I-Shroud Yase-Turin Yindvwangu Langcwatjwa Ngayo Yini Jesu?

Lokushiwo liBhayibheli

LiBhayibheli alikhulumi nge-Shroud yase-Turin. Le-Shroud yindvwangu bantfu labanyenti labacabanga kutsi yasetjentiswa nakungcwatjwa Jesu khristu. Ngenca yaleyonkholelo, labanye bantfu bacabanga kutsi lendvwangu itsatfwa njengentfo lengcwele ngulamanye emaKhristu. Lendvwangu i-shroud, igcinwe endzaweni lephephile eSontfweni lemaRoma eTurin, lese-Italy.

Kulandzisa lokuseBhayibhelini kuyavuma yini kutsi lendvwangu i-Shroud yase-Turin ngiyo mbamba lena lokwangcwatjwa Jesu ngayo? Chake, akuvumi.

Naka tintfo letintsatfu letenta lendvwangu yehluke kuloko lokushiwo liBhayibheli.

1. I-shroud yindvwangu lengu-442 centimeters budze, na-113 centimeters bubanti (14 ft 6 in. by 3 ft 8 in.) kuphindze kube nesicephu lesingu-8-centimeters (3 in.) lesitfungelwe kulendvwangu.

   Lokushiwo liBhayibheli: Sidvumbu saJesu besigocwe ngetindvwangu letinyenti, hhayi yinye. Inhloko yakhe beyigocwe ngendvwangu leyehlukile. Ngemuva kwekuvuswa kwaJesu, lomunye webaphostoli bakhe wefika ethuneni lelinganamuntfu futsi “watfola letindvwangu telineni tiphansi.” LiBhayibheli liphindze litsi: “Indvwangu lebeyisenhloko yaJesu beyingekho kuleti letinye tindvwangu, kodvwa beyigocwe yodvwa.”—Johane 20:6, 7.

2. Lendvwangu inemabala engati lokucatjangwa kutsi abewesidvumbu lesingakagezwa.

   Lokushiwo liBhayibheli: Ngesikhatsi Jesu afa, bafundzi bakhe balungisa sidvumbu sakhe ngendlela ‘emaJuda abevamise kwenta ngayo nakalungiselela tidvumbu kutsi tiyewungcwatjwa.’ (Johane 19:39-42) Lelisiko belihlanganisa kugeza sidvumbu, kusigcobisa emafutsa kanye nekusifaka emakha ngaphambi kwekusingcwaba. (Matewu 26:12; Imisebenti 9:37) Ngako-ke, kunengcondvo kutsi bafundzi baJesu bageza sidvumbu sakhe ngaphambi kwekusigocota ngetindvwangu.

3. I-Encyclopædia Britannica itsi lendvwangu inesitfombe sendvodza “lelaliswe kuhhafu walendvwangu, kwase kutsi lelenye ihhafu yambonya inhloko nemtimba wonkhe.”

   Lokushiwo liBhayibheli: Bafundzi baJesu bacoca ngekufa kwakhe, ngelithuna lakhe lebelite lutfo, kanye nangebufakazi bebafati ‘lababona tingilosi, letabatjela kutsi uyaphila.’ (Lukha 24:15-24) Kube lendvwangu beyikhona ethuneni laJesu, bafundzi bakhe bebatawucoca nangayo kanye netitfombe letikuyo. LiBhayibheli alisho lutfo ngaleyondzaba.

Kufanele yini kutsi i-Shroud itsatfwe njengentfo lengcwele?

Cha. Ngisho nome ngabe lendvwangu ngiyo beyigocotele Jesu, kuyikhonta kuliphutsa. Ake sicoce nganati timiso teliBhayibheli letichaza kutsi kungani kungaba liphutsa kuyikhonta.

1. Asikho sidzingo. Jesu watsi: “Nkulunkulu unguMoya, nalabo labamkhontako kufanele bamkhonte ngemoya nangeliciniso.” (Johane 4:24) Kukhonta kweliciniso akufaki ekhatsi kukhonta titfombe.

2. Akukavumeleki. IMitsetfo Lelishumi iyakulahla kukhonta titfombe. (Dutheronomi 5:6-10) Ngendlela lefanako, liBhayibheli linika emaKhristu umyalo lotsi: “Tibalekeleni titfombe.” (1 Johane 5:21) Labanye bangatitsetselela ngekutsi lendvwangu ayisiso sithico kodvwa iluphawu lwenkholo yabo. Nome kunjalo, luphawu lolutsite lungaba sithico kumuntfu lolutsatsa njengentfo lengcwele.a Ngako-ke, umuntfu lofuna kujabulisa Nkulunkulu akukafanele akhonte aphindze ahloniphe nome ngabe ngusiphi sitfombe lokufaka ekhatsi i-shroud.