Kufundza Emagama Njengobe Anjalo

IMIBHALO itsi kuyintsandvo yaNkulunkulu kutsi tonkhe tinhlobo tebantfu ‘titfole lwati lolungulonalona lweliciniso.’ (1 Thim. 2:4) Ngekuvumelana naloko, nasifundza liBhayibheli ngelivi lelivakalako sifiso setfu sekundlulisela lwati lolungulonalona kufanele sitsintse indlela lesifundza ngayo.

Likhono lekufundza liBhayibheli ngalokuvakalako kanye netincwadzi letilichazako, libalulekile kubo bonkhe bantfu, labasha kanye nalabadzala. Njengobe siBoFakazi BaJehova, sinemtfwalo wekunika labanye lwati ngaJehova kanye nangetindlela takhe. Esikhatsini lesinyenti loku kufaka ekhatsi kufundzela umuntfu munye nobe licembu lelincane. Siphindze sifundze nalapho sinemindeni yetfu. ESikolweni Semsebenti WemaKhristu, bazalwane nabodzadze, labasha kanye nalabadzala, batfola ematfuba ekutsi banikwe seluleko lesitabasita kutsi batfutfuke ekufundzeni ngalokuvakalako.

Kufundzela labanye bantfu liBhayibheli kufanele sikutsatse njengalokubalulekile, kungaba kunasifundzela umuntfu munye nobe libandla. LiBhayibheli liphefumulelwe nguNkulunkulu. Ngetulu kwaloko, “livi laNkulunkulu liyaphila, linemandla . . . futsi liyakwati kucondza imicabango netinhloso tenhlitiyo.” (Heb. 4:12) LiVi laNkulunkulu licuketse lwati lolubaluleke kakhulu lolungatfolakali kulomunye umtfombo. Lingamsita umuntfu kutsi amati Nkulunkulu weliciniso lokukuphela kwakhe aphindze abe nebuhlobo lobuhle naye, aphumelele nasekubeketeleleni tinkinga ekuphileni. Lichaza indlela leya ekuphileni lokuphakadze eveni lelisha laNkulunkulu. Ngaleso sizatfu, umgomo wetfu kufanele kube kulifundza kahle liBhayibheli.​—Hla. 119:140; Jer. 26:2.

Indlela Yekufundza Emagama Njengobe Anjalo. Kufundza ngendlela lezuzisako kufaka ekhatsi tintfo letinyenti, kodvwa sinyatselo sekucala kutsi uwafundze njengobe anjalo emagama. Loku kudzinga kutsi utimisele kuze ukufundze njengobe kunjalo loko lokubhaliwe. Caphela kutsi ungaweci emagama, futsi ungawajubi nobe uwafundze kabi ngesizatfu sekutsi afanana nalamanye.

Kuze uwafundze kahle emagama kufanele ukucondzisise loko lokucuketfwe nguleyo ndzinyana. Loku kutawudzinga kutsi ulungiselele ngekucophelela. Njengobe utfutfukisa likhono lekubuka emagama lamanyenti nawufundza uphindze ucondze kuhlangana kwemicondvo, utawukhona kuwafundza njengobe anjalo emagama.

Timphawu tenkhulumo tibalulekile kuloko lokubhaliwe. Tingase tivete kutsi ngukuphi lapho kufanele uhlabe khona likhefu, nekutsi ulihlabe kangakanani kanye nalapho kudzingeka ushintjashintje khona livi. Kuletinye tilwimi kwehluleka kushintja livi etimphawini letitsite tenkhulumo kungase kushintje umbuto ube ngumusho nobe kushintje inchazelo. Ngaletinye tikhatsi, timphawu tenkhulumo titsintsa imitsetfo yelulwimi. Etilwimini letinyenti angeke ukhone kuwafundza njengobe anjalo emagama nangabe ungatinaki timphawu letiba ngetulu kwetinhlavu temagama, letifaka ekhatsi leto letibhaliwe naleto lotitfola engcikitsini yendzaba. Letimphawu tiyayitsintsa indlela lobita ngayo tinhlavu temagama lapho tivela khona. Ciniseka kutsi uyetayelana nendlela timphawu tenkhulumo letisetjentiswa ngayo elulwimini lwakho. Lena yindlela lemcoka lengakusita kutsi ufundze ngendlela lezuzisako. Khumbula kutsi umgomo wakho kufanele kube kwendlulisela umcondvo hhayi kumane nje ubite emagama.

Kudzingeka kutsi uphrakthize kuze ukhone kufundza emagama njengobe anjalo. Fundza sigaba sinye, ngemuva kwaloko usiphindze tikhatsi letimbalwa kuze kube ngulapho sewusifundza ngaphandle kwekwenta emaphutsa. Ngemuva kwaloko, fundza sigaba lesilandzelako. Ekugcineni timisele kufundza yonkhe indzaba ngaphandle kwekweca emagama, kuwaphindza nobe kuwafundza kabi. Ngemuva kwekusebentisa tonkhe letindlela, cela lotsite kutsi akulalele nawufundza aphindze akutjele emaphutsa lokungenteka uwentile.

Kuletinye tindzawo inkinga yemehlo kanye nekuba bete tintfo tekukhanyisa, kubangela kutsi bantfu bafundze kamatima. Nangabe ikhona indlela yekulungisa letimo, utawukhona kutfutfukisa indlela lofundza ngayo.

Ngekuhamba kwesikhatsi bazalwane labafundza kahle bangase babelwe kutsi bafundze tigaba eSifundvweni SeliBhayibheli Selibandla nese-Sicongosekulindza. Kuze basifeze kahle leso sabelo, kudzingeka bente lokungetulu kwekumane nje babite kahle emagama. Kuze ufundzele libandla ngendlela lezuzisako, kudzingeka ube nemikhuba lemihle nawutifundzela wena. Loku kufaka ekhatsi kubona indlela ligama ngalinye lelibaluleke ngayo emshweni ngamunye. Nangabe ungawabiti lamanye awo, ngeke kwenteke kutsi ukucondze kahle loko lokushiwoko. Nawuwafundza kabi emagama ngisho nobe utifundzela wena, inchazelo yemusho itawushintja. Kufundza kabi kungase kube ngumphumela wekungatinaki timphawu letisetikwetinhlavu temagama nobe kungayinaki indlela emagama lasetjentiswe ngayo. Yenta imetamo yekucondza lokushiwo ligama ngalinye emshweni lelikuwo. Phindze unake indlela timphawu tenkhulumo letikutsintsa ngayo loko lokushiwo ngumusho. Khumbula kutsi imicondvo ivame kuvetwa ngemagama landzawonye. Kunake loko kuze nawufundzela linyenti ufundze emagama uwahlanganise kunekutsi umane nje ufundze ligama ngalinye. Kukucondza kahle loko lokufundzako kusinyatselo lesibalulekile lesiholela ekutseni wendlulisele lwati lolungulonalona nawufundzela linyenti.

Umphostoli Pawula wabhalela lomdzala lonalokuhlangenwe nako lamavi lalandzelako: “Chubeka utimisela ekufundzeleni linyenti.” (1 Thim. 4:13) Sonkhe sinelitfuba lekutfutfukisa indlela lesifundza ngayo.