Kufa Akusiso Siphetfo Sako Konkhe

IBhetani yayilidolobhanyana lebelisondzelene neJerusalema ngemakhilomitha lamatsatfu. (Johane 11:18) Emavikini lamatsatfu ngaphambi kwekufa kwaJesu, kwenteka intfo lebuhlungu kulendzawo. Lazaro, lomunye webangani baJesu labakhulu, kungakalindzeleki wagula wabangwa netibi wagcina asafile.

Watsi Jesu nakacala kuyiva lendzaba, watjela bafundzi bakhe kutsi Lazaro ulele nekutsi utawuya ayomvusa. (Johane 11:11) Kodvwa bafundzi baJesu abazange bacondze kutsi usho kutsini, ngako Jesu wase ulibeka ngembaba watsi: “Lazaro ufile.”—Johane 11:14.

Ngemuva kwemalanga lamane kungcwatjiwe, Jesu wafika eBhetani atewudvudvuta Mata dzadze wabomufi. Mata watsi: “Kube bewukhona, umnaketfu ngabe akakafi.” (Johane 11:17, 21) Jesu wamphendvula watsi: “Mine ngikuvuka nekuphila. Loyo lokholwa ngimi, ngisho nobe angafa, utawubuye avuke.”—Johane 11:25.

Kute akhombise kutsi lamavi lawashoko aliciniso, Jesu wasondzela ethuneni wase uyamemeta utsi: “Lazaro, phuma!” (Johane 11:43) Bantfu labebalapho bamangala kakhulu nababona lendvodza lebeyifile iphuma ethuneni.

Jesu abevuse bantfu lababili noma ngetulu ngaphambi kwaloku. Ngalesinye sikhatsi wavusa intfombatanyana lebeyifile, lobekuyindvodzakati yaJayiru. Ngaphambi nje kwekutsi Jesu ayivuse, nayo nakachaza simo sayo watsi ilele.—Lukha 8:52.

Uyabona yini kutsi nakakhuluma ngekufa kwaLazaro nekwendvodzakati yaJayiru, Jesu wafananisa kufa nekulala? Abefanisa kahle nakasho njalo. Sisho ngani? Nawulele hhu butfongo kute longakuva. Ngendlela lefanako, lofile akabuva buhlungu futsi akahlushwa lutfo. (Umshumayeli 9:5; fundza ngaphansi kwencenye letsi, “Kufa Kufanana Nekulala Hhu Butfongo.”) Bafundzi baJesu bekucala bebakucondza kahle loko lokwenteka kumuntfu lofile. I-Encyclopedia of Religion and Ethics itsi: “Kubafundzi baJesu, kufa bekufana nekulala futsi lithuna liyindzawo yekuphumula . . . kulabo labafa bakholwa.”a

Kuyasidvudvuta kwati kutsi bantfu labafile balele emathuneni futsi abahlushwa lutfo. Njengoba sesati kutsi kwentekani kitsi nasifa, akusadzingeki sesabe.

“NANGABE UMUNTFU AFA, UYAWUPHINDZE APHILE YINI?”

Nanobe kumnandzi kuphumula kahle ebusuku, ngubani lofuna kulala siphelane? Nguliphi litsemba lesinalo lekutsi labafile labasemathuneni batawuvuka njengobe kwenteka kuboLazaru nendvondzakati yaJayiru?

Jobe wawubuta lombuto ngalesikhatsi asatawufa. Watsi: “Nangabe umuntfu afa, uyawuphindze aphile yini?”—Jobe 14:14.

Nakakhuluma naNkulunkulu Somandla, Jobe watiphendvula watsi: “Uyawungibita, mine ngikuphendvule. Uyawufisa kubona leso sidalwa lesentiwa tandla takho.” (Jobe 14:15) Jobe abeciniseka kutsi Jehova ulangatelela kufika kwelilanga latawuvusa ngalo tinceku takhe letetsembekile. Jobe abeciniseka ngentfo lengeke yini yenteke? Cha akusinjalo.

Kuvusa bantfu labafile Jesu lakwenta kusiniketa bufakazi lobucacile bekutsi Nkulunkulu wamniketa emandla ekucedza kufa. Empeleni liBhayibheli litsi nyalo Jesu ‘unetikhiya tekufa neteliThuna.’ (Sembulo 1:18) Njengobe Jesu aba nawo emandla ekuvusa Lazaro, unawo newekuvusa labafile esikhatsini lesitako.

LiBhayibheli liyaliphindzaphindza lelitsemba lekuvuswa kwalabafile. Ingilosi yacinisekisa umphrofethi Danyela yatsi: “Uyawuphumula, kuyawutsi ekupheleni kwemalanga, uvuke utekwemukeliswa sabelo sakho lekulifa lakho.” (Danyela 12:13) Jesu watjela baSadusi, baholi bemaJuda lebebangakholelwa kulelitsemba lekuvuswa kwalabafile, watsi: “Nidukile ngobe aniyati imiBhalo kanye nemandla aNkulunkulu.” (Matewu 22:23, 29) Umphostoli Pawula watsi: “Nginelitsemba kuNkulunkulu . . . lekutsi kutawuba neluvuko lwalabalungile nalabangakalungi.”—Imisebenti 24:15.

BATAWUVUSWA NINI LABAFILE?

Batawuvuka nini laba labalungile nalabangakalungi? Lengilosi yatjela Danyela lobekalungile kutsi uyawuvuka “ekupheleni kwemalanga.” NaMata wakukholwa kutsi umnakabo Lazaro “utawuvuka ngelilanga lekugcina nasekuvuswa labafile.”—Johane 11:24.

LiBhayibheli lihlobanisa ‘lelilanga lekugcina’ neMbuso lobuswa nguKhristu. Pawula wabhala watsi: “Ngobe [Khristu] kufanele abuse njengenkhosi kuze kube ngulapho Nkulunkulu asatibeke ngephansi kwetinyawo takhe tonkhe titsa takhe. Njengesitsa sekugcina, kufa kutawukwentiwa lite.” (1 Khorinte 15:25, 26) Lesi sizatfu lesiphatsekako sekutsi sithantazele kufika kweMbuso waNkulunkulu nekwenteka kwentsandvo yakhe emhlabeni.b

Jobe bekati kahle kutsi kuyintsandvo yaNkulunkulu kuvusa labafile. Nalifika lelo langa, kufa kuyawentiwa lite futsi akuseyuphindze kube nalotibuta kutsi ‘Kufa kusiphetfo sako konkhe yini?’