SIHLOKO SEKUCALA

Titfombe Letikhombisa Kungcola—Tiphephile Yini Noma Tiyingoti

Umhlaba namuhla ugcwele titfombe letikhombisa kungcola.a Tingase titfolakale etikhangisweni, etintfweni temfashini, kubobhayisikobho, emculweni, kubomagazini, ku-TV, emidlalweni ye-video, kubomakhalekhikhini, etintfweni tebuchwephesha letiphatfwako, kuma-Web sites, kanye nasetinhlelweni te-internet letenta bantfu bakhone kukhombisana titfombe tabo. Titfombe letikhombisa kungcola tibonakala tiyintfo leyemukeleka kakhulu kubantfu labanyenti emhlabeni lamuhla. Bantfu labanyenti etindzaweni letinyenti, bangene batse shi etitfombeni letikhombisa kungcola kwendlula nome ngusiphi lesinye sikhatsi emlandvweni.—Fundza libhokisi lelitsi “Emaciniso Lamayelana Netitfombe letikhombisa kungcola.”

Simo setitfombe letikhombisa kungcola naso siyashintja. Profesa Gail Dines wabhala watsi: “Titfombe lesetikhona namuhla setimbi kakhulu kangangekutsi leto lebetitsatfwa njengetitfombe letimbi kakhulu setitsatfwa njengetitfombe letingcolile letivamile.”

Unamuphi wena umbono ngaloko? Engabe titfombe letikhombisa kungcola timane tiyintfo yekutilibatisa lengenangoti, tingushevu lobulalako noma tisemkhatsini waloku lokubili? Jesu watsi: “Sihlahla lesimnandzi sitsela titselo letimnandzi, kantsi sihlahla lesibi sitsela titselo letimbi.” (Matewu 7:17) Ngutiphi titselo letitselwa titfombe letikhombisa kungcola? Kuze sitfole timphendvulo, ase sihlole leminye yemibuto lemayelana netitfombe letikhombisa kungcola.

Titfombe letikhombisa kungcola tibatsintsa njani bantfu?

LOKUSHIWO BOCHWEPHESHA: Kulukhuni kuyekela titfombe letikhombisa kungcola nase ucale kutibukela futsi labanye bacwaningi nebetemphilo baze batifananise nesidzakamiva i-cocaine.

Brian,b lowangenwa ngumkhuba wekubukela titfombe letikhombisa kungcola ku-Internet, ulandzisa atsi: “Bese ngingavimbeki. Bengitiva shengatsi ngiyaphupha. Ngangize ngitikhuhlutise futsi ngacala kuba netinhlungu enhloko. Ngalwa kamatima kuze ngiyekele lomkhuba, kodvwa ngemuva kweminyaka letsite, bengisolo ngingene shi kuwo.”

Bantfu lababukela titfombe letikhombisa kungcola bavame kuwufihla lomkhuba wabo. Bayafihla futsi bayakhohlisa. Akumangalisi kutsi labaningi babo baze bative balahliwe, banemahloni, bakhatsatekile, bacindzetelekile futsi banentfukutselo. Kuletinye timo, baze bafune ngisho nekutibulala. Serge, lobekatitsatsela titfombe letikhombisa kungcola ku-internet, atigcine kumakhalekhikhini wakhe cishe malanga onkhe, utsi: “Ngase ngicale kuticabangela mine ngiphindze ngitiva ngiphelelwe litsemba. Ngativa ngiyintfo lenganamsebenti, ngidliwa ngunembeza, nginesitunge futsi ngingakhoni kutiyekela. Bengidliwa ngemahloni futsi ngesaba kucela lusito.”

Ngisho nekutitsi laphalati nome kutitfuka sewukuto titfombe letinjalo ungakahlosi, kungaba nemiphumela lemibi. Etfula umbiko wakhe phambi kwe-U.S. Senate committee, Dokotela Judith Reisman, longumcwaningi lohamba embili wetitfombe letikhombisa kungcola, watsi: “Titfombe letikhombisa kungcola takha tiphindze tishiye titfombe letingacimeki engcondvweni, tishintje indlela ingcondvo lecabanga ngayo, tibangele kutsi ngekushesha nangendlela longeke ukhone kuyibalekele kwakheke tinkhumbulo letihlala sikhatsi lesidze lokumatima kutisusa.” Susan, loneminyaka lengu-19, lowangena kuma-Web sites etitfombe letikhombisa kungcola ulandzisa atsi: “Letitfombe atisuki engcondvweni yami. Tivele nje tihle tichamuka ngingakalindzeli. Kuba sengatsi ngeke ngize ngikhone kutisusa.”

LICINISO LELINGEKE LIPHIKWE: Titfombe letikhombisa kungcola tiyabagcilata tiphindze tibalimate kakhulu labo labatibukelako.—2 Phetro 2:19.

Titfombe letikhombisa kungcola tiyitsintsa njani imindeni?

LOKO LOKUSHIWO BOCHWEPHESHA: I-The Porn Trap, leyabhalwa ngu-Wendy naLarry Maltz itsi: “Bantfu labashadene bayahlukana ngenca yetitfombe letikhombisa kungcola.”

Titfombe letikhombisa kungcola tiyayilimata imishado nemindeni ngekutsi:

Tehlisa lizinga lekwetsembana, kusondzelana nekutsandzana kwalabo labashadene.—Taga 2:12-17.
Titfutfukisa bugovu, kungabi nebungani kanye nekungenetiseki ngaloyo loshade naye.—Efesu 5:28, 29.
Titfutfukisa kutsi umuntfu acabange aphindze afise kulala ngendlela lengasiyo yemvelo.—2 Phetro 2:14.
Tilinga labo labatisebentisako kutsi baphocelele kulalana nalabashade nabo ngetindlela letingakavumeleki.—Efesu 5:3, 4.
Titfutfukisa kungetsembeki kubantfu labashadene.—Matewu 5:28.

LiBhayibheli litsi labo labashadene ‘bangabi ngulabangakatsembeki.’ (Malakhi 2:16) Kungetsembeki kuluhlobo lwekukhohlisa lolungalimata umshado futsi luholele ukuhlaleni ngekwehlukana nekudivosa. Kwehlukana lokunjalo kuphindze kulimate nebantfwana balabo labashadene.

Titfombe letikhombisa kungcola tingaphindze tilimate nebantfwana. Brian, lokuke kwakhulunywa ngaye, uchaza atsi: “Nangineminyaka lengu-10 budzala, ngatsi ngisadlala mabhacelana ngatfola bomagazini bababe labanetitfombe letikhombisa kungcola. Ngacala kubabuka ngasense, ngingacondzi kahle kutsi yini lena lebeyingenta ngidvonseleke kangaka kuletitfombe. Loko kwabangela kutsi ngicale kulimala kancane kancane, lokuyintfo leyachubeka ngaze ngaba mdzala.” Lucwaningo lukhombisa kutsi titfombe letikhombisa kungcola tingabangela bantfwana labasesigabeni sekutfomba kutsi bacale kulala basebancane futsi balale nebantfu labaningi labehlukahlukene, bente budlova betemacansi futsi bangabi nemiva nemicabango letintile.

LICINISO LELINGEKE LIPHIKWE: Titfombe letikhombisa kungcola tonakalisa budlelwane lobunelutsandvo futsi ekugcineni tibangele kulimala lokukhulu enhlitiyweni.—Taga 6:27.

Litsini liBhayibheli ngetitfombe letikhombisa kungcola?

LIVI LANKULUNKULU LITSI: “Ngaloko-ke bulalani tonkhe tinkhanuko tenu . . . bugwadla, nebuphingi, nekungcola, nekuhungeka, nekukhanuka lokubi, nebukhali lobukukhonta tithico.”—Kholose 3:5.

Kalula nje, Nkulunkulu Jehovac uyatenyanya titfombe letikhombisa kungcola. Loko akubangelwa kutsi akafuni nekuva ngetindzaba tekulalana. Wasidala saba nesifiso sekulalana futsi injongo yakhe beyikutsi bantfu labashadene basebentise leso sifiso kuze bajabulisane, basondzelane futsi bajabulele nelilungiselelo lelimangalisa kakhulu lekuba nebantfwana.—Jakobe 1:17.

Yini lengasenta siciniseke ngekutsi Jehova uyatenyanya titfombe letikhombisa kungcola? Nati letinye tizatfu letimbalwa.

Jehova uyati kutsi titfombe letikhombisa kungcola tingonakalisa kuphila kwetfu.—Efesu 4:17-19.
Uyasitsandza futsi ufisa kusivikela koloko lokungasilimata.—Isaya 48:17, 18.
Jehova ufuna kulondvolota imishado kanye nemindeni.—Matewu 19:4-6.
Ufuna sitiphatse ngendlela lehlantekile futsi sihloniphe emalungelo alabanye.—1 Thesalonika 4:3-6.
Ufuna kutsi sihloniphe emandla lasinike wona ekutalana futsi siwasebentise ngendlela lefanele.—Hebheru 13:4.
Jehova uyati kutsi titfombe letinekungcola tikhombisa umbono waSathane lophambene nalonebugovu.—Genesisi 6:2; Juda 6, 7.

LICINISO LELINGEKE LIPHIKWE: Titfombe letikhombisa kungcola tilimata buhlobo umuntfu lanabo naNkulunkulu.—Roma 1:24.

Nanome kunjalo, Jehova ubavela kakhulu labo labafisa kuphuma kulolugibe lwetitfombe letikhombisa kungcola. LiBhayibheli litsi: “Simakadze unemusa nesihawu, uyephuta kutfukutsela, andze ngemusa. Ngobe uyakwati kubunjwa kwetfu, uyakhumbula kutsi silutfuli nje.” (Tihlabelelo 103:8, 14) Nkulunkulu umema labo labatfobekile kutsi babuye kuye ‘khona batekwemukela sihawu, batfole umusa lotabasita ngesikhatsi lesifanele.’—Hebheru 4:16; fundza libhokisi lelitsi “Kuphunyula Etitfombeni Letikhombisa Kungcola.”

Bantfu labanyenti balemukele lusito lwaNkulunkulu. Bayasitakala yini? Naka loko lokushiwo liBhayibheli ngalabanye labakhona kuncoba imikhuba lemibi: “Senagezwa, nangcweliswa, nemukeleka kuNkulunkulu kutsi nilungile egameni leNkhosi Jesu Khristu nangaMoya waNkulunkulu wetfu.” (1 Khorinte 6:11) Njengemphostoli Pawula, labo bantfu bangalisho ligcwale umlomo, batsi: “Nginemandla ekwenta konkhe ngaye Khristu longicinisako.”—Filiphi 4:13.

Susan, lowakhona kuncoba umkhuba lobesewumngenile wekubukela titfombe letikhombisa kungcola, utsi: “NguJehova kuphela longakusita kutsi uncobe lomkhuba. Nangabe ucela lusito kanye nesicondziso sakhe, ungaphindze ube nebuhlobo lobuhle naye. Ngeke akwentele phansi.”

Kuphunyula Etitfombeni Letikhombisa Kungcola

Ukhona yini lomatiko lobhekene nebumatima bekuphunyula etitfombeni letikhombisa kungcola? Cabangela tinyatselo letitsite letisite labanyenti kutsi baphunyule kuto.

1. Thantaza kuNkulunkulu.

“Sinyatselo lokumcoka kakhulu kutsi usitsatse kuze uphunyule kulolugibe lwetitfombe letikhombisa kungcola kuthantaza ucele lusito lwaJehova.”—Franz.

Jehova anganiketa loyo muntfu umoya longcwele, longamenta akhone “kutsandza nekwenta.” (Filiphi 2:13) Nangabe loyo muntfu avumela kucondziswa nguwo, utamsita kutsi ancobe “tinkhanuko tenyama.”—Galathiya 5:16, 24.

2. Cela labanye bakusite.

“Nawunemkhuba wekubukela titfombe letikhombisa kungcola uyafihla futsi ube nemahloni kangangekutsi utive ungakhoni kucela lusito. Usuke ucabange kutsi ungawuncoba uwedvwa. Kodvwa loko ngeke kwenteke. Ungawuncoba kuphela ngekutsi utfole lusito. Ngako ngayekela kutetsemba, ngatfululela umkami sonkhe sifuba. Ngaphindze ngacela lusito kumngani wami lengimetsembako. Loko kwaba yintfo lematima kakhulu lokwake kwadzingeka kutsi ngiyente, kodvwa ngalutfola lusito lebengiludzinga.”—Yoshi.

Kute ukhone kutfululela labanye sifuba sakho, kudzingeka ube nesibidzi futsi utitjele kutsi vele loko utakwenta noma kanjani. Nanome kunjalo, leso sinyatselo lesimcoka kakhulu ekuncobeni lomkhuba futsi ukhone kuvuselela buhlobo bakho nalabo lobatsandzako. Susan, lokuke kwakhulunywa ngaye, ulandzisa atsi: “Ngemuva kwaloko ngeva kutsi hhemu! Leto bekutikhatsi letibuhlungu kimi, kodvwa tangibangela kutsi ngitive ngikhululekile futsi ngemukelekile.”—Jakobe 5:16.

3. Tfola kutsi yini lengase ikuvusele sifiso sekubuka letitfombe futsi wetame kukubalekela.

Ngutiphi timo, imicabango, nome imiva levusa tifiso letingakalungi? Kungena ku-Internet? Kubukela i-TV, ebusuku kakhulu? Kufundza bomagazini? Kuvakashela elwandle lakubhukushwa khona? Kulamba, kuba wedvwa, noma kudzinwa? Sven utsi: “Tfola kutsi ngutiphi tintfo lobutsakatsaka kuto, bese utibalekela njengekungatsi ubalekela inhlekelele”. Jesu watsi: “Nangabe liso lakho langesekudla likonisa, likhokhe ulilahle.”—Matewu 5:29.

Franz utsi: “Nangabe ngilingeka kutsi ngibuke umuntfu wesifazane ngenkhanuko, ngivele ngithantaze ngekushesha kuJehova futsi ngenkhani ngiwasuse emehlo ami kuye.” Jobe, indvodza leyetsembekile lokukhulunywa ngayo eBhayibhelini watsi: “Ngenta sivumelwane nemehlo ami kutsi ngingeke ngiyibuke ngenkhanuko intfombi.”—Jobe 31:1.

4. Cinisa buhlobo bakho naNkulunkulu.

Franz uchubeka atsi: “Gcwalisa ingcondvo yakho ngemicabango lekahle, futsi ube matasa ngetintfo letiphatselene nekukhonta Nkulunkulu.”

LiBhayibheli litsi: “Gcwalisani tinhlitiyo tenu ngako konkhe lokuliciniso, nangako konkhe lokuhloniphekako, nangako konkhe lokulungile, nangako konkhe lokumhlophe, nangako konkhe lokutsandzekako, nangako konkhe lokutusekako. Nome ngabe kukhona lokuhle, nome ngabe kukhona lokubongekako, cabangani ngaloko . . . , Nkulunkulu wekuthula utawuba nani.”—Filiphi 4:8, 9.

a Leligama lelitsi “titfombe letikhombisa kungcola” lisho kwatiswa lokumayelana netekulalana lokuhloselwe kuvusa inkhanuko yaloyo lokubukelako, lokufundzako, noma lokulalelako. Kungafaka ekhatsi titfombe,lokubhaliwe nalokulalelwako. Kulesihloko sitawusebentisa kakhulu ligama lelitsi “titfombe letikhombisa kungcola,” nanobe leticondziso tisebenta ngisho nasetintfweni letibhaliwe naletilalelwako letihloselwe kuvusa inkhanuko.

b Emagama ebantfu lokukhulunywa ngabo kulendzaba ashintjiwe.

c Ngetilwimi tekucala liBhayibheli lelabhalwa ngato, ligama laNkulunkulu nguJehova.

EMACINISO MAYELANA NETITFOMBE LETIKHOMBISA KUNGCOLA

NGEMZUZWANA NGAMUNYE: Bantfu labacishe babe ngu-30 000 babuka ema-Web sites lanetitfombe letikhombisa kungcola.

UMZUZU NGAMUNYE: Bantfu labangetulu KWETIGIDZI letingu-1.7 batfumela ema-e-mails lanetintfo letinekungcola.

LI-AWA NGALINYE: EMelika kukhicitwa ema-video LAMABILI lanetitfombe letikhombisa kungcola lokusezingeni lelikhulu kakhulu.

LlLANGA NGELILANGA: Bantfu labangalinganiselwa ETIGIDZINI letingetulu KWALETIMBILI bacasha bobhayisikobho labanetitfombe letikhombisa kungcola.

INYANGA NGAYINYE: EMelika, emajaha langaba ngu-9 kulangu 10 nebesifazane labasebasha labangaba ngu-3 kulabangu 10, babukela titfombe letikhombisa kungcola.

UMYAKA NGAMUNYE: Libhizinisi letintfo letihloselwe kuvusa inkhanuko lakha imali lengalinganiselwa ku-$100 BILLION (U.S.).