Sifundvo 14

Indlela BoFakazi BaJehova Labahleleke Ngayo

BoFakazi baJehova bacale nini etikhatsini tanamuhla? (1)

Imihlangano yaboFakazi baJehova ichutjwa kanjani? (2)

Tindleko tibhadalwa ngani? (3)

Bobani labahola libandla nelibandla? (4)

Kuba namiphi imihlangano lemikhulu umnyaka nemnyaka? (5)

Msebenti muni lowentiwa enhloko-hhovisi yabo nasemahhovisini emagatja? (6)

1. Etikhatsini tanamuhla, boFakazi baJehova bacale ngabo-1870. Bacale babitwa ngekutsi Bafundzi BeliBhayibheli. Kwatsi nga-1931 bemukela ligama lelisemiBhalweni, lelitsi BoFakazi BaJehova. (Isaya 43:10) Nome nje bebalidlanzana ekucaleni, lamuhla sekunetigidzi taboFakazi, labashumayela ngekutimisela emaveni langetulu kwa-230.

2. Emabandla lamanyenti aboFakazi BaJehova aba nemihlangano katsatfu ngeliviki. Uyamenywa kutsi ube khona kunoma ngumuphi wayo. (Hebheru 10:24, 25) Lokufundziswako kusuka eBhayibhelini. Imihlangano ivulwa iphindze ivalwe ngemthandazo. Kuleminyenti yalemihlangano, bahlabelela “tingoma takamoya” tekudvumisa Jehova letitsintsa inhlitiyo. (Efesu 5:18, 19) Kungenwa mahhala, futsi akunikeliswana ngenkhani.—Matewu 10:8.

3. Emabandla lamanyenti abambela imihlangano yawo eHholweni LeMbuso. Lesi kuba sakhiwo lesivamile, lesisuke sakhiwe tisebenti tekutitsandzela letiboFakazi. EHholweni LeMbuso, kute imifanekiso, tiphambano, nalokunye lokunjalo. Tindleko tibhadalwa ngeminikelo yekutitsandzela. Labafuna kunikela bangafaka iminikelo yabo ebhokisini lemnikelo.—2 Khorinte 9:7.

4. Ebandleni nelibandla, kunebabonisi. Bacondzisa libandla, balifundzise. (1 Thimothi 3:1-7; 5:17) Balekelelwa tinceku letisitako. (1 Thimothi 3:8-10, 12, 13) Labazalwane abaphakanyiswa babe ngetulu kwelibandla. (2 Khorinte 1:24) Bate emagama latsite ekubahlonipha. (Matewu 23:8-10) Abagcoki ngendlela leyehlukile futsi ababhadalwa lutfo. Banakekela tidzingo takamoya telibandla ngekutitsandzela. Bangasidvudvuta futsi basicondzise ngetikhatsi letimatima.—Jakobe 5:14-16; 1 Phetro 5:2, 3.

5. BoFakazi BaJehova baphindze babe nemihlangano lemikhulu umnyaka nemnyaka. Kusuke kuhlangene emabandla lamanyenti atewufundziswa ngeliBhayibheli. Kuvamise kutsi kubhajatiswe bafundzi labasha kulemihlangano.—Matewu 3:13-17; 28:19, 20.

6. Inhloko-hhovisi yemhlaba wonkhe yaboFakazi BaJehova ise-New York. Lapho, kuneLibandla Lebabonisi Labacondzisako. Lababonisi labavutsiwe bacondzisa emabandla emhlaba wonkhe. Kuphindze kube khona emahhovisi emagatja langetulu kwa-100 emaveni latsite. Kuletotindzawo, boFakazi basebenta ngekutitsandzela ekushicileleni nasekumikiseni tincwadzi teliBhayibheli noma ngukuphi latifuneka khona. Ticondziso mayelana nekuhlelwa kwemsebenti wekushumayela titfolakala khona lapho. Kungaba njani sewuvakashele lihhovisi leligatja lelisedvutane nalapho uhlala khona?