BoFakazi BaJehova Baceceshwa Njani Kuze Bente Umsebenti Wabo Wekushumayela?

BoFakazi BaJehova bahlale baceceshwa kuto tonkhe tingoni tekuphila njengemaKhristu, lokufaka ekhatsi nemsebenti wabo wekushumayela. Lomsebenti ngulowo Jesu layala bafundzi bakhe kutsi bawente, lokukushumayela kanye nekufundzisa tindzaba letimnandzi teMbuso waNkulunkulu. (Matewu 24:14; 28:19, 20) Lokuceceshwa sikutfola emihlanganweni yelibandla lesiba nayo maviki onkhe, nasemihlanganweni yesifundza neyesigodzi. BoFakazi BaJehova labenta imisebenti letsite ebandleni noma enhlanganweni, batfola kuceceshwa etikolweni teliBhayibheli letikhetsekile.

Kulesihloko

Ngukuphi kuceceshwa BoFakazi BaJehova labakutfolako?

Imihlangano yelibandla. Njalo ngeliviki siba nemihlangano lemibili etindzaweni tetfu tekukhontela, letibitwa ngekutsi ngemaHholwa eMbuso. Munye walemihlangano siba nawo emkhatsini weliviki, bese lolomunye ngetimphelasontfo. Wonkhe muntfu wemukelekile futsi kute lipulete lemnikelo.

Umhlangano wasekhatsi neliviki. Sifundziswa indlela yekufundza kahle, yekucocisana kahle nebantfu, yekukhuluma embikwebantfu, yekushumayela neyekufundzisa. Lokuceceshwa sikutfola ngetinkhulumo, tincociswano, imiboniso nangema-video. Lokuceceshwa kusisita kutsi siphumelele nasicoca nalabanye ngemlayeto weliBhayibheli nanasichuba tifundvo teliBhayibheli nalabo labatsandza kufundza. Bonkhe lababakhona kulemihlangano, bayazuza kulokuceceshwa. Ngetulu kwakokonkhe, imihlangano icinisa kukholwa kwetfu kuNkulunkulu, lutsandvo lwetfu ngaye nangebazalwane betfu.
Umhlangano loba khona ngemphelasontfo. Lomhlangano wehlukene kabili. Ucala ngenkhulumo lesekelwe eBhayibhelini leyentelwe linyenti. Incenye yesibili yalomhlangano iyimibuto netimphendvulo lesekelwe esihlokweni lesiku-Sicongosekulindza lesifundvwako.a Letihloko tichaza tihloko letiseBhayibhelini kanye netimiso letisisita nasenta umsebenti wekushumayela, tiphindze tisisite nasekuphileni kwetfu.

Imihlangano yesigodzi neyesifundza. Njalo ngemnyaka bamemeteli labasuka emabandleni lamanyenti bayahlangana emibutsanweni lemikhulu leyehlukene katsatfu. Lemibutsano iba netihloko letisekelwe eBhayibhelini futsi iba netinkhulumo, imiboniso, tincociswano, kanye nema-video. Imihlangano yesigodzi kanye neyesifundza ifanana nemihlangano yelibandla ngobe nayo itfutfukisa lwati lwetfu ngeliBhayibheli futsi isisite siwente kancono umsebenti wetfu wekushumayela tindzaba letimnadzi. Nakulemihlangano, wonkhe muntfu wemukelekile futsi kute lipulete lemnikelo.

Tikolwa teliBhayibheli taBoFakazi BaJehova

Labanye BoFakazi BaJehova bayamenywa kutsi baye etikolweni teliBhayibheli letehlukahlukene kuze bayoceceshwa ngalokwengetiwe. Ngutiphi letikolwa? Iyini injongo yato futsi titsatsa sikhatsi lesinganani? Bobani labangaya kuto?

Sikolwa Semsebenti Semahlahlandlela

Injongo: Kucecesha tisebenti tasikhatsi sonkhe letibitwa ngekutsi ngemahlahlandlela,b kuze tiwente kancono umsebenti wekushumayela newekufundzisa. Lokuceceshwa kufaka ekhatsi tincociswano, imiboniso, kanye netinkhulumo.
Sitsatsa sikhatsi lesingakanani: Emalanga lasitfupha.
Bobani labangaya kuso: Kumenywa labo lasebacedze umnyaka bangemahlahlandlela lavamile. Kuphindze kumenywe nemahlahlandlela lasanesikhatsi lesidze futsi lesekuphele iminyaka lesihlanu agcina kuya kulesikolwa.

Bafundzi lababili benta umboniso eSikolweni Semsebenti Semahlahlandlela futsi labanye bafundzi balalelisisile.

Sikolwa Sebavangeli BeMbuso

Injongo: Kuniketa emahlahlandlela lasanesikhatsi lesidze kucecesha lokukhetsekile. Bafundzi batfutfukisa emakhono abo ekushumayela newekufundzisa, baphindze badadishe tihloko letiseBhayibhelini ngalokujulile. Labanyenti labaphotfule kulesikolwa bamenywa kutsi bayosita lapho kunesidzingo sebamemeteli khona.
Sitsatsa sikhatsi lesingakanani: Tinyanga letimbili.
Bobani labangaya kuso: Emahlahlandlela lavamile angafaka ticelo nangabe afaneleka futsi nanangabe timo tawo tiwavumela kutsi angayosita lapho kunesidzingo khona.

Bafundzi baphakamisa tandla kuze baphendvule eSikolweni Sebavangeli BeMbuso.

Sikolwa Salabadzala Belibandla

Injongo: Kusita labadzalac bemabandla kutsi bayente kahle imisebenti yabo ebandleni, lefaka ekhatsi kufundzisa, kwelusa kanye nekujulisa lutsandvo lwabo ngaNkulunkulu nangebazalwane babo.—1 Phetro 5:2, 3.
Sitsatsa sikhatsi lesingakanani: Emalanga lasihlanu.
Bobani labangaya kuso: Kumenywa labo labasandza kuba ngulabadzala belibandla kanye nalabadzala lesebanesikhatsi lesidze kodvwa lesikuphele iminyaka lesihlanu bagcine kuya kulesikolwa.

Umfundzi uyaphendvula eSikolweni Salabadzala Belibandla.

Sikolwa Sebabonisi Labajikeletako Nemakhosikati Abo

Injongo: Kucecesha bazalwane labahambela emabandla lababitwa ngekutsi babonisi betigodzi,d kutsi bawente kahle umsebenti wabo. (1 KuThimothi 5:17) Lemfundvo iphindze isite lalabadzala labangemaKhristu kanye nabomkabo kutsi bayati kancono imiBhalo.
Sitsatsa sikhatsi lesingakanani: Inyanga yinye.
Bobani labangaya kuso: Kumenywa babonisi besigodzi kanye nabomkabo lesebanemnyaka benta lomsebenti wekujikeleta. Baphindze bamenywe ngemuva kweminyaka lesihlanu.

Bafundzi eSikolweni Sebabonisi Labajikeletako Nemakhosikati Abo bayalalelisisa.

Sikolwa Semsebenti WeMbuso

Injongo: Kusita labadzala bemabandla kanye netinceku letisebentakoe kutsi bawente kahle umsebenti wabo kuye ngetimo nangetidzingo. (2 KuThimothi 3:1) Lesikolwa siba khona ngemuva kweminyaka lembalwa.
Sitsatsa sikhatsi lesingakanani: Kuyashiyana, kodvwa kuvamise kuba lilanga linye.
Bobani labangaya kuso: Babonisi betigodzi, labadzala bemabandla kanye netinceku letisebentako.

Bafundzi eSikolweni Semsebenti WeMbuso bashutha sitfombe seliklasi.

Sikolwa Semsebenti Wase-Bethel

Injongo: Kusita emalunga ase-Bethelf kutsi awente kahle umsebenti wawo futsi akhulise lutsandvo lwawo ngaNkulunkulu nangalabanye.
Sitsatsa sikhatsi lesingakanani: Emalanga lasihlanu nehhafu.
Bobani labangaya kuso: Labafikako e-Bethel kanye nalabo lesebanesikhatsi lesidze kodvwa lesebaneminyaka lesihlanu bagcinile kuya kulesikolwa.

Sikolwa SaseGileyadi

Injongo: Kusita bafundzi kutsi batfutfukise indlela lababonga ngayo ngeliVi laNkulunkulu futsi sibasite kutsi bakwente loko labakufundzako. (1 KubaseThesalonika 2:13) Labafundzi labetsembekile labangemaKhristu labaya kulesikolwa babese baba lusito lolukhulu enhlanganweni yaJehova nasemsebentini wemhlaba wonkhe wekufundzisa ngeliBhayibheli. Bafundzi labaphotfule kulesikolwa bangabelwa kutsi bayosebenta ensimini nobe ehhovisini leligatja, kungaba kuseveni labasuka kulo nobe kulelinye live.
Sitsatsa sikhatsi lesingakanani: Tinyanga letisihlanu.
Bobani labangaya kuso: Emahhovisi eligatja akhutsata tisebenti letitsite tasikhatsi sonkhe kutsi tifake ticelo. Lesikolwa siba seMelika e-Watchtower Educational Center lesePatterson, e-New York.

Lofundzisa eSikolweni SaseGileyadi usebentisa sitfombe lesakhiwe selithempeli laseJerusalema kuze afundzise liklasi.

Sikolwa Semalunga Emakomidi Emagatja Nemakhosikati Awo

Injongo: Kucecesha emalunga eKomidi Yeligatjag kutsi engamele umsebenti lowentiwa ehhovisini leligatja, kanye nemisebenti lemayelana nekukhonta Nkulunkulu leyentiwa BoFakazi BaJehova labaseveni nobe emaveni labelwe ligatja labo.
Sitsatsa sikhatsi lesingakanani: Tinyanga letimbili.
Bobani labangaya kuso: Indlunkhulu yaBoFakazi BaJehova imema emalunga latsite eKomidi Yeligatja kanye nabomkabo kutsi bete kulesikolwa lesiba se-Watchtower Educational Center e-Patterson, e-New York.

Kusekelwe kuphi lokuceceshwa boFakazi labakutfolako?

Lokuceceshwa boFakazi labakutfolako kusekelwe ngalokuyinhloko eBhayibhelini. Sikholelwa kutsi liBhayibheli liphefumulelwe nguNkulunkulu futsi lineticondziso letinhle letingasita umKhristu kutsi aphile ngendlela leyemukelwa nguNkulunkulu.—2 KuThimothi 3:16, 17.

BoFakazi BaJehova bayakubhadalela yini lokuceceshwa?

Cha. Lokuceceshwa kumahhala. Imisebenti yaBoFakazi BaJehova isekelwa ngeminikelo yekutitsandzela.—2 KubaseKhorinte 9:7.

a LiBhayibheli netincwadzi tetfu letisekelwe eBhayibhelini lokufaka ekhatsi nema-video, kuyatfolakala ku-website yetfu letsi jw.org.

b Lihlahlandlela ngumuntfu wesilisa nobe wesifazane lobhajatisiwe losibonelo lesihle nalonesifiso sekusebenta ema-awa latsite njalo ngenyanga ashumayela ngemlayeto weliBhayibheli kulabanye.

c Labadzala belibandla, ngemadvodza langemaKhristu lavutsiwe, lafundzisa asebentisa imiBhalo futsi eluse bantfu baJehova ngekutsi abasite futsi abakhutsate. Kute imali lanikwa yona ngekwenta lomsebenti.

d Umbonisi wesigodzi sisebenti sasikhatsi sonkhe lesivakashela emabandla lehlukahlukene lasesigodzini saso njalo ngeliviki. Ukhutsata bazalwane nabodzadze ngetinkhulumo letisekelwe eBhayibhelini kanye nangekusebenta nabo emsebentini wekushumayela.

e Kunyenti lokwentiwa tinceku letisebentako, tikwentela bazalwane nabodzadze. Tisita labadzala belibandla kutsi babe nesikhatsi lesinyenti sekufundzisa kanye nesekwelusa.

f I-Bethel ligama lemahhovisi eligatja aBoFakazi BaJehova. Tisebenti tasikhatsi sonkhe letisebenta lapho tisekela umsebenti waBoFakazi BaJehova lowentiwako kulelogatja.

g IKomidi Yeligatja yakhiwa ngemadvodza lafanelekako nalanebuhlobo lobucinile naNkulunkulu, angaba matsatfu nobe ngetulu.

Yini BoFakazi BaJehova labayizuzile kulokuceceshwa?

“Ngenca yekutsi nginemahloni, ngikutfola kumatima kukhuluma nebantfu lengingabati ngeliBhayibheli. Kodvwa kuceceshwa lengikutfole emihlanganweni yasekhatsi neliviki kungisitile kutsi ngibe nesibindzi futsi ngitfutfukise nendlela lengifundzisa ngayo. Nyalo sengiyakhona kukhuluma nalabanye bantfu ebandleni nasemsebentini.”—Natasha, waseMelika.
“Kuya eSikolweni Sebavangeli BeMbuso kungisite ngaba nebuntfu lobuhle lobufaka ekhatsi lutsandvo, kubeketela kanye nemusa. Umphumela waloko ube kutsi sengingumKhristu loncono, umngani loncono kanye namakhelwane loncono. Lesikolwa siphindze sangifundzisa kucwaninga ngetihloko letitsite letiseBhayibhelini kanye nekuchaza liVi laNkulunkulu ngendlela letsintsa tinhlitiyo.”—Stephen, waseNigeria.
“Sikolwa Salabadzala Belibandla singisite kutsi ngibe nebuntfu lengibudzingako kuze ngibe ngulomdzala welibandla. Letinkhulumo tagcizelela kutsi kufanele ngilandzele sibonelo saJesu.”—Luca, wase-Italy.
“Sikolwa Semsebenti WeMbuso singifundzise bumcoka bekungeneka kanye nekuba nemusa njengobe ngisebentelana nalabanye bantfu. Ngifundze nekutsi nangentela labanye tintfo ngitente ngobe ngibatsandza hhayi ngobe kufanele.”—Samuel, wase-United Kingdom.
“Sikolwa saseGileyadi sisisite kutsi sitihlolisise sisebentisa sibuko lesiliVi laNkulunkulu. (Jakobe 1:22-25) Ngako sabona lapho kufanele sishintje khona buntfu betfu kanye naloko lesimentela kona Jehova. Safundza nekutsi sicabangele labanye kunekutsi siticabangele tsine kuphela futsi sivumele lutsandvo lusicondzise kuko konkhe lesikushoko nalesikwentako.”—Elnathan naPrincess, basePhilippines.