Kuphela Kwalelive Kutawufika Nini? Lokwashiwo NguJesu

CABANGA NGEMISHO LEMIBILI LEYASHIWO NGUJESU NGEKUPHELA KWALELIVE:

“Hlalani nilindzile ngobe anilati lilanga nobe li-awa.”​—MATEWU 25:13.

“Hlalani nicaphele futsi nihlale nilindzile, ngobe anati kutsi sinini sikhatsi lesibekiwe.”​—MAKHO 13:33.

Ngako kute umuntfu emhlabeni lowati ngalokucondzile kutsi lelive lelibi litawuphela nini. Nobe kunjalo, Nkulunkulu ‘ubeke sikhatsi,’ ‘lilanga neli-awa’ lelicondzile lekuphela kwalelive. (Matewu 24:36) Loku kusho kutsi kute yini indlela yekwati kutsi kuphela kwalelive sekusondzele? Chake. Jesu watjela bafundzi bakhe kutsi babuke tintfo lebetitawukwenteka lebetitawukhombisa kutsi kuphela sekusedvute.

LOKO JESU LATSI SITAWUBONA NGAKO

Letentakalo titawuba luphawu ‘lwekuphela kwalelive.’ Jesu watsi: “Sive sitawuvukela lesinye sive, nembuso uvukele lomunye umbuso, futsi kutawuba khona indlala nekutamatama kwemhlaba etindzaweni letehlukahlukene.” (Matewu 24:3, 7) Waphindze watsi kutawuba ‘netifo letingumshayabhuce.’ (Lukha 21:11) Uyatibona yini letentakalo Jesu laphrofetha ngato?

Bantfu lamuhla bayahlupheka ngenca yetimphi, indlala, kutamatama kwemhlaba kanye netifo letehlukahlukene. Sibonelo nje, nga-2004, kutamatama kwemhlaba lokwenteka e-Indian Ocean kwabangela itsunami leyabulala bantfu labangaba ngu-225 000. Ngeminyaka nje lemitsatfu, sifo se-COVID-19 sibulele bantfu labangaba ngu-6.9 million emhlabeni wonkhe. Jesu watsi loku bekutawukhombisa kutsi kuphela kwalelive sekusedvute.

‘EMALANGA EKUGCINA’

LiBhayibheli lichaza sikhatsi lesingaphambi kwekutsi kuphela kufike ngekutsi ‘ngemalanga ekugcina.’ (2 Phetro 3:3, 4) 2 KuThimothi 3:1-5 utsi, emalanga ekugcina atawubonakala ngekwandza kwebantfu labatiphatsa kabi. (Buka libhokisi lelitsi “Ngaphambi Nje Kwekutsi Kuphela Kwalelive Kufike.”) Uyababona yini lamuhla bantfu labaticabangela bona, labangenetiseki, labanebudlova kanye nalabete lutsandvo? Naloku kubufakazi bekutsi siphila dvutane nekuphela kwalelive.

Atawutsatsa sikhatsi lesidze kangakanani emalanga ekugcina? Ngekusho kweliBhayibheli, atawutsatsa ‘sikhatsi lesincane.’ Ngemuva kwaloko, Nkulunkulu utawubhubhusa “labo labalimata umhlaba.”—Sembulo 11:15-18, umbhalo longentasi; 12:12.

UMHLABA LOLIPHARADISI SEWUSEDVUTANE!

Nkulunkulu sewuvele ulibekile lilanga nesikhatsi sekucedza lelive lelibi. (Matewu 24:36) Kunaletinye tindzaba letimnandzi, Nkulunkulu “akafisi kutsi kubhubhe ngisho namunye.” (2 Phetro 3:9) Usiniketa litfuba lekufundza ngentsandvo yakhe nekumlalela. Leni? Kungobe ufuna sisindze nakuphela lelive lelibi futsi siphile eveni lelisha, lapho umhlaba sewulipharadisi.

Nkulunkulu uhlele umsebenti wekufundzisa lowentiwa emhlabeni wonkhe kuze asite bantfu bafundze indlela yekuba yincenye yemhlaba lomusha ngaphansi kweMbuso wakhe. Jesu watsi letindzaba letimnandzi letimayelana neMbuso waNkulunkulu titawushunyayelwa “emhlabeni wonkhe.” (Matewu 24:14) BoFakaza BaJehova emhlabeni wonkhe bacitsa tigidzigidzi tema-awa bashumayela futsi bafundzisa bantfu ngemlayeto loseBhayibhelini loniketa litsemba. Jesu watsi lomsebenti wekushumayela bewutawukwentiwa emhlabeni wonkhe ngaphambi kwekutsi kufike kuphela.

Sekusedvute kutsi sikhatsi sekubusa kwebantfu siphele, kodvwa tindzaba letimnandzi tikutsi ungasindza nakuphela lelive futsi ube yincenye yemhlaba loliPharadisi Nkulunkulu lasetsembe wona. Sihloko lesilandzelako sitawuchaza kutsi yini longayenta kuze uphile kulelive lelisha.