Yini Lengenta Kuphila Kwemndeni Kujabulise?

LOKO LOKUSHIWO LIBHAYIBHELI

“Bayajabula labo labeva livi laNkulunkulu futsi baligcine!”—Lukha 11:28.

KUNGAKUSITA NGANI KUKUKHOLELWA LOKU?

Ungatfola lutsandvo sibili.—Efesu 5:28, 29.

Ungajabulela inhlonipho lejulile.—Efesu 5:33.

Kuvikeleka sibili.—Makho 10:6-9.

SINGAKWETSEMBA MBAMBA YINI LOKUSHIWO LIBHAYIBHELI?

Yebo singakwetsemba, nganati tizatfu letimbili:

• Nkulunkulu nguMsunguli wemindeni. LiBhayibheli litsi, ‘yonkhe imindeni yaba khona’ ngaNkulunkulu Jehova. (Efesu 3:14, 15) Ngalamanye emavi, lilungiselelo lemndeni likhona ngobe Jehova walidala. Kubaluleke ngani loko?

  Ase ucabange: Kube bewudla kudla lokumnadzi futsi ufuna kwati kutsi kuphekwe njani, bewungabuta bani? Ngalokucinisekile, ungabuta loyo lokuphekile.

  Ngendlela lefanako, kute sitfole tintfo letingasita kutsi kuphila kwemndeni kujabulise, singafundza kuJehova, uMsunguli wemndeni.—Genesisi 2:18-24.

• Nkulunkulu uyakukhatsalela. Kukuhlakanipha ngemindeni kufuna seluleko saJehova lasinika sona ngeliVi lakhe. Ngani? “Ngobe uyanikhatsalela.” (1 Phetro 5:6, 7) Jehova ukufisela lokuhle—futsi seluleko sakhe siyasebenta ngaso sonkhe sikhatsi.—Taga 3:5, 6; Isaya 48:17, 18.