Uyatimisela Yini Kufundza KuJehova?

1. Jehova utiva njani ngemfundvo?

¹ Jehova, ‘longuMfundzisi Lomkhulu,’ ufuna kutsi sifundziswe. (Isa. 30:20) Wacala kufundzisa ngemuva kwekudala iNdvodzana yakhe lelitubulo. (Joh. 8:28) Ngemuva kwekuhlubuka kwa-Adamu, Jehova akazange ayekele kufundzisa kodvwa ngelutsandvo, waniketa bantfu ticondziso.—Isa. 48:17, 18; 2 Thim. 3:14, 15.

2. Ngumuphi umkhankaso wekufundzisa lowentiwako lamuhla?

² Lamuhla, Jehova ucondzisa umkhankaso wekufundzisa lomkhulu kunayo yonkhe leyake yaba khona. Njengobe Isaya aphrofetha, tigidzi tebantfu emhlabeni wonkhe tiya ‘entsabeni yelithempeli laSimakadze’ lengekwemfanekiso. (Isa. 2:2) Kungani tiya lapho? Kute Jehova atifundzise ngetindlela takhe. (Isa. 2:3) Emnyakeni wemsebenti wa-2010, boFakazi BaJehova bacitse ema-awa langetulu kwetigidzigidzi letingu-1.6 bashumayela futsi bafundzisa bantfu liciniso leliseBhayibhelini. Ngetulu kwaloko, kunemfundvo yakamoya lechutjwa maviki onkhe emabandleni langetulu kwa-105 000 lasemhlabeni wonkhe, futsi sisebenti lesetsembekile nalesihlakaniphile sishicilela tincwadzi tebuKhristu ngetilwimi letingetulu kwa-500.

3. Wena uzuze njani emfundvweni lesiyiniketwa nguJehova?

³ Zuza Ngalokugcwele: Sizuze kakhulu emfundvweni levela kuNkulunkulu! Sifundze kutsi Nkulunkulu unelibito nekutsi uyasikhatsalela. (Hla. 83:18, NW; 1 Phet. 5:6, 7) Sifundze nangetimphendvulo taleminye imibuto lebaluleke kakhulu ekuphileni, njengalena letsi: Kungani bantfu bahlupheka futsi bafa? Ngingayitfola njani injabulo sibili? Iyini injongo yekuphila? Jehova usinikete nesicondziso sekutiphatsa lesenta kutsi ‘siphumelele.’—Josh. 1:8.

4. Ngumaphi lamanye ematfuba emfundvo lavulekele tinceku taNkulunkulu, futsi kungani kufanele sitimisele kutsi sifundze kuJehova?

⁴ Ngetulu kwaloko, Jehova uhlele kutsi kube nemfundvo lekhetsekile kute asite tinceku takhe letinyenti kutsi tandzise umsebenti letimentela wona. Emakhasini 4 kuya ku-6 kunalamanye ematfuba lasivulekele. Ngisho nobe timo tetfu tingasivumeli kutsi sitfole lokuceceshwa lokuvetiwe, siyisebentisa ngalokugcwele yini lemfundvo Jehova lasiniketa yona? Njengobe bothishela kanye nalabanye bakhutsata labasha kutsi baphishanekele imfundvo lephakeme, tsine siyabakhutsata yini kutsi batibekele imigomo yakamoya futsi baphishanekele imfundvo lephakeme kakhulu—leyo levela kuJehova? Kutimisela kutsi sifundze kuJehova kutawusisita kutsi siphile imphilo lejabulisako nyalo futsi sitfole nelikusasa laphakadze.—Hla. 119:105; Joh. 17:3.

Lamanye Ematfuba Emfundvo Latfolakala Enhlanganweni YaJehova

Emaklasi Ekufundza Nekubhala

• Injongo: Kufundzisa bantfu indlela yekufundza nekubhala kute bakwati kutitadishela liBhayibheli futsi bafundzise labanye liciniso.

• Sikhatsi Lesitsatfwako: Kuya ngesidzingo.

• Indzawo: LiHholwa leMbuso lendzawo.

• Labo Langalingenela: Bonkhe bamemeteli kanye nalabanye labanesifiso sekwenta njalo.

• Indlela Yekulingenela: Labadzala belibandla bahlela emaklasi ekufundza nekubhala kuye ngetidzingo telibandla, futsi bakhutsata bonkhe labangazuza kuleliklasi kutsi balingenele.

Sikolwa Semsebenti WemaKhristu

• Injongo: Kucecesha bamemeteli kutsi babe bashumayeli kanye nebafundzisi betindzaba letinhle labaphumelelako.

• Sikhatsi Lesitsatfwako: Sichutjwa njalo.

• Indzawo: LiHholwa leMbuso lendzawo.

• Labo Labangasingenela: Bonkhe bamemeteli. Nalabanye labahlanganyela njalo nelibandla, labavumelana netimfundziso teliBhayibheli nalabaphila ngekuvumelana netimiso tebuKhristu bangasingenela.

• Indlela Yekusingenela: Khuluma nembonisi weSikolwa Semsebenti WemaKhristu.

Emaklasi Ekufundza Lolunye Lulwimi

• Injongo: Kufundzisa bamemeteli indlela yekushumayela tindzaba letinhle ngalolunye lulwimi.

• Sikhatsi Lesitsatfwako: Tinyanga letine nobe letisihlanu. Lamaklasi avame kuchutjwa ngeMigcibelo ekuseni, kutsatfwe li-awa linye nobe lamabili.

• Indzawo: Ngalokuvamile aba seHholweni leMbuso lelisedvute.

• Labo Labangalingenela: Bamemeteli labatiphetse kahle labanesifiso sekushumayela ngalolunye lulwimi.

• Indlela Yekulingenela: Emaklasi ahlelwa lihhovisi leligatja kuye ngesidzingo.

Kwakhiwa KwemaHholwa EMbuso

• Injongo: Kwakha kanye nekulungisa emaHholwa eMbuso. Lesi akusiso sikolwa, kodvwa labo labatinikelako bafundziswa emakhono lehlukehlukene kute bakhone kusita emsebentini wekwakha.

• Sikhatsi Lesitsatfwako: Kuya ngetimo temuntfu ngamunye.

• Indzawo: Nobe ngukuphi lapho Ikomidi Yekwakha EmaHholwa EMbuso yabelwe khona. Ungasebenta sikhatsi sonkhe lapho kunesidzingo khona ukanye nemaCembu Ekwakha EmaHholwa EMbuso lacondziswa ligatja.

• Loko Lokudzingekako: Kuba bazalwane nabodzadze lababhajatisiwe futsi labagunyatwe sigungu salabadzala. Bangase babe nemakhono nobe bangabi nawo.

• Indlela Yekubhalisa: Kute usebente neKomidi Yekwakhiwa KwemaHholwa EMbuso, gcwalisa lifomu lelitsi “Ifomu Lemibuzo Yezisebenzi Zokuzithandela ZamaHholo OMbuso” (S-82-ZU) lelitfolakala kulabadzala belibandla. Nangabe ungakhona kusebenta sikhatsi sonkhe inyanga yinye nobe ngetulu, gcwalisa lifomu lelitsi “Application for Kingdom Hall Construction Volunteer Program” (A-25-E).

Sikolwa Semsebenti Semahlahlandlela

• Injongo: Kusita emahlahlandlela kutsi ‘awufeze wonkhe’ umsebenti wawo.—2 Thim. 4:5.

• Sikhatsi Lesitsatfwako: Emaviki lamabili.

• Indzawo: Ikhetfwa lihhovisi leligatja, kodvwa kuvamise kuba liHholwa leMbuso lelisedvute.

• Loko Lokudzingekako: Kuba ngemahlahlandlela lavamile lasakhonte sikhatsi lesingaba ngumnyaka munye.

• Indlela Yekusingenela: Emahlahlandlela lafanelekako avele afakwe kulesikolwa bese atiswa ngumbonisi wawo wesifundza ngaloku.

Sikolwa Salabasandza Kufika EBethel

• Injongo: Lesikolwa sentelwe kusita labo labafikako kutsi baphumelele emsebentini wabo waseBethel.

• Sikhatsi Lesitsatfwako: Li-awa linye maviki onkhe kute kube ngemaviki lalishumi nesitfupha.

• Indzawo: EBethel.

• Loko Lokudzingekako: Kuba ngemalunga emndeni waseBethel nobe tisebenti tekutitsandzela letitawuhlala sikhatsi lesidze (umnyaka lowodvwa nobe ngetulu).

• Indlela Yekusingenela: Emalunga emndeni waseBethel lafanelekako avele afakwe kuso.

Sikolwa Semsebenti WeMbuso

• Injongo: Kucecesha labadzala kanye netinceku letisebentako kute banakekele imitfwalo labanayo enhlanganweni. (Imis. 20:28) Lesikolwa sichutjwa njalo ngemuva kweminyaka lembalwa kuye ngekwaloko lokushiwo Sigungu Lesibusako.

• Sikhatsi Lesitsatfwako: Kuleminyaka yakamuva, besichutjwa lilanga linye nencenye kulabadzala bese kuba lilanga linye kulabo labatinceku letisebentako.

• Indzawo: Kuvamise kuba liHholwa leMbuso lelisedvute nobe liHholwa leMhlangano.

• Loko Lokudzingekako: Kuba ngulabadzala nobe tinceku letisebentako.

• Indlela Yekusingenela: Labadzala kanye netinceku letisebentako letifanelekako bamenywa ngumbonisi wesifundza.

Sikolwa Salabadzala Belibandlaa

• Injongo: Kusita labadzala kutsi banakekele imitfwalo yabo ebandleni.

• Sikhatsi Lesitsatfwako: Ngemalanga lasihlanu.

• Indzawo: Ikhetfwa lihhovisi leligatja, kodvwa kuvamise kuba liHholwa leMbuso lelisedvute nobe liHholwa leMhlangano.

• Loko Lokudzingekako: Kuba ngulabadzala.

• Indlela Yekusingenela: Labadzala labafanelekako bamenywa lihhovisi leligatja.

Sikolwa Sebabonisi Labajikeletako Kanye Nemakhosikati Abob

• Injongo: Kusita babonisi betifundza nebetigodzi kutsi baphumelele kakhulu ekukhonteni emabandla, basebente kamatima ‘ekushumayeleni nasekufundziseni’ futsi beluse labo labangephansi kwabo.—1 Thim. 5:17; 1 Phet. 5:2, 3.

• Sikhatsi Lesitsatfwako: Tinyanga letimbili.

• Indzawo: Ikhetfwa lihhovisi leligatja.

• Loko Lokudzingekako: Kuba ngumbonisi wesifundza nobe wesigodzi.

• Indlela Yekusingenela: Babonisi labajikeletako labafanelekako kanye nebafati babo bamenywa lihhovisi leligatja.

Sikolwa Lesisekelwe EBhayibhelini Sebazalwane Labangakashadic

• Injongo: Kusita labadzala kanye netinceku letisebentako letingakashadi kutsi tilungele imitfwalo leyengetiwe. Linyenti lalabo labaphotfulako labelwa kuyewukhonta lapho kunesidzingo khona eveni labo. Labanye labambalwa bangase babelwe kulelinye live nangabe batenta batfolakale.

• Sikhatsi Lesitsatfwako: Tinyanga letimbili.

• Indzawo: Ikhetfwa lihhovisi leligatja, kodvwa kuvamise kuba seHholweni leMhlangano nobe eHholweni leMbuso.

• Loko Lokudzingekako: Kuba bazalwane labangakashadi labasemkhatsini weminyaka lengu-23 nalengu-62 budzala, labanemphilo lenhle, labafuna kusita bazalwane kanye nekutfutfukisa tintfo letimayelana neMbuso nobe ngukuphi lapho kunesidzingo khona. (Mak. 10:29, 30) Kufanele babe sebakhonte njengetinceku letisebentako nobe labadzala lokungenani iminyaka lemibili lelandzelanako.

• Indlela Yekusingenela: Nangabe lesikolwa sikhona ensimini yeligatja lenu, umhlangano walabo labanesifiso sekuya kuso uba khona emihlanganweni yesifundza. Kwatiswa lokubanti ngaso kutfolakala kulomhlangano.

Sikolwa Lesisekelwe EBhayibhelini SemaKhristu Lashadened

• Injongo: Kuniketa bantfu labashadile kuceceshwa lokukhetsekile kute bakwati kumsebentela kakhulu Jehova kanye nenhlangano yakhe. Linyenti lalabo labaphotfulako labelwa kutsi liyewukhonta lapho kunesidzingo khona eveni labo. Labanye labambalwa bangabelwa kuyewukhonta kulelinye live nangabe batenta batfolakale.

• Sikhatsi Lesitsatfwako: Tinyanga letimbili.

• Indzawo: Emaklasi lambalwa ekucala achutjwa eMelika eWatchtower Educational Center, lesePatterson, eNew York. Ngekuhamba kwesikhatsi, lesikolwa sitawuchutjwa etindzaweni letikhetfwe lihhovisi leligatja, kungaba seHholweni Lemhlangano nobe eHholweni LeMbuso.

• Loko Lokudzingekako: Kuba bantfu labashadile labasemkhatsini weminyaka lengu-25 nalengu-50 budzala, labanemphilo lenhle nalabanetimo letibavumela kutsi bakhonte lapho kunesidzingo khona futsi labatsi: “Nangu mine, tfuma mine!” (Isa. 6:8) Ngetulu kwaloko, kufanele babe sebashade lokungenani iminyaka lemibili futsi babe semsebentini wasikhatsi sonkhe lokungenani iminyaka lemibili lelandzelanako.

• Indlela Yekusingenela: Nangabe lesikolwa sikhona ensimini yeligatja lenu, umhlangano walabo labanesifiso sekuya kuso uba khona emihlanganweni lekhetsekile. Kwatiswa lokubanti ngaso kutfolakala kulomhlangano.

I-Watchtower Bible School of Gilead

• Injongo: Kucecesha emahlahlandlela kanye naletinye tisebenti tasikhatsi sonkhe kute tibe titfunywa telivangeli.

• Sikhatsi Lesitsatfwako: Tinyanga letisihlanu.

• Indzawo: EMelika, eWatchtower Educational Center, lesePatterson, eNew York.

• Loko Lokudzingekako: Kuba ngulabashadile lasebabhajatiswe iminyaka lemitsatfu futsi labaneminyaka lesemkhatsini wa-21 nalengu-38 budzala nabafaka ticelo tabo tekucala. Kufanele bakwati kukhuluma siNgisi, babe sebashade lokungenani iminyaka lemibili futsi babe semsebentini wasikhatsi sonkhe lokungenani iminyaka lemibili lelandzelanako. Labo labafaka ticelo kufanele babe nemphilo lenhle. Emahlahlandlela lakhonta kulelinye live (kuhlanganise nalawo labekwe njengetitfunywa telivangeli); babonisi labajikeletako; emalunga emndeni waseBethel; labo labaphotfule eSikolweni Sekuceceshelwa Imisebenti YebuKhristu, eSikolweni Lesisekelwe EBhayibhelini Sebazalwane labangakashadi, kanye naseSikolweni Lesisekelwe EBhayibhelini SemaKhristu Lashadene bangafaka ticelo tabo nangabe bafaneleka.

• Indlela Yekusingenela: Kulamanye emagatja, umhlangano walabo labanesifiso sekuya kuso uba khona emihlanganweni yesigodzi. Kwatiswa lokubanti ngaso kutfolakala kulemihlangano. Nangabe lomhlangano ungekho emhlanganweni wenu wesigodzi futsi unesifiso sekufaka sicelo, ungatfola kwatiswa lokubanti ngekubhalela lihhovisi leligatja.

Sikolwa Semalunga Emakomidi Emagatja Kanye Nemakhosikati Awo

• Injongo: Kusita labo labasemaKomidini Emagatja kutsi bawufeze kancono umsebenti wekunakekela imindeni yaseBethel, kunakekela tindzaba letitsintsa emabandla, kwengamela tifundza netigodzi letingephansi kweligatja labo, kuhumusha, kushicilela, kutfumela tincwadzi emabandleni kanye nekunakekela emahhovisi lehlukehlukene.—Luk. 12:48b.

• Sikhatsi Lesitsatfwako: Tinyanga letimbili.

• Indzawo: EMelika, eWatchtower Educational Center, lesePatterson, eNew York.

• Loko Lokudzingekako: Kuba ngemalunga eKomidi yeLigatja nobe eKomidi yeLive nobe labo lababelwe kutsi babe ngiwo.

• Indlela Yekusingenela: Bazalwane labafanelekako kanye nebafati babo bamenywa Sigungu Lesibusako.

[Footnotes]