Liyini Litsemba Ngalabatsandzekako Labafile?
Indvodza lenguJobe yabuta lombuto: “Nangabe umuntfu afa, uyawuphindze aphile yini?” (Jobe 14:14) Kusenekwenteka nawe uke wacabanga ngaloku. Ungativa kanjani nawungati kutsi ungaphindze uhlangane nalabatsandzekako labebafile, khona lapha emhlabeni ngaphasi kwetimo letincono kakhulu?
LiBhayibheli liyetsembisa: “Kodvwa labafile bakho bayawuphila; imitimba yabo iyawuvuka.” Liphindze litsi: “Labalungile bayawudla lifa lemhlaba, bahlale kulo kuze kube phakadze.”—Isaya 26:19; Tihlabelelo 37:29.
Kute sitetsembe letetsembiso, kufanele siphendvule leminye yemibuto lesisekelo, lefanana nalena: Kungani bantfu bafa? Bakuphi labafile? Yini lengasenta siciniseke kutsi labafile bangaphindze baphile?
Kufa, Naloko Lokwentekako Nasifa
LiBhayibheli likwenta kucace kutsi kwakungesiyo injongo yaNkulunkulu yasekucaleni kutsi bantfu bafe. Wadala bantfu bekucala bo-Adamu na-Eva, wababeka endzaweni lenhle lelipharadisi lebeyibitwa ngekutsi i-Edeni. Wabaniketa umyalo wekutsi batale bantfwana futsi banwebele likhaya labo leliyiPharadisi emhlabeni wonkhe. Bebatawufa kuphela nje nabangawulaleli umtsetfo waNkulunkulu.—Genesisi 1:28; 2:15-17.
Ngenca yekungawatisi umusa waNkulunkulu, bo-Adamu na-Eva abalalelanga futsi loko kwaphumela ekutseni bajeziswe. Nkulunkulu watsi ku-Adamu ‘utawubuyela emhlabatsini, ngobe vele watsatfwa kuwo; njengobe ulutfuli, uyawubuyela elutfulini.’ (Genesisi 3:19) Ngembi kwekuba Adamu adalwe, abengekho. Ngenca yekungalaleli kwakhe, Adamu wagwetjelwa kufa wabuyela elutfulini.
Kufa kumane kusho kungaphili. LiBhayibheli liveta lomehluko: “Inkhokhelo yesono kufa; kodvwa sipho semusa saNkulunkulu sikuphila lokuphakadze.” (Roma 6:23) LiBhayibheli lapha likhombisa kutsi kufa kusho kungabi khona ngalokuphelele, lize liphindze litsi: “Labaphilako bayati kutsi batakufa, kodvwa labafile abati lutfo” (Umshumayeli 9:5) Ngalesikhatsi umuntfu afa, liBhayibheli litsi: “Umoya wakhe uyaphuma, yena abuyele emhlabatsini; ngalelolanga imicabango yakhe iyaphela.”—Tihlabelelo 146:3, 4, NW.
Nobe kunjalo, njengobe kubo-Adamu na-Eva labephula umyalo waNkulunkulu e-Edeni, pho kungani sonkhe sesifa? Kungenca yekutsi sonkhe satalwa ngemuva kwekuba Adamu sekonile, ngako sonkhe satfola sono nekufa kuye. Njengobe liBhayibheli lisho: “Sono sangena ngemuntfu munye [Adamu] emhlabeni, sangena nekufa, kufa kwase kwendlulela kubo bonkhe bantfu.”—Roma 5:12; Jobe 14:4.
Mhlawumbe lomunye angase abute: ‘Kantsi tsine site yini umphefumulo longafi losindzako lapho sifa?’ Labanyenti bafundzisa loko, baze batsi kufa kuyindlela yekwendlulela kulokunye kuphila. Noko-ke, loko akufundziswa liBhayibheli. Kunaloko, liVi laNkulunkulu lifundzisa kutsi wena ngekwakho ungumphefumulo, nato tonkhe timfanelo takho tekuphila. (Genesisi 2:7; Jeremiya 2:34; Taga 2:10) LiBhayibheli liphindze litsi: “Lowo lobuyise soni ekwedukeni kwaso, uyawusindzisa umphefumulo waso ekufeni.” (Jakobe 5:20) Kute lapho liBhayibheli lifundzisa khona kutsi umuntfu unemphefumulo longafi losindzako lapho kufa umtimba.
Indlela Bantfu Labangaphindze Baphile ngayo
Ngemuva kwekuba sono nekufa kungenile eveni, Nkulunkulu watsi injongo yakhe kutsi labafile baphindze baphile ngelilungiselelo leluvuko. LiBhayibheli litsi “Abrahama wabona kutsi Nkulunkulu unemandla ekuvusa [indvodzana yakhe Isaka] . . . ngisho kulabafile.” (Hebheru 11:17-19) Litsemba la-Abrahama lalingakasekelwa eteni, ngobe naku liBhayibheli lelikushoko ngaSomandla: “UnguNkulunkulu walabaphilako, hhayi walabafile; ngobe bonkhe bayaphila kuye.”—Lukha 20:37, 38.
Nkulunkulu Somandla hhayi nje kutsi unemandla ekuvusa labo labakhetsile, kodvwa uphindze abe nesifiso sekwenta loko. Jesu Khristu watsi: ‘Kunganimangalisi loko, ngobe sikhatsi siyeta lapho bonkhe bantfu labasematfuneni bayawuliva livi layo futsi bavuke.’—Johane 5:28, 29; Imisebenti 24:15.
Kungakendluli nesikhatsi lesinganani ashito loku, Jesu wahlangana nesicumbi sebantfu siya emngcwabeni siphuma edolobheni laka-Israyeli iNayini. Lendvodzana leyayifile beyiyemfelokati futsi kukuphela kwayo kuye. Nakabona lolusizi lolungaka, Jesu wafikelwa sihawu. Ngako, watsintsa loluhlaka lolwalunalesidvumbu, watsi: “Ngitsi kuwe: Vuka, jaha!” Lelijaha lavuka lahlala ngetibunu, Jesu wase ulinika unina.—Lukha 7:11-17.
Njengobe kwenteka kulomfelokati, kwaphindze kwaba nenjabulo lekhulu ngalesikhatsi Jesu avakashele umuti waJayiru, siphatsimandla selisinagoge. Indvodzakati yaso leneminyaka lengu-12 budzala yayifile. Nakefika emtini waJayiru, Jesu waya kulomntfwana lofile watsi: “Ntfombatane! Vuka!” Yavuka!—Lukha 8:40-56.
Kwatsi kamuva umngani waJesu, Lazaro wafa. Jesu nakefika lapho abehlala khona Lazaro, wakhandza kutsi sekuphele emalanga lamane afile. Nakuba dzadzewaboLazaro Mata abelusizi, wakhombisa kuba nelitsemba ngekutsi atsi: “Ngiyati kutsi uyawuvuka aphile, nasekuvukwa ngemhla wekuphela.” Kodvwa Jesu waya ethuneni wefike watsi akususwe lelitje lelalimbhonye emnyango, wamemeta watsi: “Lazaro! Phuma!” Waphuma!—Johane 11:11-44.
Cabanga ngaloku: Sasinjani simo saLazaro kulamalanga lamane afile? Nasavusiwe, Lazaro akazange asho lutfo ngenjabulo layitfole ezulwini nobe ngekuhlushwa esihogweni semlilo. Kuliciniso kutsi kunye kwaloku lokubili abetawukhuluma ngako kube abebuya kuko. Lazaro abefile ngalokuphelele futsi abetawuchubeka asethuneni kuze kufike ‘umhla wekuphela’ kube nje Jesu akazange amvuse ngaleso sikhatsi.
Kuliciniso kutsi letimangaliso taJesu tatitesikhashana njengobe labo labavusa baphindze bafa. Nobe kunjalo, waniketa bufakazi eminyakeni lengetulu kwalengu-1 900 leyendlulile bekutsi ngemandla aNkulunkulu, labo labafile bangaphindze baphile. Ngetimangaliso takhe Jesu wakhombisa loko lokuyowenteka ngaphasi kweMbuso waNkulunkulu.
Lapho Umuntfu Lomtsandzako Afa
Lapho kufa kuhlasela futsi kubulala lotsite lomtsandzako, lusizi loba nalo luba lukhulu nome unalo litsemba leluvuko. Abrahama abekholwa kutsi umfati wakhe utawuphindze aphile, kodvwa sifundza kutsi, “Abrahama wakhalela umkakhe, Sara.” (Genesisi 23:2) Kutsiwani ngaJesu? Nakufa Lazaro, “wabibitseka, wadzabuka kakhulu,” ngemuva kwaloko “wakhala tinyembeti.” (Johane 11:33, 35) Ngako-ke, lapho lotsite lomtsandzako afa, usuke ungakhombisi kutsi ubutsakatsaka ngekukhala.
Nakufa umntfwana, make wakhe uva buhlungu kakhulu. LiBhayibheli liyavuma kutsi make angativa aselusizini lolukhulu ngenca yekushonelwa. (2 Emakhosi 4:27) Kuba simo lesifanako nakubabe loshonelwe ngumntfwana wakhe, naye uba selusizini. INkhosi Davide lapho ifelwa indvodzana yayo Absalomu yatsi: “Kube kufane kwafa mine esikhundleni sakho!”—2 Samuweli 18:33.
Nobe kunjalo, njengobe unelitsemba eluvukweni, lusizi loba nalo angeke luchubeke siphelwane. LiBhayibheli litsi angeke ‘udzabuke njengalabo labete litsemba.’ (1 Thesalonika 4:13) Kunaloko, utawusondzela kuNkulunkulu ngemthandazo, futsi liBhayibheli litsembisa kutsi “yena uyawukusimisa.”—Tihlabelelo 55:22.
Yonkhe imiBhalo icashunwe eBhayibhelini lesiSwati. Kepha nangabe kuvele NW, isuke icashunwe ku-New World Translation of the Holy Scriptures.