Ngemuva KwaZamcolo Kuya Ekukhululweni EGibhithe

Basiphohlongo nje kuphela bantfu labasindza kuZamcolo, kepha njengoba sikhatsi sichubeka bandza baba tinkhulungwane letinyenti. Kwendlula iminyaka lengu-352 ngemuva kwaZamcolo, Abrahama wabese uyatalwa. Sitawufundza ngendlela Nkulunkulu lasigcina ngayo setsembiso sakhe ngekuniketa Abrahama indvodzana layetsa watsi ngu-Isaka. Nkulunkulu wakhetsa Jakobe kubantfwana ba-Isaka lababili.

Jakobe abenemndeni lomkhulu, abenemadvodzana langu-12 nemadvodzakati lamanyenti. Emadvodzana akhe langu-10 abemenyanya umnakabo lomncane Josefa, futsi amtsengisa eGibhithe kutsi ayoba sigcili. Ngekuhamba kwesikhatsi Josefa waba ngumbusi lobalulekile eGibhithe. Kwatsi nakufika indlala lenkhulu, Josefa wavivinya bomnakabo kute abone kutsi sebashintjile yini. Wonkhe umndeni waJakobe longema-Israyeli ekugcineni watfutsela eGibhithe. Loku kwenteka ngemuva kweminyaka lengu-290 Abrahama atelwe.

Ema-Israyeli ahlala eGibhithe iminyaka lengu-215. Ngemuva kwekufa kwaJosefa, abatigcili taseGibhithe. Ngekuhamba kwesikhatsi Mosi watalwa, futsi Nkulunkulu wamsebentisa kutsi akhulule ema-Israyeli eGibhithe. Seyiyonkhe iminyaka yemlandvo lehlanganisiwe Encenyeni YESIBILI, ingu-857.