Ungayitfutfukisa Inkhumbulo Yakho

JEHOVA NKULUNKULU wadala ingcondvo yemuntfu ngendlela lemangalisako kute ikwati kukhumbula. Wayenta yaba njengelithange lokungakhiwa kulo emanti kodvwa kungenteki lisale lingenalutfo. Indlela ingcondvo leyakheke ngayo ivumelana nenjongo yaNkulunkulu yekutsi bantfu baphile phakadze.​—Hla. 139:14; Joh. 17:3.

Nanobe kunjalo, ungase uve shengatsi lokunyenti lokufaka engcondvweni yakho uyakukhohlwa. Nasewukudzinga, uvele ungakukhumbuli. Ngako-ke, yini longayenta kute utfutfukise inkhumbulo yakho?

Bani Nelutsandvo

Kuba nelutsandvo kusici lesibalulekile sekutfutfukisa inkhumbulo. Ingcondvo yetfu iyatsintseka nangabe sikwenta umkhuba kunakisisa, futsi sibe nendzaba nebantfu kanye naloko lokwentekako. Ngaleso sizatfu, kutawuba melula ngatsi kutinaka ngendlela lefananako tintfo letibalulekile lesitifundzako nobe lesitivako.

Kuvamile kutsi umuntfu akutfole kumatima kukhumbula emabito ebantfu. Nanobe kunjalo, njengobe tsine singemaKhristu, siyati kutsi bantfu babaluleke kangakanani​—emaKhristu lesikanye nawo, bantfu lesifakaza kubo kanye nalabo lesisebentelana nabo ekuphileni kwamalanga onkhe. Yini lengasisita kutsi sikhumbule emabito ebantfu? Umphostoli Pawula wababita ngemabito bantfu labangu-26 belibandla lalibhalela. Lutsandvo lwakhe ngabo lwabonakala ngekutsi angagcini nje ngekusho emabito abo, kodvwa akhulume nangetintfo letimayelana nabo. (Rom. 16:3-16) KuBoFakazi BaJehova lamuhla, kunebabonisi labajikeletako labakhona kukhumbula emabito ebantfu, nanobe bahambela emabandla lehlukehlukene liviki ngalinye. Yini lebasitako? Nabakhuluma nemuntfu kwekucala, betama kusebentisa libito lakhe tikhatsi letinyenti. Benta imetamo yekuhlobanisa libito lemuntfu nebuso bakhe. Ngetulu kwaloko, bacitsa sikhatsi nebamemeteli labehlukehlukene nabasensimini kanye nalapho babamemele kutsi badle ndzawonye. Nakwenteka uhlangana nemuntfu, utawulikhumbula yini libito lakhe? Cala ngekuba nesizatfu sekukhumbula libito lakhe; ngemuva kwaloko, yetama kusebentisa lamaphuzu lavetwe ngenhla.

Kubalulekile nekutsi ukukhumbule loko lokufundzako. Yini lengakusita kutsi utfutfuke kuloku? Kukutsandza loko lokufundzako kanye nekukucondza kudlala indzima lebalulekile. Kufanele ukutsandze loko lokufundzako kute ukwati kukunaka ngalokugcwele. Angeke ukwati kukugcina engcondvweni yakho kwatiswa lokufundzako nangabe ucabanga ngaletinye tintfo. Kucondza kuyatfutfuka nangabe uhlobanisa loko lokufundzako netintfo lotetayele nobe ukuhlobanise nelwati losewuvele unalo. Tibute: ‘Ngingakusebentisa njani futsi nini lokwatiswa ekuphileni kwami? Ngingakusebentisa njani kute ngisite labanye?’ Ungaphindze ukutfutfukise kucondza ngekutsi ufundze imisho, kunekutsi ubale emagama. Nawenta njalo, utawukwati kusheshe ucondze kutsi kukhulunywa ngani futsi uwabone nemaphuzu labalulekile, bese kuba melula kuwakhumbula.

Tinike Sikhatsi Sekubuketa

Tati tetemfundvo tiyakugcizelela kubaluleka kwekubuketa. Kulolunye lucwaningo, lomunye phrofesa wasekolishi waveta kutsi kubuketa umzuzu munye kungenta kutsi likhule lizinga lekwatiswa lokukhumbulako. Ngako-ke, ngekushesha nawucedza kufundza indzima letsite​—lencane nobe lenkhulu—​buketa ngengcondvo imicondvo leyinhloko kute uyigcine engcondvweni yakho. Cabanga ngendlela longawachaza ngayo ngemavi akho emaphuzu lamasha lowafundzile. Nawutikhumbuta ngekushesha ngemuva kwekufundza liphuzu lelitsite, utawukhona kulikhumbula sikhatsi lesidze.

Ngemuva kwemalanga lambalwa, funa ematfuba ekubuketa loko lokufundzile ngekutsi ukucocele labanye. Bantfu longabacocela bafaka ekhatsi emalunga emndeni wakho, lotsite ebandleni, losebenta naye, lofundza naye, makhelwane wakho nobe umuntfu lomtfola ensimini. Yetama kungagcini ngekukhuluma ngemaphuzu layinhloko nje kuphela, kodvwa coca nangemiBhalo lehambisana nawo. Kwenta njalo kutawukusita kutsi ukhone kukhumbula tintfo letibalulekile, futsi kutawubasita nalabanye bantfu.

Zindla Ngetintfo Letibalulekile

Ngetulu kwekubuketa loko lokufundzile kanye nekukucocela labanye, utawutfola kutsi kuyazuzisa kuzindla ngetintfo letibalulekile lotifundzile. Babhali beliBhayibheli, bo-Asafa naDavide bakwenta loko. Asafa watsi: “Ngitase ngikhumbule imisebenti yaNkulunkulu, yebo, ngikhumbule netimangaliso takho tasendvulo. Ngitawucabangisisa ngawo wonkhe umsebenti wakho, ngijinge ngicabange ngemisebenti yakho yemandla.” (Hla. 77:11, 12) Davide naye wabhala watsi: “Nangicwashile ebusuku ngizindla ngawe,” futsi “ngikhumbula emalanga asendvulo. Ngizindla ngemisebenti yakho yonkhe.” (Hla. 63:6; 143:5) Wena uyakwenta yini loku?

Kucabanga lokujulile nekuzindla ngetento taJehova, bunguye bakhe kanye nendlela lasikhombisa ngayo intsandvo yakhe, kukusita kutsi ungagcini nje ngekukhumbula loko lokufundzile. Nawukwenta umkhuba kucabanga ngaleyo ndlela, kutawukwenta kutsi tintfo letibaluleke kakhulu tihlale enhlitiyweni yakho. Kutawukwenta kutsi utfutfukise luhlobo lwemuntfu longilo. Tintfo lotikhumbulako titawuveta imicabango yakho lejulile.​—Hla. 119:16.

Indzima Yemoya WaNkulunkulu

Kukhona lokungasisita sikwati kukhumbula emaciniso lamayelana netento taJehova kanye netintfo letakhulunywa nguJesu Khristu. Ngebusuku bekugcina ngembikwekufa kwakhe, naku Jesu lakutjela balandzeli bakhe: “Letintfo ngitikhulume kini ngesikhatsi ngisenani. Kodvwa umsiti, lokungumoya longcwele, loyo Babe latawutfumela ngeligama lami, utanifundzisa tonkhe tintfo futsi unikhumbute konkhe lenganitjela kona.” (Joh. 14:25, 26) BoMatewu kanye naJohane bebakhona ngesikhatsi Jesu asho lamavi. Wabasita yini umoya longcwele? Yebo, wabasita! Eminyakeni lesiphohlongo ngemuva kwaloko, Matewu wacedza kubhala kulandzisa kwekucala lokumayelana nekuphila kwaKhristu. Lokulandzisa, bekuhlanganisa iNshumayelo YaseNtsabeni kanye nekwatiswa lokubanti mayelana nesibonakaliso sekuba khona kwaKhristu nesekuphela kwalelive lelibi. Ngemuva kweminyaka lengu-65 Jesu afa, umphostoli Johane wabhala liVangeli lakhe, lebelihlanganisa imininingwane yaloko Jesu lakusho ngebusuku bekugcina labucitsa nebaphostoli bakhe ngembikwekutsi anikele ngekuphila kwakhe. Nanobe boMatewu kanye naJohane bebatikhumbula kahle tintfo Jesu latisho futsi watenta ngesikhatsi anabo, umoya longcwele wadlala indzima lenkhulu kute uciniseke kutsi abayikhohlwa imininingwane lebalulekile Jehova labefuna ibhalwe eVini lakhe.

Umoya longcwele uyatisita yini tinceku taNkulunkulu lamuhla? Yebo uyatisita! Umoya longcwele ngeke usente sati tintfo lesingakake satifundza, kodvwa usebenta njengemsiti kute usente sikhumbule tintfo letibalulekile lesike satifundza esikhatsini lesendlulile. (Luk. 11:13; 1 Joh. 5:14) Ngako-ke, nakuvela sidzingo, tingcondvo tetfu tiyakhona ‘kukhumbula emavi labeshiwo baphrofethi labangcwele, kanye nemyalo weNkhosi neMsindzisi.’​—2 Phet. 3:1, 2.

‘Ungakhohlwa’

Jehova wawecwayisa ngalokuphindziwe ema-Israyeli, watsi: ‘Ningakhohlwa.’ Loku akusho kutsi abelindzele kutsi ema-Israyeli atikhumbule kahle tonkhe tintfo. Nanobe kunjalo, bekusho kutsi bekungakafaneli anake kakhulu tintfo tawo agcine asakhohliwe ngemisebenti yaJehova. Bekufanele akhumbule indlela Jehova lawakhulula ngayo ngesikhatsi ingilosi yakhe ibulala onkhe ematubulo aseGibhithe, nangesikhatsi Jehova ehlukanisa Lwandle Lolubovu aphindze alubuyisela endzaweni yalo, wenta kutsi Faro nelibutfo lakhe bamite. Ema-Israyeli bekufanele akhumbule kutsi Nkulunkulu wawaniketa uMtsetfo wakhe eNtsabeni iSinayi, nekutsi wawahola ehlane wawayisa eVeni Lesetsembiso. Bekungakafaneli akhohlwe kutsi kukhumbula letintfo bekutawuchubeka kutsintsa kuphila kwawo kwamalanga onkhe.​—Dut. 4:9, 10; 8:10-18; Eks. 12:24-27; Hla. 136:15.

Natsi kufanele sigadze kutsi singakhohlwa. Njengobe simelana netinkhatsato tekuphila, kufanele singamkhohlwa Jehova, sikhumbule luhlobo lwaNkulunkulu langilo kanye nelutsandvo lasikhombise lona ngekusipha iNdvodzana yakhe, leyasihlawulela tono tetfu kute sitfole kuphila lokuphakadze sesite sono. (Hla. 103:2, 8; 106:7, 13; Joh. 3:16; Rom. 6:23) Kufundza liBhayibheli malanga onkhe, kuhlanganyela emihlanganweni yelibandla kanye nasensimini, kutawusenta kutsi sihlale siwakhumbula lamaciniso laligugu.

Nakufanele wente tincumo, letincane nobe letinkhulu, kufanele ukhumbule lamaciniso labalulekile futsi uwavumele atsintse indlela locabanga ngayo. Ungakhohlwa. Tsembela kuJehova kute akucondzise. Kunekutsi ubuke tintfo ngembono wenyama nobe wetsembele enhlitiyweni yakho lenesono, tibute: ‘Ngusiphi secwayiso nobe simiso lesiseVini laNkulunkulu lokufanele sitsintse sincumo sami?’ (Taga 3:5-7; 28:26) Angeke utikhumbule tintfo longakake watifundza nobe wativa. Kodvwa njengobe ukhula elwatini lweliciniso kanye nasekutsandzeni Jehova, kuba kunyenti loko umoya waNkulunkulu lotawukusita kutsi ukukhumbule, futsi lutsandvo lwakho ngaJehova lolukhulako lutakubangela kutsi ukusebentise ekuphileni kwakho.