LiBhayibheli Liyakugucula Kuphila
Yini leyakhutsata lenye intfombatana kutsi iphindze iphile ngetimiso teliBhayibheli lebeseyitishiyile? Fundza loko lekulandzisako.
“Nyalo Kuphila Kwami Sekunenjongo.”—LISA ANDRÉ
UMNYAKA LATALWA NGAWO: 1986
LIVE LATALELWA KULO: LUXEMBOURG
UMLANDVO WAKHE: UMNTFWANA LOWABHUNGUKA
KUPHILA KWAMI: Ngakhulela eBertrange, indzawo lehlantekile, lephephile naletfutfukako lesedvutane nelidolobha laseLuxembourg. Ngingumntfwana wekugcina ebantfwaneni labasihlanu. Batali bami baboFakazi BaJehova, futsi basebenta kamatima kute basifundzise timiso tebuKhristu.
Ngesikhatsi ngingena eminyakeni yekutfomba, ngacala kukungabata kakhulu loko lokufundziswa boFakazi BaJehova. Ekucaleni, ngangetama kungakunaki loko, kodvwa kukholwa kwami kwancipha kancane kancane. Batali bami benta konkhe lobekusemandleni abo kute bangicondzise endleleni lefanele, kodvwa angizange ngilwemukele lusito lwabo. Bebangati kutsi sengicitsa sikhatsi sami nabontsanga yami labangabahloniphi batali babo. Ngangifuna inkhululeko lokwakubonakala shengatsi bayayitfola. Sasicitsa sikhatsi lesinyenti emaphathini, sitiphatsa kabi ngekwelicasi, futsi sisebentisa kabi tidzakamiva kanye netjwala. Ekucaleni bekungijabulisa kuba nebantfu labebabonakala benetisekile ekuphileni.
Kodvwa ecinisweni, bengingajabuli mbamba. Imphilo lengangiyiphila nebangani bami yayite injongo, futsi bebanganendzaba nalutfo. Kodvwa mine ngangikhatsateka kakhulu nangibona kungalungi lokugcwele emhlabeni. Njengobe sikhatsi sichubeka, ngativa ngicindzeteleke kakhulu.
INDLELA LIBHAYIBHELI LELAKUGUCULA NGAYO KUPHILA KWAMI: Ngalelinye lilanga ngesikhatsi sengineminyaka lengu-17 budzala, ngangicindzeteleke kakhulu. Make wami wabona kutsi angikajabuli futsi wangicela kutsi ngiphindze ngifundze liBhayibheli. Wangikhutsata kutsi ngihlolisise timfundziso talo bese ngiyatikhetsela kutsi ngiyafuna yini kuphila ngato nobe cha. Lamavi akhe lawasho ngekukhululeka akushintja kuphila kwami. Ngavuma kutsi dzadzewetfu lomdzala Caroline kanye na-Akif, indvodza yakhe, bangifundzele liBhayibheli. Akif abengakakhuliswa boFakazi BaJehova kodvwa wemukela liciniso nasakhulile. Nangibuka limuva lakhe, ngabona kutsi bengingakhona kukhuluma naye ngekukhululeka, njengobe loko kwakuyintfo lengangiyidzinga kakhulu.
Bengati kutsi indlela yami yekuphila ayimfaneli umuntfu longuFakazi, kodvwa ekucaleni ngangicabanga kutsi loko lengangikwenta kwakuyindzaba yami ngedvwa. Kodvwa njengobe ngifundza liBhayibheli, ngabona kutsi kutiphatsa kwami kuyamtsintsa Jehova. (Tihlabelelo 78:40, 41; Taga 27:11) Ngaphindze ngabona nekutsi kuyabatsintsa labanye bantfu.
Njengobe ngangichubeka ngifundza liBhayibheli, ngatfola kutsi kunetizatfu letivakalako tekukholelwa kutsi liBhayibheli liliVi laNkulunkulu. Sibonelo saloko kutsi ngafundza ngetiphrofetho teliBhayibheli letinyenti letagcwaliseka. Lwati lolunjalo lwangisita kutsi ngicedze kungabata lebenginako ekucaleni.
Ngemuva kwemnyaka ngicale kufundza liBhayibheli, mine nebatali bami sahamba sayewuvakashela umnaketfu lomdzala lobekasisebenti sekutitsandzela ehhovisini leligatja laboFakazi BaJehova leliseJalimane. Nangibona indlela labejabule ngayo, ngatsintseka kakhulu. Nguleyo injabulo lengangisolo ngiyifuna! Ngatsintseka kakhulu nalapho ngibona labanye boFakazi labebatisebenti tekutitsandzela kuleyo ndzawo. Bebehluke kakhulu kubantfu labangaketsembeki, nalabaphilela kufuna injabulo lengangike ngatihlanganisa nabo. Sikhashana lesitsite ngemuva kwaloko, ngathandaza kuJehova ngalokusuka enhlitiyweni ngimetsembisa kutsi ngitawumkhonta kuphila kwami konkhe. Ngesikhatsi ngineminyaka lengu-19 budzala, ngaveta kutinikela kwami kuJehova ngekutsi ngibhajatiswe.
INDLELA LENGIZUZE NGAYO: Nyalo kuphila kwami sekunenjongo. Ngitfola injabulo ngekufundzisa labanye liBhayibheli, futsi ngibasite kutsi bafundze ngaJehova nangetetsembiso takhe tesikhatsi lesitako. Umndeni wakitsi nawo uzuzile ngobe awusadzingi kukhatsateka ngami.
Ngiyawakhumbula emaphutsa lengawenta, kodvwa ngiyetama kutsi ngingahlali ngicabanga ngawo. Esikhundleni sawo, ngicabanga ngentsetselelo yaJehova nangekungikhatsalela kwakhe ngelutsandvo. Ngenhlitiyo yami yonkhe, ngiyavumelana nemavi eTaga 10:22, latsi: “Sibusiso saSimakadze lesenta umuntfu acebe, akengeti kuhlupheka kuso.”
[Emavi lahambisana nesitfombe ekhasini 10]
“Sasicitsa sikhatsi lesinyenti emaphathini, sitiphatsa kabi ngekwelicasi, futsi sisebentisa kabi tidzakamiva kanye netjwala”
[Emavi lahambisana nesitfombe ekhasini 11]
“Ngiyawakhumbula emaphutsa lengawenta, kodvwa ngiyetama kutsi ngingahlali ngicabanga ngawo”