Kungani Kungakalungi Kusebentisa Imimoya?

Kusukela asesemusha, Barbaraa bekabona imibono, eva emavi futsi bekaciniseka kutsi ukhuluma netihlobo takhe lesetashona. Yena nemyeni wakhe Joachim, bebafundza tincwadzi letikhuluma ngemlingo bagcina sebabochwepheshe ekufundzeni emakhadi ekubona likusasa (tarot cards). Lomsebenti bewubangenisela imali lenyenti. Ngalelinye lilanga, lamakhadi abecwayisa ngekutsi kunebantfu labayingoti labatawufika emtini wabo abatjela nekutsi kufanele bativikele njani kulabantfu.

NANOBE kukholelwa emimoyeni kungase kubonakale sekuphelelwe sikhatsi kodvwa bantfu bayatsandza kwati ngayo. Bantfu labanyenti emhlabeni bafaka emaseshi, bagabe tiphandla, baye kubemanga bayobhula kute babatjele ngelikusasa nome bativikele emimoyeni lemibi. Sihloko lesitsi “Laptop and Lucifer,” lesavela kumagazini waseJalimane i-Focus satsi: I-Internet yenta bantfu bafune kwati ngemimoya lemibi.

Bewati yini kutsi litsini liBhayibheli ngemimoya lemibi? Lelikushoko ngayo kungase kukumangalise.

Lokushiwo LiBhayibheli Ngemimoya Lemibi

Umtsetfo Nkulunkulu lawuniketa ema-Israyeli bewutsi: ‘Kubete emkhatsini wenu loyawutfolakala . . . abhula nome losangoma, nome lohumusha tigameko, angenele butsi, nome alumbe, nome wemimoya lemibi, nome lophengulako, nome lokhuluma nalabafile. Wonkhe umuntfu lowenta letintfo usinengiso kuSimakadze.’ (Dutheronomi 18:10-12) Kungani umtsetfo waJehova uyilahla lemikhuba yekusebentisa imimoya?

Njengalabantfu lesikhulume ngabo ekucaleni, bantfu labanyenti bakholelwa kutsi bantfu labaphilako bangakhona kukhuluma nalabafile baphindze batfole imininingwane ngekubhula, bacabanga kutsi ivela kulabaphansi. Tinkholelo letinjalo, njengalena letsi bantfu lesebafa bahlala endzaweni yemimoya, tivela etimfundzisweni tetinkholo letinyenti. LiBhayibheli alikufundzisi loko, lona litsi: “Labafile abati lutfo.” (Umshumayeli 9:5) Lifananisa labafile nemuntfu lolele butfongo lobukhulu, abati lutfo.b (Matewu 9:18, 24; Johane 11:11-14) Njengobe lisho njalo, ungase utibute kutsi: Babobani labantfu labasuke bababona nome bakhuluma nabo?

Kuchumana Nalabasendzaweni Lengabonakali

Kulandzisa kwemaVangeli kuveta kutsi ngalesikhatsi Jesu asemhlabeni wake wachumana netidalwa letisendzaweni lengabonakali. Makho 1:23, 24 utsi ‘lidimoni’ latsi kuJesu: “Ngiyakwati kutsi ungubani.” Asingabati-ke kutsi nawe emadimoni ayakwati. Wena-ke, uyawati yini?

Ngembikwekutsi Nkulunkulu adale bantfu, wadala emadvodzana lanemtimba wemoya nome tingilosi letinyenti. (Jobe 38:4-7) Tingilosi tinekuphila lokusezingeni leliphakeme kunekwebantfu. (Hebheru 2:6, 7) Tinemandla, tihlakaniphe kakhulu futsi tadalelwa kutsi tente intsandvo yaNkulunkulu. Umhlabeli watsi: “Dvumisani Simakadze, nine tingilosi takhe, nani machawe lanemandla, nine labenta livi lakhe.”—Tihlabelelo 103:20.

LiBhayibheli liveta kutsi ngekuhamba kwesikhatsi letinye tetingilosi tachumana nebantfu ngendlela Nkulunkulu langayemukeli. Takwentelani loko? Ingilosi leyacala kwenta njalo, yayenga bantfu bekucala bo-Adamu na-Eva kute ibente bangamlaleli Nkulunkulu longuMdali wabo. Ngekwenta njalo, yatenta Sathane Develi, umhlambalati nemphikisi waNkulunkulu.—Genesisi 3:1-6.

Ngekuhamba kwesikhatsi naletinye tingilosi ‘tashiya likhaya lato’ lasezulwini, tatigucula taba nemitimba yenyama, teta emhlabeni tatsatsa tintfombi letinhle tatenta bafati. (Juda 6; Genesisi 6:1, 2) Letingilosi letahlubuka kanye nentalo yato, tahlukumeta bantfu kakhulu kangangekutsi umhlaba ‘wagcwala budlova.’ Mhlawumbe uyetayele lendzaba leseBhayibhelini lemayelana nendlela Nkulunkulu labhubhisa ngayo lesitukulwane lesibi lebesigcwele budlova asebentisa Zamcolo ngesikhatsi saNowa.—Genesisi 6:3, 4, 11-13.

Emanti azamcolo, aphocelela letidalwa temoya kutsi tishintje imitimba yenyama tibuyele endzaweni lengabonakali. UMdali akazange ativumele kutsi tibuyele ezulwini. Esikhundleni saloko, watinikela endzaweni lefananiswa ‘nemigodzi yebumnyama bebumnyama.’ (2 Phetro 2:4, 5) LiBhayibheli libita letingilosi letahlubuka ngekutsi ‘ngemadimoni.’ (Jakobe 2:19) Emandla ekusebentisa imimoya avela kuwo lamadimoni.

Iyini Inhloso Yemadimoni?

Inhloso yekucala yemimoya lemibi lekhuluma nebantfu, ikubayekelisa kukhonta Nkulunkulu weliciniso Jehova. Tiphiwo nobe emandla bantfu labasebentisa imimoya labatsi banato, timane nje tilugibe lolwenta bantfu bangalutfoli lwati lolungulonalona ngaNkulunkulu futsi bangatakheli buhlobo naye.

Inhloso yesibili yemadimoni, ibonakala kuloko Sathane, longumholi wawo lake wetama kukwenta kuJesu. Sathane abefuna kupha Jesu “yonkhe imibuso nebucwebecwebe bayo.” Yini Sathane labefuna kutsi Jesu ayente? Wamncenga kutsi ‘awe phansi akhotsame kuye.’ Sathane nemadimoni bafuna kukhontwa. Jesu akazange avumelane nembono wekushiya Nkulunkulu nenkholo yeliciniso.—Matewu 4:8-10.

Lamuhla, imimoya lemibi ayikavami kukhuluma nebantfu ngendlela leyakhuluma ngayo naJesu. Esikhundleni saloko, ifuna kubamba bantfu labangakanaki ngetintfo letibonakala tingesiyo ingoti, njengekuphengula, kubhula, kuphahla nekuya enyonini. Ungatifaki emikhubeni lenjalo. Akakufaneli sitsatse lendlela yekuchumana nebantfu labakulenye indzawo lengatiwa njengaleyemukelekako. Imimoya lemibi ikwenta kutsandzeke kusebentisa imimoya kuze iyenge bantfu ngobe ifuna kutsi bayekele kukhonta Jehova. Nangabe lomgomo wayo ungaphumeleli, lemimoya lemibi ivamise kubahlupha labo labangasafuni kuyisebintisa. Nangabe usesimeni lesinjalo, yini longayenta kute ingasakuhluphi imimoya lemibi?

Ungaphunyula Njani Ekusebentiseni Imimoya?

Asingabati kutsi, imimoya lekhuluma nebantfu ititsa taNkulunkulu letitawubhujiswa nome kanjani. (Juda 6) Itimbulu leticala emanga. Itenta bantfu labafile. Ungaphatseka njani nangabe utfola kutsi umngani wakho uyimbulu, ufuna nje kukuholela ebubini? Ungenta njani nawungatfola kutsi ku-Internet wakhe buhlobo nemuntfu longumdlwenguli ube ungati? Kutifaka emadimonini kuyingoti lenkhulu kakhulu. Kufanele wente konkhe lokusemandleni akho kute wehlukane nawo. Ungakwenta njani loko?

Ngemuva kwekufundza lokushiwo yimiBhalo ngekusebentisa imimoya, letinye takhamuti tase-Efesu yasendvulo tabona kufanele kutsi tishise tincwadzi tato lebetikhuluma ngemilingo, ngisho nome betidule kakhulu. “Batokhela ngemlilo, bonkhe bantfu babuka.” (Imisebenti 19:19, 20) Lamuhla tintfo letihlobene nekusebentisa imimoya tifaka ekhatsi tincwadzi, kugaba tiphandla nemaseshi, ema-DVD, imidlalo lekubongcondvomshini netinhlelo letitfolakala ku-Internet letimayelana nekusebentisa imimoya nalokunye lokufanana nako. Balekela nome yini lengase ikwente usebentise imimoya.

Khumbula Barbara naJoachim lesicoce ngabo ekucaleni kwalesihloko. Njengobe emakhadi abo abatjela kutsi kutawufika bantfu labayingoti, bancuma kutsi akukafaneli babalalele nome bemukele nome ngabe yini kubo. Nome kunjalo, ngalesikhatsi boConnie naGudrun lababoFakazi BaJehova bafika emtini wabo batsi babaletsele tindzaba letimnandzi ngaNkulunkulu, boJoachim naBarbara bancuma kubalalela. Incociswano yabo yate yefika endzabeni yekusebentisa imimoya futsi boConnie naGudrun babaniketa yonkhe imininingwane leliciniso letfolakala emiBhalweni ngalendzaba. Base bacala kucoca nabo njalo ngeliBhayibheli.

Ngekushesha, Joachim naBarbara bancuma kuyekela tonkhe tindlela lebebatisebentisa tekuchumana nemadimoni. LaboFakazi babachazela kutsi lemimoya lemibi ngeke ijabule ngaloko. Kwenteka vele kutsi boJoachim naBarbara bahlangabetane netikhatsi letimatima futsi bahlaselwa ngemadimoni ngendlela leyetfusako. Emalanga latsite bebahlale besaba njalo ebusuku kwadzimate kwaba ngulapho sebatfutsele kulenye indlu. Kuso sonkhe lesikhatsi sebumatima, boJoachim naBarbara betsembela emavini laku-Isaya 12:2 latsi: “Impela, Nkulunkulu uyinsindziso yami; ngiyakumetsemba ngingesabi, Simakadze, Simakadze ungemandla ami nengoma yami; nguye loyinsindziso yami.” Jehova wababusisa ngekutimisela kwabo futsi ekugcineni lemimoya lemibi yayekela kubahlupha. Lamuhla boJoachim naBarbara batikhonti letijabulako taNkulunkulu weliciniso, Jehova.

ImiBhalo ikhutsata bonkhe labatfola sibusiso saJehova, itsi: “Tfobelani Nkulunkulu, kodvwa nimelane naSathane, uyawunibalekela. Sondzelani kuNkulunkulu, naye utawusondzela kini.” (Jakobe 4:7, 8) Nangabe ufuna kuphunyula emadimonini, Nkulunkulu Jehova angakhona kukusita futsi utakusita. Nabacabanga ngendlela labaphunyule ngayo ekusebentiseni imimoya, boJoachim naBarbara bavumelana ngenhlitiyo yonkhe nemavi latfolakala kuTihlabelelo 121:2, latsi: “Lusito lwami luchamuka kuSimakadze.”

[Imibhalo lengentansi]

[Emavi lacashuniwe lasekhasini 11]

Imikhuba lehlobene nekusebentisa imimoya ivimbela bantfu kutsi babe nebuhlobo lobuhle naNkulunkulu

[Emavi lacashuniwe lasekhasini 12]

“Sondzelani kuNkulunkulu, naye utawusondzela kini.”—JAKOBE 4:8