Yenta Ngekuvumelana Nemthantazo WaJesu Lokhombisa Lutsandvo

1, 2. Chaza loko Jesu lakwentela baphostoli bakhe labetsembekile ngemuva kwekugubha nabo liPhasika nga-33 C.E.

KUKUSIHLWA ngaNisan-14 ngemnyaka wa-33 C.E. Jesu nebangani bakhe bajabulele kugubha liPhasika lelibakhumbute ngendlela Nkulunkulu lakhulula ngayo bokhokho babo ebugcilini baseGibhithe. Nome kunjalo, bafundzi bakhe labetsembekile batawutfola “kuhlengwa kwaphakadze.” Ngakusasa, uMholi wabo lote sono utawubulawa titsa takhe. Lesento lesikhombisa inzondo sitawugucuka sibe sibusiso. Ingati yaJesu letawuchitseka itawuvula indlela yekutsi bantfu bakhululwe esonweni nasekufeni.—Heb. 9:12-14.

² Jesu wacalisa umkhosi lomusha waminyaka yonkhe lowatsatsa sikhundla seliPhasika kute acinisekise kutsi asilikhohlwa lelilungiselelo lelikhombisa lutsandvo. Loko wakwenta ngekutsi ahlephule sinkhwa lesite imbiliso asinikete umphostoli ngamunye lowetsembekile kuba phostoli bakhe labangu-11, watsi: ‘Loku ngumtimba wami lonikelwe esikhundleni senu. Yentani loku kuze kube sikhumbuto ngami.’ Wenta njalo nangendzebe yeliwayini lelibovu, wabatjela kutsi: ‘Lendzebe sivumelwane lesisha sengati yami lecitselwe nine.’—Luk. 22:19, 20.

3. (a) Nguluphi lushintjo lolukhulu lolwenteka ngemuva kwekufa kwaJesu? (b) Ngumiphi imibuto lokufanele sicabange ngayo mayelana nemthantazo waJesu lokuJohane sehluko 17?

³ Besekusele kancane kutsi kuphele kusebenta kwesivumelwane seMtsetfo lesidzala Nkulunkulu lebekasente nema-Israyeli emvelo. Sivumelwane lesidzala besitawutsatselwa sikhundla sivumelwane lesisha Jehova lasenta nebalandzeli baJesu labagcotjiwe. Jesu abeyikhatsalela kakhulu inhlalakahle ya-Israyeli waNkulunkulu. Ema-Israyeli abengasimunye ekukhonteni Nkulunkulu futsi abengahlalisani ngekuthula, bekute nelitsemba lekutsi siyoke silunge lesimo. Loko bekulihlambalata libito laNkulunkulu lelingcwele. (Joh. 7:45-49; Imis. 23:6-9) Ngalokwehlukile, Jesu bekanesifiso sekutsi balandzeli bakhe bahlale bamunye kute basebente ngekuvumelana futsi bakhatimulise libito laNkulunkulu. Yini Jesu layenta? Wathantaza umthantazo lotsintsa inhlitiyo longafundvwa ngibo bonkhe bantfu. (Joh. 17:1-26; buka sitfombe lesisekucaleni kwalesihloko.) Njengobe sifundza ngalomthantazo, asitibute kutsi: “Nkulunkulu uwuphendvulile yini lomthantazo waJesu?” Kufanele sitihlolisise bese sitibuta kutsi: “Mine ngenta ngekuvumelana nawo yini lomthantazo?”

TINTFO LEBETIBALULEKILE KUJESU

4, 5. (a) Yini lesiyifundzako ekucaleni kwemthantazo waJesu? (b) Jehova wasiphendvula njani sicelo saJesu lesimayelana nelikusasa lakhe?

⁴ Jesu wakhuluma kwate kwaba sebusuku aniketa bafundzi bakhe lwati leliligugu lelivela kuNkulunkulu. Ngemuva kwaloko wabheka etulu ezulwini wase uyathantaza utsi: “Babe, sikhatsi sesifikile. Khatimulisa iNdvodzana yakho, kuze iNdvodzana itekukhatimulisa. Ngobe uyiphe emandla ngetulu kwabo bonkhe bantfu, kuze itebapha kuphila lokuphakadze bonkhe labo loyiphe bona. .   . Ngikudvumisile eveni ngekucedzela umsebenti lowanginika wona kutsi ngiwente. Manje-ke, Babe, ngikhatimulise kuwe ngaleyo nkhatimulo lenganginayo ngisenawe, umhlaba ungakasekelwa.”—Joh. 17:1-5.

⁵ Naka tintfo lebetibalulekile kuJesu nakacala umthantazo wakhe. Ngalokuyinhloko abekhatsalela kungcweliswa kwelibito lababe wakhe wasezulwini futsi loko kuvumelana nesicelo sekucala lesisemthantazweni waJesu losibonelo lesitsi: “Babe, alingcweliswe libito lakho.” (Luk. 11:2) Lokunye lokwakubalulekile kuJesu kutsi tidzingo tebafundzi bakhe tinakekelwe ‘kuze atebapha kuphila lokuphakadze.’ Ngemuva kwaloko Jesu wacela watsi: “Babe, ngikhatimulise kuwe ngaleyo nkhatimulo lenganginayo ngisenawe, umhlaba ungakasekelwa.” Jehova wayibusisa iNdvodzana yakhe leyetsembekile ngalokungetulu kwaloko lebeyikucelile. Wakwenta loku ngekunika Jesu “libito lelikhulu kunelato” tonkhe tingilosi.—Heb. 1:4.

‘KWATI NKULUNKULU LONGUYENA YEDVWA WELICINISO’

6. Yini lobekudzingeka baphostoli bayente kute batfole kuphila lokuphakadze, futsi sati kanjani kutsi baphumelela?

⁶ Jesu uphindze athantaze ngaloko lokufanele tsine toni sikwente kute kusifanele kutfola sipho sekuphila lokuphakadze. (Fundza Johane 17:3.) Utsi kufanele sichubeke ‘simati’ Nkulunkulu naKhristu. Kufanele sente konkhe lokusemandleni kute sifundze lokunyenti ngaJehova neNdvodzana yakhe. Lenye indlela lebalulekile yekufundza ngaNkulunkulu kutfola injabulo yekusebentisa loko lesikufundzako ngaye. Baphostoli bebayisebentisa lendlela leholela ekuphileni, ngako Jesu wachubeka wathantaza watsi: “Ngibanikile lamavi lowanginika wona, nabo bawemukela.” (Joh. 17:8) Kodvwa kute batfole kuphila lokuphakadze, bekudzingeka bachubeke bazindla ngaloko lokushiwo nguNkulunkulu futsi bakusebentise ekuphileni kwabo. Baphostoli labetsembekile baphumelela yini kukwenta loko nabasaphila emhlabeni? Baphumelela. Siyakwati loko ngobe emabito abo abhalwe ngendlela yekutsi angacimeki ematjeni lasisekelo langu-12 laseJerusalema Lensha ezulwini.—Semb. 21:14.

7. Kusho kutsini ‘kwati’ Nkulunkulu, futsi kubaluleke ngani?

⁷ Ngekusho kwetati telulwimi lwesiGriki, ligama lesiGriki lelihunyushwe ngekutsi ‘kwati’ lingaphindze lihunyushwe ngekutsi “bahlale bakwati” nome “bachubeke nekukwati.” Letinchazelo tiyavumelana futsi tibalulekile totimbili. Umbhalo longentasi waJohane 17:3 ku-Reference Bible, usinika lenye inchazelo letsi “kukwati wena.” Ngako-ke, ‘kwati’ kusho kufundza lokuchubekako lokuletsa sibusiso ‘sekwati’ Nkulunkulu. Kwati Nkulunkulu njengobe amkhulu endzaweni yonkhe, kudzinga lokungetulu kwekucondza bunguye bakhe nenjongo yakhe. Kwati Jehova kuhlanganisa kumtsandza yena kanye nalesikholwa nabo. LiBhayibheli litsi: “Lote lutsandvo akamati Nkulunkulu.” (1 Joh. 4:8) Ngaleyondlela, kwati Nkulunkulu kufaka ekhatsi kumlalela. (Fundza 1 Johane 2:3-5.) Kusibusiso lesikhulu kuba ngulomunye webantfu labatiwa nguJehova! Kodvwa njengobe kwenteka kuJudasi Skariyothe, lobuhlobo lobuligugu bungaphela. Kufanele sente konkhe lokusemandleni etfu kute sibugcine bukhona. Nasenta njalo, kutasifanela kutfola sipho semusa lesikuphila lokuphakadze.—Mat. 24:13.

“EGAMENI LAKHO”

8, 9. Yini lebeyibaluleke kakhulu kuJesu nakenta umsebenti wakhe emhlabeni, futsi nguyiphi imfundziso yenkholo langazange avumelane nayo?

⁸ Njengobe sifundza lomthantazo waJesu lokuJohane 17, kuyacaca kutsi Jesu bekangatsandzi kuphela bafundzi bakhe kodvwa natsi. (Joh. 17:20) Ngesikhatsi lesifanako, kudzingeka sicondze kutsi kusindziswa kwetfu akusiyo intfo lebaluleke kakhulu kuJesu. Kusukela ekucaleni kwemsebenti wakhe nakasemhlabeni kwaze kwaba sekupheleni kwawo, injongo yakhe leyinhloko bekukusebentela kungcweliswa kanye nekukhatinyuliswa kwelibito laBabe wakhe. Nasi sibonelo: Ngalesikhatsi akhuluma ngemsebenti wakhe asesinagogeni laseNazaretha, Jesu wafundza umculu wa-Isaya lotsi: “UMoya weNkhosi [Jehova] ukimi, ngobe ungigcobile kutsi ngishumayele tindzaba letimnandzi etimphuyeni.” Asingabati kutsi walisho ngalokucacile libito laNkulunkulu nakafundza ngemsebenti wakhe.—Luk. 4:16-21.

⁹ Ngekwelisiko lemaJuda kusesele sikhatsi lesidze kutsi Jesu ete emhlabeni, baholi benkholo bafundzisa bantfu kutsi akukafaneli balisebentise libito laNkulunkulu. Singaciniseka kutsi Jesu akazange avumelane nalemfundziso lengakasekelwa eBhayibhelini. Nakakhuluma nebaphikisi bakhe watsi: “Mine ngite egameni laBabe, kodvwa aningemukeli; kepha nakuta lomunye atitela egameni lakhe, yena nitamemukela.” (Joh. 5:43) Ngaphambi kwemalanga lambalwa Jesu angakafi, waveta intfo lebeyibaluleke kakhulu ekuphileni kwakhe ngekutsi athantaze atsi: “Babe, dvumisa ligama lakho.” (Joh. 12:28) Ngako-ke akukafaneli kusimangalise kutsi kulomthantazo lesifundza ngawo nyalo, Jesu waveta kutsi lokubaluleke kakhulu libito laBabe wakhe.

10, 11. (a) Bekufaka ekhatsi ini kwatisa kwaJesu bantfu ngelibito laBabe wakhe? (b) Bafundzi baJesu kufanele basebentele kumuphi umgomo?

¹⁰ Jesu wathantaza watsi: “Ligama lakho ngilatisile kulabo longiphe bona. Babevele babakho, wangipha bona. Baligcinile livi lakho. Babe Longcwele, bagcine egameni lakho longiphe lona, kuze nabo babe munye, njengobe wena nami simunye.”—Joh. 17:6, 11.

¹¹ Kwatisa bafundzi libito laBabe wakhe bekuhlanganisa lokungetulu kwekubatjela lona ngemlomo. Jesu waphindze wabasita bati kutsi limeleleni libito laNkulunkulu, ngalokuyinhloko bunguye bakhe nendlela lasebentelana ngayo natsi. (Eks. 34:5-7) Ngetulu kwaloko kusukela Jesu asesikhundleni lesiphakeme ezulwini, uyachubeka nekusita bafundzi bakhe kutsi batise bantfu libito laJehova emhlabeni wonkhe jikelele. Loko bakwenta banamuphi umgomo? Ngemgomo wekutsi kwengenteke bafundzi labanyenti kungakafiki kuphela kwalelive lelibi. Ngemuva kwaloko, Jehova utatentela ligama ngendlela lemangalisako nakakhulula bofakazi bakhe labetsembekile.—Hez. 36:23.

“KHONA LIVE LITAWUKHOLWA”

12. Ngutiphi tintfo letintsatfu letidzingekako kute siphumelele ekwenteni umsebenti losindzisa kuphila?

¹² Ngalesikhatsi asemhlabeni Jesu wenta konkhe lokusemandleni akhe ekusiteni bafundzi bakhe kutsi bancobe butsakatsaka babo. Bekubalulekile kutsi bakwente loko kute bakhone kucedza umsebenti Jesu lawucala. Jesu wathantaza watsi: “Njengobe nawe wangitfumela eveni, nami ngibatfumela eveni.” Kute baphumelele ekwenteni lomsebenti losindzisa kuphila, Jesu wagcizelela tintfo letintsatfu letidzingekako letibalulukile. Kwekucala, uthantazela kutsi bafundzi bakhe bangabi yincenye yalelive lelibi laSathane. Kwesibili, uthantazela kutsi bangcweliswe nobe bahlale bangcwele ngekutsi bakusebentise lokushiwo liVi laNkulunkulu. Kwesitsatfu, Jesu wancenga kanyenti kutsi bafundzi bakhe batsandzane futsi babe munye njengobe kunjalo kuye naBabe wakhe. Kwenta njalo kudzinga kutsi sitihlolisise. Ngamunye wetfu kufanele atibute kutsi: ‘Ngenta ngekuvumelana naleticelo taJesu letintsatfu yini?’ Ngekusho loku, Jesu wakhombisa kutsi bekanelitsemba lekutsi leticelo takhe titawufezeka ‘khona live litawukholwa kutsi utfunywe nguye.’—Fundza Johane 17:15-21.

13. Umthantazo waJesu waphendvuleka njani ngelikhulu lekucala leminyaka?

¹³ Kuphendvuleka kwemthantazo waJesu kubonakala nasifundza emaVangeli lamane neMisebenti Yebaphostoli eBhayibhelini. Cabanga ngematfuba labengaba khona ekwehlukana kumaKhristu ekucala, lamanye awo abengemaJuda lamanye abantfu betive, kunalanjingile nalaphuyile, lebekatigcili nalabekanetigcili. Nome kunjalo, onkhe lamaKhristu aba munye kangangekutsi afananiswa netitfo temtimba letehlukahlukene Jesu loyinhloko yawo. (Ef. 4:15, 16) Loku kusimangaliso lesikhulu kulelive lelibuswa nguSathane lelite bunye. NguJehova lofanelwa kudvunyiswa ngenca yaloku ngobe nguye lowente kwaba njalo ngekusebenta kwemoya wakhe longcwele.—1 Khor. 3:5-7.

14. Umthantazo waJesu uphendvuleke njani esikhatsini sanyalo?

¹⁴ Kuyadzabukisa kutsi lobunye lobusimangaliso baphela nakufa baphostoli. Esikhundleni saloko njengobe kwakuphrofethiwe, kwaba khona kuhlubuka lokukhulu ebandleni lokwenta kutsi kube nemahlelo lamanyenti alabaseTikholweni Letitsi TebuKhristu. (Imis. 20:29, 30) Ngemnyaka wa-1919, Jesu wakhulula balandzeli bakhe labagcotjiwe ekutfunjweni yinkholo yemanga futsi wabahlanganisela ‘esibophweni sekuphelela.’ (Khol. 3:14) Kushumayela kwabo, kube namuphi umphumela emhlabeni? ‘Letinye timvu’ letingetulu kwetigidzi letisikhombisa ‘lokubantfu labaphuma etiveni tonkhe, nasemindenini yonkhe, nasemaveni onkhe, nasetilimini tonkhe,’ tidvonsiwe taba mhlambi munye nemhlambi logcotjiwe waNkulunkulu. (Joh. 10:16; Semb. 7:9) Lena yimphendvulo lejabulisako yemthantazo waJesu lotsi: “Kuze live lati kutsi wangitfuma nekutsi nabo uyabatsandza, njengobe nami wangitsandza.”—Joh. 17:23.

SIPHETFO LESIJABULISAKO

15. Ngusiphi sicelo lesikhetsekile Jesu lasentela bafundzi bakhe labagcotjiwe?

¹⁵ Nakusandza kuhlwa ngaNisan 14, Jesu wabakhatimulisa nobe wabadvumisa bafundzi bakhe ngekutsi ente sivumelwane sekubusa nabo eMbusweni wakhe. (Luk. 22:28-30; Joh. 17:22) Ngako nakakhuluma ngabo bonkhe labebatawuba balandzeli bakhe labagcotjiwe, Jesu wathantaza watsi: “Babe, ngifisa kutsi labo longiphe bona nabo babe khona lapho nami ngikhona, kuze batewubona inkhatimulo yami lowangipha yona, ngobe wangitsandza, umhlaba ungakasekelwa.” (Joh. 17:24) Loku kwaletsa injabulo, hhayi umona kuletinye timvu taJesu futsi kungulobunye bufakazi bebunye lobukhona kumaKhristu eliciniso emhlabeni lamuhla.

16, 17. (a) Jesu waveta kuphi kutimisela nakaphetsa umthantazo wakhe? (b) Yini lokufanele sitimisele kuyenta?

¹⁶ Bantfu labanyenti emhlabeni abavumelani nebufakazi bekutsi Jehova unebantfu labamunye labamati kahle. Loko bakwenta ngobe balawulwa baholi betinkholo tabo. Lokufana naloku kwenteka nangesikhatsi saJesu. Kungako Jesu waphetsa lomthantazo ngalamavi lajabulisako latsi: “Babe lolungile, live alikwati wena, kodvwa mine ngiyakwati; nalaba bayati kutsi ngitfunywe nguwe. Ngibatisile libito lakho, futsi ngisetawuchubeka ngente njalo, kuze kutsi lutsandvo longitsandze ngalo lube khona nakubo, nami ngibe kubo.”—Joh. 17:25, 26.

¹⁷ Ngubani longaphika kutsi Jesu wenta ngekuvumelana nalomthantazo wakhe? Njengobe ayiNhloko yelibandla, uyachubeka nekusisita kutsi sati libito laBabe wakhe nenjongo yakhe. Shengatsi singahlale sititfoba ebunhlokweni bakhe ngekutsi sitimisele kulalela imiyalo yakhe, sishumayele futsi sente bafundzi. (Mat. 28:19, 20; Imis. 10:42) Shengatsi singenta konkhe lokusemandleni etfu kute silondvolote bunye betfu lobuligugu. Ngekwenta loku, sitawube senta ngekuvumelana nemthantazo waJesu, umphumela ube kungcweliswa kwelibito laJehova futsi natsi sijabule phakadze.