Yini Longayenta Kuze Uphile Eveni Lelisha?

Tihloko lesisuka kuto tikhombisile kutsi madvutane Nkulunkulu utawucedza lelive lelibi nato tonkhe tinkinga talo. Singaciniseka kutsi loku kutawukwenteka. Leni? Ngobe liVi laNkulunkulu liBhayibheli letsembisile:

“Live liyendlula.”—1 JOHANE 2:17.

Singaciniseka kutsi bakhona labatawusindza ngobe lelivesi leliBhayibheli lelingenhla liyetsembisa:

“Loyo lowenta intsandvo yaNkulunkulu uhlala kuze kube phakadze.”

Ngako-ke, nasifuna kusindza kufanele sente intsandvo yaNkulunkulu. Kuze sitfole kutsi iyini intsandvo yaNkulunkulu, kufanele sicale ngekumati.

SINDZA NAKUPHELA LELIVE NGEKUTSI ‘WATI’ NKULUNKULU

Titfombe: 1. Nesi usesibhedlela uhleti phansi, udziniwe futsi ucindzetelekile. 2. Utsatsa likhefu endzaweni yekudlela futsi ubona lomunye lasebenta naye ujabulile ufundza magazini. 3. Lona lasebenta naye umfundzela livesi eBhayibhelini bese umniketa likhadi lekungena ku-jw.org.

Jesu watsi: “Kukwati wena lokuphela kwaNkulunkulu weliciniso . . . kuholela ekuphileni lokuphakadze.” (Johane 17:3) Kuze sisindze nakuphela lelive futsi siphile phakadze, kudzingeka ‘sati’ Nkulunkulu. Loku kusho lokungetulu nje kwekumane sikholelwe kutsi Nkulunkulu ukhona nobe kwati emaciniso lambalwa ngaye. Kufanele sibe bangani bakhe. Kuze bungani betfu nalomunye umuntfu bucine, kufanele sicitse sikhatsi naye. Kufanele sente lokufanako nasebunganini betfu naNkulunkulu. Cabanga ngemaciniso labalulekile lesiwafundza eBhayibhelini lasisita kutsi sakhe siphindze sigcine buhlobo betfu naNkulunkulu bucinile.

Emaciniso Lesiwafundza EBhayibhelini

Sifundza kutsi Nkulunkulu bekafuna siphile ePharadisi.

Wadala bantfu bekucala, bo-Adamu na-Eva, wababeka endzaweni lenhle lebitwa ngekutsi yingadze yase-Edeni. Bebete sono futsi Nkulunkulu bekabanikete yonkhe intfo lebebayidzinga kuze bajabulele kuphila. Bebatawuphila phakadze kube bachubeka babangani baNkulunkulu. Kunaloko, bakhetsa kungawulaleli umyalo lomelula Nkulunkulu lebekabanikete wona.

Siyafundza kutsi kungani sihlupheka.

Ngekungamlaleli Nkulunkulu, umuntfu wekucala Adamu, walahla litfuba lekutsi aphile phakadze yena kanye nabo bonkhe bantfu. LiBhayibheli litsi: “Ngako sono sangena ngemuntfu munye eveni, nekufa kwangena ngesono, ngenca yaloko kufa kwasakatekela kubo bonkhe bantfu ngobe bonkhe bonile.” (KubaseRoma 5:12) Njengalapho umuntfu angatfola sifo njengelifa kubatali bakhe, kanjalo-ke, nabo bonkhe bantfwana ba-Adamu batfola sono njengelifa kuye. Ngenca yaloko siyaguga futsi sife.

Sifundza ngaloko Nkulunkulu lakwentile kuze asisite.

LiBhayibheli litsi: “Nkulunkulu walitsandza kakhulu live kangangekutsi waze wanikela ngeNdvodzana yakhe lekuphela kwayo, kuze wonkhe umuntfu lokholwa ngiyo angabhubhi, kodvwa atfole kuphila lokuphakadze.” (Johane 3:16) Nkulunkulu watfumela Jesu emhlabeni kuze atonikela ngekuphila kwakhe ngenca yetfu. Prabhakar, indvodza leneminyaka lengu-86 yase-India, nakakhuluma ngalolutsandvo utsi: “Lesento saJehovaa selutsandvo sikhombisa kutsi ungitsandza kakhulu kangakanani. Indlela langitsandza ngayo inginiketa litsemba lekuphila phakadze.”

Sifundza indlela lesingabonga ngayo ngaloko Nkulunkulu lasentele kona.

LiBhayibheli litsi singakhombisa kubonga ngaloko Nkulunkulu lasentele kona ngekutsi “sigcine imiyalo yakhe.” (1 Johane 2:3) Ngelutsandvo, Jehova Nkulunkulu usikhombisa loko lesingakwenta kuze sikujabulele kuphila kwamanje. (Isaya 48:17, 18, umbhalo longentasi) Nkulunkulu akafuni sihlupheke. Wetsembisa kutsi nasilandzela ticondziso takhe angeke sigcine ngekujabulela kuphila manje kuphela kodvwa sitawuba nelitfuba lekuphila phakadze.

FUNDZA LIVI LANKULUNKULU, LIBHAYIBHELI ONKHE MALANGA

Lonesi ubuka ezulwini ngemuva kwekufundza liBhayibheli ngesikhatsi sakhe selikhefu ngaphandle. — Ungasindza nakuphela lelive ngekutsi uthantaze kuNkulunkulu umcele akusite uphindze wente intsandvo yakhe

Sidla ngaso sonkhe sikhatsi kuze sichubeke siphila. Jesu watsi: “Umuntfu ngeke aphile ngesinkhwa sodvwa, kodvwa uphila ngawo onkhe emavi laphuma emlonyeni waJehova.”—Matewu 4:4.

Lamuhla emavi aJehova siwatfola eBhayibhelini. Njengobe utadisha lencwadzi lengcwele, utawutfola emaciniso labalulekile ngaloko Nkulunkulu lakwenta esikhatsini lesendlulile, lakwentako manje, naloko latokwenta esikhatsini lesitako.

THANTAZA KUNKULUNKULU UCELE LUSITO

Yini longayenta nawufuna kulandzela ticondziso taNkulunkulu kodvwa ukutfola kumatima kuyekela tintfo latsi timbi? Kulesimo, kwati Nkulunkulu kahle kungakusita.

Cabanga ngalomunye wesifazane lesitambita ngekutsi nguSakura, lebekaphila imphilo yebugwadla. Nakacala kutadisha liBhayibheli, wafundza ngemyalo waNkulunkulu ‘wekubalekela bugwadla.’ (1 KubaseKhorinte 6:18) Sakura wathantaza kuNkulunkulu wacela emandla ekuyekela lomkhuba lomubi futsi wakhona kuwuyekela. Nobe kunjalo, kusadzingeka alwe netilingo. Utsi: “Imicabango lemibi nayifika, ngithantaza kuJehova ngalokusuka enhlitiyweni ngobe ngiyati kutsi angeke ngikhone kutilwela. Emandla lengiwatfola ngekuthantaza angente ngasondzela kakhulu kuJehova.” NjengaSakura, tigidzi tebantfu tifundza ngaNkulunkulu. Utiniketa emandla kuze tishintje kuphila kwato futsi tiphile ngendlela lemjabulisako.—KubaseFiliphi 4:13.

Njengobe uchubeka umati Nkulunkulu, nawe ‘utakwatiwa nguye’ njengemngani losedvute. (KubaseGalathiya 4:9; Tihlabelelo 25:14) Ngaleyondlela, utawufanelekela kusindza futsi ungene eveni lelisha laNkulunkulu. Litawuba njani lelive lelisha? Sihloko lesilandzelako sitawuchaza.

a Jehova ligama laNkulunkulu njengobe livetwa eBhayibhelini.