SEHLUKO 6
Siya Kuphi Nasifa?
1-3. Ngumiphi imibuto bantfu labatibuta yona ngekufa futsi letinye tinkholo tiyiphendvula njani?
LIBHAYIBHELI lisetsembisa kutsi esikhatsini lesitako “kufa ngeke kusaba khona.” (Sembulo 21:4) KuSehluko 5, sifundze kutsi ngenhlawulo singakutfola kuphila lokuphakadze. Nanobe kunjalo, bantfu solo bayafa. (Umshumayeli 9:5) Lomunye umbuto lobalulekile lesitibuta wona ngulotsi: ‘Kwentekani kitsi nasifa?’
2 Imphendvulo yalowo mbuto ibalulekile ikakhulukati nasifelwe. Singase sitibute kutsi: ‘Uyephi? Uyasibona yini? Angasisita yini? Sitawuphindze simbone yini?’
3 Tinkholo tiyiphendvula ngetindlela letehlukehlukene lemibuto. Letinye tinkholo tifundzisa kutsi nawulungile utakuya ezulwini, kantsi nawenta tintfo letimbi utawushiswa esihogweni. Labanye batsi nasewufile uba ngumoya bese uphila netihlobo takho lesetashona. Labanye baphindze batsi nasewufile, futsi sewehlulelwe, utalwa kabusha ube ngulomunye umuntfu noma mhlawumbe ube silwane.
4. Ngumuphi umcondvo lofundziswa tinkholo ngekufa?
4 Tinkholo tifundzisa tintfo letingafani. Kepha cishe tonkhe tifundzisa umcondvo munye. Tifundzisa kutsi kunencenye lechubeka iphila kumuntfu nakafa. Kuliciniso yini loko?
SIYA KUPHI NASIFA?
5, 6. Kwentekani kitsi nasifa?
5 Jehova uyati kutsi kwentekani kitsi nasifa, futsi uyasifundzisa kutsi umuntfu nakafa kusuke sekuphelile ngaye. Loku kusho kutsi nawufile usuke ungaphili. Umuntfu nakafa imiva nemicabango yakhe akuchubeki kusebenta.a Nasesifile asiboni, asiva futsi asicabangi.
6 INkhosi Solomoni yabhala yatsi: “Labafile abati lutfo.” Labafile bete lutsandvo nobe inzondo futsi “kute kusebenta, nekucabanga, nelwati kanye nekuhlakanipha” ethuneni.—Fundza Umshumayeli 9:5, 6, 10.
LOKWASHIWO NGUJESU MAYELANA NEKUFA
Jehova wadala bantfu kutsi baphile phakadze emhlabeni
7. Yini leyashiwo nguJesu mayelana nekufa?
7 Ngesikhatsi kufe umngani wakhe lomkhulu Lazaro, Jesu watjela bafundzi bakhe kutsi: “Umngani wetfu Lazaro ulele.” Jesu bekangasho kutsi Lazaro uphumulile. Wase uchubeka utsi: “Lazaro ufile.” (Johane 11:11-14) Jesu wafananisa kufa nebutfongo. Akazange atsi Lazaro usezulwini nobe unebakubo lasebafa. Akashongo nekutsi Lazaro bekahlushwa esihogweni nobe waphindze watalwa angulomunye umuntfu nobe silwane. Kodvwa abetsi kufana nekutsi Lazaro ukulobukhulu butfongo. Jesu waphindze wafananisa kufa nebutfongo, ngesikhatsi avusa indvodzakati yaJayiru nakatsi: “Akakafi kodvwa ulele.” (Lukha 8:52) Ukhona nalomunye umBhalo lofananisa kufa nebutfongo lobukhulu.—Tihlabelelo 13:3.
8. Sati ngani kutsi Nkulunkulu bekangakasidaleli kutsi sife?
8 Nkulunkulu abehlose kutsi bo-Adamu na-Eva begcine bafile yini? Cha. Jehova bekabadalele kutsi baphile kahle kuze kube phakadze. Jehova wadala bantfu baba nesifiso sekuphila phakadze. (Umshumayeli 3:11) Batali abafisi kubona bantfwababo baguga futsi bafa, naJehova utiva ngendlela lefanako ngatsi. Pho yini leyenta sife nangabe Nkulunkulu asidalela kutsi siphile phakadze?
YINI LEYENTA SIFE?
9. Sisho ngani kutsi umyalo Jehova labewunike bo-Adamu na-Eva bewukhombisa kutsi uyabacabangela?
9 Ensimini yase-Edeni, Jehova watsi ku-Adamu: “Ungadla ngekutsandza kwakho tonkhe titselo letilapha ensimini, kodvwa ungasidli sitselo sesihlahla sekwati lokulungile nalokungakalungi, ngobe mhlazana usidla uyakufa nekufa.” (Genesisi 2:9, 16, 17) Lomyalo locacile bekungasilukhuni kuwulalela, futsi Jehova bekanelilungelo lekutjela bo-Adamu na-Eva kutsi ngukuphi lokuhle nalokubi. Ngekulalela Jehova bebatawukhombisa kutsi bayalihlonipha ligunya lakhe. Bebatawuphindze bavete kutsi bayabonga ngako konkhe labekabentele kona.
10, 11. (a) Sathane wabadukisa njani bo-Adamu na-Eva? (b) Kushiwo ngani kutsi bo-Adamu na-Eva bona ngemabomu?
10 Kuyadzabukisa kutsi bo-Adamu na-Eva bakhetsa kungamlaleli Jehova. Sathane watsi ku-Eva: “Kodvwa ngempela Nkulunkulu ushito yini kutsi: ‘Ningadli nome ngusinye nje sitselo setihlahla letisensimini’?” Eva waphendvula watsi: “Singatidla titselo tetihlahla letisensimini, ngaphandle kwesitselo sesihlahla lesisekhatsi nensimi; Nkulunkulu utsite: ‘Ningasidli sitselo sesihlahla lesisekhatsi nensimi, ningasitsintsi nekusitsintsa, kuze ningafi.’”—Genesisi 3:1-3.
11 Sathane wase utsi: “Ningeke nife. Kepha Nkulunkulu uyati kutsi mhlazana nisidla, emehlo enu ayawuvuleka, bese nifanana naNkulunkulu nikwati lokuhle nalokubi.” (Genesisi 3:4-6) Sathane bekafuna Eva acabange kutsi angatikhetsela kutsi ngukuphi lokuhle nalokubi. Waphindze wacamba emanga ngekutsi yini lebeyitakwenteka nakangalaleli. Sathane watsi Eva ngeke afe futsi loku kwenta kutsi Eva asidle lesitselo wase unika nendvodza yakhe. Bo-Adamu na-Eva bebati kutsi Jehova bekatse bangasidli lesitselo. Ngekudla lesitselo, bakhetsa kungawulaleli lomyalo locacile nalokhombisa kutsi Jehova uyabacabangela. Bakhombisa nekutsi abamhloniphi Babe wabo losezulwini lonelutsandvo. Bawephula ngemabomu umyalo waNkulunkulu!
12. Yini leyenta kudvumate kangaka kungalaleli kwabo-Adamu na-Eva?
12 Kuyadvumata kutsi batali betfu bekucala bebangamedzelela ngalendlela uMdali wetfu! Bekungakuphatsa njani kutsi usebente kamatima ukhulisa bantfwabakho bese abasakulaleli bente lokuphambene nalobafundzise kona? Asingabati kutsi bekungakuvisa buhlungu kakhulu!
Adamu watsatfwa elutfulini, futsi wabuyela kulo
13. Bekasho kutsini Jehova nakatsi Adamu “uyawubuyela elutfulini”?
13 Ngekungalaleli kwabo, bo-Adamu na-Eva balahlekelwa litsemba lekuphila phakadze. Jehova watsi ku-Adamu: “Njengobe ulutfuli, uyawubuyela elutfulini.” (Fundza Genesisi 3:19.) Loko bekutawusho kutsi Adamu bekatawubuyela abelutfuli, kube shengatsi akazange sekabe khona. (Genesisi 2:7) Ngemuva kwekona, Adamu wafa futsi kwaphela ngaye.
14. Yini leyenta sife?
14 Kube bo-Adamu na-Eva bamlalela Nkulunkulu ngabe basaphila nalamuhla. Kepha ngesikhatsi bangamlaleli Nkulunkulu, bona futsi bagcine bafile. Sono sifana nesifo lesibi lesasitfola kubatali betfu bekucala. Sonkhe sitalwa sinesono, kungako-ke sifa. (Roma 5:12) Kodvwa leyo bekungasiyo injongo yaNkulunkulu ngebantfu. Nkulunkulu akazange sekafise kutsi bantfu bafe futsi liBhayibheli litsi kufa ‘kusitsa.’—1 Khorinte 15:26.
LICINISO LIYASIKHULULA
15. Kwati liciniso mayelana nalabafile kungasikhulula njani?
15 Liciniso ngekufa lisikhulula etimfundzisweni letinyenti letingemanga. LiBhayibheli lifundzisa kutsi labafile ababuva buhlungu. Ngeke sikhone kukhuluma nabo futsi nabo abakhoni kukhuluma natsi. Angeke sikhone kubasita futsi nabo abakhoni kusisita. Akudzingeki sibesabe ngoba angeke basilimate. Nanobe kunjalo, tinkholo letinyenti tifundzisa kutsi labafile solo bayaphila kulenye indzawo futsi singabasita ngekutsi sibhadale imali kubafundisi noma labo labatsatfwa ngekutsi bangcwele. Asiyengeki kalula nasilati liciniso mayelana nalabafile.
16. Ngumaphi emanga lafundziswa tinkholo letinyenti mayelana nalabafile?
16 Sathane usebentisa inkholo yemanga kuze asidukise futsi asente sikholelwe kutsi labafile solo bayaphila. Sibonelo saloko kutsi letinye tinkholo tifundzisa kutsi kunencenye yemuntfu lechubeka iphila kulenye indzawo nakafa. Inkholo yakho ikufundzisa loko yini noma ifundzisa loko lokushiwo liBhayibheli ngalabafile? Sathane usebentisa emanga kute akhweshise bantfu kuJehova.
17. Yini lesenta sitsi imfundziso yekushiswa kwebantfu esihogweni iyamhlambalata Jehova?
17 Lokufundziswa tinkholo letinyenti mayelana nekufa kwetfusa kakhulu. Sibonelo saloko kutsi letinye tifundzisa kutsi bantfu lababi batawushiswa phakadze esihogweni. Lamanga lawo ayamhlambalata Jehova. Akayuze avumele kutsi bantfu bahlushwe ngalendlela! (Fundza 1 Johane 4:8.) Ungativa njani ngemuntfu lojezisa umntfwana ngekutsi afake sandla sakhe emlilweni, asishise? Bewungamtsatsa njengemuntfu lonenhlitiyo lembi. Ngeke nje sewufise nekumati. Nguleyo kanye-ke indlela Sathane lafuna sitive ngayo ngaJehova!
18. Yini lesenta singabesabi labafile?
18 Letinye tinkholo titsi bantfu nabafa bagucuka babe yimimoya. Letinkholo tifundzisa kutsi kufanele siyihloniphe siphindze siyesabe lemimoya ngoba ingaba bangani betfu labalusito nobe titsa letiyingoti kakhulu. Bantfu labanyenti bayawakholelwa lawo manga. Bayabesaba labafile kungako babakhonta esikhundleni sekutsi bakhonte Jehova. Ungakhohlwa kutsi labafile abeva lutfo, ngako-ke akukafaneli sibesabe. Jehova unguMdali wetfu. UnguNkulunkulu weliciniso, ngako-ke kufanele sikhonte yena kuphela.—Sembulo 4:11.
19. Kusisita ngani kwati liciniso ngekufa?
19 Nasati liciniso ngekufa siyakhululeka kuwo onkhe emanga lafundziswa tinkholo. Leliciniso liphindze lisisite sicondze tonkhe tetsembiso Jehova lasetsembise tona ngemphilo kanye nelikusasa.
20. Sitawufundza ngani esehlukweni lesilandzelako?
20 Jobe, inceku yaNkulunkulu wake wabuta watsi: “Nangabe umuntfu afa, uyawuphindze aphile yini?” (Jobe 14:14) Kungenteka yini vele kutsi umuntfu lofile aphindze aphile? Ijabulisa kakhulu imphendvulo Nkulunkulu lasiniketa yona eBhayibhelini. Sitawufundza ngayo esehlukweni lesilandzelako.
a Labanye bantfu bakholelwa kutsi umphefumulo noma umoya uchubeka uphila ngisho umuntfu asafile. Kute ufundze kabanti, fundza liphuzu 17 na-18 ngephasi kwesihloko lesitsi Imininingwane Lesekugcineni.