IMIBUTO YELIBHAYIBHELI IYAPHENDVULWA
Likhona yini litsemba ngalabafile?
Kufa kunjengekulala ngobe labafile abati lutfo futsi kute labakhona kukwenta. Kodvwa uMdali wekuphila angababuyisela ekuphileni bantfu labafile ngekutsi abavuse. Kute afakazele loko, Nkulunkulu wanika Jesu emandla ekuvusa bantfu labatsite.—Fundza Umshumayeli 9:5; Johane 11:11, 43, 44.
Kufa kufana njani nekulala?
Nkulunkulu wetsembise kutsi labafile labasenkhumbulweni yakhe batawuvuselwa ekuphileni, emhlabeni lomusha lonekulunga. Labo labatawuvuswa batawulindza emathuneni kudzimate kube ngulapho Nkulunkulu abanika kuphila. Nkulunkulu longuSomandla uyakulangatelela kusebentisa emandla akhe kute avuse labafile.—Fundza Jobe 14:14, 15.
Kutawuba njani kuvuswa kwalabafile?
Nkulunkulu nasavusa bantfu labafile, batawukhona kutibona kutsi basengibo, babone bangani babo nemindeni yabo. Ngisho nobe umtimba wemuntfu ubola, Nkulunkulu angakwati kumvusa loyo muntfu abuye abe nemtimba lomusha.—Fundza 1 Khorinte 15:35, 38.
Bambalwa bantfu labatawuvuselwa ekuphileni kwasezulwini. (Sembulo 20:6) Bantfu labanyenti labavusiwe batawuphila emhlabeni lolungisiwe lolipharadisi. Batakucala kabusha kuphila kwabo futsi babe nelitsemba lekuphila phakadze.—Fundza Tihlabelelo 37:29; Imisebenti 24:15.