Sondzela KuNkulunkulu
“NginguSimakadze, Nkulunkulu Wakho, Lobamba Sandla Sakho Sangesekudla”
“BAMBA sandla sami,” kusho babe akhuluma nendvodzana yakhe lencane njengobe batakwewela umgwaco lophitsitelako. Njengobe babe wakhe abambe sandla sakhe lesincane wasicinisa, lomfana utiva avikelekile futsi angesabi. Wake wafisa yini shengatsi umuntfu lotsite angabamba sandla sakho futsi akusite ukhone kubona indlela lefanele yekuphila? Nangabe kunjalo, emavi labhalwa ngu-Isaya angakudvudvuta.—Fundza Isaya 41:10, 13.
Isaya wawasho kuma-Israyeli lamavi. Nanobe Nkulunkulu abetsatsa lesive saka-Israyeli ‘njengeligugu lakhe,’ lesive besitungeletwe titsa. (Eksodusi 19:5) Bekufanele kuwesabise yini loko ema-Israyeli? Jehova wasebentisa Isaya kutsi awatjele umlayeto lotawacinisa. Njengobe sitawuhlola lamavi, asikhumbule kutsi ayasebenta nakubantfu labakhonta Nkulunkulu lamuhla.—Roma 15:4.
Jehova wawancenga watsi: “Ungesabi.” (Kuvesi 10) Jehova bekanetizatfu tekutjela bantfu bakhe kutsi bangesabi. Uyachaza kutsi kungani bantfu bakhe kungakafaneli besabe. Utsi: “Ngobe mine nginawe.” Abehlale akhona ngesikhatsi labamdzinga ngaso. Ufuna bantfu bakhe bati kutsi yena uhlale anabo, kufanane nekutsi useceleni kwabo uhlale akulungele kubasekela. Lamavi ayadvudvuta.
Kubantfu labamkhontako, Jehova utsi: “Ungajabhi.” (Kuvesi 10) Yini lengenta kutsi umuntfu ajabhe? Leligama lesiHebheru lelisetjentiswe lapha lelichaza ‘kujabha’ lingasho bantfu “labacalata yonkhe indzawo kute babone kutsi kute yini lokungabalimata.” Jehova uyachaza kutsi kungani bantfu bakhe kungakafaneli besabe, utsi: “Ngobe mine nginguNkulunkulu wakho.” Sikhona yini sicinisekiso lesingasitfola lesendlula lesi? Jehova ‘unguLosetikwako Konkhe,’ futsi ‘unguSomandla.’ (Tihlabelelo 91:1) Njengobe banaNkulunkulu Jehova longuSomandla, yini lengabenta besabe?
Bantfu labakhonta Jehova, bangalindzelani kuye? Ubetsembisa kutsi: “Ngiyakukubamba ngesandla sami sekudla lesilungile.” (Kuvesi 10) Uphindze atsi: “Ngobe mine nginguSimakadze, Nkulunkulu wakho, lobamba sandla sakho sangesekudla.” (Kuvesi 13) Kufikani engcondvweni yakho nawuva lamavi? Lenye incwadzi yatsi: “Lamavesi nawahlanganiswa omabili asivetela sitfombe semntfwana nemtali. [Lobabe] akagcini nje ngekuma eceleni kwalomntfwana kute amvikele kodvwa ubamba sandla sakhe. Angeke amvumele lomntfwanakhe kutsi asuke kuye.” Asewucabange nje, ngeke Jehova avume kutsi bantfu bakhe basuke kuye ngisho nangetikhatsi letibonakala timatima ekuphileni kwabo.—Hebheru 13:5, 6.
Bantfu labakhonta Jehova lamuhla, angabadvudvuta emavi labhalwa ngu-Isaya. ‘Kuletikhatsi letimatima,’ singativa sicindzetelwe tinkinga tekuphila. (2 Thimothi 3:1) Akukafaneli setame kutisombulula sisodvwana. Jehova utimisele kwelula sandla sakhe asibambe sandla. Njengebantfwana baNkulunkulu labametsembako, singabambelela esandleni sakhe siciniseka kutsi utasiholela endleleni lefanele futsi asisite nasimdzinga.—Tihlabelelo 63:7, 8.