Khontani Jehova Njengemndeni

Njengobe ufundzile kulencwajana, liBhayibheli licuketse timiso letinyenti letitawusita wena nemndeni wakho. Jehova ufuna kutsi ujabule. Wetsembisa kutsi nangabe ukubeka kucala kukhonta yena, ‘tonkhe leletinye tintfo utawengetelwa tona.’ (Matewu 6:33) Ufuna kutsi ube ngumngani wakhe sibili. Wasebentise onkhe ematfuba kute ukhulise bungani bakho naNkulunkulu. Leli lilungelo lelikhulu kakhulu umuntfu langase abe nalo.​—Matewu 22:37, 38.

1 CINISA BUHLOBO BAKHO NAJEHOVA

LOKO LOKUSHIWO LIBHAYIBHELI: “‘Ngitawuba ngubabe kini, nani nitawuba ngemadvodzana nemadvodzakati kimi,’ kusho Jehova.” (2 Khorinte 6:18) Nkulunkulu ufuna kutsi ube ngumngani wakhe lomkhulu. Umthantazo ungulenye yetindlela tekusondzelana naye. Jehova ukumema kutsi ‘uhlale uthantaza.’ (1 Thesalonika 5:17) Uyakulangatelela kuva imicabango yakho lejulile naloko lokukukhatsatako. (Filiphi 4:6) Nawuthantaza nemalunga emndeni wakho, atawubona kutsi Nkulunkulu ungumuntfu mbamba kuwe.

Ngetulu nje kwekukhuluma naNkulunkulu, kufanele umlalele. Loko ungakwenta ngekutadisha liVi lakhe netincwadzi letisekelwe eBhayibhelini. (Tihlabelelo 1:1, 2) Zindla ngaloko lokufundzako. (Tihlabelelo 77:11, 12) Kulalela Nkulunkulu kuphindze kufake ekhatsi kuya njalo emihlanganweni yebuKhristu.​—Tihlabelelo 122:1-4.

Kukhuluma nalabanye ngaJehova kungulenye indlela lebalulekile yekucinisa buhlobo bakho naye. Nawuchubeka ukwenta loko, utawusondzelana kakhulu naye.​—Matewu 28:19, 20.

LONGAKWENTA:

• Tibekele sikhatsi sekufundza liBhayibheli malanga onkhe futsi uthantaze

• Njengemndeni, kufanele nibeke tintfo letiphatselene nebuhlobo benu naNkulunkulu kucala kunekutijabulisa kanye nekuphumula

2 KUJABULELENI KUKHONTA KWENU KWEMNDENI

LOKO LOKUSHIWO LIBHAYIBHELI: “Sondzelani kuNkulunkulu, naye utawusondzela kini.” (Jakobe 4:8) Kudzingeka nente luhlelo lwekukhonta kwemndeni futsi nilulandzele njalo. (Genesisi 18:19) Kodvwa kunyenti lokudzingekako. Nkulunkulu kufanele abe yincenye yekuphila kwenu kwamalanga onkhe. Cinisa buhlobo bemndeni wakho naNkulunkulu ngekukhuluma ngaye ‘nawuhleti ekhaya, nome uhamba endleleni, nome ulala nome uvuka.’ (Dutheronomi 6:6, 7) Kwente umgomo wakho kulingisa Joshuwa lowatsi: “Kodvwa mine nendlu yami sitawukhonta Simakadze.”​—Joshuwa 24:15.

LONGAKWENTA:

• Bani neluhlelo loluchubekako lwekucecesha loluhlanganisa tidzingo telilunga ngalinye lemndeni