Libito LaNkulunkulu​—Libaluleke Kanganani Kuwe?

1-2. Sati njani kutsi libito laNkulunkulu libalulekile kuJesu?

LIBITO laNkulunkulu libaluleke kakhulu kuJesu. Nguye lohamba embili ekwenteni libito laBabe wakhe kutsi latiwe. Njengobe sihloko lesendlulile sikhombisile, Jesu bekakulungele kufa ngenca yelibito laNkulunkulu nangenca yako konkhe lelikumelelako. (Mak. 14:36; Heb. 10:7-9) Ngemuva Kwekubusa Kwakhe Kweminyaka Leyinkhulungwane, Jesu utawube akulungele kubuyisela lonkhe ligunya kuJehova kuze kungcweliswe libito laNkulunkulu. (1 Khor. 15:26-28) Lutsandvo lanalo ngelibito laNkulunkulu luphindze luvete lokunyenti ngebudlelwane lanabo naBabe wakhe. Lukhombisa ngalokusebaleni kutsi Jesu uyamtsandza loMuntfu lomelelwa ngulelibito.

² Jesu weta emhlabeni ngelibito laBabe wakhe. (Joh. 5:43; 12:13) Watjela balandzeli bakhe ngelibito laBabe wakhe. (Joh. 17:6, 26) Wafundzisa ngelibito laNkulunkulu futsi wenta timangaliso ngalo. (Joh. 10:25) Ecinisweni, Jesu wacela Jehova kutsi avikele balandzeli bakhe “ngenca yelibito [lakhe].” (Joh. 17:11) Ngako nangabe libito laNkulunkulu belibaluleke kangaka kuJesu, umuntfu angasho njani kutsi ungumlandzeli waKhristu mbamba kepha abe angalati libito laBabe wakhe futsi angalisebentisi?

3. Sitawucoca ngani kulesihloko?

³ Njengobe singemaKhristu letama kulandzela tinyatselo taJesu, liligugu kitsi libito laBabe wakhe. (1 Phet. 2:21) Kulesihloko, sitawucoca ngekutsi libito laNkulunkulu libenta njani babonakale labo labamemetela ‘tindzaba letimnandzi teMbuso.’ (Mat. 24:14) Sitawuphindze sicoce ngekutsi libito laNkulunkulu kufanele libaluleke kanganani kumuntfu ngamunye.

“BANTFU LABATAWUBITWA NGELIBITO LAKHE”

4. (a) Ngaphambi kwekutsi Jesu abuyele ezulwini, yini latjela bafundzi bakhe kutsi bayente? (b) Ngumuphi umbuto lophakamako?

⁴ Ngaphambi kwekutsi Jesu abuyele ezulwini, watjela bafundzi bakhe watsi: “Nitawutfola emandla nawufika kini umoya longcwele, futsi nitawuba bofakazi bami eJerusalema, kuyo yonkhe iJudiya neSamariya, nakuto tonkhe tincenye temhlaba.” (Imis. 1:8) Ngako tindzaba letimnandzi betingeke tigcine ngekushunyayelwa ka-Israyeli kuphela. Ngekuhamba kwesikhatsi, bantfu labavela kuto tonkhe tive bebatawuba nelitfuba lekuba balandzeli baJesu. (Mat. 28:19, 20) Kodvwa Jesu watsi: “Nitawuba bofakazi bami.” Labafundzi labasha bekutawudzingeka bati ligama laNkulunkulu yini, nobe bebatawugcina ngekuba bofakazi baJesu? Tintfo letenteka lokukhulunywa ngato encwadzini yeMisebenti sehluko 15 tisisita siphendvule lombuto.

5. Baphostoli nemadvodza lamadzala eJerusalema bakhombisa njani kutsi bonkhe bantfu bekufanele balati libito laNkulunkulu? (Buka nesitfombe.)

⁵ Nga-49 C.E., baphostoli kanye nemadvodza lamadzala eJerusalema bahlangana ndzawonye kuze bakhulume ngaloko bekufanele kwentiwe bantfu labangasiwo emaJuda labangakasoki kuze bemukelwe kutsi babe ngemaKhristu. Ngasekupheleni kwalomhlangano, Jakobe longumnakaboJesu watsi: “[Phetro] sewusichazele kahle kutsi nyalo Nkulunkulu sewuyabemukela bantfu betive kuze emkhatsini wabo akhetse bantfu labatawubitwa ngelibito lakhe.” Jakobe bekakhuluma ngelibito labani? Acaphuna emavi emphrofethi Amose, wengeta watsi: “Kuze labo labasele bafunisise Jehova bakanye nebantfu bato tonkhe tive, lokubantfu lababitwa ngelibito lami. Nguloku lokushiwo nguJehova.” (Imis. 15:14-18) Labafundzi labasha bebangeke bagcine ngekufundza ngaJehova, kodvwa bebatawuphindze ‘babitwe ngelibito lakhe.’ Loku kusho kutsi bebatawulenta latiwe libito laNkulunkulu futsi nabo batiwe ngalo.

6-7. (a) Yini leyenta Jesu weta emhlabeni? (b) Ngusiphi lesinye sizatfu lesibaluleke kakhulu lesenta Jesu weta emhlabeni?

⁶ Lona kanye libito laJesu lisho kutsi “Jehova Uyinsindziso,” futsi wakhombisa kutsi uyindlela yaJehova yekusindzisa labo labanekukholwa. Jesu weta emhlabeni kuze anikele ngekuphila kwakhe ngenca yebantfu. (Mat. 20:28) Ngekukhipha inhlawulo, wavula litfuba lekutsi bantfu basindziswe futsi batfole kuphila lokuphakadze.​—Joh. 3:16.

⁷ Kodvwa yini leyenta kwadzingeka kutsi bantfu basindziswe? Kungenca yaloko lokwenteka ensimini yase-Edeni. Njengobe kuvetiwe esihlokweni lesendlulile, bantfu bekucala lokungu-Adamu na-Eva bavukela Jehova, ngenca yaloko balahlekelwa litfuba lekuphila phakadze. (Gen. 3:6, 24) Nobe kunjalo, kunalokutsite lokubaluleke kakhulu kulendzaba kunekusindziswa kwebantfu labanesono. Kwanyundzelwa libito laNkulunkulu. (Gen. 3:4, 5) Ngako kusindziswa kwesitukulwane sa-Adamu na-Eva bekuhlobene nendzaba lebaluleke kakhulu, lokukungcweliswa kwelibito laNkulunkulu. Ngenca yekutsi Jesu bekamelela Jehova futsi afundzisa ngelibito lakhe, wadlala indzima lebalulekile ekungcweliseni libito laNkulunkulu.

8. Yini lebekufanele bayivume bonkhe labo lebebakholwa kuJesu?

⁸ Bonkhe labo lebebatawukholwa kuJesu, labangemaJuda nalabangasiwo, bekutawudzingeka bavume kutsi Babe waJesu, lokunguJehova Nkulunkulu, nguye uMtfombo wensindziso yabo. (Joh. 17:3) Ngetulu kwaloko, njengaJesu, bebatawubitwa ngelibito laNkulunkulu. Bekutawudzingeka babone nekutsi kubalulekile kulingcwelisa lelibito. Nguloko lebekufanele bakwente kuze basindziswe. (Imis. 2:21, 22) Ngako bonkhe balandzeli baJesu labetsembekile bekufanele bafundze ngaJehova nangaJesu. Kungako Jesu nakephetsa umthantazo wakhe lobhalwe kuJohane 17 watsi: “Ngibafundzisile ngelibito lakho, futsi ngitawuchubeka ngibafundzisa ngalo, kuze batsandzane ngendlela lowangitsandza ngayo, bese ngiba munye nabo.”​—Joh. 17:26.

“NINE NIBOFAKAZI BAMI”

9. Singakhombisa njani kutsi libito laNkulunkulu libalulekile kitsi?

⁹ Bonkhe labo lababalandzeli baJesu mbamba kufanele babe nendzaba nekungcweliswa kwelibito laNkulunkulu. (Mat. 6:9, 10) Kufanele batsatse libito laNkulunkulu njengaleliphakeme kakhulu kunawo onkhe. Kodvwa kunalokutsite lokufanele bakwente. Ngako singasifaka njani sandla ekungcwelisweni kwelibito laNkulunkulu, nobe ekulihlanteni kulokulinyundzela kwaSathane?

10. Nguyiphi indzaba lekhulunywa enkantolo lengumfanekiso lesencwadzini ya-Isaya 42 kuya ku-44? (Isaya 43:9; 44:7-9) (Buka nesitfombe.)

¹⁰ Kubaluleka kwendzima yetfu ekungcwelisweni kwelibito laNkulunkulu kuvetwe encwadzini ya-Isaya tehluko 42 kuya ku-44. Letehluko tikhuluma ngenkantolo lengumfanekiso lapho kukhulunywa khona ngendzaba yekutsi ngubani longuNkulunkulu mbamba. Jehova utsi bonkhe labo labatsi babonkulunkulu abanikete bufakazi bekutsi vele babonkulunkulu mbamba. Uphindze abite bofakazi kutsi abete ngembili futsi bafakazele loko lokushiwo ngulabonkulunkulu. Kodvwa kute lokhona kukwenta loko!​—Fundza Isaya 43:9; 44:7-9.

11. Yini Jehova layisho kubantfu bakhe njengobe kubhalwe ku-Isaya 43:10-12?

¹¹ Fundza Isaya 43:10-12. Naku Jehova lakushoko mayelana nebantfu bakhe: “Nine nibofakazi bami, . . . mine nginguNkulunkulu.” Jehova ubacela kutsi baphendvule nangu umbuto: “Ukhona yini lomunye Nkulunkulu ngaphandle kwami?” (Isa. 44:8) Ngako sinelitfuba lekuphendvula lombuto. Sifakazela kutsi Jehova ukuphela kwaNkulunkulu weliciniso ngaloko lesikushoko nalesikwentako. Libito lakhe liphakeme kunawo onkhe lamanye emabito. Siphindze sikhombise ngendlela lesiphila ngayo kutsi simtsandza mbamba Jehova futsi setsembekile kuye ngisho nobe Sathane angasicindzetela ngayiphi indlela. Ngako sinelitfuba lekusita ekungcweliseni libito laNkulunkulu.

12. Sagcwaliseka njani siphrofetho lesiku-Isaya 40:3, 5?

¹² Nasisekela libito laNkulunkulu nobe lidvumela lakhe, silingisa Jesu Khristu. Isaya waphrofetha nekutsi bekutawuba nalotsite ‘lolungisa indlela yaJehova.’ (Isa. 40:3) Sagcwaliseka njani lesiphrofetho? Johane uMbhabhatisi walungisela Jesu indlela, loweta ngelibito laNkulunkulu futsi wakhuluma nasegameni lakhe. (Mat. 3:3; Mak. 1:2-4; Luk. 3:3-6) Lesiphrofetho siphindze sitsi: “Inkhatimulo yaJehova itakwembulwa.” (Isa. 40:5) Kwenteka njani loko? Ngesikhatsi Jesu alamhlabeni, wammelela kahle kakhulu Jehova kangangekutsi kwaba ngatsi nguJehova matfupha lote emhlabeni.​—Joh. 12:45.

13. Singamlingisa njani Jesu?

¹³ NjengaJesu, sibofakazi baJehova. Sibitwa ngelibito laNkulunkulu futsi sitjela labanye ngetintfo letimangalisako latentile. Kodvwa kuze sikhone kukwenta loko, kufanele siyente yatiwe indzima yaJesu lebalulekile ekungcwelisweni kwelibito laNkulunkulu. (Imis. 1:8) Jesu unguFakazi waJehova lohamba embili, futsi tsine silandzela sibonelo sakhe. (Semb. 1:5) Kodvwa kufanele lisho kutsini kumuntfu ngamunye libito laNkulunkulu?

LOKO LIBITO LANKULUNKULU LELIKUSHOKO KITSI

14. Njengobe kuvetwe kuTihlabelelo 105:3, sitiva njani ngelibito laNkulunkulu?

¹⁴ Siyatigcabha ngelibito laNkulunkulu. (Fundza Tihlabelelo 105:3.) Jehova ujabula kakhulu nasitigcabha ngelibito lakhe. (Jer. 9:23, 24; 1 Khor. 1:31; 2 Khor. 10:17) ‘Kutigabatisa ngaJehova’ kusho kujabula ngekutsi unguNkulunkulu wetfu. Kuligugu kitsi kutjela labanye kutsi ungcwele nekutsi konkhe lakwentako kulungile. Kufanele singabi nemahloni ekutjela lesisebenta nabo, lesifundza nabo, bomakhelwane betfu kanye nalabanye kutsi siBoFakazi BaJehova! Develi ufuna siyekele kukhuluma ngelibito laNkulunkulu kulabanye. (Jer. 11:21; Semb. 12:17) Ecinisweni, Sathane nebaphrofethi bakhe bemanga bafuna kwenta bantfu balikhohlwe libito laNkulunkulu. (Jer. 23:26, 27) Kodvwa lutsandvo lesinalo ngelibito laNkulunkulu lwenta kutsi ‘sihlale’ sijabula ngalo.​—Hla. 5:11; 89:16.

15. Kusho kutsini kubita libito laNkulunkulu?

¹⁵ Siyachubeka sibita libito laNkulunkulu. (Jow. 2:32; Rom. 10:13, 14) Kubita libito laNkulunkulu kusho lokungetulu kwekulati nekulisebentisa. Kusho kwati kutsi Nkulunkulu unguMuntfu lonjani, simetsembe futsi setsembele kuye kutsi asisite futsi asicondzise. (Hla. 20:7; 99:6; 116:4; 145:18) Siphindze sitjele labanye ngebuntfu bakhe nangelibito lakhe, sibasite kutsi baphendvuke futsi bente lokutsite kuze Jehova abemukele.​—Isa. 12:4; Imis. 2:21, 38.

16. Singakhombisa njani kutsi Sathane ungumcambimanga?

¹⁶ Sikulungele kuhlupheka ngenca yelibito laNkulunkulu. (Jak. 5:10, 11) Nasihlala setsembekile kuJehova ngisho nobe siphatfwa kabi, sikhombisa kutsi Sathane ungumcambimanga. Ngemalanga aJobe, Sathane wamangalela labo labakhonta Jehova watsi: “Umuntfu angalahlekelwa ngiko konkhe lanako kuze alondvolote kuphila kwakhe.” (Jobe 2:4) Sathane watsi bantfu batawukhonta Jehova kuphela nangabe tintfo tibahambela kahle, kodvwa nababhekene netinkinga batamshiya Jehova. Jobe lowetsembekile wakhombisa kutsi loku kungemanga. Natsi sinelitfuba lekukhombisa kutsi asiyuze siyekele kukhonta Jehova ngisho nobe Sathane angasihlasela ngani. Singaciniseka ngalokuphelele kutsi Jehova utasivikela ngenca yelibito lakhe.​—Joh. 17:11.

17. Nguyiphi lenye indlela lesingalidvumisa ngayo libito laNkulunkulu njengobe kuvetwe ku-1 Phetro 2:12?

¹⁷ Siyalihlonipha libito laNkulunkulu. (Taga 30:9; Jer. 7:8-11) Ngenca yekutsi simelela Jehova futsi sibitwa ngelibito lakhe, singalidvumisa nobe silihlaze libito lakhe. (Fundza 1 Phetro 2:12.) Ngako sifuna kwenta konkhe lesingakwenta kuze sidvumise Jehova ngaloko lesikushoko nalesikwentako. Nasenta njalo, sitawudvumisa libito lakhe ngisho nobe sinesono.

18. Nguyiphi lenye indlela lesingakhombisa ngayo kutsi libito laNkulunkulu libalulekile kitsi? (Buka nembhalo longentasi.)

¹⁸ Sikhatsateka kakhulu ngelibito laNkulunkulu kunelidvumela letfu. (Hla. 138:2) Kubaluleke ngani loko? Kungenca yekutsi lutsandvo lesinalo ngelibito laNkulunkulu lungenta labanye bangasitsandzi.a Jesu bekakulungele kufa ngendlela lelihlazo, afe njengesigebengu, kuze angcwelise libito laNkulunkulu. Akazange ‘alinake lihlazo,’ ngendlela yekutsi akazange akhatsateke kakhulu ngaloko labanye bebakucabanga ngaye. (Heb. 12:2-4) Bekanake kakhulu kwenta intsandvo yaNkulunkulu.​—Mat. 26:39.

19. Utiva njani ngelibito laNkulunkulu, futsi ngasiphi sizatfu?

¹⁹ Siyatigcabha ngelibito laNkulunkulu futsi sitiva sibakhulu ngekubitwa ngekutsi siBoFakazi BaJehova. Ngenca yaloko, sikulungele kubeketelela nobe ngukuphi kuhlanjalatwa. Libito laNkulunkulu libaluleke kakhulu kitsi kunelidvumela letfu. Ngako shengatsi singatimisela kuchubeka sidvumisa libito laNkulunkulu ngisho nobe Sathane angasihlasela ngani. Nasenta njalo, sitawukhombisa kutsi libito laNkulunkulu libaluleke kakhulu kitsi, njengobe libaluleke kakhulu nakuJesu Khristu.