Imibuto Levela Kubafundzi

Kungenteka yini kutsi umkhuba wemKhristu wekubuka titfombe letikhombisa kungcola ube mubi kangangekutsi asuswe ekuhlanganyeleni?

▪ Yebo, kungenteka. Kungako kubalulekile kutsi sigweme tonkhe tinhlobo tetitfombe letikhombisa kungcola, kungaba kufundza ngato, kutibuka etincwadzini, kumabhayisikobho, kuma-video kanye naku-Internet.

Titfombe letikhombisa kungcola tigcwele emhlabeni wonkhe. I-Internet yente kutsi letitfombe titfolakale ngelizinga leliphakeme futsi yakhulisa nelinani lebantfu lababanjwa ngito. Bantfu labasebasha nalabadzala, batikhandze sebabuka titfombe letikhombisa kungcola bangakahlosi. Labanye batibuka ngemabomu banemuva wekutsi bangafundza ngato nobe batibuke ngansense ekhaya nobe ehhovisini. Kungani emaKhristu kufanele acabangisise ngalendzaba?

Sitfola sizatfu lesibalulekile esecwayisweni saJesu lesitsi: “Ngulowo nalowo lobuka lomsikati, bese uyamkhanuka, sewuphinge naye enhlitiyweni yakhe.” (Mat. 5:28) Kuliciniso kutsi kutijabulisa ngekwelicasi kwebantfu lababili labashadene, kuyafaneleka. (Taga 5:15-19; 1 Khor. 7:2-5) Sisuke singakhulumi ngaloko nasikhuluma ngetitfombe letikhombisa kungcola. Esikhundleni saloko, tona tifaka ekhatsi kutiphatsa lokubi ngekwelicasi lokungekho emtsetfweni lokwenta umuntfu abe nemicabango lemibi lena Jesu lacwayisa ngayo. Kufundza ngato nobe kutibuka, kuphambene kakhulu nesicondziso saNkulunkulu lesitsi: “Ngaloko-ke bulalani tonkhe tinkhanuko tenu talapha emhlabeni: bugwadla, nebuphingi, nekungcola, nekuhungeka, nekukhanuka lokubi, nebukhali lobukukhonta tithico.”—Khol. 3:5.

Kutsiwani-ke nangabe umKhristu abuke titfombe letikhombisa kungcola emahlandla lambalwa? Simo sakhe singase sifananiswe nengoti umhlabeli Asafa latikhandza akuyo, watsi: “Kepha mine, tinyawo tami tacishe taphambuka, kwasala kancane kutsi tinyawo tami tishelele.” UmKhristu angaba njani nanembeza lohlobile futsi abe nekuthula naNkulunkulu nangabe ake wabuka titfombe letikhombisa kungcola tebantfu labadvuna nobe labasikati labangcunu nobe bantfu labatiphatsa kabi ngekwelicasi? Asafa uchubeka atsi: “Ngihlushwa sonkhe sikhatsi, ngitsetsiswe onkhe emalanga.”—Hla. 73:2, 14.

UmKhristu lowente bubi lobunjalo kufanele atisole futsi atsatse sinyatselo sekulungisa buhlobo bakhe naJehova. Lusito lolunjalo luyatfolakala ebandleni: “Nangabe lomunye wenu asawele esonweni, nine bakamoya, lowo mephuleni, loko nikwente ngemoya wekutfobeka; kodvwa nawe uticaphele.” (Gal. 6:1) Lomdzala welibandla nobe lababili bangamniketa lusito laludzingako, futsi ‘imithandazo yekukholwa ingamphilisa logulako, nome entile tono uyawutsetselelwa tona.’ (Jak. 5:13-15) Labo labafune lusito kute baphunyule kulolugibe lwekubuka titfombe letikhombisa kungcola, babonile kutsi kusondzela kuNkulunkulu kube lusito kubo, njengobe kwaba njalo naku-Asafa.—Hla. 73:28.

Nobe kunjalo, umphostoli Pawula utsi labanye labona abazange baphendvuke “ekungcoleni, nasebugwadleni, nasebuphingini.”a (2 Khor. 12:21) Mayelana naleligama lesiGriki lelihunyushwe ngekutsi ‘kungcola,’ Profesa Marvin R. Vincent, wabhala watsi “linemcondvo wekungahlanteki ekutiphatseni.” Kuliciniso lelibuhlungu kutsi letinye titfombe letikhombisa kungcola timbi kwendlula kubuka bantfu labangcunu nobe indvodza nemfati labatiphatsa kabi ngekwelicasi. Tihlanganisa kutiphatsa lokungekho emtsetfweni, bunkonkoni (kulalana kwebantfu bebulili lobufananako) kulalana kwebantfu njengelicembu, kulala nesilwane, kubuka titfombe tebantfwana labangcunu, kugagadlelwa kwemuntfu munye bantfu labanyenti, kuphatfwa kabi kwebantfu labasikati, kuhlukumeta ngenhloso yekwenetisa sifiso selicasi nobe kuboshwa kwemuntfu nakagagadlelwa. Labanye ngesikhatsi saPawula ‘labebahlwelwe engcondvweni’ baba ‘butfuntfu, batinikela emanyaleni, base benta kungcola ngekuhungeka.’—Ef. 4:18, 19.

KuGalathiya 5:19, Pawula waphindze wakhuluma ‘ngekungcola.’ Sati lesingumNgisi satsi “leligama lapha lingasho tinkhanuko letingasito temvelo.” Yini lengenta umKhristu aphike kutsi lokutiphatsa lokungcolile lesisandza kukusho lokufaka ekhatsi kubuka titfombe tebulili letikhombisa kungcola “kutinkhanuko letingasito temvelo” futsi kukungcola? KuGalathiya 5:19-21 Pawula waphetsa ngekutsi “labo labenta” kungcola lokunjalo “bangeke balidle lifa lembuso waNkulunkulu.” Ngako-ke, nangabe lotsite sekanemkhuba wekubuka titfombe letikhombisa kungcola sikhatsi lesidze, futsi angaphendvuki angeke ahlale ebandleni lebuKhristu. Kufanele asuswe ekuhlanganyeleni kute kugcinwe libandla lihlobile futsi kugeleta umoya waNkulunkulu kulo.—1 Khor. 5:5, 11.

Kuyajabulisa kutsi labanye labawele elugibeni lwekubuka titfombe letikhombisa kungcola, bayile kulabadzala futsi balutfola lusito labebaludzinga kute bente lushintjo. Jesu washo nankha emavi kumaKhristu aseSadesi: “Ucinise loko lokusasele lobese kutakufa, . . . Khumbula-ke loko lokwemukele wakuva, ukugcine, uphendvuke. Nangabe awuvuki ucaphele . . . ngeke usati sikhatsi lengiyawukufikela ngaso.” (Semb. 3:2, 3) Ungakwati kumonyula elugibeni lwalomkhuba, njengobe benta labanye.—Juda 22, 23.

Shengatsi ngamunye wetfu angenta sincumo sekutsi angacali atisondzete kulengoti. Kufanele sitimisele kugwema tonkhe tinhlobo tetitfombe letikhombisa kungcola.

[Umbhalo longentansi]

[Emavi lahambisana nesitfombe ekhasini 30]

UmKhristu lowenta bubi lobunjalo kufanele atisole futsi atsatse sinyatselo sekulungisa buhlobo bakhe naNkulunkulu