Bobani Labenta Intsandvo YaJehova Lamuhla?
1. Sitawucala nini kufundza incwajana letsi Bobani Labenta Intsandvo YaJehova Lamuhla? futsi kutasizuzisa ngani loko?
1 Kusukela ngeliviki la-October 28 sitawube sifundza incwajana letsi Bobani Labenta Intsandvo YaJehova Lamuhla? eSifundvweni SeliBhayibheli Selibandla. Lencwajana lensha leyakhululwa eMhlanganweni Wesigodzi lobewunesihloko lesitsi “Londvolota Inhlitiyo Yakho!” yentelwe kusita tifundvo teliBhayibheli kutsi tite enhlanganweni yaNkulunkulu. Kufundza lencwajana ngeke kugcine ngekusisita ekutfutfukiseni lutsandvo lwetfu ngenhlangano yaJehova, kodvwa kutasisita nangekutsi setayelane nalencwajana njengobe ilithulusi lelilusito emsebentini wetfu wekushumayela.—Hla. 48:13.
2. Lencwajana itawusetjentiswa njani ebandleni?
2 Indlela Letawufundvwa Ngayo: Umchubi kufanele ahlele sikhatsi sakhe kahle kuze kutsi sifundvo ngasinye sihlanganiswe kahle. Utawucala sifundvo ngasinye kuletifundvo letingu-28 ngekutsi afundze sihloko lesingumbuto. Ngemuva kwaloko utawucela umfundzi wetigaba kutsi afundze sigaba lesisetfulo salesifundvo. Umchubi utawubese ubuta libandla umbuto lawulungiselele walesetfulo. Ngemuva kwaloko, incenye ngayinye lecala ngemavi labhalwe ngalokugcamile kufanele ifundvwe futsi idzingidvwe yodvwa. Naseyifundziwe lencenye, umchubi utawucela libandla lisho kutsi iwuphendvula njani lombuto lokulesihloko salesifundvo. Lencwajana iphindze ibe netitfombe letinyenti letingakhulunyelwa. Imibhalo leyinhloko kufanele ifundvwe nangabe sikhatsi sivuma. Ngaphambi kwekutsi kuchutjekelwe esifundvweni lesilandzelako, umchubi utawubuta imibuto yekubuketa lesekugcineni kwelikhasi. Nangabe kunelibhokisi lelitsi “Tfola Lokunyenti,” utawucela kutsi lifundvwe, bese ucela libandla lisho kutsi umuntfu lochutjelwa sifundvo seliBhayibheli angazuza njani ngekwenta loku lokushiwo kulo. Nangabe sikhatsi sisekhona, ekuphetseni kwesifundvo, umchubi angasebentisa tihlokwana letikuletifundvo njengemibuto yekubuketa. Asikhumbuleni kutsi kute sidzingo sekutsi lendlela isetjentiswe nakuchutjwa sifundvo seliBhayibheli sasekhaya.
3. Yini letasisita kutsi sizuze kakhulu ngekufundza lencwajana?
3 Kuze uzuze kahle, ubokuya emhlanganweni ulungiselele kahle. Yenta imetamo yekutsi uphendvule. Nasisachubeka lesifundvo, cabanga ngendlela lesingabazuzisa ngayo bantfu labachutjelwa tifundvo teliBhayibheli. Shengatsi kufundza kwetfu lencwajana lensha kungasisita sikhone kusita nalabanye kutsi bente intsandvo yaNkulunkulu kanye natsi kuze nabo babe nelitsemba lekutfola kuphila lokuphakadze.—1 Joh. 2:17.