Libito LaNkulunkulu​—Libaluleke Kanganani KuJesu?

1-2. (a) Yini Jesu layenta ngebusuku bekugcina ngaphambi kwekutsi abulawe? (b) Ngumiphi imibuto lesitayiphendvula kulesihloko?

BEKUNGULESINE ebusuku ngaNisani 14, 33 C.E., futsi besekusele kancane kutsi Jesu atsengiswe, ehlulelwe, alahlwe ngelicala, aphatfwe ngesibhuku futsi abulawe. Bekasandza nje kucedza kuba nesidlo lesikhetsekile nebaphostoli bakhe labetsembekile ekamelweni lelisetulu. Ngemuva kwalesidlo, Jesu watjela labaphostoli bakhe emavi ekugcina lakhutsatako. Ngaphambi kwekutsi bonkhe baphume kulelikamelo, Jesu wema kancane wabese usho umthantazo lobaluleke kakhulu. Umphostoli Johane wawubhala lomthantazo; utfolakala kuJohane sehluko 17.

² Umthantazo waJesu uveta kutsi bekakhatsateke ngani ngaleso sikhatsi? Lomthantazo ukuveta njani loko bekubalulekile kuye kuso sonkhe lesikhatsi enta umsebenti wekushumayela lamhlabeni? Asesicoce ngetimphendvulo talemibuto.

“NGIBAFUNDZISILE NGELIBITO LAKHO”

3. Yini Jesu layisho ngelibito laNkulunkulu, futsi bekasho kutsini? (Johane 17:6, 26)

³ Ngesikhatsi Jesu athantaza, watsi: “Ngibafundzisile ngelibito lakho.” Ecinisweni, washo kabili kutsi ubafundzisile bafundzi bakhe libito laNkulunkulu. (Fundza Johane 17:6, 26.) Bekasho kutsini? Bekabatjele ligama lebebangalati yini? Bafundzi baJesu bebangemaJuda, ngako besebavele balati libito laNkulunkulu kutsi nguJehova. Lelibito belivela tikhatsi letitinkhulungwane emiBhalweni yesiHebheru. Ngako Jesu bekangakhulumi ngelibito laNkulunkulu, kunaloko bekakhuluma ngaloko lelibito lelikumelelako. Jesu bekabafundzise ngaloMuntfu lomelelwa nguleligama, lokufaka ekhatsi tinjongo takhe, loko lakwentile kanye nebuntfu bakhe, futsi loko wakwenta ngendlela lebekute lomunye umuntfu lebekangakhona kukwenta ngayo.

4-5. (a) Singakufananisa nani kulati kancono ligama lemuntfu? (b) Bafundzi baJesu balati njani libito laNkulunkulu kancono?

⁴ Asesibekise, asesitsi kunalomdzala welibandla losebandleni lokulo lokutsiwa nguDavid futsi ungudokotela. Sekuphele iminyaka leminyenti umati lomzalwane. Kodvwa ngalelinye lilanga ugula kamatima. Babese bakuphutfumisa kulesibhedlela lasebenta kuso, futsi afike asindzise kuphila kwakho. Indlela lombuka ngayo isafana yini nakucala, nawucabanga ngalomsebenti wakhe? Cha ayisafani! Nyalo David akasasuye nje lomdzala welibandla lomatiko, sewuphindze abe ngulodokotela losindzise kuphila kwakho.

⁵ Ngendlela lefanako, bafundzi baJesu besebalati libito laNkulunkulu. Kodvwa lelibito labese libaluleka kakhulu kubo ngenca yemsebenti waJesu. Sisho ngani? Sisho ngobe Jesu wabuveta kahle kakhulu buntfu baBabe wakhe kuko konkhe lakusho nalakwenta. Ngako labafundzi bakhe babese ‘bamati’ kancono Jehova ngekutsi balalele indlela Jesu bekafundzisa ngayo futsi banakisise indlela bekabaphatsa ngayo bantfu.​—Joh. 14:9; 17:3.

‘LIBITO LAKHO LONGIPHATSISE LONA’

6. Jesu bekasho kutsini nakatsi uphatsiswe libito laNkulunkulu? (Johane 17:11, 12)

⁶ Nakathantaza, Jesu wacelela bafundzi bakhe watsi: “Bavikele ngenca yelibito lakho longiphatsise lona.” (Fundza Johane 17:11, 12.) Loko bekusho kutsi Jesu sewutawubitwa ngelibito laNkulunkulu yini? Cha. Naka kutsi kulomthantazo, nakakhuluma ngelibito laNkulunkulu utsi “libito lakho.” Ngako libito lelitsi Jehova akuzange kube libito laJesu. Bekasho kutsini-ke Jesu nakatsi uphatsiswe libito laNkulunkulu? Kwekucala nje, Jesu bekamelele Jehova futsi anguMkhulumeli wakhe. Weta ngelibito laBabe wakhe futsi wenta imisebenti lenemandla asebentisa lelibito. (Joh. 5:43; 10:25) Ngetulu kwaloko, ligama lelitsi Jesu lisho kutsi “Jehova Uyinsindziso.” Ngako inchazelo yelibito laJesu ifaka ekhatsi ligama laNkulunkulu.

7. Fanekisa kutsi Jesu bakangakhuluma njani egameni laNkulunkulu.

⁷ Nasi sibonelo, ngenca yekutsi mbasada umelela umbusi, angakhuluma egameni lalombusi. Ngako emavi lashiwo ngulombasada atawuba neligunya lelifanako nalapho kube bekukhuluma lombusi. Ngendlela lefanako, Jesu wamelela Jehova futsi wakhuluma nebantfu egameni lakhe.​—Mat. 21:9; Luk. 13:35.

8. Yini leyenta Jehova watsi Jesu ‘uta’ ngeligama lakhe ngisho nangaphambi kwekutsi ete lamhlabeni? (Eksodusi 23:20, 21)

⁸ Njengobe bekanguliVi, Jesu bakanguMkhulumeli waJehova ngekutsi endlulisele imininingwane kanye neticondziso kulamanye emadvodzana aNkulunkulu langumoya kanye nakubantfu. (Joh. 1:1-3) Kungenteka Jesu ngulengilosi leyatfunywa nguJehova kutsi inakekele ema-Israyeli nakasehlane. Ngesikhatsi atjela ema-Israyeli kutsi alalele lengilosi, Jehova watsi: “Ita ngeligama lami.”a (Fundza Eksodusi 23:20, 21.) Jesu ‘beketa’ ngeligama laNkulunkulu ngemcondvo wekutsi bekamelela Jehova futsi kunguye lohamba embili ekungcweliseni libito laBabe wakhe futsi ahamba embili ekukhombiseni kutsi konkhe Jehova lakwentako kulungile.

“BABE, KHATIMULISA LIBITO LAKHO”

9. Belibaluleke kanganani libito laNkulunkulu kuJesu? Chaza.

⁹ Njengobe sesicocile, ngisho nangaphambi kwekutsi Jesu ete lamhlabeni, libito laNkulunkulu belibaluleke kakhulu kuye. Kungako singamangali kutsi ngesikhatsi alamhlabeni waphindze wakhombisa ngako konkhe lakwenta kutsi libaluleke kanganani libito laNkulunkulu kuye! Ngasekupheleni kwemsebenti wakhe wekushumayela, wathantaza watsi: “Babe, khatimulisa libito lakho.” Babe wakhe wamphendvula ngekushesha ngelivi lelikhulu lelivela ezulwini watsi: “Ngilikhatimulisile, futsi ngitawuphindze ngilikhatimulise.”​—Joh. 12:28.

10-11. (a) Jesu walingcwelisa njani libito laNkulunkulu? (Buka nesitfombe.) (b) Yini leyenta kudzingeke kutsi libito laNkulunkulu lingcweliswe futsi lihlengwe?

¹⁰ NaJesu walingcwelisa libito laBabe wakhe. Kanjani? Watjela labanye ngebuntfu baBabe wakhe lobuhle nangetintfo letimangalisako latentile. Nanobe kunjalo, kunalokunye lebekufanele kwentiwe kuze kungcweliswe leligama. Bekufanele kungcweliswe libito laNkulunkulu futsi kuhlengwe nelidvumela lakhe.b Jesu wakhombisa kutsi bekubaluleke ngani loko ngesikhatsi afundzisa balandzeli bakhe indlela yekuthantaza. Watsi: “Babe wetfu losemazulwini, alingcweliswe libito lakho.”​—Mat. 6:9.

¹¹ Yini leyenta libito laNkulunkulu kwadzingeka kutsi lingcweliswe futsi lihlengwe? Kungenca yekutsi e-Edeni, Sathane Develi wahlambalata Jehova Nkulunkulu futsi wamnyundzela. Watsi Jehova ungumcambimanga futsi kunalokuhle labagodlela kona bo-Adamu na-Eva. (Gen. 3:1-5) Ngekusho njalo, bekasho kutsi indlela Jehova lenta ngayo tintfo ayikalungi. Lamanga lawakhuluma ahlasela ngalokucondzile lidvumela laJehova, nobe libito lakhe. Ngesikhatsi saJobe, Sathane watsi labo labakhonta Jehova bamkhonta kuphela ngenca yekutsi kunalokutsite labakutfolako kuye. Lamanga bekamangalela bantfu ngekutsi kute umuntfu lomtsandza mbamba Jehova kangangekutsi angachubeka amkhonta ngisho abhekana nebumatima. (Jobe 1:9-11; 2:4) Bekudzingeka sikhatsi kuze kubonakale kutsi ngubani lonemanga, nguJehova nobe nguSathane.

“NGINIKELA NGEKUPHILA KWAMI”

12. Yini Jesu bekalungele kuyenta ngenca yekutsi bekatsandza libito laNkulunkulu?

¹² Ngenca yekutsi Jesu bekamtsandza Jehova, bekafuna kwenta konkhe langakwenta kuze angcwelise libito laNkulunkulu futsi alihlenge. Jesu watsi: “Nginikela ngekuphila kwami.” (Joh. 10:17, 18) Bekakulungele ngisho nekufa ngenca yelibito laNkulunkulu.c Bantfu bekucala lebebete sono, bo-Adamu na-Eva, bamshiya Jehova futsi baba seluhlangotsini lwaSathane. Ngalokwehlukile, Jesu wavuma kuta emhlabeni futsi wakhombisa kutsi uyamtsandza Jehova. Loko wakwenta ngekutsi agcine bucotfo bakhe kuko konkhe kuphila kwakhe alamhlabeni. (Heb. 4:15; 5:7-10) Kuko konkhe kuphila kwakhe wagcina bucotfo bakhe, kwaze kwaba ngulapho afa kabuhlungu elugodvweni. (Heb. 12:2) Ngaleyondlela, wakhombisa kutsi uyamtsandza Nkulunkulu kanye nelibito lakhe.

13. Yini leyenta sitsi nguJesu lebekangakhona kuveta kahle kutsi Sathane unemanga? (Buka nesitfombe.)

¹³ Kuko konkhe kuphila kwakhe, Jesu wakhombisa kutsi nguSathane lonemanga, hhayi Jehova! (Joh. 8:44) Jesu bekamati kancono Jehova kwendlula nobe ngabe ngumuphi umuntfu lowake waphila. Kube bekukhona lokuliciniso kuloko Sathane lakusho ngaJehova, Jesu bekatawukwati. Kodvwa Jesu wema wacina, wamelela lidvumela laJehova nobe libito lakhe. Ngisho nangalesikhatsi kubonakala ngatsi Jehova sewumshiyile, Jesu bekatimisele kufa kunekutsi avukele Babe wakhe lonelutsandvo.​—Mat. 27:46.d

“NGIWUCEDZILE UMSEBENTI LONGITFUME KUTSI NGIWENTE”

14. Jehova wambusisa njani Jesu ngenca yekwetsembeka?

¹⁴ Kulomthantazo Jesu lawusho ngebusuku lobungaphambi kwekutsi abulawe, watsi: “Ngiwucedzile umsebenti longitfume kutsi ngiwente.” Beketsemba kutsi Babe wakhe bekatambusisa ngenca yekwetsembeka kwakhe. (Joh. 17:4, 5) Jehova akazange amdvumate. Akazange avume kutsi Jesu achubeke asethuneni. (Imis. 2:23, 24) Wamvusa ekufeni futsi wamniketa sikhundla lesiphakeme kakhulu ezulwini. (Fil. 2:8, 9) Ekugcineni, Jesu waba yiNkhosi yeMbuso waNkulunkulu. Yini letawufezwa nguloMbuso? Nawuchubeka lomthantazo losibonelo utsi: “UMbuso wakho awute. Intsandvo yakho [Jehova] ayentiwe emhlabeni njengasezulwini.”​—Mat. 6:10.

15. Yini lenye letawufezwa nguJesu?

¹⁵ Esikhatsini lesitako, Jesu utakulwa netitsa taNkulunkulu futsi abhubhise lababi nge-Amagedoni. (Semb. 16:14, 16; 19:11-16) Ngekushesha ngemuva kwaloko, utawujikijela Sathane ‘emgodzini longenamkhawulo’ lapho atawuvalelwa khona angakhoni kwenta lutfo. (Semb. 20:1-3) Ngesikhatsi Sekubusa Kwakhe Kweminyaka Leyinkhulungwane, Jesu utawuphindze ente kube nekuthula futsi ente bantfu babebete sono. Utawuvusa labafile. Ente umhlaba wonkhe ube lipharadisi. Injongo yaJehova itawufezeka!​—Semb. 21:1-4.

16. Yini letawube seyifeziwe ngasekupheleni Kweminyaka Leyinkhulungwane Yekubusa KwaKhristu?

¹⁶ Yini lesingalindzela kutsi yenteke ngasekupheleni Kweminyaka Leyinkhulungwane Yekubusa KwaJesu? Bantfu batawuba bete sono. Angeke kusadzingeka kutsi bantfu bacele kucolelwa ngenca yetono tabo ngesisekelo senhlawulo; futsi angeke kusadzingeka kube nalobakhulumelako nobe umphristi. Ngetulu kwaloko, ‘sitsa sekugcina lokukufa [lokwabakhona nga-Adamu], kutawucedvwa.’ Kutawusala kushaya umoya emathuneni. Labafile batawube sebavusiwe ekufeni. Wonkhe muntfu emhlabeni utawubabete sono.​—1 Khor. 15:25, 26.

17-18. (a) Yini letawenteka ekupheleni Kweminyaka Leyinkhulungwane Yekubusa KwaKhristu? (b) Yini Jesu latawuyenta nasesiphelile sikhatsi sekubusa kwakhe? (1 KubaseKhorinte 15:24, 28) (Buka nesitfombe.)

¹⁷ Yini lenye letawenteka ngasekupheleni Kweminyaka Leyinkhulungwane Yekubusa KwaKhristu? Ngaleso sikhatsi, kutawenteka intfo lekhetseke kakhulu. Imphikiswano lemayelana nebungcwele belibito laNkulunkulu itawuphela. Kanjani? Ensimini yase-Edeni, Sathane watsi Jehova ungumcambimanga futsi indlela labusa ngayo bantfu ite lutsandvo. Kusukela ngaleso sikhatsi, libito laNkulunkulu belisolo lingcweliswa ngalokuphindzaphindziwe ngulabo labamtsandzako nalabamhloniphako. Ngako ekupheleni Kweminyaka Leyinkhulungwane Yekubusa KwaKhristu, lidvumela laJehova litawube lihlengwe ngalokuphelele. Jehova utawube akhombisile kutsi unguBabe lonelutsandvo futsi kute lotakuphika loko.

¹⁸ Ekugcineni, kutawuba sebaleni kutsi Sathane bekanemanga. Yini Jesu latawuyenta nasesiphelile sikhatsi sekubusa kwakhe? Utawulingisa sibonelo saSathane yini avukele Jehova? Cha! (Fundza 1 KubaseKhorinte 15:24, 28.) Jesu utawubuyisela uMbuso kuBabe wakhe. Utawutitfoba ngephansi kwekubusa kwaJehova. Ngalokungafani naSathane, Jesu ukulungele kubuyisela lonkhe ligunya kuJehova ngenca yekutsi uyamtsandza.

19. Lisho kutsini libito laNkulunkulu kuJesu?

¹⁹ Akumangalisi-ke kutsi Jehova bekakulungele kuphatsisa Jesu libito lakhe! Jesu ukhombisile kutsi ummelela kahle kakhulu Babe wakhe. Ngako lisho kutsini libito laNkulunkulu kuJesu? Lingiko konkhe kuye! Bekakulungele kulifela, futsi utakulungela kubuyisela konkhe kuJehova ekupheleni Kweminyaka Leyinkhulungwane Yekubusa Kwakhe. Singasilingisa njani sibonelo saJesu? Sitawucoca ngemphendvulo yalombuto esihlokweni lesilandzelako.