Kucecesha Tikhonti TeMbuso

1-3. Jesu wawutfutfukisa njani umsebenti wekushumayela, futsi loko kusenta sitibute miphi imibuto?

KWAPHELA iminyaka lemibili Jesu ashumayela eGalile. (Fundza Matewu 9:35-38.) Wavakashela emadolobha nemadolobhana lamanyenti afundzisa emasinagogeni futsi ashumayela tindzaba letimnandzi letimayelana neMbuso. Kuto tonkhe tindzawo labeshumayela kuto, ticumbi tebantfu betimtungeleta. Jesu wabona kutsi “umsebenti wekuvuna mkhulu” futsi bekudzingeka tisebenti letinyenti.

² Jesu wahlela kutfutfukisa umsebenti wekushumayela. Wakwenta njani loko? Ngekutsi atfume baphostoli bakhe labangu-12 kutsi “bayoshumayela ngeMbuso waNkulunkulu.” (Luk. 9:1, 2) Kungenteka kutsi labaphostoli batibuta kutsi batawenta njani lomsebenti. Ngaphambi kwekutsi abatfume, Jesu wabanika loko Babe wakhe wasezulwini lamnika kona​—wabacecesha.

³ Nayi imibuto lembalwa lesitibuta yona: Ngukuphi kuceceshwa Jesu lakutfola kuYise? Jesu wabanika kuphi kuceceshwa baphostoli bakhe? Kutsiwani ngalamuhla​—iNkhosi lenguMesiya ibaceceshile yini balandzeli bayo kutsi bente umsebenti wabo wekushumayela? Nangabe kunjalo, ikwente njani loko?

‘Ngikhuluma Njengobe Babe Angifundzisile’

4. Jesu wafundziswa nguBabe wakhe nini futsi kuphi?

⁴ Jesu wavuma ngalokucondzile kutsi wafundziswa nguBabe wakhe. Ngesikhatsi ashumayela lapha emhlabeni, watsi: “Letintfo ngitikhuluma njengobe Babe angifundzisile.” (Joh. 8:28) Jesu wafundziswa nini futsi kuphi? Kuyacaca kutsi kuceceshwa kwakhe kwacala ngemuva kwekudalwa kwakhe njengeNdvodzana yaNkulunkulu lelitibulo. (Khol. 1:15) Njengobe beyiseceleni kweYise ezulwini, leNdvodzana yacitsa iminyaka leminyenti ilalela futsi ibuka “uMfundzisi Lomkhulu.” (Isa. 30:20, NW.) Ngenca yaloko, leNdvodzana yatfola imfundvo leyendlula yonkhe ebuntfwini baBabe wayo, emisebentini kanye nasenjongweni yakhe.

5. Ngutiphi ticondziso Babe latinika iNdvodzana yakhe lebetimayelana nemsebenti wekushumayela lebeyitawenta emhlabeni?

⁵ Ngesikhatsi lesifanele, Jehova wafundzisa iNdvodzana yakhe ngemsebenti wekushumayela lebekufanele iwente emhlabeni. Cabanga ngesiphrofetho lesichaza buhlobo lobusemkhatsini weMfundzisi Lomkhulu neNdvodzana yakhe lelitibulo. (Fundza Isaya 50:4, 5.) Lesiphrofetho sitsi Jehova abevusa iNdvodzana yakhe “njalo nje ekuseni.” Lomfanekiso usenta sicabange ngathishela lovusa umfundzi wakhe ekuseni kute amfundzise. Lenye incwadzi lechaza liBhayibheli itsi: “Kuba shengatsi Jehova . . . utsatsa Jesu njengemfundzi wakhe amyise esikolweni kute amfundzise indlela lokufanele ashumayele ngayo naloko lokufanele akushumayele.” “Kulesikolwa” sasezulwini, Jehova wafundzisa iNdvodzana yakhe kutsi kufanele ‘ikhulume ini.’ (Joh. 12:49) Babe waphindze wanika iNdvodzana yakhe ticondziso tendlela yekufundzisa.a Ngesikhatsi Jesu alapha emhlabeni, akazange agcine ngekusebentisa loko labececeshwe kona emsebentini wakhe wekushumayela, kodvwa waphindze wacecesha balandzeli bakhe kutsi bente nemsebenti wabo wekushumayela.

6, 7. (a) Ngukuphi kuceceshwa Jesu lakunika baphostoli bakhe, futsi kwabasita kutsi benteni? (b) Jesu wahlela kutsi balandzeli bakhe balamuhla batfole kuphi kuceceshwa?

⁶ Njengobe sifundzile ekucaleni kwalesehluko, ngukuphi kuceceshwa Jesu lakunika baphostoli bakhe? Macondzana naloko lokushiwo nguMatewu sehluko 10, wabanika ticondziso leticacile tendlela yekushumayela, letihlanganisa leti letilandzelako: kutsi kufanele bashumayele kuphi (emavesi 5, 6), bacoce ngamuphi umlayeto (livesi 7), kubaluleka kwekwetsembela kuJehova (emavesi 9, 10), indlela yekucoca nemnikati wemuti (emavesi 11-13), loko lokufanele bakwente nabangemukelwa (emavesi 14, 15), nekutsi kufanele bente njani nabaphatfwa kabi (emavesi 16-23).b Lokuceceshwa lokucacile Jesu lakunika baphostoli bakhe kwabasita kutsi bahole emsebentini wekushumayela tindzaba letimnandzi ngesikhatsi sabo.

⁷ Kutsiwani ngalamuhla? Jesu, iNkhosi yeMbuso waNkulunkulu, unike balandzeli bakhe umsebenti lobaluleke kakhulu wekutsi bashumayele “letindzaba letimnandzi teMbuso . . . emhlabeni wonkhe, kuze kube bufakazi etiveni tonkhe.” (Mat. 24:14) INkhosi isiceceshile yini kutsi sente lomsebenti lobaluleke kakhulu? Yebo isiceceshile. Njengobe isezulwini, ihlelile kutsi balandzeli bayo batfole kuceceshwa endleleni yekushumayela ensimini, kanye nekufeza imisebenti lebalulekile ebandleni.

Kucecesha Tikhonti Kutsi Tibe Bavangeli

8, 9. (a) Iyini injongo leyinhloko yeSikolwa Semsebenti WemaKhristu? (b) Sikolwa Semsebenti WemaKhristu sikusite njani kutsi uphumelele emsebentini wakho wekushumayela?

⁸ Inhlangano yaJehova beyisolo isebentisa imihlangano lemincane, lemikhulu kanye neyelibandla​—lefaka ekhatsi uMhlangano Wemsebenti, kute iceceshe bantfu baNkulunkulu kutsi bente umsebenti wekushumayela. Nanobe kunjalo, kusukela ngabo-1940, bazalwane labacondzisako endlunkhulu bacala kuhlela kutsi kube netikolwa letehlukahlukene tekucecesha.

⁹ Sikolwa Semsebenti WemaKhristu. Njengobe sibonile esehlukweni lesendlulile, lesikolwa sacala kuchutjwa nga-1943. Injongo yalesikolwa kumane siceceshe bafundzi kutsi babeke tinkhulumo letiphumelelako yini emihlanganweni yelibandla? Cha. Injongo leyinhloko yalesikolwa ayikashintji, solo ikucecesha bantfu baNkulunkulu kutsi basebentise sipho sabo sekukhuluma kute badvumise Jehova ensimini. (Hla. 150:6) Lesikolwa sisita bonkhe bazalwane nabodzadze lababhalise kuso kutsi babe tikhonti teMbuso letiphumelelako.

10, 11. Bobani nyalo labangaya eSikolweni saseGileyadi, futsi iyini injongo yemfundvo letfolakala khona?

¹⁰ Sikolwa saseGileyadi. Lesikolwa lesesibitwa ngekutsi Sikolwa saseGileyadi sacala kuchutjwa ngeMsombuluko, ngaFebruary 1, 1943. Injongo yaso yasekucaleni bekukucecesha emahlahlandlela kanye naletinye tikhonti letenta umsebenti wasikhatsi sonkhe kutsi tibe titfunywa telivangeli emasimini lasemhlabeni wonkhe. Kodvwa kusukela nga-October 2011, kulesikolwa besekuya labo labenta umsebenti wasikhatsi sonkhe lokhetsekile kuphela​—lokufaka ekhatsi emahlahlandlela lakhetsekile, babonisi labajikeletako nemakhosikati abo, emalunga emndeni waseBethel kanye naletinye titfunywa telivangeli letingakake tiye kulesikolwa.

¹¹ Iyini injongo yemfundvo yeSikolwa saseGileyadi? Lomunye umzalwane losabe ngumchubi walesikolwa sikhatsi lesidze, uyaphendvula: “Kucinisa kukholwa kwebafundzi ngekutsi kufundzisiswe liVi laNkulunkulu, kanye nekubasita kutsi babe nesimilo lesitabenta babeketelele bumatima labahlangabetana nabo emsebentini wabo. Kantsi lenye injongo leyinhloko yalemfundvo kwenta labafundzi kutsi babe nesifiso lesikhulu sekuhlanganyela emsebentini webavangeli.”​—Ef. 4:11.

12, 13. Sikolwa saseGileyadi sibe namiphi imiphumela emsebentini wekushumayela wemhlaba wonkhe? Shano sibonelo.

¹² Sikolwa saseGileyadi sibe namiphi imiphumela emsebentini wekushumayela wemhlaba wonkhe? Kusukela nga-1943, sekuceceshwe bantfu labangetulu kwa-8 500 kulesikolwa,c futsi titfunywa telivangeli leticeceshwe eGileyadi tiyiswe emaveni langetulu kwa-170 emhlabeni wonkhe. Letitfunywa telivangeli tikusebentise kahle kuceceshwa kwato ngekutsi tibe sibonelo sekukhutsala ensimini tiphindze ticeceshe nalabanye kutsi bente lokufananako. Etikhatsini letinyenti, letitfunywa telivangeli ngito letiholako ekwenteni lomsebenti etindzaweni lapho kunebamemeteli labambalwa khona nobe lapho bangekho kwasanhlobo.

¹³ Cabanga ngaloko lokwenteka eJapan ngesikhatsi umsebenti wekushumayela lohleliwe ungasachubeki ngalokuphelele, emkhatsini neMphi Yelive Yesibili. Nga-August 1949, bekunebamemeteli labangephansi kwalabalishumi eJapan. Nanobe kunjalo, ngasekupheleni kwaloyo mnyaka, besekunetitfunywa telivangeli letingu-13 leticeceshwe eGileyadi lebetimatasatasa tishumayela eJapan. Kwafika naletinye titfunywa telivangeli. Ekucaleni, betishumayela emadolobheni lamakhulu, kodvwa ngemuva kwesikhatsi tatfutsela nakulamanye. Ngelutsandvo, letitfunywa telivangeli betikhutsata bantfu letibafundzelako kanye nalabanye kutsi babe ngemahlahlandlela. Imetamo yaletitfunywa telivangeli yekukhutsala yaba nemiphumela lemihle kakhulu. Nyalo sekunebamemeteli beMbuso labangetulu kwa-216 000 eJapan, futsi bantfu labangemaphesenti lacishe abe ngu-40 bangemahlahlandlela.d

14. Tikolwa tebuKhristu tibufakazi lobunemandla bani? (Fundza nelibhokisi lelitsi “Tikolwa Leticecesha Tikhonti TeMbuso,” ekhasini 188.)

¹⁴ Letinye tikolwa tebuKhristu. Sikolwa Semsebenti Semahlahlandlela, Sikolwa Lesisekelwe EBhayibhelini SemaKhristu Lashadene, kanye neSikolwa Lesisekelwe EBhayibhelini Sebazalwane Labangakashadi sisite labo labaya kuso kutsi babe nebuhlobo lobuhle naNkulunkulu futsi bahole ngenkhutsalo emsebentini webavangeli.e Tonkhe letikolwa tebuKhristu tibufakazi lobukhulu bekutsi iNkhosi yetfu ihlomise balandzeli bayo kutsi bafeze umsebenti wabo.​—2 Thim. 4:5.

Kucecesha Bazalwane Kutsi Bente Imisebenti Lekhetsekile

15. Emadvodza lanemtfwalo afisa kulingisa Jesu ngayiphi indlela?

¹⁵ Khumbula siphrofetho sa-Isaya lesitsi Jesu wafundziswa nguNkulunkulu. “Kulesikolwa” sasezulwini, leNdvodzana yafundza kuphendvula ‘ngelivi lekucinisa labamadvolo aba asaceka.’ (Isa. 50:4) Jesu wasisebentisa lesicondziso; ngesikhatsi alapha emhlabeni, wavuselela labo ‘labakhatsele nalabasindvwako.’ (Mat. 11:28-30) Balingisa Jesu, bazalwane labenta imisebenti letsite ebandleni banesifiso sekuvuselela bazalwane kanye nabodzadzewabo. Ngako kute bakhone kukwenta loko, kunetikolwa letehlukahlukene letentelwe kusita bazalwane labafanelekako kutsi baphumelele ekusiteni emakholwa labakanye nawo.

16, 17. Iyini injongo yeSikolwa Semsebenti WeMbuso? (Fundza nembhalo lochazako.)

¹⁶ Sikolwa Semsebenti WeMbuso. Likilasi lekucala lalesikolwa lacala ngaMarch 9, 1959, eSouth Lansing, eNew York. Babonisi labajikeletako kanye netinceku temabandla bamenywa kutsi baye kulesikolwa lesatsatsa inyanga yonkhe. Ngekuhamba kwesikhatsi, lemfundvo yahunyushelwa nakuletinye tilwimi isuselwa esiNgisini, futsi kancane kancane lesikolwa sacala kucecesha nebazalwane labasemhlabeni wonkhe.f

¹⁷ Mayelana nenjongo yeSikolwa Semsebenti WeMbuso, “INcwadi Yonyaka YoFakazi BakaJehova” ya-1962 yatsi: “Kulomhlaba lomatasatasa kakhulu, umbonisi welibandla laBoFakazi BaJehova kufanele abe yindvodza lekhonako kuhlela timo tayo kute ikhone kubanaka bonkhe ebandleni futsi ibe sibusiso kubo. Ngesikhatsi lesifanako, akukafaneli abe yindvodza lengawunaki umndeni wayo ngenca yekutsi unakekela libandla, kodvwa kufanele abe nengcondvo lebhadlile. Tinceku telibandla letisemhlabeni wonkhe tinikwe litfuba lelihle kakhulu lekuceceshwa eSikolweni Semsebenti WeMbuso, kute lesikolwa sitisite tikhone kwenta loko liBhayibheli lelitsi umbonisi kufanele akwente!”​—1 Thim. 3:1-7; Thit. 1:5-9.

18. Bonkhe bantfu baNkulunkulu bazuza njani eSikolweni Semsebenti WeMbuso?

¹⁸ Bonkhe bantfu baNkulunkulu bazuzile kuleSikolwa Semsebenti WeMbuso. Bazuze njani? Nangabe labadzala belibandla netinceku letisebentako basebentisa loko labakufundze kulesikolwa, njengaJesu, baba ngumtfombo wekuvuselela emakholwa labakanye nawo. Awuwajabuleli yini emavi lanemusa, kulalelwa nobe kuvakashelwa ngulomdzala lokhatsalelako nobe yinceku lesebentako kute ikukhutsate? (1 Thes. 5:11) Lamadvodza lafanelekako asibusiso lesikhulu emabandleni lakuwo.

19. Ngutiphi letinye tikolwa iKomidi Yekufundzisa leticondzisako, futsi leto tikolwa tilungiselelwe kutsi tenteni?

¹⁹ Letinye tikolwa tebuKhristu. IKomidi Yekufundzisa yeSigungu Lesibusako icondzisa letinye tikolwa leticecesha bazalwane labanemitfwalo enhlanganweni. Letikolwa tentelwe kusita bazalwane labanemitfwalo​—labafaka ekhatsi labadzala belibandla, babonisi labajikeletako kanye nemalunga eKomidi Yeligatja, kutsi bente imisebenti yabo ngemphumelelo. Lemfundvo lesekelwe eBhayibhelini letfolwa ngulabazalwane ibakhutsata kutsi balondvolote buhlobo babo naNkulunkulu futsi basebentise timiso temiBhalo nabanakekela timvu letiligugu Jehova labaphatsise tona.​—1 Phet. 5:1-3.

20. Kungani Jesu bekangatsi sonkhe ‘sifundziswa nguJehova,’ futsi yini lotimisele kuyenta?

²⁰ Kuyacaca kutsi iNkhosi lenguMesiya ihlelile kutsi balandzeli bayo baceceshwa kahle. Konkhe lokuceceshwa kwacala ezulwini kwase kuya emhlabeni: Jehova wacecesha iNdvodzana yakhe, leNdvodzana yase icecesha balandzeli bayo. Kungaleso sizatfu Jesu atsi sonkhe ‘sifundziswa nguJehova.’ (Joh. 6:45; Isa. 54:13) Asikusebentise ngekutimisela konkhe lokuceceshwa iNkhosi yetfu lesilungiselele kona. Asikhumbule nekutsi injongo leyinhloko yako konkhe lokuceceshwa, kusisita kutsi sibe nebuhlobo lobucinile naNkulunkulu kute sikhone kufeza umsebenti wetfu wekushumayela ngemphumelelo.