“Asewubuke Lesitfombe!”

Uwasho tikhatsi letingakhi lamavi nawuvula magazini lomusha uwedvwa nobe unalabanye bantfu? Letitfombe letinhle futsi letentiwe kahle tifakwe ngenjongo. Nato tiyindlela yekufundzisa ngobe tisenta sicabange futsi titsintse imivelo yetfu. Tingaba lusito nasilungiselela magazini Lofundvwako we-Sicongosekulindza nalapho siphendvula.

Nasi sibonelo: Tibute kutsi yini leyente kwafakwa futsi kwakhetfwa sitfombe lesisekhasini lekucala esihlokweni ngasinye lesifundvwako. Sigcizelela ini? Sihlobana njani naleso sihloko nobe nembhalo loyinhloko waleso sihloko? Kuto tonkhe titfombe tibute kutsi tihlobana njani nendzaba lokucocwa ngayo nekutsi tikutsintsa njani kuphila kwakho.

Umchubi weSifundvo se-Sicongosekulindza angase acele bonkhe labasebandleni kutsi baphendvule ngesitfombe ngasinye, bachaze kutsi sihlobana njani nesifundvo lokucocwa ngaso nekutsi sibatsintsa njani bona. Ngaletinye tikhatsi, kuba nemavi labhalwa eceleni kwaleso sitfombe lacatsanisa leso sitfombe nesigaba lesitsite. Kuletinye timo lona lochubako angase akhetse kutsi esigabeni lesitsite utawucoca ngasiphi sitfombe. Ngalendlela, bonkhe labakhona batawuzuza kakhulu kuloko lokwentiwe kute kubasite babone ngeliso lengcondvo tifundvo letitfolakala eVini laNkulunkulu.

Lomunye umzalwane utsi: “Nangicedza kufundza sihloko lesibhalwe kahle, titfombe letikuso tivele tente lesihloko sikhange kakhulu.”