Kwenta Kukhetsa Lokukahle Usemusha

1. Ngumaphi ematfuba lamahle emaKhristu lamanyenti lasemasha lawajabulelako?

SIPHILA esikhatsini lesibaluleke kakhulu. Tigidzigidzi tebantfu labavela etiveni tonkhe bangena ekukhonteni kweliciniso ngendlela lokungakaze kwenteke ngayo emlandvweni. (Semb. 7:9, 10) Bantfu labasha labanyenti batfola lokuhlangenwe nako lokujabulisako njengobe basita labanye kutsi bacondze emaciniso eliBhayibheli lasindzisa kuphila. (Semb. 22:17) Labanye labasha bachuba tifundvo teliBhayibheli, basita bantfu kutsi babe nekuphila lokuncono. Labanye bashumayela ngekutimisela tindzaba letimnandzi ensimini lokukhulunywa kuyo lulwimi lwakulelinye live. (Hla. 110:3; Isa. 52:7) Yini lokufanele uyente kute ube nencenye kulomsebenti lowenetisako?

2. Sibonelo saThimothi sikhombisa njani kutsi Jehova unesifiso sekuniketa bantfu labasha imisebenti letsite? (Buka sitfombe lesisekucaleni kwalesihloko.)

² Njengobe usemusha, ungenta kukhetsa lokungase kukuvulele ematfuba ekwenta lokunyenti ekukhonteni Nkulunkulu ngekuhamba kwesikhatsi. Nasi sibonelo: Thimothi waseListra akungabateki kutsi watsatsa tincumo letihlakaniphile letamenta kutsi atfole sabelo sekuba sitfunywa selivangeli mhlawumbe ngalesikhatsi asasondzela nobe asandza kwendlula eminyakeni lengu-20 budzala. (Imis. 16:1-3) Umlandvo uveta kutsi etinyangeni letimbalwa kamuva, umphostoli Pawula waphoceleleka kutsi ahambe nakusandza kusungulwa libandla laseThesalonika ngenca yekuphikiswa nebudlova. Pawula waniketa Thimothi losemncane umsebenti wekubuyela eThesalonika kute ayewucinisa bazalwane. (Imis. 17:5-15; 1 Thes. 3:1, 2, 6) Ase ucabange nje kutsi kutfola leso sabelo kwamphatsa njani Thimothi.

SINCUMO SAKHO LESIBALULEKE KAKHULU

3. Ngukuphi kukhetsa lokubaluleke kakhulu longakwenta ekuphileni, futsi ungakwenta nini?

³ Nawusemusha sikhatsi lesikahle sekutsatsa tincumo letibalulekile. Kodvwa kunekukhetsa lokubaluleke kwendlula konkhe—sincumo sakho sekukhonta Jehova. Sinini sikhatsi lesikahle sekwenta lokukhetsa? Jehova utsi: “Khumbula uMdali wakho etinsukwini tebusha bakho.” (Shu. 12:1) Lokukuphela kwendlela lefanele ‘yekukhumbula’ Jehova, kumkhonta. (Dut. 10:12) Sincumo sakho sekukhonta Nkulunkulu ngenhlitiyo yakho yonkhe, sikukhetsa lokubaluleke kakhulu. Likusasa lakho litawuya ngekutsi uncume njani.—Hla. 71:5.

4. Ngaphandle kwekukhetsa kukhonta Jehova, ngukuphi lokunye kukhetsa lokubalulekile lokutawuba nemtselela ekukhonteni kwakho Nkulunkulu?

⁴ Kuliciniso kutsi kukhetsa kwakho kukhonta Jehova akusiko kuphela lokutawuncuma likusasa lakho. Nasi sibonelo: Ungase utibute kutsi utawushada yini, ungase ushade nabani nekutsi utatiphilisa ngani. Leti tincumo letibaluleke kakhulu, kodvwa usuke ukhombisa kutsi uhlakaniphile nawucabange kukhetsa kutsi utamkhonta yini Jehova ngawo onkhe emandla akho. (Dut. 30:19, 20) Kungani? Ngenca yekutsi kukhetsa lotakwenta kunekuhlobana lokutsite. Loko lokuncumako ngemshado kanye nemsebenti kutawuba nemtselela endleleni lomkhonta ngayo Nkulunkulu. (Catsanisa naLuka 14:16-20.) Ngalokwehlukile, sifiso sakho sekukhonta Nkulunkulu sitawuba nemtselela endleleni lotawukhetsa ngayo mayelana nemshado kanye nemsebenti. Ngako-ke, cala ngekwenta tincumo letibaluleke kakhulu.—Fil. 1:10.

YINI LOTAYENTA EBUSHENI BAKHO?

5, 6. Shano kutsi kukhetsa kahle kungaholela njani kulokuhlangenwe nako lokuhle ngemuva kwesikhatsi. (Fundza nesihloko lesitsi “Lengakukhetsa Nangisengumntfwana” lesikulomagazini.)

⁵ Nasewukhetsile kukhonta Nkulunkulu, ungase ucabange ngekutsi yini lafuna kutsi uyente futsi ungase uncume kutsi utamkhonta njani. Lomunye umzalwane waseJalimane wabhala watsi: “Ngesikhatsi ngineminyaka lengu-14 budzala, bengiye kuyoshumayela ngihamba nalomdzala welibandla lowangibona kutsi bengingawujabuleli umsebenti wekushumayela. Ngemusa wangitjela kutsi: ‘Buyela ekhaya Yuichiro ufike uhlale ucabangisise ngaloko Jehova lakwentele kona.’ Ngenta njengobe asho. Ecinisweni, kwaphela emalanga ngicabanga futsi ngithantaza. Kancane kancane, yashintja indlela lebengitiva ngayo. Ngemuva kwaloko, ngakujabulela kukhonta Jehova. Ngakujabulela kufundza ngetitfunywa telivangeli futsi ngacala kucabanga ngendlela lengingatfutfukisa ngayo kukhonta Nkulunkulu.”

⁶ Yuichiro uchubeka atsi: “Ngancuma kucala kwenta kukhetsa lobekutawungenta kutsi ngalelinye lilanga ngikhonte Jehova ngesheya kwetilwandle.” Nasi sibonelo: “Ngakhetsa kufundza siNgisi. Ngatsi nangicedza sikolwa, ngakhetsa kwenta litoho lekufundzisa siNgisi kute ngikhone kuba lihlahlandlela. Nangineminyaka lengu-20 budzala, ngacala kufundza siMongolia futsi ngatfola litfuba lekuvakashela licembu lebamemeteli labakhuluma siMongolia. Ngemuva kweminyaka lemibili, nga-2007, ngavakashela eMongolia. Nangiya kuyoshumayela nalamanye emahlahlandlela futsi ngibona kutsi bantfu labanyenti bebalifuna liciniso, ngaba nesifiso sekutfutsela kuleyo ndzawo ngiyosita. Ngabuyela eJapan kute ngihlele kahle timo tami. Kusukela nga-April 2008, bengisolo ngilihlahlandlela eMongolia. Kuphila akusimelula lapha kodvwa bantfu bayatitsandza tindzaba letimnandzi futsi ngiyakhona kubasita kutsi basondzele kuJehova. Ngicabanga kutsi ngakhetsa indlela lencono kakhulu yekuphila.”

7. Ngukuphi kukhetsa lokufanele sitentele kona, futsi ngusiphi sibonelo Mosi lasibekela sona?

⁷ Umuntfu ngamunye kufanele atentele kukhetsa mayelana nekutsi utakusebentisa njani kuphila kwakhe njengobe anguFakazi waJehova. (Josh. 24:15) Ngeke sikutjele kutsi shada yini, ushade nabani nobe kutsi kufanele usebente muphi umsebenti. Utawukhetsa umsebenti lodzinga kuceceshwa lokutsatsa sikhatsi lesifishane yini? Labanye benu nine maKhristu lasemasha nihlala etindzaweni letiphuyile, labanye bahlala emadolobheni latfutfukile. Emhlabeni wonkhe, nehlukehlukene buntfu benu, emakhono, lokwentekile kini, lenikutsandzako kanye nekukholwa kwenu. Mhlawumbe nehlukene ngendlela labasha labebangemaHebheru eGibhithe yasendvulo labebangafani ngayo naMosi losemusha. Mosi abenawo onkhe ematfuba ekuhlala ebukhosini kantsi lamanye emaHebheru abetigcili. (Eks. 1:13, 14; Imis. 7:21, 22) Bekaphila esikhatsini lesibaluleke kakhulu njengobe kunjalo nakuwe. (Eks. 19:4-6) Ngamunye bekufanele akhetse kutsi utawentani ngekuphila kwakhe. Mosi wakhetsa kahle.—Fundza Hebheru 11:24-27.

8. Bantfu labasha labenta kukhetsa ekuphileni bangalutfola kuphi lusito?

⁸ Jehova uyakusita kutsi ukhetse kahle usemusha. Uniketa teluleko ngetimiso longase utisebentise etimeni takho letingafani netalabanye. (Hla. 32:8) Ngetulu kwaloko, batali bakho labangemaKhristu kanye nalabadzala belibandla bangakusita kutsi ucabange ngendlela longatisebentisa ngayo letimiso ekuphileni kwakho. (Taga 1:8, 9) Ase sicoce ngetimiso teliBhayibheli letintsatfu letisisekelo letingakusita kutsi wente kukhetsa lokukahle lokutawuba nemtselela futsi kuzuzise likusasa lakho.

TIMISO TELIBHAYIBHELI LETINTSATFU LETINGAKUSITA

9. (a) Jehova usibeka njani esigabeni lesiphakeme ngekusiniketa inkhululeko yekutikhetsela? (b) ‘Kufuna kucala uMbuso’ kuvula maphi ematfuba?

⁹ Funa uMbuso waNkulunkulu kucala kanye nekulunga kwakhe. (Fundza Matewu 6:19-21, 24-26, 31-34.) Jehova usibeka esigabeni lesiphakeme ngekutsi asinikete inkhululeko yekutikhetsela. Akasho kutsi sikhatsi lesingakanani sebusha bakho lokufanele usisebentisele kushumayela ngeMbuso. Kodvwa Jesu usiniketa simiso lesilusito sekufuna uMbuso kucala. Indlela lokusebentisa ngayo loko lakusho itakuvulela ematfuba ekukhombisa kutsi umtsandza kangakanani Nkulunkulu, ubakhatsalela kangakanani bomakhelwane bakho kanye nekutsi ulatisa kangakanani litsemba lekuphila lokuphakadze. Njengobe ucabangisisa ngemshado kanye nemsebenti, cabanga ngekutsi kukhetsa kwakho kutakubangela kutsi ucindzeteleke yini etidzingweni takho nome kutawuveta inshisekelo lonayo ngeMbuso waNkulunkulu kanye nekulunga kwakhe.

10. Yini leyenta Jesu wajabula, futsi ngukuphi kukhetsa lokutakwenta wena ujabule?

¹⁰ Tfola injabulo ngekusita labanye. (Fundza Imisebenti 20:20, 21, 24, 35.) Jesu wasifundzisa ngemusa lesimiso sekuphila lesibalulekile. Bekangumuntfu lohlale ajabulile ngobe bekenta intsandvo yeYise kunekutsi ente yakhe. Jesu wakujabulela kubona bantfu labamnene batemukela tindzaba letimnandzi. (Luk. 10:21; Joh. 4:34) Mhlawumbe sewuyitfolile injabulo letfolakala ngekusita labanye. Nangabe kukhetsa kwakho lokubalulekile ekuphileni ukusekela kuletimiso Jesu lasifundzisa tona, asingabati kutsi utawutfola injabulo futsi naJehova utawujabula.—Taga 27:11.

11. Kungani Bharuki aphelelwa yinjabulo, futsi ngusiphi seluleko Jehova lamniketa sona?

¹¹ Injabulo yetfu lenkhulu kakhulu itfolakala ngekukhonta Jehova. (Taga 16:20) Mabhalane waJeremiya, Bharuki, kungenteka kutsi wakukhohlwa loko. Ngalesinye sikhatsi, abengasakujabuleli kukhonta Jehova. Jehova wamtjela kutsi: “Ungatifunela yini wena tintfo letinkhulu? Ungatifuni. Ngobe ngiyakwehlisela inhlekelele etikwabo bonkhe bantfu, kodvwa wena nome ngukuphi lapho uya khona, ngiyawukwenta uphunyule kanye nemphilo yakho.” (Jer. 45:3, 5) Ucabangani? Yini lebeyingenta Bharuki ajabule—kufuna tintfo letinkhulu nome kusindza nakubhujiswa iJerusalema njengobe abeyinceku yaNkulunkulu leyetsembekile?—Jak. 1:12.

12. Ngukuphi kukhetsa lokwenta Ramiro waba nekuphila lokujabulisako?

¹² Lomunye umzalwane lowatfola injabulo ngekusita labanye nguRamiro. Utsi: “Ngibuya ekhaya leliphuyile etiNtsabeni tase-Andes. Ngako-ke ngalesikhatsi umnaketfu lomdzala atsi utangibhadalela kute ngifundze enyuvesi, kwavuleka iminyango leholela emphumelelweni. Kodvwa bengisandza kubhajatiswa sengingulomunye waBoFakazi BaJehova futsi besengicelwe ngulelinye lihlahlandlela kutsi ngishumayele nalo edolobheni lelincane. Ngaya lapho, ngafundza kuhhula tinwele ngase ngitivulela indzawo yekuhhula kute ngikwati kutiphilisa. Njengobe besitinikele kufundzisa bantfu imiBhalo, labanyenti bakujabulela loko. Ngekuhamba kwesikhatsi, ngahlanganyela nelibandla lebelisandza kusungulwa lebelikhuluma lulwimi lwemdzabu. Sekuphele iminyaka lelishumi ngisisebenti sasikhatsi sonkhe. Kute lomunye umsebenti lobewunganginiketa injabulo lengiyitfolile njengobe ngisita bantfu kutsi bafundze tindzaba letimnandzi ngelulwimi labalumunya.”

13. Kungani nawusemusha kusikhatsi sekukhonta Jehova ngawo onkhe emandla akho?

¹³ Jabulela kukhonta Jehova usemusha. (Fundza Umshumayeli 12:1.) Asikho sidzingo sekutsi ucabange kutsi kufanele utfole umsebenti loholela kahle kute ukhone kukhonta Jehova ngekuhamba kwesikhatsi. Nawusemusha sikhatsi lesikahle sekukhonta Jehova ngawo onkhe emandla akho. Labasha labanyenti kungenteka kutsi banemitfwalo lembalwa ekhaya futsi basengimicemane, lokubenta bakhone kwenta imisebenti lenetinsayeya. Yini longatsandza kuyentela Jehova usemusha? Mhlawumbe umgomo wakho kuba lihlahlandlela. Ungase ufune kuyewushumayela ensimini lakukhulunywa khona lolunye lulwimi. Nobe mhlawumbe ubona tindlela longenta ngato lokunyenti ekukhonteni Jehova ebandleni lokulo nyalo. Nome ngabe ngumuphi umgomo wakho wekukhonta Nkulunkulu, kutawudzingeka ube nendlela yekutiphilisa. Kungakanani kuceceshwa lokudzingako? Utawukhetsa ini?

KUSEBENTISA TIMISO TELIBHAYIBHELI KUTE UTSATSE TINCUMO LETIHLAKANIPHILE

14. Yini lokufanele umuntfu ayicabangele nakahlela likusasa?

¹⁴ Letimiso teliBhayibheli letintsatfu lesifundze ngato tingakusita kutsi ukhetse umsebenti lokahle. Asingabati kutsi bothishela bati lokutsite mayelana nemisebenti letfolakalako. Kungenteka nekutsi kunelitiko lahulumende lelibuke tindzaba temisebenti lefunwa kakhulu nome lapho unesifiso sekuyewusebenta khona. Kwatiswa lokuvela kuleyo mitfombo kungaba lusito kodvwa kufanele ucaphele. Bantfu labangamtsandzi Jehova bangase betame kukwenta kutsi utsandze live. (1 Joh. 2:15-17) Nawubona loko live lelingakunika kona, inhlitiyo yakho ingase ikukhohlise kalula.—Fundza Taga 14:15; Jer. 17:9.

15, 16. Ngubani umuntfu lokahle longakucondzisa mayelana nekukhetsa umsebenti?

¹⁵ Nasewati kutsi ufuna muphi umsebenti, kufanele utfole seluleko lesinengcondvo. (Taga 1:5) Bobani labangakusita kutsi ukhetse umsebenti lokahle ucondziswa timiso teliBhayibheli? Lalela bantfu labatsandza Jehova ngobe bayakutsandza futsi bakwati kahle wena kanye netimo takho. Batakusita kutsi uhlatiye emakhono akho ekufundza nekusebenta kanye naloko lokufunako ekuphileni. Mhlawumbe loko labakushoko kutakusita kutsi ucabangisise ngemigomo yakho. Unesibusiso lesikhulu nangabe batali bakho batsandza Jehova. Labadzala ebandleni lakini nabo bangemadvodza lavutsiwe langakusita. Ngetulu kwaloko khuluma nemahlahlandlela kanye nebabonisi labajikeletako. Yini leyababangela kutsi bakhetse kwenta umsebenti wasikhatsi sonkhe ekushumayeleni? Bacala njani kuba ngemahlahlandlela futsi batiphilisa ngani? Ngukuphi kwenetiseka labakutfolile emsebentini labawentela Jehova?—Taga 15:22.

¹⁶ Labo labakwati kahle bangakunika teluleko letinengcondvo. Nasi sibonelo: Ase sitsi ufuna kuyekela esikolweni sewusebangeni leliphakeme kute ucale kuba lihlahlandlela ngobe nje ungawutsandzi umsebenti wesikolwa. Umuntfu lokutsandzako angase ayicondze indlela lotiva ngayo futsi akusite ubone kutsi sikolwa singakusita ufundze kungaphonsi lithawula ngekushesha, lokuyintfo lebalulekile nawufuna kukhonta Jehova ngenhlitiyo yakho yonkhe.—Hla. 141:5; Taga 6:6-10.

17. Ngutiphi tincumo lokufanele sitibalekele?

¹⁷ Bonkhe labakhonta Jehova kukholwa kwabo kutawutsikametwa tintfo letingase tibayekelise kumkhonta. (1 Khor. 15:33; Khol. 2:8) Letinye tinhlobo temisebenti tingabufaka engotini kakhulu buhlobo bemuntfu naNkulunkulu kunaletinye. Bakhona yini endzaweni yakini labehlelwe ‘kulimala kwekukholwa kwabo njengemkhumbi lowephukile’ ngemuva kwekukhetsa luhlobo lolutsite lwemsebenti? (1 Thim. 1:19) Kutawuba kuhlakanipha kugwema kutsatsa tincumo letitawufaka buhlobo bakho naNkulunkulu engotini.—Taga 22:3.

KUJABULELE KUBA NGUMKHRISTU LOSEMUSHA

18, 19. Nangabe lomusha ete sifiso sekukhonta Jehova nyalo, yini lokufanele ayente?

¹⁸ Nangabe enhlitiyweni yakho unesifiso sekukhonta Jehova, wajabulele ematfuba ekuba sikhonti saNkulunkulu lesisesisha. Tsatsa tincumo letitakusita kutsi ujabulele kukhonta Jehova kulesikhatsi lesibalulekile.—Hla. 148:12, 13.

¹⁹ Ngakulolunye luhlangotsi, yini lokufanele uyente nangabe kwanyalo ute sifiso sekukhonta Jehova? Ungapheli mandla, chubeka wetama kucinisa kukholwa kwakho. Ngemuva kwekutsi umphostoli Pawula asho konkhe lokusemandleni akhe lakwenta kute aphile imphilo letawubusiswa nguNkulunkulu, wabhala watsi: “Nangabe nicabanga ngalenye indlela kunobe ngukuphi, Nkulunkulu utanembulela lokucabanga. Ngelizinga lesesitfutfuke ngalo, asichubekeni sihamba ngalokufanele kulendlela lefanako.” (Fil. 3:15, 16) Chubeka ucabangisisa ngelutsandvo lwaNkulunkulu kanye neseluleko sakhe lesihlakaniphile. Jehova angakusita kutsi ukhetse kahle usemusha kwendlula nobe ngabe ngubani.