Kungani Jehova Anenhlangano?

1. Kungani Nkulunkulu ahlanganisa ema-Israyeli asendvulo?

Nkulunkulu wahlanganisa situkulwane sa-Abrahama, wasenta saba sive wabese usipha imitsetfo leminyenti. Lesive wasibita ngekutsi ngu-“Israyeli” futsi wasifaka enkholweni yeliciniso, wasinika nelivi lakhe. (Tihlabelelo 147:19, 20) Ngako-ke, bantfu bato tonkhe tive bebazuza kuma-Israyeli.​—Fundza Genesisi 22:18.

Nkulunkulu wakhetsa ema-Israyeli kutsi abe bofakazi bakhe. Lokwenteka emlandvweni wawo kukhombisa indlela bantfu lababusiswa ngayo ngekulalela imitsetfo yaNkulunkulu. (Dutheronomi 4:6) Ngako-ke, nalabanye babese bayamati Nkulunkulu weliciniso ngekubuka ema-Israyeli nangekufundza kulakwentako.​—Fundza Isaya 43:10, 12.

2. Kungani kwadzingeka kutsi kuhlanganiswe emaKhristu eliciniso?

Ngekuhamba kwesikhatsi, ema-Israyeli alahlekelwa ngumusa waNkulunkulu, futsi Jehova wasilahla lesosive, esikhundleni saso wafaka libandla lemaKhristu. (Matewu 21:43; 23:37, 38) Lamuhla, esikhundleni sema-Israyeli, emaKhristu eliciniso sengiwo laboFakazi BaJehova.​—Fundza Imisebenti 15:14, 17.

Jesu naye wahlanganisa balandzeli bakhe futsi wabatfuma kutsi bayoshumayela baphindze bente bantfu bato tonkhe tive babe bafundzi. (Matewu 10:7, 11; 24:14; 28:19, 20) Njengobe kuphela kwalelive sekutawufika, nalomsebenti nawo sewutawuphela. Kuyacala kwenteka emlandvweni kutsi Jehova ahlanganise tigidzi letisuka kuto tonkhe tive atihlanganisele ekukhonteni kweliciniso. (Sembulo 7:9, 10) EmaKhristu eliciniso alicembu lebantfu labamunye, labakhutsatanako futsi labasitanako. Emhlabeni wonkhe, bajabulela luhlelo lolufananako lwemfundvo yeliBhayibheli loluba semihlanganweni yabo yelibandla.​—Fundza Hebheru 10:24, 25.

3. Inhlangano yaboFakazi BaJehova yacala njani etikhatsini talamuhla?

Eminyakeni yangabo-1870 licembu lelincane lebafundzi beliBhayibheli latfola emaciniso eliBhayibheli labesanesikhatsi lesidze alahleka. Ngesizatfu sekutsi belati kutsi Jesu watfuma libandla lebuKhristu kutsi liyoshumayela, lelicembu lase licala umsebenti wekushumayela ngeMbuso emhlabeni wonkhe. Nga-1931 lacala kubitwa ngekutsi boFakazi BaJehova.​—Fundza Imisebenti 1:8; 2:1, 4; 5:42.

4. Bahleleke njani boFakazi BaJehova?

Kadzeni, emaveni lamanyenti libandla lemaKhristu belitfola ticondziso letisuka esigungwini lesibusako lebesicaphela kutsi Jesu uyiNhloko yelibandla. (Imisebenti 16:4, 5) Ngendlela lefananako, boFakazi BaJehova emhlabeni wonkhe batfola ticondziso eSigungwini Lesibusako lesakhiwa madvodza lasanelwati lolunyenti. LeSigungu sinakekela emahhovisi emagatja aboFakazi BaJehova lenta umsebenti wekuhumusha, kushicilela, kanye nekusakata tincwadzi letitsetfwe kulokushiwo liBhayibheli, naletihunyushelwa etilwimini letingetulu kwa-600. Ngaleyondlela Sigungu Lesibusako siniketa sikhutsato nesicondziso emabandleni langetulu kwa-100 000 emhlabeni wonkhe. Libandla ngalinye linemadvodza labekiwe langulabadzala nobe babonisi. Lamadvodza ayawutsandza umhlambi waNkulunkulu futsi ayawunakekela.​—Fundza 1 Phetro 5:2, 3.

BoFakazi BaJehova baniketwe umsebenti wekushumayela tindzaba letimnandzi newekwenta bantfu babe bafundzi. Njengebaphostoli, natsi sishumayela umuti nemuti. (Imisebenti 20:20) Siphindze sifundze liBhayibheli nebantfu labatsandza Nkulunkulu. Kodvwa boFakazi BaJehova akusiko kutsi bamane nje bayinhlangano. Bangumndeni munye lonaBabe lonelutsandvo. Sibazalwane nabodzadze labakhatsalelanako. (2 Thesalonika 1:3) Njengobe bantfu baJehova bajabulisa Nkulunkulu futsi basitana, loko kwenta kutsi babe ngumndeni lojabula kakhulu emhlabeni.​—Fundza Tihlabelelo 33:12; Imisebenti 20:35.