Siphetfo Lesiphumelelako

KUNGENTEKA ukucwaningisise kahle kwatiswa kwenkhulumo yakho futsi wakuhlela kahle. Kungenteka nekutsi ulungiselele setfulo lesitawukwenta labo lotawube ukhuluma nabo babe nesifiso sekulalela. Kodvwa-ke kukhona lokusadzingeka​—siphetfo lesiphumelelako. Ungacabangi kutsi siphetfo asikabaluleki. Loko lokusho ekugcineni kukhumbuleka sikhatsi lesidze. Nangabe siphetfo sakho site emandla, naloko lebesewuvele ukushito kungenteka kungasabatsintsi labo lokhuluma nabo.

Cabanga ngaloku: Ngasekupheleni kwekuphila kwakhe, Joshuwa wetfula inkhulumo emadvodzeni lamadzala esive saka-Israyeli, futsi iyohlale ikhunjulwa. Ngemuva kwekuchaza kusebentisana kwaJehova nema-Israyeli kusukela emalangeni a-Abrahama, Joshuwa wamane wabuketa emaphuzu layinhloko yini? Cha. Kodvwa wancusa bantfu ngalokusuka enhlitiyweni, watsi: ‘Yesabani Simakadze nimkhonte ngekwetsembeka konkhe.’ Tifundzele lesiphetfo saJoshuwa lesibhalwe kuJoshuwa 24:14, 15.

Lenye inkhulumo lenjalo itfolakala kuMisebenti 2:14-36, futsi yetfulwa ngumphostoli Phetro esicumbini sebantfu lebesiseJerusalema ngeMkhosi weliPhentekhoste la-33 C.E. Wacale wachaza kutsi bebabona kugcwaliseka kwesiphrofetho saJoweli lesimayelana nekwehla kwemoya waNkulunkulu. Ngemuva kwaloko waveta kutsi loku bekuhlangana njani netiphrofetho letimayelana naMesiya letikuTihlabelelo, letabiketela kuvuswa kwaJesu Khristu kanye nekuphakanyiselwa kwakhe ngesekudla saNkulunkulu. Esiphetfweni sakhe, Phetro wakusho ngalokucacile loko ngamunye wabo lebekufanele akwente. Watsi: “Ngako yonkhe indlu yaka-Israyeli kufanele yati kutsi loJesu lenambetsela, Nkulunkulu umente iNkhosi futsi wamenta waba nguKhristu.” Labantfu babuta batsi: “Banaketfu, kufanele senteni?” Phetro waphendvula watsi: “Phendvukani, nibhajatiswe egameni laJesu Khristu.” (Imis. 2:37, 38) Ngalelo langa, bantfu labangu-3 000 lebebakhona, kwabatsintsa kakhulu loko labakuva, ngako balemukela liciniso lelimayelana naJesu Khristu.

Emaphuzu Lokufanele Uwakhumbule. Loko lokusho esiphetfweni kufanele kuhambisane nesihloko senkhulumo yakho. Kufanele kube siphetfo lesinengcondvo lesilandzela emaphuzu layinhloko lebewuwachaza. Nanobe ufuna kufaka emavi latsite esihloko senkhulumo yakho, kukuwe kutsi utawuphindze usisho yini.

Ngalokuvamile, umgomo wakho nawetfula inkhulumo kutsi ukhutsate labo labakulalele kutsi batsatse sinyatselo ngaloko labakuvako. Lokunye lokufezwa siphetfo kukhombisa bantfu loko lokufanele bakwente. Ngesikhatsi ukhetsa sihloko kanye nemaphuzu layinhloko, ucabangisisile yini ngekutsi kungani inkhulumo yakho ibalulekile kulabo labatawube bakulalele nekutsi uyini umgomo wakho? Nangabe kunjalo, sewuyati kutsi ngusiphi sinyatselo lofuna basitsatse. Nyalo sekufanele usichaze leso sinyatselo kanye nekutsi singatsatfwa njani.

Ngetulu kwekukhombisa labo labakulalele kutsi kufanele benteni, siphetfo sakho kufanele sikhutsate. Kufanele sivete netizatfu tekutsi kungani kufanele batsatse leso sinyatselo kanye nekutsi tiyini tinzuzo taso. Nangabe loko lokusho ekugcineni kucatjangisiswe kahle futsi kubekwe ngendlela lefanele, kutawukwenta yonkhe inkhulumo yakho izuzise.

Kufanele ukhumbule kutsi sewuyayiphetsa inkhulumo yakho. Loku kufanele kubonakale kuloko lokushoko. Kufanele ukhulume nangelitubane lelifanele. Ungakhulumi uphangise uze uyofika ekugcineni, kutsi kusenjalo bese uyema. Nanobe kunjalo, ungalivumeli livi lakho kutsi linciphe. Livi lakho kufanele livakale kahle kodvwa lingaphakami kakhulu. Emavini akho ekugcina kufanele kuvakale kutsi sewuyaphetsa. Indlela lowasho ngayo kufanele ivete umdlandla kanye nekuciniseka. Nawulungiselela indlela yekwetfula inkhulumo yakho, kufanele uphrakthize nendlela lotayephetsa ngayo.

Kufanele sibe sidze kangakanani siphetfo sakho? Kute sikhatsi lesicondzile lesingabekwa kuloku. Kodvwa-ke siphetfo akukafaneli sidvonse. Budze baso butawuncunywa kutsi sitawubatsintsa kangakanani labo labalalele. Ngaso sonkhe sikhatsi sikahle siphetfo lesimelula, lesicondzile, nalesikhutsatako. Nangabe sihlelwe kahle, siphetfo lesidzanyana lesinemfanekiso lomfishane naso singaphumelela. Asewucatsanise siphetfo lesifishane sayo yonkhe incwadzi yeMshumayeli lesitfolakala kuMshumayeli 12:13, 14, kanye nesiphetfo seNshumayelo YaseNtsabeni lemfisha lesikuMatewu 7:24-27.

Emsebentini Wekushumayela. Kute lesinye sikhatsi lapho kutawudzingeka kutsi wente tiphetfo letinyenti khona kwendlula lapho usemsebentini wekushumayela. Nangabe ulungiselele futsi ubatsandza bantfu, utawuphumelela. Lamaphuzu lesesikhulume ngawo angaba lusito ngisho nalapho ucoca nemuntfu munye.

Kungenteka kucoca kwenu kungatsatsi sikhatsi lesidze. Lomuntfu lococa naye kungenteka umatasatasa, ngakho ningase nicoce imizuzu lembalwa nje kuphela. Nangabe kufanele, ungase utsi: “Ngiyabona kutsi umatasatasa. Kodvwa ngicela kukushiya neliphuzu linye nje lelikhutsatako. LiBhayibheli liveta kutsi uMdali wetfu unenjongo lenhle yekwenta lomhlaba ube yindzawo lapho bantfu batawujabulela khona kuphila phakadze. Singakhona kuphila kulelo Pharadisi, kodvwa kufanele sifundze ngaloko Nkulunkulu lakulindzele kitsi.” Nobe ungase ucele kubuya ngalesinye sikhatsi.

Nangabe ningakhoni kuchubeka nicoca ngenca yekutsi umnikati welikhaya akakwemukeli nobe unelulaka, kusekhona lokuhle longakufeza. Khumbula seluleko lesitfolakala kuMatewu 10:12, 13 nakuRoma 12:17, 18. Kuphendvula ngemusa kungenta loyo muntfu ashintje indlela labatsatsa ngayo BoFakazi BaJehova. Loko kungaba yintfo lenhle kakhulu.

Kodvwa-ke kungenteka kutsi ucoce kamnandzi nemnikati welikhaya. Kungani ungaliphindzi liphuzu leliyihloko lofuna kutsi alikhumbule? Mkhutsate kutsi ente lokutsite ngalelo phuzu.

Nangabe ubona kutsi akhona ematfuba ekutsi niphindze nicoce ngalesinye sikhatsi, yenta loyo muntfu kutsi akulangatelele loko. Buta umbuto, mhlawumbe lokukhulunywa ngawo encwadzini letsi “Ukubonisana NgemiBhalo” nobe kulenye incwadzi leyentelwe kuchuba tifundvo teliBhayibheli tasekhaya. Khumbula umgomo wakho, njengobe Jesu awuchaza kuMatewu 28:19, 20.

Kutsiwani nangabe wephetsa sifundvo seliBhayibheli sasekhaya? Kuphindza sihloko kutawusita loyo lofundza naye kutsi akukhumbule loko lebenicoca ngako. Kusebentisa imibuto yekubuketa kutawukwenta emaphuzu lamcoka kutsi ahlale engcondvweni yaloyo lofundza naye, ikakhulukati nangabe nibuketa ningajaki. Kumbuta kutsi loko lebenifundza ngako kungamzuzisa njani nobe kutsi angabacocela njani labanye, kungamsita kutsi acabange ngetindlela langakusebentisa ngako loko lakufundzako.​—Taga 4:7.

Khumbula kutsi siphetfo singenta kutsi loko lokhuluma ngako kubatsintse bantfu.