphila KwemaKhristu Nemsebenti Wawo
FEBRUARY 6-12
UMCEBO LOSEVINI LANKULUNKULU | ISAYA 47-51
“Kulalela Jehova Kuletsa Tibusiso”
(Isaya 48:17) Naku lokushiwo nguSimakadze, uMhlengi wenu, Longcwele waka-Israyeli, utsi: “NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lekufanele nihambe ngayo.
ip-2 131 ¶18
Jehova Uyasifundzisa Kuze Sizuze
“Lalela Imiyalo Yami”
18 Umoya waJehova wamnika emandla umphrofethi waze watsi: “Manje-ke, iNkhosi Simakadze ingitfumile kanye naMoya wayo. Naku lokushiwo nguSimakadze, uMhlengi wenu, Longcwele waka-Israyeli, utsi: ‘NginguSimakadze Nkulunkulu wenu, longuyena anifundzisa kutsi ngukuphi lokuncono kunako konkhe kini, lonilayela indlela lekufanele nihambe ngayo.’” (Isaya 48:16b, 17) Lamavi lanemusa lakhombisa kutsi Jehova uyanakekela, kufanele acinisekise sive saka-Israyeli kutsi Nkulunkulu utasikhulula eBhabhulona ngobe wasitsenga kabusha. (Isaya 54:5) Kusifiso saJehova kutsi ema-Israyeli alungise buhlobo bawo naye futsi alalele imiyalo yakhe. Kukhonta kweliciniso kusekelwe ekulaleleni timfundziso letivela kuNkulunkulu. Ema-Israyeli ngeke akhone kuhamba endleleni lefanele nangabe angakafundziswa ‘indlela lekufanele ahambe ngayo.’
(Isaya 48:18) Kube mane naniyilalela imiyalo yami, kuthula nenhlalakahle yenu ngabe kunjengemifula, kulunga kwenu kube njengemagagasi elwandle.
ip-2 131 ¶19
Jehova Uyasifundzisa Kuze Sizuze
19 Sifiso saJehova sekutsi bantfu bakhe bagweme inhlekelele futsi bajabulele kuphila, sichazwe kanje: “Kube mane naniyilalela imiyalo yami, kuthula nenhlalakahle yenu ngabe kunjengemifula, kulunga kwenu kube njengemagagasi elwandle.” (Isaya 48:18) Cabanga ngekuncusa lokumnandzi kangaka lokusuka kuMdali longuSomandla! (Duteronomi 5:29; Tihlabelelo 81:13) Esikhundleni sekuya ekutfunjweni, ema-Israyeli angatfola kuthula lokunjengemanti lageleta emfuleni. (Tihlabelelo 119:165) Kulunga kwawo kungaba njengemagagasi elwandle. (Amosi 5:24) Njengobe awakhatsalela mbamba, ngemusa Jehova uncenga ema-Israyeli ngekuwakhombisa indlela lokufanele ahambe ngayo. Utsi: Kube mane naniyilalela imiyalo yami!
(Isaya 48:19) Titukulwane tenu ngabe tingangetihlabatsi. Bantfwabenu ngabe bangangetinhlavu letingenakubalwa, emabito abo abengayiwuncanyulwa lutfo, abengayiwubhujiswa embikwami.”
ip-2 132 ¶20-21
Jehova Uyasifundzisa Kuze Sizuze
20 Ngutiphi tibusiso letingatfolwa ngu-Israyeli nangabe aphendvuka? Jehova utsi: “Titukulwane tenu ngabe tingangetihlabatsi. Bantfwabenu ngabe bangangetinhlavu letingenakubalwa, emabito abo abengayiwuncanyulwa lutfo, abengayiwubhujiswa embikwami.” (Isaya 48:19) Jehova ukhumbuta bantfu ngesetsembiso sakhe lesitsi titukulwane ta-Abrahama titawuba tinyenti “tibe ngangetinkhanyeti tesibhakabhaka nangangesihlabatsi selugu lwelwandle.” (Genesisi 22:17; 32:12) Kodvwa, lesitukulwane sa-Abrahama besisolo sivukela futsi asinalo lilungelo lekubona lesetsembiso sifezeka. Ecinisweni umlandvo waso bewusolo umubi kangangekutsi ngekweMtsetfo waJehova, kufanele kutsi ligama laso lisuswe. (Duteronomi 28:45) Nanobe kunjalo, Jehova akafisi kutsi bantfu bakhe babulawe futsi akafuni nekubalahla ngalokuphelele.
21 Timiso letikulelivesi tiyasebenta kulabakhonta Jehova lamuhla. Jehova unguMtfombo wekuphila, futsi wati kancono kwendlula nome ngubani kutsi kufanele sikusebentise njani kuphila kwetfu. (Tihlabelelo 36:9) Usinikete ticondziso kuze sizuze, hhayi ngenjongo yekusephuca injabulo. EmaKhristu eliciniso ayalalela ngobe afuna kufundziswa nguJehova. (Mikha 4:2) Ticondziso takhe tivikela buhlobo betfu naJehova, tisilondvolota nasekuyengweni nguSathane. Nangabe siticondza timiso letisekelwe kulemitsetfo yaNkulunkulu, siyabona kutsi kufundziswa nguJehova kuzuzisa tsine. Siyacaphela kutsi ‘imiyalo yakhe ayisiwo umtfwalo.’ Futsi ngeke sincunywe.—1 Johane 2:17; 5:3.
Funisisa Umcebo EVini LaNkulunkulu
(Isaya 49:6) Utsi: “Kuyintfo lelula kakhulu kuwe kuba yinceku yami kubuyisela tive takajakobe, nekubuyisa labo labasasele bema-Israyeli lengitigcinele bona. Ngitakwenta futsi ube kukhanya kubetive, kuze utewumikisa insindziso yami emikhawulweni yonkhe yemhlaba.”
w07 1/15 9 ¶8
Emaphuzu Lagcamile Encwadzi Ya-Isaya—II
49:6—Kwentiwa yini kutsi Mesiya abe ‘kukhanya kubetive,’ kantsi ngesikhatsi asemhlabeni abeshumayela kubantfwana baka-Israyeli kuphela? Kungenca yaloko lokwenteka ngemuva kwekufa kwaJesu. LiBhayibheli liveta kutsi Isaya 49:6 usebenta kubafundzi bakhe. (Imisebenti 13:46, 47) Lamuhla, emaKhristu lagcotjiwe, asitwa sicumbi lesikhulu sebakhulekeli labakhonta ‘njengekukhanya kubetive,’ akhanyisela bantfu “emhlabeni wonkhe.”—Matewu 24:14; 28:19, 20.
(Isaya 50:1) Naku lokushiwo nguSimakadze, utsi: “Iphi incwadzi yenyoko yesehlukaniso, lengamcosha ngayo kutsi ahambe? Nome-ke nganitsengisa kumuphi kulengibakweledako? Natsengiswa ngenca yetono tenu, ngenca yemacala enu unyoko wacoshwa.
it-1 643 ¶4-5
Idivosi
Kudivosa Lokungekwemfanekiso. EmiBhalweni buhlobo bemshado busetjentiswa ngalokungumfanekiso. (Isa 54:1, 5, 6; 62:1-6) Lesimo sentelwe kufanekisela kudivosa nobe kucosha umfati.—Jer 3:8.
Umbuso wakaJuda wacitfwa futsi iJerusalema yabhujiswa nga-607 B.C.E., bantfu bakulelive batfunjwelwa eBhabhulona. Eminyakeni yakamuva Jehova wabiketela kutsi emaJuda abetawutfunjwa: “Iphi incwadzi yenyoko yesehlukaniso, lengamcosha ngayo kutsi ahambe? (Isa 50:1) “Unyoko” wabo nobe inhlangano yebetive, wavele wacoshwa nje hhayi ngobe Jehova abephule sivumelwane wase utsatsa sinyatselo sekwehlukana naye, kodvwa kungenca yebubi labenta mayelana neMtsetfo wesivumelwane. Kodvwa ema-Israyeli lasele aphendvuka futsi athantaza kuze abuyisane nemyeni wakhe lokunguJehova futsi abuyele eveni labo. Ngenca yeligama lakhe, Jehova, wababuyisela eveni labo bantfu bakhe njengobe abetsembisile nga-537 B.C.E., ngemuva kwekuphela kweminyaka lengu-70 baphatfwa kabi.—Hla 137:1-9; fundza sihloko lesitsi UMSHADO.
Kufundvwa KweliBhayibheli
(Isaya 51:12-23) “Mine, mine ngekwami, nginguye lonidvudvutako. Benibobani-ke nine kutsi ningesaba bantfu lababhubhako, emadvodzana ebantfu, latjani nje, 13 kutsi ningakhohlwa Simakadze, uMenti wenu, loweneka emazulu, wabeka tisekelo temhlaba, kutsi seningahlala ngekutfutfumela onkhe emalanga ngenca yelulaka lwemcindzeteli, lotilungiselela kunibhubhisa? Ngobe lukuphi nje lulaka lwemcindzeteli? 14 Labo labatiboshwa batawukhululwa masinyane; bangeke bafele kulomgodzi welijele labo, futsi bangeke bakweswele kudla. 15 Ngobe nginguSimakadze Nkulunkulu wakho, lonyakatisa lwandle kubhodle emagagasi alo, nguSimakadze longuSomandla libito lakhe. 16 Ngibeke emavi ami emlonyeni wakho, ngakusibekela ngemtfunti wesandla sami; mine lengibeke emazulu endzaweni yawo, nalengabeka tisekelo temhlaba, ngikhuluma neSiyoni ngitsi: ‘Wena usive sami!’” 17 Vuka, vuka, sukuma, wena Jerusalema, wena lonatse esandleni saSimakadze indzebe yentfukutselo yakhe, wena lominyele sinatfo lesiseludziweni lesenta bantfu badzayitele. 18 Kuwo onkhe emadvodzana lowawatala kwabate nayinye yekukucondzisa endleleni; kuwo onkhe emadvodzana lowawakhulisa, kwabate nayinye leyakubamba ngesandla sakho. 19 Lamaphindze etinhlekelele ehlele etikwakho, ngubani nje longakudvudvuta? Kulokuphihlitwa nekubhujiswa, kuyo indlala kanye nenkemba, ngubani longakudvudvuta? 20 Emadvodzana akho acalekile, adzindzibele ekugcineni kwato tonkhe titaladi njengenyamatane ibanjwe elugibeni. Emadvodzana akho ehlelwe yintfukutselo yaSimakadze, ahlaselwa kwekhutwa nguNkulunkulu wakho. 21 Ngako-ke, vani naku, wena lohlushwako, nalosadzakisiwe, kodvwa hhayi ngeliwayini. 22 Naku lokushiwo yiNkhosi Simakadze, Nkulunkulu wakho, lovikela sive sakhe, utsi: “Uyabona, sengiyisusile esandleni sakho indzebe beyikwenta udzayitele; kuleyo ndzebe, ludziwo lwentfukutselo yami, ungeke uphindze unatse kuyo futsi. 23 Ngiyakuyifaka etandleni tebahluphi bakho, labakhuluma kuwe batsi: ‘Khotsama phansi, khona sitewuhamba etikwakho.’ Umhlane wakho uwente ufanane nesiyilo, ufanane nemgwaco lekungahanjwa etikwawo.”
FEBRUARY 13-19
UMCEBO LOSEVINI LANKULUNKULU | ISAYA 52-57
“Khristu Wahlupheka Ngenca Yetfu”
(Isaya 53:3-5) Yedzelelwa yaliwa bantfu, umuntfu wetinsizi labekwetayele kuhlupheka. Njengemuntfu bantfu labangafuni kumbuka, yedzelelwa, asizange siyishaye mkhuba. 4 Impela yabetfwala butsakatsaka betfu, yatetjatsa netinhlungu tetfu, noko tsine sayitsatsa ngekutsi ishaywe nguNkulunkulu, yamukulwa nguye, yahlushwa. 5 Kodvwa yagwazwa ngenca yetiphambuko tetfu, yafihlitwa ngenca yekona kwetfu, sijeziso saba setikwayo, kuze tsine sibe nekuthula; ngemanceba emivimbo yayo siyaphiliswa tsine.
w09 1/15 26 ¶3-5
Inceku YaJehova “Yagwazwa Ngenca Yetiphambuko Tetfu”
“Yedzelelwa,” Futsi Ayizange ‘Ishaywe Mkhuba’
3 Fundza Isaya 53:3. Ase ucabange kutsi bekusho kutsini ngeNdvodzana yaNkulunkulu letelwe yodvwa kutsi idzele injabulo yekukhonta iseceleni kweYise, bese ita emhlabeni itewunikela ngekuphila kwayo kube ngumhlatjelo wekusindzisa bantfu esonweni nasekufeni! (Fil. 2:5-8) Umhlatjelo wayo, bekufanele utsetselele tono njengobe imihlatjelo yetilwane lebeyentiwa ngaphansi kweMtsetfo waMosi nayo beyitsetselela tono. (Heb. 10:1-4) Bekungafanele yini lendvodzana yamukelwe futhi idvunyiswe ngemaJuda labekalindzele kufika kwaMesiya? (Joh. 6:14) Bekufanele, kodvwa emaJuda ‘amedzelela’ Khristu futsi ‘awazange amshaye mkhuba’ njengobe Isaya abebiketele. Umphostoli Johane wabhala watsi: “Wefika kubantfu bakubo kodvwa abazange bamemukele.” (Joh. 1:11) Umphostoli Phetro watjela emaJuda watsi: Nkulunkulu “wabokhokho betfu, umkhatimulisile Jesu iNceku yakhe, loyo lenamnikela futsi namlahla embikwaPilatu, ngesikhatsi yena asancume kumkhulula. Namlahla lona longcwele nalolungile.”—Imi. 3:13, 14.
4 Isaya waphrofetha nekutsi Jesu bekufanele “ahlushwe.” Ngesikhatsi ashumayela Jesu abekhatsala ngaletinye tikhatsi, kodvwa kute lakusho khona kutsi wagula. (Joh. 4:6) Nanobe kunjalo, bekababona bantfu lebekabashumayela bagula. Waba nesihawu ngabo futsi welapha labanyenti. (Makho 1:32-34) Ngako, Jesu wagcwalisa siphrofetho lesitsi: “Impela yabetfwala butsakatsaka betfu, yatetjatsa netinhlungu tetfu.”—Isa 53:4a; Mat. 8:16, 17.
Yatsatfwa ‘Njengaleshaywe NguNkulunkulu’
5 Fundza Isaya 53:4b. Bantfu labanyenti lebebaphila ngesikhatsi saJesu abazange basicondze sizatfu sekuhlupheka nekufa kwakhe. Bebakholelwa kutsi Nkulunkulu abemjezisa, njengekungatsi umshaya ngesifo lesenyanyekako. (Mat. 27:38-44) EmaJuda amangalela Jesu ngekutsi uyahlambalata. (Makho 14:61-64; Joh. 10:33) Kuliciniso kutsi, Jesu abengasiso soni noma umhlambalati. Kodvwa ngenca yekutsi abemtsandza kakhulu uYise, lokutsi nje abetawufa ngekutsi umangalelwe futsi wahlanjalatwa, kufanele kutsi kwabengeta buhlungu abebuva njengeNceku yaJehova. Nanobe kunjalo, ngekutfobeka abetimisele kwenta intsandvo yaJehova.—Mat. 26:39.
(Isaya 53:7, 8) Yacindzetelwa, yahlushwa, kodvwa ayizange iwuvule umlomo wayo; yaba njengelizinyane lemvu leliyiswa ekuhlatjweni, nanjengemvu lebindzile embikwebahhuli bayo, nayo ayizange iwuvule umlomo wayo. 8 Yaboshwa, yalahlwa ngelicala, yesuswa. Ngubani nje wesitukulwane sayo labenaka kutsi yancunywa eveni lalabaphilako, yashaywa ngenca yesono sebantfu bami?
w09 1/15 27 ¶10
Inceku YaJehova “Yagwazwa Ngenca Yetiphambuko Tetfu”
“Yaba Njengelizinyane Lemvu Leliyiswa Ekuhlatjweni”
10 Fundza Isaya 53:7, 8. Ngesikhatsi Johane uMbhabathisi abona Jesu eta, wamemeta watsi: “Nalo liWundlu laNkulunkulu lelisusa sono selive!” (Joh. 1:29) Ngesikhatsi Johane akhuluma ngaJesu njengeliWundlu, kungenteka abecabanga ngemavi a-Isaya latsi: “Yaba njengelizinyane lemvu leliyiswa ekuhlatjweni.” (Isaya 53:7) Isaya waphrofetha watsi: “Yatfululela kuphila kwayo ekufeni.” (Isaya 53:12) Ngebusuku lenta ngabo Sikhumbuto sekufa kwakhe, Jesu wanika baphostoli bakhe labetsembekile labangu-11 indzebe yeliwayini wase utsi: “Isho ‘ingati yami yesivumelwane,’ letawucitfwa ngenca yalabanyenti kute kutsetselelwe tono.”—Mat. 26:28.
(Isaya 53:11, 12) Emvakwekuhlupheka kwemphefumulo wayo iyawukubona kukhanya kwekuphila, yeneliswe, ngelwati lwayo inceku yami lelungile iyakwenta labanyenti bemukeleke kuNkulunkulu kutsi balungile, njengobe yetfwele tiphambuko tabo. 12 Ngako-ke ngiyawuyinika sabelo emkhatsini walabakhulu,a iyakwehlukanisa imphango nalabanemandla, ngobe yatfululela kuphila kwayo ekufeni, yabalwa kanye netoni. Ngobe yetfwala tono talabanyenti, yancusela toni”
w09 1/15 28 ¶13
Inceku YaJehova “Yagwazwa Ngenca Yetiphambuko Tetfu”
INceku “Iyakwenta Labanyenti Bemukeleke”
13 Fundza Isaya 53:11, 12. Nakakhuluma ngeNceku yakhe lekhetsiwe, Jehova watsi: “Inceku yami lelungile iyakwenta labanyenti bemukeleke kuNkulunkulu kutsi balungile.” Njani? Incenye yekugcina yavesi 12 iyasisita kute sitfole imphendulvo. “Ngobe [INceku] yetfwala tono talabanyenti, yancusela toni.” Yonkhe intalo ya-Adamu italwa inesono, ‘itoni,’ ngako itfola “umvuzo wesono” lokukufa. (Roma 5:12; 6:23) Umuntfu losoni kudzingeka abuyisane naJehova. Sehluko 53 sesiphrofetho sa-Isaya siyichaza kahle indlela Jesu “lalamlela” ngayo bantfu labanesono ngesikhatsi atsi: “Sijeziso saba setikwayo, kuze tsine sibe nekuthula; ngemanceba emivimbo yayo siyaphiliswa tsine.”—Isaya 53:5.
Funisisa Umcebo EVini LaNkulunkulu
(Isaya 54:1) “Hlabela, wena mfati loyinyumba, wena longazange sewumtale umntfwana; hlokoma uhlabele, memeta ngekujabula, wena longazange sewuhelwe, ngobe banyenti bantfwana bemfati lolahliwe kunebemfati lonendvodza,” kusho Simakadze.
w06 3/15 11 ¶2
‘Indzaba Lengumfanekiso’ Isebalulekile Kitsi
Bobani labafanekiselwa ‘ngumfati lokhululekile’ Sara nendvodzana yakhe, Isaka? Pawula waveta kutsi Sara, ‘longumfati loyinyumba,’ abefanekisela umfati waNkulunkulu, incenye yenhlangano yakhe lesezulwini. Lomfati wasezulwini abeyinyumba ngobe ngaphambikwekutsi Jesu ete emhlabeni abengenabo “bantfwana” labagcotjiwe. (Galathiya 4:27; Isaya 54:1-6) Nanobe kunjalo’ ngeliPhentekoste la-33 C.E., licembu lemadvodza nebafati lemukela umoya longcwele lowabenta batalwa kabusha njengebantfwana balomfati wasezulwini. Bantfwana labatalwa ngulenhlangano babese bafakwa esiswini bentiwa emadvodzana aNkulunkulu futsi baba tindlalifa naJesu Khristu ngaphansi kwesivumelwane lesisha. (Roma 8:15-17) Umphostoli Pawula njengalomunye walabantfwana, wabhala watsi: “Kodvwa iJerusalema lesetulu ikhululekile, futsi ingumake wetfu.”—Galathiya 4:26.
(Isaya 57:15) Ngobe nguloko lokushiwo nguLophakeme Losetulu, lolibito lakhe linguLongcwele, utsi: “Ngihlala etulu endzaweni lengcwele, kodvwa nakuye lodzabukile nalotfobekile emoyeni, kutewuvuselela umoya walabatfobekile nekuvuselela tinhlitiyo talabephukile emoyeni.
w05 10/15 26 ¶3
Lwela Kutfobeka Mbamba
Sibonelo Sekutfobeka Lesikhulu Kunato Tonkhe
3 Jehova mkhulu kakhulu futsi akaphenyeki. Nome kunjalo, “emehlo aSimakadze abuka emhlabeni wonkhe kucinisa labo labatinhlitiyo tabo titinikele kuye ngalokuphelele.” (2 TiKhronike 16:9) Yini Jehova layentako lapho atfola bakhulekeli labaphansi labachotjotwe tinhlupheko letehlukahlukene? Ngemcondvo lotsite, ‘uhlala’ nabo ngemoya wakhe longcwele “kutewuvuselela umoya walabatfobekile nekuvuselela tinhlitiyo talabephukile emoyeni.” (Isaya 57:15) Ngenca yaloko, bakhulekeli bakhe labavuselelekile babese bayakwati kuphindze bamkhonte ngekujabula. Cabanga ngendlela Nkulunkulu latfobeke ngayo!
Kufundvwa KweliBhayibheli
(Isaya 57:1-11) Lolungile uyabhubha, kubete nalotihluphako ngako enhlitiyweni yakhe. Bantfu labatinikelako bayesuswa, kubete nalokucondzako loko kutsi labalungile bayesuswa, kuze batewuphephiswa kulokubi. 2 Labo labahamba ngebucotfo bangena ekuthuleni; batfola kuphumula, nabangena ekufeni. 3 “Kodvwa nine, wotani la, nine madvodzana esangoma lesisikati, nine ntalo yetiphingi neyetingwababane! 4 Ngubani lona lenimphukutako? Ngubani lona lenikhombana ngaye ngetinhloko, nisinekelane ematinyo ngaye? Anisiyo yini intalelwane yebahlubuki? Anisiwo yini umliba webacali bemanga? 5 Nishiselwa tinkhanuko etihlahleni tema-okhi nangaphansi kwato tonkhe tihlahla letendlala emagala ato. Ninikela ngebantfwabenu emifudlaneni nangaphansi kwemifantfu yemadvwala. 6 Emkhatsini wematje labusheleleti asemifudlaneni ukhetsa tithico takho, tona titabelo takho. Yebo, utfululele kuto iminikelo yetinatfo, wanikela nangeminikelo yalokutinhlavu. Ngifanele ngeneliseke yini ngato tonkhe letintfo? 7 Wendlale umbhedze wakho etulu etintsabeni letiphakeme, wase wenyukela khona kuyawushisa imihlatjelo. 8 Emvakwetivalo nasemvakwetinsika temnyango wakho, ubeke titfombe tetithico takho. Ungikhohliwe mine, wagwabula umbhedze wakho, wagibela kuwo, wawandzisa kakhulu, wavumelana nalabo lotsandza imibhedze yabo, wabukana nebungcunu babo. 9 Waya kuMoloki nemafutsa emncumo, wandzisa emakha akho. Watfumela emancusa akho khashane, wehlela edlizeni cobo lwalo! 10 Ukhatsatwe ngito tonkhe letindlela takho, kodvwa awuzange usho kutsi: ‘Akusiti lutfo.’ Watfola kuvusetelwa kwemandla akho, ngiko nje ungazange ucaleke. 11 “Ngubani lona lebewumvevela kangaka, umesaba, uze ungetsembeki kimi, ungasangikhumbuli, futsi ungasangicabangi ngisho nasenhlitiyweni yakho? Akwentiwa kutsi sengithule sikhatsi lesidze yini lokutsi ungasangesabi?
FEBRUARY 20-26
UMCEBO LOSEVINI LANKULUNKULU | ISAYA 58-62
“Ngitewumemetela Umnyaka Wemusa WaJehova”
(Isaya 61:1, 2) Moya weNkhosi Simakadze ukimi, ngobe Simakadze ungigcobile, kutsi ngishumayele tindzaba letimnandzi kulabamphofu. Ungitfume kutsi ngitewubopha labo labatinhlitiyo tabo tidzabukile. Ungitfume kutawumemetela kukhululwa kulabatfunjiwe, nekukhululwa kulababoshiwe. 2 Ungitfume kutsi ngitewumemetela umnyaka wemusa waSimakadze, nelilanga lekuphindzisela kwaNkulunkulu wetfu, nelekudvudvuta bonkhe labalilako,
ip-2 322 ¶4
Kulunga Kuyahluma ESiyoni
“Umnyaka Wemusa”
4 Isaya uyabhala: “Moya weNkhosi Simakadze ukimi, ngobe Simakadze ungigcobile, kutsi ngishumayele tindzaba letimnandzi kulabamphofu. Ungitfume kutsi ngitewubopha labo labatinhlitiyo tabo tidzabukile. Ungitfume kutawumemetela kukhululwa kulabatfunjiwe, nekukhululwa kulababoshiwe.” (Isaya 61:1) Ngubani lotfunywe kutsi amemetele tindzaba letimnandzi? Cishe ekucaleni ngu-Isaya, lowaphefumulelwa nguNkulunkulu kutsi abhalele labatfunjwe eBhabhulona tindzaba letimnandzi. Nanobe kunjalo, Jesu wakhuluma ngalobekutawugcwaliseka lokubaluleke kakhulu ngesikhatsi atsi emavi a-Isaya asebenta kuye. (Luka 4:16-21) Jesu watfunywa emhlabeni kuze atjele labatfobekile tindzaba letimnandzi, futsi wase ugcotjwa ngemoya longcwele ngesikhatsi abhajatiswa.—Matewu 3:16, 17.
(Isaya 61:3, 4) Labakhala eSiyoni babonelelwe, banikwe umchele webuhle esikhundleni semlotsa, banikwe nemafutsa enjabulo esikhundleni sesililo, banikwe ingubo yekudvumisa esikhundleni semoya lodzabukile. Bayawubitwa ngekutsi batihlahla tekulunga, letihlanyelwe nguSimakadze, kuze kubonakaliswe inkhatimulo yakhe. 4 Bayawutakha kabusha tindzala takadzeni, bativusetele tindzawo letabhidlitwa kadzenidzeni; bayawuvusa kabusha emadolobha lahhihlitwa, labhidlitwa etitukulwaneni tasendvulo.
ip-2 326-327 ¶13-15
Kulunga Kuyahluma ESiyoni
13 Kusukela ngeliPhentekoste la-33 C.E. kuchubeke, Nkulunkulu wahlanyela ‘tihlahla tekulunga’ letifanako—emaKhristu lagcotjiwe lanesibindzi—lamelela sive sakhe lesisha, ‘Israyeli waNkulunkulu.’ (Galathiya 6:16) Emakhulwini eminyaka leyengcile, ‘letihlahla’ tandzile taba ngu-144 000, tatsela titselo tekulunga letikhatimulisa Jehova Nkulunkulu. (Sembulo 14:3) Bantfu bekugcina labamelelwa ‘nguletihlahla’ letinkhulu bachakazile kusukela nga-1919, ngesikhatsi Jehova avuselela labasele baka-Israyeli waNkulunkulu labebangasebenti kwesikhashana. Ngekubanika emanti lamanyenti, Jehova wente kwaba nelihlatsi letihlahla tekulunga, naletitsela titselo.—Isaya 27:6.
14 Achaza kubaluleka ‘kwaletihlahla’, Isaya uyachubeka: “Bayawutakha kabusha tindzala takadzeni, bativusetele tindzawo letabhidlitwa kadzenidzeni; bayawuvusa kabusha emadolobha lahhihlitwa, labhidlitwa etitukulwaneni tasendvulo.” (Isaya 61:4) Ngemyalo weNkhosi yasePheresiya lenguKhuresi, emaJuda letsembekile abuya eBhabhulona akha kabusha liJerusalema nelithempeli lalo, lebelinesikhatsi lesidze libhidlitiwe. Imisebenti yekulivusetela yayiyokwentiwa ngisho ngemuva kwa-33 C.E. na-1919.
15 Nga-33 C.E., kuboshwa kwaJesu, kutekiswa kwakhe licala kanye nekufa kwakhe kwabavisa buhlungu kakhulu bafundzi bakhe. (Matewu 26:31) Kodvwa, indlela lebebativa ngayo yashintja ngesikhatsi bambona. Ngemuva kwekutfululwa kwemoya longcwele etikwabo, baba matasa ngemsebenti wekushumayela tindzaba letimnandzi, “kokubili eJerusalema, naseJudiya lonkhe, naseSamariya, kuze kube ngusekugcineni kwemhlaba.” (Imisebenti 1:8) Ngekwenta kanjalo bacala kubuyisela kukhulekela lokuhlantekile. Ngendlela lefanako, kusukela nga-1919 kuchubeke Jesu Khristu wenta kutsi labagcotjiwe labasele emhlabeni bakhe kabusha “tindzawo letabhidlitwa etitukulwaneni tasendvulo.” Besekuphele emakhulu eminyaka bafundisi beTinkholo behlulekile kunika bantfu lwati ngaJehova, esikhundleni saloko bebafundzisa emasiko ebantfu netimfundziso letingakasekelwa emiBhalweni. Emabandleni awo, emaKhristu lagcotjiwe ayekela yonkhe imikhuba lefana neyenkholo yemanga kuze kubuyiselwa kwekukhonta kweliciniso kuchubekele embili. Aphindze acala umkhankaso wekufakaza lomkhulu kunayo yonkhe leyake yaba khona emhlabeni.—Makho 13:10.
(Isaiah 61:5, 6) Betive bayakwelusa imihlambi yenu, bachamuki bayawulima emasimini enu nasetivinini tenu. 6 Nine niyawubitwa ngekutsi nibaphristi baSimakadze, niyakwetsiwa emabito, kutsiwe nitikhonti taNkulunkulu wetfu. Niyawudla imfuyo yetive ngetive, nangebunjinga bato niyawutigabatisa.
‘Tihambi’ Timunye Ekukhonteni Kweliciniso
5 Ngakulolunye luhlangotsi, labanye bangase bakhulume ngencwadzi ya-Isaya sehluko 61, lenesiprofetho lesigcwaliseka ebandleni lebuKhristu. Livesi laka-6 lalesehluko likhuluma ngalabo labatawuba ‘baphristi baSimakadze.’ Bese kutsi vesi 5, akhulume ngalabo labatawuba “bachamuki” futsi labatawusita baphindze basebente ‘nalabaphristi.’ Nguyiphi indlela lokufanele siwacondze ngayo lamavesi?
6 Siyati kutsi ‘baphristi baSimakadze’ ngemaKhristu lagcotjiwe latawuhlanganyela “ekuvukeni kwekucala” futsi “bayawuba baphristi baNkulunkulu naKhristu, bayawubusa naye iminyaka leyinkhulungwane.” (Semb. 20:6) Ngetulu kwaloko, kunemaKhristu lamanyenti letsembekile lanelitsemba lekuphila emhlabeni. LamaKhristu lasebenta aphindze atihlanganise nalabo labayawuphila ezulwini, abachamuki, ngenkhulumo lengumfanekiso. Ngenjabulo, asekela aphindze asebente ‘nebaphristi baSimakadze,’ kuba shengatsi ‘balima emasimini nasetivinini.’ Basita labagcotjiwe kute baletse ludvumo kuNkulunkulu, ngekushumayela nekufundzisa labanye emaciniso. Ngako-ke, emaKhristu lagcotjiwe ‘naletinye timvu’ atfola aphindze abeluse ngelutsandvo bantfu labanetinhlitiyo leticotfo labanesifiso sekukhonta Nkulunkulu phakadze.—Joh. 10:16.
Funisisa Umcebo EVini LaNkulunkulu
(Isaiah 60:17) Ngiyawukuletsela igolide esikhundleni selitfusi, nesiliva esikhundleni sensimbi. Esikhundleni selukhuni ngiyawukuletsela litfusi, nensimbi esikhundleni sematje. Kuthula ngiyawukwenta kube ngumbusi wakho, kulunga ngikwente kube ngumholi wakho.
Yenta Imetamo Kute Utfutfukise Kuthula Kubantfu BaNkulunkulu
14 Bazalwane labanyenti lasebakhulile emabandleni etfu, batibonele ngewabo tingucuko letente luhlangotsi lolusemhlabeni lwenhlangano yaJehova kutsi lube luhle kakhulu. Basakhumbula ngesikhatsi emabandla anenceku yelibandla esikhundleni sekuba nesigungu salabadzala, ngesikhatsi emave asenenceku yeligatja esikhundleni sekuba neKomidi Yeligatja nangesikhatsi kungumengameli we-Watch Tower Society lonika ticondziso esikhundleni sekutsi kube Sigungu Lesibusako saBoFakazi BaJehova. Nanobe bonkhe labazalwane bebanebasiti labetsembekile, munye umuntfu lobekanemtfwalo wekutsatsa tincumo ebandleni, emahhovisini eligatja nasendlunkhulu yemhlaba wonkhe. Ngemuva kwa-1970, kwentiwa lushintjo kute kube tigungu talabadzala letinemtfwalo wekutsatsa tincumo kunekutsi kube ngumuntfu munye.
15 Kungani letingucuko tiyizuzisile inhlangano? Kungobe betisekelwe ekuyicondzeni kancono imiBhalo. Esikhundleni sekutsi kube ngumuntfu munye lotsatsa tonkhe tincumo, inhlangano iyazuza emakhonweni lamahle abo bonkhe bazalwane labadzala, nobe “tipho letibantfu,” lesitinikwe nguJehova.—Efesu 4:8; Taga 24:6.
16 Cabanga ngetingucuko takamuva letentiwe etincwadzini tetfu. Sijabulela kunika bantfu tincwadzi letilusito naletibakhangako emsebentini wetfu wekushumayela. Cabanga futsi nangendlela lesisebentisa ngayo tintfo takamuva tebucwepheshe kute sishumayele tindzaba letimnandzi. Sibonelo saloku kutsi i-website yetfu letsi jw.org ifinyelela kubantfu labanyenti kute batfole lusito labaludzinga sibili. Kuto tonkhe letingucuko, sibona lutsandvo lolujulile Jehova lanalo ngebantfu.
17 Siphindze sitijabulele tingucuko letentiwe emihlanganweni yelibandla kute sitewuba nesikhatsi sekukhonta kwemndeni nesekuba nesifundvo lesitichubela sona. Siyatijabulela netingucuko letentiwe eluhlelweni lwetfu lwemihlangano lemincane nalemikhulu. Letingucuko tibonakala tiba tinhle umnyaka ngemnyaka! Sibonga kakhulu nangekuceceshwa lesikutfola etikolweni letinyenti teliBhayibheli. Kuto tonkhe letingucuko, kuyacaca kutsi Jehova ucondzisa inhlangano yakhe nekutsi uyachubeka enta kuthula kubantfu bakhe kube kuhle kakhulu!
(Isaiah 61:8, 9) Ngobe mine, Simakadze, ngiyakutsandza kwehlulela ngebucotfo. Ngiyakutondza kudlelela nekona, bantfu bami ngiyawubakhokhela njengekwetsembeka kwami, ngente sivumelwane saphakadze naphakadze nabo. 9 Titukulwane tabo tiyakwatiwa emkhatsini wetive, nentalelwane yabo emkhatsini wetive. Bonkhe labababonako bayawuvuma kutsi basive lesibusiswe nguSimakadze.
w07 1/15 11 ¶5
Emaphuzu Lagcamile Encwadzi Ya-Isaya—II
Timphendvulo Temibuto YeliBhayibheli:
61:8, 9—Siyini “sivumelwane saphakadze” futsi tibobani “titukulwane”? Lesi sivumelwano lesisha Jehova lasenta nemaKhristu lagcotjiwe. “Titukulwane” ‘nguletinye timvu’—tigidzi tebantfu letilalela sigijimi sawo.—Johane 10:16.
Kufundvwa KweliBhayibheli
(Isaiah 62:1-12) Ngenca yeSiyoni nje, ngingeke ngibindze, ngenca yeJerusalema ngingete ngathula, kuze kulunga kwayo kukhanye njengekusa, nensindziso yayo ibe njengesidlwane lesivutsako. 2 Tive tiyawukubona kulunga kwakho, nawo onkhe emakhosi abone emandla akho. Uyawubitwa ngelibito lelisha leliyawubekwa ngumlomo waSimakadze. 3 Uyawuba ngumchele wenkhatimulo esandleni saSimakadze, umchele webukhosi esandleni saNkulunkulu wakho. 4 Abasayiwukubita ngekutsi unguLahliwe, nome betse live lakini batsi nguShiywayedvwa. Kodvwa uyawubitwa ngekutsi unguHefsiba, nelive lakini kutsiwe yiBhewula, ngobe Simakadze uyawujabula ngawe, nelive lakini liyakwendza kuye. 5 Njengelijaha nalishada nentfombi, kanjalo-ke nemadvodzana akho ayawushada nawe; njengemyeni nakajabula ngamakoti wakhe, kanjalo-ke naNkulunkulu wakho uyawujabula ngawe. 6 Ngibeke balindzi etibondzeni takho, Jerusalema, bangeke bathule imini nebusuku. Nine lenibita Simakadze, ningatiniki kuphumula, 7 naye ningamniketi kuphumula, adzimate ayakhe kabusha iJerusalema, ayente ibe ludvumo emhlabeni. 8 Simakadze ufunge ngesandla sakhe sekudla nangemkhono wakhe lonemandla, watsi: “Angisayiwuphindza ngephane ngekudla kwakho kutsi kube kudla kwetitsa takho, nebetive abasayiwuphindze balinatse liwayini lelisha lolishikashikanele kangaka. 9 Kodvwa labo labakuvunako bayawukudla badvumise Simakadze, nalabo lababutsa emagelebisi, liwayini bayawulinatsela etibuyeni tendlu yami lengcwele.” 10 Phumani, phumani emasangweni! Lungiselelani bantfu umgwaco! Yakhani, yakhani umgwaco lomkhulu! Susani ematje. Phakamiselani tive siboniso sekuncoba, titesibona. 11 “Lalelani la: Simakadze sewente simemetelo lesiya emikhawulweni yonkhe yemhlaba, lesitsi: “Tjela iNdvodzakati yaseSiyoni utsi: ‘Buka, nanguya uMsindzisi wakho uyeta! Bukela, umvuzo wakhe ukuye, nenkhokhelo yakhe ihamba embikwakhe.’” 12 Bayawubitwa ngekutsi Sive Lesingcwele, Labahlengiwe baSimakadze. Wena uyawubitwa ngekutsi unguLofuniwe, Lidolobha Lelingakalahlwa.
FEBRUARY 27–MARCH 5
UMCEBO LOSEVINI LANKULUNKULU | ISAYA 63-66
“Emazulu Lamasha Nemhlaba Lomusha Kutawubangela Kujabula Lokukhulu”
(Isaya 65:17) “Buka la, ngiyawudala emazulu lamasha nemhlaba lomusha. Tintfo takadzeni tingeke tikhunjulwe, futsi tingeke tisabuya nasengcondvweni.
ip-2 383 ¶23
“Jabulani Nitfokote Phakadze Naphakadze Ngaloko Lengiyawukudala”
23 Incwadzi yesembulo ichaza umbono lowabonwa ngumphostoli Johane welilanga laJehova lelitako, lokuyawususwa ngalo lesimiso setintfo. Ngemuva kwaloko, Sathane utawuphonswa emgodzini longenamkhawulo. (Sembulo 19:11–20:3) Nasakuchazile loko, Johane waphindza emavi a-Isaya lasiphrofetho, wabhala watsi: “Ngabona lizulu lelisha nemhlaba lomusha.” Emavesi lalandzelako nakalandzisa ngalombono lomangalisako akhuluma ngesikhatsi lapho Jehova Nkulunkulu ayawulungisa khona timo letimatima emhlabeni atente tibe ncono. (Sembulo 21:1, 3-5) Kuyacaca kutsi setsembiso lesabhalwa ngu-Isaya ‘semazulu lamasha nemhlaba lomusha’ siyogcwaliseka ngendlela lemangalisako emhlabeni lomusha waNkulunkulu! Ngephasi kwemazulu lamasha languhulumende, umphakatsi lomusha wasemhlabeni uyojabulela lipharadisi mbamba kanye nekuthula kubantfu baNkulunkulu. Sisidvudvuta mbamba lesetsembiso lesitsi “tintfo letindzala [kugula, kuhlupheka kanye buhlungu lobunyenti bantfu lababhekene nabo] ngeke tikhunjulwe, futsi ngeke tifike enhlitiyweni.” Nobe yini lesiyawuyikhumbula ngaleso sikhatsi ngeke isiphatse kabi nobe isivise buhlungu kakhulu lobulimata tinhlitiyo tebantfu labanyenti lamuhla.
(Isaya 65:18, 19) Kodvwa jabulani nitfokote phakadze naphakadze ngaloko lengiyawukudala, ngobe iJerusalema ngiyawuyidala ibe yintfokoto, nebantfu bayo babe yinjabulo. 19 Ngiyawutfokota ngeJerusalema, ngijabule ngebantfu bami, umsindvo wekulila newekukhala awuyiwuphindza uvakale kuyo.
ip-2 384 ¶25
“Jabulani Nitfokote Phakadze Naphakadze Ngaloko Lengiyawukudala”
25 Nalamuhla Jehova wenta liJerusalema libe ‘sizatfu sekujabula.’ Njani? Njengobe sesibonile, emazulu lamasha labakhona nga-1914 ayawugcine anebabusi labangu-144 000 labayobusa ngekubambisana, babe nguhulumende wasezulwini. Babitwa ngekwesiphrofetho ngekutsi “iJerusalema Lensha.” (Sembulo 21:2) Naku Nkulunkulu lakusho mayelana neJerusalema Lensha: “iJerusalema ngiyawuyidala ibe yintfokoto, nebantfu bayo babe yinjabulo.” Nkulunkulu uyawuletsela bantfu labalalelako tibusiso letinyenti, asebentisa iJerusalema Lensha. Umsindvo wekulila newekukhala angeke uphindze uvakale kuyo, ngobe Jehova utasipha “lokufiswa yinhlitiyo [yetfu].”—Tihlabelelo 37:3, 4.
(Isaya 65:21-23) Bantfu bayakwakha tindlu, bahlale kuto, bayawuhlanyela tivini, badle titselo tato. 22 Bangeke baphindze bakhe tindlu, bese kuhlala labanye bantfu kuto, nome bahlanyele, bese kudla labanye. Ngobe njengemalanga esihlahla ayawuba njalo-ke nemalanga ebantfu bami. Labakhetsiwe bami bayawutijabulisa sikhatsi lesidze ngemisebenti yetandla tabo. 23 Bangeke bashikanekele lite nome batale bantfwana labayawudliwa sehlakalo; ngobe bayawuba sive lesibusiswe nguSimakadze, bona kanye netitukulwane tabo.
Kuthula Kweminyaka Leyinkhulungwane Nekwaphakadze!
‘BAYAKWAKHA TINDLU FUTSI BAHLANYELE TIVINI’
4 Ngubani longeke atsandze kuba nendlu yakhe, lapho yena nemndeni wakhe bangativa bavikeleke khona? Emhlabeni lesiphila kuwo lamuhla, kutfolakala kwetindlu letenele kuyinkinga lenkhulu. Bantfu baminyetelene etindzaweni tasemadolobheni. Labanyenti bahlala etindlini letingekho esimeni lesikahle. Kuba nendlu letsi wena, kuliphupho kubo.
5 Nasekubusa uMbuso waNkulunkulu emhlabeni, sifiso setfu sekuba netindlu lesititsandzako siyofezeka, ngobe kwaphrofethwa nga-Isaya kutsi: “Bantfu bayakwakha tindlu, bahlale kuto, bayawuhlanyela tivini, badle titselo tato.” (Isa. 65:21) Nobe kunjalo, akusho kutsi sibuke nje kuphela kuba netindlu letinhle. Labanye lamuhla bahlala etindlini tabo, futsi kukhona nalabahlala etindlini takanokusho. Nobe kunjalo, bahlala bakhatsateke ngekutsi angeke bakhone kutibhadala nangekutsi tigebengu tingagcekeza. Nasekubusa uMbuso waNkulunkulu bantfu angeke bakhatsateke ngako konkhe loko. Umphrofethi Mikha wabhala: “Bantfu bayawuhlala ngekuthula ngulowo nalowo esivinini sakhe nasemikhiweni yakhe, kubete lobesabisako.”—Mik. 4:4.
Funisisa Umcebo Evini LaNkulunkulu
(Isaya 63:5) Ngabuka, kodvwa kwabate namunye labengasita. Ngamangala kakhulu kutsi kubete lowelekelelako, ngako umkhono wami wangentela insindziso yami, nelulaka lwami lwangisekela.
w07 1/15 11 ¶6
Emaphuzu Lagcamile Encwadzi Ya-Isaya—II
63:5—Kumsita ngani Nkulunkulu kuba nelulaka? Lulaka lwaNkulunkulu luyalawuleka—utfukutsela ngendlela lelungile. Intfukutselo yakhe iyamsita futsi imshukumisela kutsi akhiphe tehlulelo takhe letilungile.
(Isaya 64:8) Noko, wena Simakadze, unguBabe wetfu. Tsine silibumba, wena ungumbumbi, sonkhe singumsebenti wetandla takho.
Vumela Seluleko SaJehova Sikubumbe
INDLELA UMBUMBI LASEBENTISA NGAYO EMANDLA AKHE
3 Umbhalo wa-Isaya 64:8 uchaza emandla Jehova lanawo kubantfu netive ngendlela lengumfanekiso, utsi: “Wena Simakadze, unguBabe wetfu. Tsine silibumba, wena ungumbumbi, sonkhe singumsebenti wetandla takho.” Umbumbi unawo onkhe emandla ekubumba lubumba lube ngunobe ngusiphi sitja lasifunako. Lolubumba lute emandla ekutikhetsela kulendzaba. Kunjalo nangebantfu naNkulunkulu. Umuntfu angeke aphikisane naNkulunkulu njengobe nelubumba lungeke luphikise umbumbi lolubumbako.—Fundza Jeremiya 18:1-6.
4 Jehova wakhombisa kuma-Israyeli asendvulo likhono lakhe lekwenta lokwentiwa ngumbumbi. Kodvwa kunemehluko lomkhulu. Umbumbi angenta nobe ngusiphi sitja lakhona kusenta ngelubumba. Jehova ubabumba ngekukhetsa yini bantfu nobe tive, ente labanye babe kahle futsi labanye babe babi? Imphendvulo leseBhayibhelini ingucha. Jehova unike bantfu sipho lesiligugu—sipho sekutikhetsela. Akawasebentisi emandla akhe ekubusa ngendlela letawenta lesipho sakhe singasasebenti. Bantfu kufanele bakhetse kubunjwa nguMdali, longuJehova.—Fundza Jeremiya 18:7-10.
5 Kutsiwani-ke nangabe bantfu bala ngenkhani kubunjwa nguMbumbi Lomkhulu? Kuleso simo, Nkulunkulu uwasebentisa njani emandla akhe? Cabanga ngaloko lokwenteka ngelubumba nangabe lungasakulungeli kusetjentiselwa injongo yalo. Umbumbi angavele ente lolunye luhlobo lwesitja nobe alulahle. Nobe kunjalo, nangabe lolubumba lungasasebenti, ngalokuvamile liphutsa lisuke likumbumbi. Akusinjalo ngeMbumbi wetfu. (Dut. 32:4) Nangabe umuntfu angavumi kubunjwa nguJehova, liphutsa liba kuloyo muntfu. Jehova usebentisa emandla akhe lafana newembumbi ngekuphatsa bantfu ngekuvumelana nendlela labakusebentisa ngayo kubumba kwakhe. Labo labakusebentisa kahle babunjwa ngendlela lezuzisako. Nasi sibonelo: EmaKhristu lagcotjiwe ‘atitja temusa’ letibunjwe taba ‘titja teludvumo, letisetjentiswa ngetikhatsi letitsite.’ Ngakulolunye luhlangotsi, labo labaphikisa Nkulunkulu ngenkhani bagcine ‘batitja telulaka lwakhe letimiselwe kubhujiswa.’—Rom. 9:19-23.
Kufundvwa KweliBhayibheli
(Isaya 63:1-10) Ngubani lona lochamuka ka-Edomu, lobuya eBhosra, lonetingubo letibhocwe ngalokubovu njengengati? Ngubani yena lona, lowembetse umjiva webukhosi lokhatimulako, lohamba acanase ngebukhulu bemandla akhe? “Ngimi, lengikhuluma ngekulunga, lonemandla ekusindzisa.” 2 Tentiwa yini tingubo takho kutsi tibe bovu njengetemuntfu lobekahluta emagelebisi? 3 “Nginyatsele sikhamo seliwayini ngingedvwa; kuto tonkhe tive kute namunye labekanye nami. Ngibagcobagcobile ngentfukutselo yami, ngabapitjita ngelulaka lwami. Ingati yabo yasaphatela tembatfo tami; ngatingcolisa tonkhe timphahla tami. 4 Ngobe lilanga lekuphindzisela belisenhlitiyweni yami; nemnyaka wekuhlenga labangebami sewufikile. 5 Ngabuka, kodvwa kwabate namunye labengasita. Ngamangala kakhulu kutsi kubete lowelekelelako, ngako umkhono wami wangentela insindziso yami, nelulaka lwami lwangisekela. 6 Ngagcobagcoba tive ngentfukutselo yami; ngelulaka lwami ngatenta tadzakwa, ngatfululela ingati yato emhlabatsini.” 7 Ngiyawukhuluma ngebukhulu bemusa waSimakadze, ngibonge tento takhe lekufanele advunyiselwe tona, ngidvumise konkhe loko Simakadze lasentele kona, yebo, tintfo letinyenti letinhle latentele indlu yaka-Israyeli, ngesihawu sakhe nangemusa wakhe lomkhulukati. 8 Watsi: “Ngempela, basive sami, emadvodzana langeke angiyenge;” ngaloko-ke waba nguMsindzisi wabo. 9 Kuko konkhe kukhatsateka kwabo naye abekhatsatekile, ingilosi yebukhona bakhe yabasindzisa, ngelutsandvo lwakhe nangemusa wakhe wabahlenga. Wabatsatsa wabetfwala kuwo onkhe emalanga akadzeni. 10 Noko, bamhlubuka, badzabukisa Moya wakhe Longcwele. Ngako-ke wagucuka waba sitsa sabo, yena cobo lwakhe walwa nabo.