Iyakha futsi Ilusito

SITFUNYWE kutsi sishumayele tindzaba letimnandzi. Jesu watsi: ‘Tindzaba letimnandzi kufanele tishunyayelwe etiveni tonkhe kucala.’ (Mak. 13:10) Jesu wasibekela sibonelo ngekushumayela ‘tindzaba letimnandzi teMbuso waNkulunkulu.’ (Luk. 4:43) Netindzaba baphostoli lebebatishumayela tichazwa ngekutsi ‘tindzaba letimnandzi taNkulunkulu’ nangekutsi “tindzaba letimnandzi ngaKhristu.” (1 Thes. 2:2; 2 Khor. 2:12) Tindzaba letinjalo tiyakha futsi tilusito.

Ngekuvumelana ‘netindzaba letimnandzi taphakadze’ lebetimenyetelwa ‘yingilosi lendiza emoyeni,’ sincusa bantfu sitsi: “Mesabeni Nkulunkulu nimnike inkhatimulo.” (Semb. 14:6, 7) Sitjela bantfu kuto tonkhe tindzawo ngaNkulunkulu weliciniso, ngelibito lakhe, buntfu bakhe lobumangalisako, tintfo letimangalisako latentile, injongo yakhe yelutsandvo, kutsi sitawulandzisa kuye, kanye nangaloko lakulindzele kitsi. Letindzaba letimnandzi tifaka ekhatsi kutsi Jehova Nkulunkulu utawubhubhisa bantfu lababi, labangamhloniphi futsi labenta labanye baphile kabuhlungu. Kodvwa-ke akusiwo umsebenti wetfu kutsi sehlulele bantfu lesishumayela kubo. Sifiso setfu kutsi bantfu labanyenti bakwemukele loko lokuseBhayibhelini kuze vele kutawuba tindzaba letimnandzi kubo.​—Taga 2:20-22; Joh. 5:22.

Nciphisa Tindzaba Letimbi. Kuliciniso kutsi tikhona tintfo letimbi ekuphileni, futsi asenti shengatsi asitiboni. Kuze ucale kucoca nemuntfu, ungase uvete inkinga lesetingcondvweni tebantfu basensimini yenu futsi ucoce ngayo kafishane. Kodvwa akuzuzisi kucoca ngayo sikhatsi lesidze. Bantfu bavamile kuva tindzaba letimbi, ngako kukhuluma ngetintfo letinjalo kungababangela kutsi bangakulaleli. Nawusandza kucala nje kucoca naye, mkhombise emaciniso lakhutsatako laseVini laNkulunkulu. (Semb. 22:17) Ngisho nobe lomuntfu angafuni kuchubeka akhuluma nawe, utawube umshiyele lokutsite lokwakhako latawusala acabanga ngako. Loku kungamenta kutsi alalele ngesikhatsi lesitako.

Ngendlela lefanako, nawetfula inkhulumo kufanele ungakhulumi kakhulu ngetintfo letimbi ngenca nje yekutsi leto tintfo tikhona. Nangabe sikhulumi sikhuluma kakhulu ngekwehluleka kwebabusi lababantfu, imibiko yebugebengu nebudlova kanye nekwandza lokumangalisako kwekutiphatsa lokubi, kungabacedza emandla labo labalalele. Tindzaba letimbi tifake kuphela nangabe titawufeza lokutsite lokulusito. Nangabe kwatiswa lokunjalo ukufaka kancane, loko kutawugcizelela kutsi inkhulumo yakho ihambisana nesikhatsi. Kungaphindze kuvete letinye tintfo letibanga simo lesitsite futsi kukhombise nekutsi kungani sisombululo lesivetwa liBhayibheli sisebenta. Nakungenteka, shano leyo nkinga ngalokucondzile kodvwa ungahlali kuyo kakhulu.

Esikhatsini lesinyenti ngeke kwenteke kutsi ungatifaki ngalokuphelele tindzaba letimbi enkhulumeni, futsi loku akukafaneli ukwente. Kodvwa inkinga leba khona kutsi utawutihlanganisa njani letindzaba letimbi kanye naleto letinhle kuze ekugcineni umphumela ube muhle. Kuze uphumelele ekwenteni loku, kufanele uncume kutsi yini lotayifaka kanye nalotayikhipha, nekutsi kukuphi lapho utawugcizelela khona. ENshumayelweni Yasentsabeni, Jesu wancusa labo lebebamlalele kutsi bangatibeki phambili njengobe bekwenta babhali kanye nebaFarisi, futsi washo tibonelo letimbalwa kuze acacise loku. (Mat. 6:1, 2, 5, 16) Kodvwa-ke kunekutsi akhulume kakhulu ngesibonelo lesibi salabaholi benkholo, wagcizelela sidzingo sekucondza tindlela taNkulunkulu letiliciniso kanye nekutilandzela. (Mat. 6:3, 4, 6-15, 17-34) Umphumela waloku waba muhle kakhulu.

Khuluma Ngendlela Lekhutsatako. Nangabe wabelwe kwetfula inkhulumo ebandleni lemayelana nemsebenti lotsite webuKhristu, timisele kutsi uyetfule ngendlela lekhutsatako hhayi ngendlela legcekako. Ciniseka kutsi nawe uyakwenta loko lokhutsata labanye kutsi bakwente. (Rom. 2:21, 22; Heb. 13:7) Loko lokushoko kufanele ukusho ngobe ukhutsatwa lutsandvo hhayi intfukutselo. (2 Khor. 2:4) Nawuciniseka kutsi emaKhristu lokanye nawo afuna kujabulisa Jehova, loko kuciniseka kutawubonakala kuloko lokushoko, kantsi nemphumela utawuba muhle kakhulu. Naka kutsi umphostoli Pawula wakuveta njani kuciniseka lokunjalo encwadzini ya-1 Thesalonika 4:1-12; 2 Thesalonika 3:4, 5; kanye neyaFilemoni 4, 8-14, 21.

Ngaletinye tikhatsi kuyadzingeka kutsi labadzala becwayise libandla ngekutiphatsa lokubi. Kodvwa kutfobeka kutawubasita kutsi bakhulumisane ngemoya lomuhle nebazalwane babo. (Gal. 6:1) Indlela labakhuluma ngayo kufanele ikhombise kutsi bayalihlonipha libandla. (1 Phet. 5:2, 3) LiBhayibheli leluleka emadvodza lasemasha kutsi akunake kakhulu loku. (1 Thim. 4:12; 5:1, 2; 1 Phet. 5:5) Nakudzingeka kutsi bakhalime, bayale, balungise tintfo, loku kufanele bakwente basebentisa loko lokushiwo liBhayibheli. (2 Thim. 3:16) Sikhulumi akukafaneli siwente ngenkhani umBhalo kutsi uhambisane neliphuzu lesilitsandzako nobe siwusontse. Ngisho nobe kudzingeka kutsi kukhishwe seluleko, inkhulumo ingachubeka yetfulwa ngendlela leyakhako nangabe sikhulumi sigcizelela kakhulu kutsi singakubalekela njani kwenta lokubi, singaticatulula njani tinkinga, singabhekana njani nebumatima, singakuyekela njani lokubi, nekutsi loko Jehova lakulindzele kitsi kusivikela njani.​—Hla. 119:1, 9-16.

Nawulungiselela inkhulumo yakho, cabangisisa ngekutsi liphuzu ngalinye leliyinhloko utawuliphetsa njani kanye nenkhulumo yakho yonkhe. Loko lokusho ekugcineni kukhumbuleka sikhatsi lesidze. Siphetfo sakho utawusenta sakhe yini?

Nasikhuluma Nalamanye EmaKhristu. Tinceku taJehova tiyawajabulela ematfuba ekuba nalamanye emaKhristu emihlanganweni. Leti tikhatsi tekukhutsatana ekukholweni. LiBhayibheli lisikhutsata kutsi sikhumbule ‘kukhutsatana’ nasisetindzaweni lesikhontela kuto. (Heb. 10:25) Loku asikwenti kuphela ngetinkhulumo nangekuphendvula kulemihlangano, kodvwa sikwenta nangekucoca ngaphambi kanye nangemuva kwayo.

Nanobe kuvamile kutsi nasicoca sikhulume ngekuphila kwetfu kwamalanga onkhe, sikhutsateka kakhulu nangabe sikhuluma ngetintfo letihlobene nekukhonta kwetfu Nkulunkulu. Letintfo tifaka ekhatsi lokuhlangenwe nako lesikutfola nasenta umsebenti waJehova. Kukhombisa kutsi siyakhatsalelana nako kuyasakha.

Ngenca yalelive lesiphila kulo, kudzingeka sicaphele. Nakabhalela emaKhristu ase-Efesu, Pawula watsi: “Njengobe seniwalahlile emanga, nguloyo naloyo akakhulume liciniso kumakhelwane wakhe.” (Ef. 4:25) Kukhuluma liciniso kufaka ekhatsi kungatidvumisi tintfo kanye nebantfu lelive lelibatsandza kakhulu. Ngendlela lefanako, Jesu wecwayisa mayelana ‘nekuyenga kwemcebo.’ (Mat. 13:22) Ngako nasicoca, kufanele sicaphele singatfutfukisi umcebo, siwente ubonakale shengatsi uyintfo lenhle.​—1 Thim. 6:9, 10.

Nakakhutsata ngesidzingo sekutsi sakhane, umphostoli Pawula usincusa kutsi singamehluleli nobe simbukele phansi umzalwane longatenti tintfo letitsite ngenca ‘yebutsakatsaka ekukholweni,’ lokubangelwa kutsi akayicondzi kahle inkhululeko yebuKhristu. Kuze loko lesikushoko kubakhutsate labanye, natsi kufanele siticabangele timo tabo kanye nelizinga lasebatfutfuke ngalo ekukholweni. Kungaba buhlungu kubeka “lutfo lolungakhuba umzalwane [nobe dzadze] nobe lube ngumcabo kuye.”​—Rom. 14:1-4, 13, 19.

Labo labaphetfwe tinkinga, njengekugula lokungapheli, bayakujabulela kutsi sibakhe nasicoca nabo. Umuntfu lonjalo angatikhandla kuze abe khona emihlanganweni. Labo labatiko ngesimo sakhe bangase bambute batsi: “Utiva njani?” Akungabateki kutsi utakujabulela kumkhatsalela labambonisa kona. Kodvwa-ke kungenteka akatsandzi kukhuluma ngemphilo yakhe. Emavi ekumbonga nekumkhutsata angamdvudvuta kakhulu. Kukhona yini lokubonako lokukhombisa lutsandvo lwakhe ngaJehova kanye nekubeketela kwakhe ngaphansi kwalesimo lesimatima lakuso? Uyakhutsateka yini nakaphendvula emihlanganweni? Ngeke yini kumkhutsate kutsi ukhulume ngetintfo letinhle latentako kanye naloko lakwentela libandla, kunekutsi ukhulume ngaloko langakhoni kukwenta?​—1 Thes. 5:11.

Kuze sakhe labanye nasicoca, kubaluleke kakhulu kutsi sinake loko Jehova lakushoko ngaleyo ndzaba lesikhuluma ngayo. Ka-Israyeli wasendvulo, Nkulunkulu wabatfukutselela labo labakhuluma kabi ngebantfu lebebamelela Jehova nalabakhonona ngemana. (Num. 12:1-16; 21:5, 6) Sisuke sikhombisa kutsi sizuzile kuleto tibonelo nangabe sihlonipha labadzala futsi siyijabulela indlela Nkulunkulu lasondla ngayo ngelwati asebentisa sisebenti lesetsembekile nalesihlakaniphile.​—1 Thim. 5:17.

Akusimatima kutfola tintfo letizuzisako lesingacoca ngato nasinebazalwane betfu. Kodvwa-ke nangabe umuntfu agceka, wena tsatsa sinyatselo ufake lokutsite lokwakhako leningacoca ngako.

Ngisho nobe sifakaza kulabanye, setfula inkhulumo, nobe sicoca nebazalwane betfu, shengatsi singakhombisa kucondza kuze sikhiphe etinhlitiyweni tetfu “loko lokulungele kwakha kuye ngesidzingo, kuze kuniketwe lokulusito kulabo labalalele.”​—Ef. 4:29.