“Sikhatsi Sekutsandza Nesikhatsi Sekutondza”
“NKULUNKULU ulutsandvo” (God is love). Kulamanye emave, bantfu babhala lawo magama bese bawalengisa etindlini tabo. Kuliciniso kutsi lawa ngemavi lamahle lachaza Nkulunkulu njengesibonelo lesihamba embili selutsandvo.
Nanobe kunjalo, bantfu labanyenti abati kutsi lamavi avela eBhayibhelini. Umphostoli Johane nguye lowabhala lamavi latsi: “Kodvwa lote lutsandvo akamati Nkulunkulu, ngobe Nkulunkulu ulutsandvo.” (1 Johane 4:8) Johane waphindze wabhala mayelana nelutsandvo Nkulunkulu lanalo ngebantfu: “Nkulunkulu walitsandza live kakhulu kangangekutsi wadzimate wanikela ngeNdvodzana yakhe lekukuphela kwayo, kuze kutsi nome ngubani lokholwa ngiyo angabhubhi, kodvwa abe nekuphila lokuphakadze.”—Johane 3:16.
Nababona loku, labanye bangacabanga kutsi Nkulunkulu uhlale angakunaki loko lesikwentako. Indlela bantfu labanyenti labaphila ngayo iveta kutsi bacabanga kutsi ngisho nobe bangatiphatsa ngendlela lengakafaneli, Nkulunkulu angeke abajezise ngaloko. Kodvwa kuliciniso mbamba yini loko? Nkulunkulu utsandza bonkhe bantfu yini, lokufaka ekhatsi labalungile nalabangakalungi? Kuke kube khona yini sikhatsi lapho Nkulunkulu atondza khona intfo letsite?
Lutsandvo LwaNkulunkulu Nalucatsaniswa Nekutondza Kwakhe
Solomoni, iNkhosi lehlakaniphile, watsi: “Konkhe kunesikhatsi sako, yonkhe intfo leyentekako inesikhatsi sayo lapha emhlabeni . . . sikhatsi sekutsandza nesikhatsi sekutondza.” (Umshumayeli 3:1, 8) Ngekusho kwalelivesi, ngisho nobe Nkulunkulu anelutsandvo kanye nemusa lomkhulu, tikhona tintfo latitondzako.
Kwekucala, lisho kutsini ligama lelitsi ‘kutondza’ njengobe lisetjentiswe eBhayibhelini? Lenye incwadzi itsi: “EBhayibhelini, ligama lelitsi ‘tondza’ linetinchazelo letinyenti. Lingase lisho kutondza intfo kakhulu ute ufune kutiphindziselela. Kutondza intfo ngaleyo ndlela kungenta umuntfu ate afune kuyilimata leyontfo.” Lena yinchazelo lesiyetayele kakhulu, futsi kutondza intfo ngaleyo ndlela kugcwele emhlabeni wonkhe. Kodvwa lencwadzi ichubeka itsi: “‘Kutondza’ kungaphindze kusho kwenyanya intfo letsite kodvwa ube ungafuni kuyilimata.”
Kulesihloko, sitawucoca ngalenchazelo yesibili. Sitawukhuluma ngekutondza intfo letsite kakhulu, hhayi kutondza lokuhambisana nekufuna kuyilimata. Nkulunkulu angayitondza yini intfo ngaleyo ndlela? Asewunake loko lokushiwo Taga 6:16-19: “Tisitfupha tintfo letenyanywa nguSimakadze, empeleni letisikhombisa uphambene nato kakhulu: Ngemehlo latichenyako, nelulwimi lolucala emanga, nembulali walote licala, nengcondvo lebumba emacebo ebubi, nemuntfu lotsandza lokubi, nafakazi lotfulula emanga, nemuntfu locabanisa bazalwane.”
Njengobe sibona, ikhona imikhuba Nkulunkulu layitondzako. Nanobe kunjalo, usuke angatondzi lomuntfu lowenta leyo mikhuba. Uyaticaphela tintfo letingabangela kutiphatsa lokunjalo, letifaka ekhatsi butsakatsaka lesinabo, indzawo lesiphila kuyo, indlela lesikhuliswe ngayo, kanye nekungati. (Genesisi 8:21; Roma 5:12) Loyo lowabhala incwadzi yeTaga wachaza lendzaba nganasi sibonelo: “Simakadze uyamtsetsisa amcondzise lowo lamtsandzako, njengobe neyise enta endvodzaneni yakhe lajabula ngayo.” (Taga 3:12) Umtali angakutondza kungalaleli kwemntfwana wakhe, kodvwa uyachubeka amtsandza futsi enta konkhe lokusemandleni akhe kute amsite ashintje kutiphatsa kwakhe ngekutsi amjezise. Ngelutsandvo lwakhe, Jehova wenta intfo lefananako nakabona kutsi umuntfu lowonile angasitakala.
Lapho Kutondza Intfo Kufaneleka Khona
Kutsiwani-ke nangabe umuntfu ayati intsandvo yaNkulunkulu kodvwa angayenti? Nkulunkulu angeke amemukele lowo muntfu. Nangabe atenta ngemabomu tintfo latitondzako, Jehova utawumtondza. Nasi sibonelo: LiBhayibheli litsi: “Simakadze uyamvivinya lolungile, kodvwa uyamtondza lomubi nalotsandza budlova.” (Tihlabelelo 11:5) Nkulunkulu akamtsetseleli umuntfu longaphendvuki. Umphostoli Pawula wakwenta kwacaca loku encwadzini layibhalela emaHebheru: “Nasona ngemabomu sesilati liciniso, sekute umhlatjelo longesula tono, kodvwa sekusele kutsi ngekwesaba lokukhulu silindzele kwehlulelwa nemlilo loshisa ngelulaka loyawucedza emaphikankhani.” (Hebheru 10:26, 27) Kungani Nkulunkulu lonelutsandvo atsatsa sinyatselo lesinjena?
Nangabe umuntfu enta sono lesikhulu ngemabomu, loku kungaba kubi kakhulu kangangekutsi loyo losentile angagcine asamubi njengaso. Angakhohlakala kakhulu ate angasashintji. LiBhayibheli litsi umuntfu lonjalo ufanana nengwe lengeke ikhone kushintja emabala ayo. (Jeremiya 13:23) Lapho umuntfu angasatisoli, usuke sekenta loko liBhayibheli lelikubita ngekutsi ‘licala laphakadze,’ lelingeke lize litsetselelwe.—Makho 3:29.
Nguloko lokwenteka ku-Adamu na-Eva kanye nakuJudasi Skariyothe. Njengobe bo-Adamu na-Eva bebete sono kantsi nemyalo waNkulunkulu bewucacile, kuyabonakala kutsi bona ngemabomu, ngako-ke angeke batsetselelwe. Loko Nkulunkulu lakusho kubo ngesikhatsi sebonile akuzange kuvete kutsi utsi basengaphendvuka. (Genesisi 3:16-24) Nanobe Judasi abenesono, abesedvute kakhulu neNdvodzana yaNkulunkulu, kodvwa wagcine angumkhohlisi. Jesu wambita ngekutsi ‘ngulowo labesafanele kulahlwa.’ (Johane 17:12) LiBhayibheli liphindze litsi Develi usoni lesesikhohlakele kakhulu nalesilindzelwe kubhujiswa. (1 Johane 3:8; Sembulo 12:12) Nkulunkulu uyabatondza bonkhe laba lesesikhulume ngabo.
Nanobe kunjalo, kuyasidvudvuta kwati kutsi bantfu labonile basengakhona kuphendvuka. Jehova ubeketela kakhulu futsi akakutsandzi kujezisa labo labone bangati. (Hezekeli 33:11) Uyabacela kutsi baphendvuke kute abatsetselele. Utsi: “Lomubi akayiyekele indlela yakhe lembi, nalokhohlakele ayekele imicabango yakhe lemibi. Akaphendvuke abuyele kuSimakadze, uyawuba nemusa kuye, akabuyele kuNkulunkulu wetfu, ngobe uyawumtsetselela ngenkhululeko.”—Isaya 55:7.
Umbono Lofanele Ngekutsandza Kanye Nekutondza
Njengebalingisi baNkulunkulu, emaKhristu eliciniso kufanele acondze kutsi sinini “sikhatsi sekutsandza” kanye “nesikhatsi sekutondza.” Kuba neluvelo kakhulu kungenta umuntfu angabi nembono lofanele ngelutsandvo nangemusa. Emavi aJuda angasisita kutsi sihlale sinembono lofanele ngekuba nemusa nangekutondza sono. Watsi: “Labanye nibevele ngekwesaba, ningatitsintsi tingubo letingcoliswe tinkhanuko tabo letimbi.” (Juda 22, 23) Ngako-ke, kufanele sitondze tintfo letimbi, hhayi bantfu labatentako.
EmaKhristu ayalwa nekutsi atsandze titsa tawo ngekutsi atentele tintfo letinhle. Jesu watsi: “Tsandzani titsa tenu, nibakhulekele labanitingelela kunihlupha.” (Matewu 5:44) Nguleso sizatfu lesenta boFakazi BaJehova bangayekeli kushumayela tindzaba letinhle teMbuso waNkulunkulu kubomakhelwane babo ngisho nobe labanye bangabalaleli. (Matewu 24:14) Njengobe banembono weliBhayibheli ngetintfo, boFakazi batsatsa wonkhe umuntfu njengaloyo lofanelwe kutfola umusa kanye nelutsandvo lwaJehova. Nangabe bantfu bangayijabuleli imetamo yabo yekubasita, bangabemukeli nobe babashushisa, boFakazi balandzela seluleko semphostoli Pawula lesitsi: “Busisani labanitingelela kunihlupha; yebo, nibusise ningacalekisi . . . Ningabuyiseli kunobe ngubani lokubi ngalokubi.” (Roma 12:14, 17) Bahlale bakhumbula kutsi nguJehova lobatiko labo labafanelekela kutsandvwa nobe kutondvwa nguye. Nguye uMehluleli wekugcina etindzabeni tekufa nekuphila.—Hebheru 10:30.
“Nkulunkulu ulutsandvo.” Ngako-ke, kufanele silubonge lutsandvo lwakhe futsi setame kwati intsandvo yakhe kanye nekuyenta. BoFakazi baJehova endzaweni yakini bangakujabulela kukusita kutsi ufundze eBhayibhelini lakho kutsi iyini intsandvo yaNkulunkulu kanye nekutsi ungaphila njani ngekuvumelana nayo. Nawenta njalo, Nkulunkulu angeke akutondze kodvwa utawukutsandza.
[Emavi lahambisana nesitfombe ekhasini 13]
“Tisitfupha tintfo letenyanywa nguSimakadze, empeleni letisikhombisa uphambene nato kakhulu: Ngemehlo latichenyako, nelulwimi lolucala emanga, nembulali walote licala, nengcondvo lebumba emacebo ebubi, nemuntfu lotsandza lokubi, nafakazi lotfulula emanga, nemuntfu locabanisa bazalwane.”—TAGA 6:16-19
[Emavi lahambisana nesitfombe ekhasini 14]
“Nasona ngemabomu sesilati liciniso, sekute umhlatjelo longesula tono, kodvwa sekusele kutsi ngekwesaba lokukhulu silindzele kwehlulelwa nemlilo loshisa ngelulaka loyawucedza emaphikankhani.”—HEBHERU 10:26, 27
[Emavi lahambisana nesitfombe ekhasini 15]
“Lomubi akayiyekele indlela yakhe lembi, nalokhohlakele ayekele imicabango yakhe lemibi. Akaphendvuke abuyele kuSimakadze, uyawuba nemusa kuye, . . . uyawumtsetselela ngenkhululeko.”—ISAYA 55:7
[Sitfombe ekhasini 14]
Umtali lonelutsandvo uyamyala umntfwana wakhe kute amsite
[Sitfombe ekhasini 15]
Tiboshwa letinyenti tilutfolile lutsandvo kanye nemusa waNkulunkulu