Bani Nekukholwa Yenta Tincumo Ngekuhlakanipha!

1. Yini leyabangela Khayini wehluleka kwenta sincumo lesihlakaniphile?

KHAYINI bekufanele ente sincumo emkhatsini wekulwisana nentfukutselo yakhe noma avumele intfukutselo yakhe kutsi imbuse. Kungakhatsaliseki kutsi yini lebekatayikhetsa, kokubili bekutawuba nemphumela lebeyitawutsintsa kuphila kwakhe konkhe. Siyati kutsi Khayini akazange ente sincumo lesikahle. Sincumo lasenta kanye nemphumela waso samenta wabulala umnakabo Abela. Lesincumo saKhayini sabulimata buhlobo bakhe neMdali wakhe.​—Gen. 4:3-16.

2. Kubaluleke ngani kutsi sente tincumo ngekuhlakanipha?

² Natsi ngalesinye sikhatsi kufanele sente tincumo. Akusito tonkhe tincumo lesitentako letibalulekile. Nome kunjalo, tincumo lesikhetsa kutenta tingaba nemiphumela lengatsintsa kuphila kwetfu. Ngako, nangabe sente tincumo letikahle singaba nemphilo lejabulisako lenekuthula kunekutsi siphile imphilo lenesiphitsiphitsi, kucabana kanye nekudvumateka.​—Taga 14:8.

3. (a) Ngutiphi tintfo lokufanele sikholelwe kuto kute sente tincumo letihlakaniphile? (b) Ngumiphi imibuto lesitawucoca ngayo?

³ Yini letasisita kutsi sente tincumo letihlakaniphile? Ngalokucinisekile, kufanele sibe nekukholwa kuNkulunkulu, singasingabati sifiso sakhe sekusisita kutsi sihlakaniphe. Kufanele setsembele eVini laJehova nasendleleni yakhe yekwenta tintfo futsi sisetsembe neseluleko sakhe lesiphefumulelwe. (Fundza Jakobe 1:5-8) Njengoba sisondzela kuye futsi sichubeka silitsandza liVi lakhe, kancane kancane siya ngekutetsemba tehlulelo takhe. Ngako, ngaphambi kwekutsi sente tincumo, sitawuvele sifune sicondziso eVini laNkulunkulu. Singawatfutfukisa kanjani emakhono etfu ekwenta tincumo letikahle? Kutsi sinesifiso sekwenta tincumo, ngabe loko kusho kutsi kufanele sinamatsele kuloko lesesivele sikuncumile ngisho nobe sekufanele sale senta lushintjo?

KUFANELE SENTE TINCUMO EKUPHILENI

4. Yini lebekufanele Adamu akhetse kuyenta, futsi kwaba namiphi imiphumela?

⁴ Kusukela bantfu babakhona, emadvodza nebafati bekufanele bente timcumo letibalulekile. Adamu bekufanele akhetse kutsi ulalela bani emkhatsini weMdali wakhe na-Eva. Bekatimisele kwenta sincumo, kodvwa ucabangani ngalesincumo lasenta? Umfati wakhe lobekadukisiwe wamenta wakhetsa kabi, ngemuva kwaloko walahlekelwa lilungelo lekuphila ePharadesi futsi wagcine afile. Loku kwaba kucala kwekuhlupheka kwaso sonkhe sintfu. Natsi lamuhla solo sisahlupheka ngenca yesincumo sa-Adamu lesibi.

5. Kufanele sisibheke njani sidzingo sekwenta tincumo?

⁵ Labanye bantfu bangase bacabange kutsi kuphila ngabe kumnandzi kube asitenti tincumo. Utiva kanjalo yini nawe? Khumbula kutsi Jehova akazange adale bantfu kutsi babe ngemarobhothi, bangakwati kucabanga futsi bangakwati nekutikhetsela. LiBhayibheli lisifundzisa kutsi singatenta njani tincumo letihlakaniphile. Njengobe kunguJehova lofuna sente tincumo, ngako kwenta tincumo kungasisita. Asesicabange ngebufakazi baloko.

6, 7. Ngukuphi lebekufanele ema-Israyeli akukhetse futsi yini leyenta kwaba lukhuni ngawo kutsi ancume ngekuhlakanipha? (Buka sitfombe lesisekucaleni kwalesihloko.)

⁶ Ngesikhatsi ema-Israyeli sekangenile Eveni Lesetsembiso, bekufanele akhetse kutsi akhonta Jehova yini noma akhonta labanye bonkulunkulu. (Fundza Joshuwa 24:15 ) Loku bekungabonakala kusincumo lesimelula nje. Noma kunjalo, sincumo sabo besingasho kuphila noma kufa.Ngesikhatsi seTikhulu, ema-Israyeli bekakhetsa kabi emahlandla lamanyenti. Bamshiya Jehova futsi bakhonta bonkulunkulu bemanga. (Khu. 2:3, 11-23) Cabanga nangaloko lokwenteka kamuva emlandvweni webantfu baNkulunkulu ngesikhatsi kufanele bente sincumo. Umphrofethi Elija watibeka ebaleni tintfo lebekufanele bakhetse emkhatsini wato: Kukhonta Jehova noma kukhonta nkulunkulu wemanga longuBhali. (1 Khos. 18:21) Elija wabekhuta bantfu ngekutsi bangehlukanisi kutsi bangakuluphi luhlangotsi. Mhlawumbe ungase ucabange kutsi lesi kwakusincumo lesimelula ngoba kukuhlakanipha futsi kuhlale kuzuzisa kukhonta Jehova. Liciniso, kute umuntfu lobekaphile kahle engcondvweni lobekangakhetsa kukhonta Bhali. Noma kunjalo, lawo ma-Israyeli bekasolo adziyatela “emkhatsini wemicondvo lemibili.” Ngekuhlakanipha, Elija wabeluleka kutsi bakhetse indlela lekahle yekukhulekela, lokukukhonta Jehova.

⁷ Yini lebeyenta ema-Israyeli angakhoni kwenta sincumo lesihlakaniphile? Kwekucala, bekakulahlile kukholwa kuJehova futsi bekakwalile kulalela livi lakhe. Bekehlulekile kwakha sisekelo selwati lolungulonalona noma kuhlakanipha lokuvela kuNkulunkulu futsi bekangaketsembeli kuJehova. Kusebentisa kwawo lwati lolungulonalona bekutawasita akhone kwenta tincumo letihlakaniphile. (Hla. 25:12) Ngetulu kwaloko, bekavumele labanye kutsi awahlubule kuNkulunkulu wawo nome aze awentele tincumo. Bantfu baletinye tive lebetingamkhonti Jehova, bashintja indlela yekucabanga yema-Israyeli, bawenta kutsi alandzele emacaba. Jehova bekavele awecwayisile kutsi tintfo letinjengaleti betingenteka.​—Eks. 23:2.

KUFANELE YINI LABANYE BASENTELE TINCUMO?

8. Ngusiphi sifundvo lesibalulekile lesisifundzako emlandvweni wema-Israyeli endzabeni yekwenta sincumo?

⁸ Letibonelo lesicoce ngato kuletigaba letingenhla tisiniketa sifundvo lesicacile. Kungumsebenti wetfu kutentela tincumo futsi tincumo letihlakaniphile naletikahle sitenta ngekutsi sisebentise lwati lesilutfola eBhayibhelini. Galathiya 6:5 usikhumbuta kutsi: “Nguloyo naloyo utawutetfwalela umtfwalo wakhe.” Ngako akukafanele sinike lomunye umuntfu umsebenti wekutsi asentele tincumo. Kunaloko, kufanele umuntfu ngamunye afundze kutsi ngukuphi lokulungile emehlweni aNkulunkulu bese sewukhetsa kwenta kona.

9. Kungani kungaba yingoti kuvumela labanye kutsi basentele tincumo?

⁹ Nguyiphi ingoti lesingangena kuyo nangabe sivumela labanye kutsi basikhetsele? Kucindzetelwa ngulabanye kungasibangela kutsi sente tincumo letikabi. (Taga 1:10, 15) Noma kunjalo, kungakhatsaliseki kutsi labanye basicindzetela kangakanani kungumsebenti wetfu kutsi silandzele bonembeza betfu labaceceshwe ngeliBhayibheli. Nangabe sivumela labanye kutsi basentele tincumo sisuke sikhetsa kutsi ‘sihambisane nabo.’ Kuyavunywa kutsi sisuke sikhetsile, kodvwa sisuke sikhetse indlela letasiletsela inhlekelele.

10. Pawula wawecwayisa ngani emaKhristu aseGalathiya?

¹⁰ Umphostoli Pawula wecwayisa emaKhristu aseGalathiya ngengoti lebekangangena kuyo nangabe avumela labanye kutsi awentele tincumo. (Fundza Galathiya 4:17.) Lamanye emaKhristu ebandleni bekafuna kwentela labanye tincumo kute awehlukanise nebaphostoli. Kungani? Lawo maKhristu lebekanebugovu bekatifunela ludvumo. Bekagabadzela futsi bekangalihloniphi lilungelo lalamanye emaKhristu lekutentela tincumo.

11. Singabasita njani labanye nabatentela tincumo?

¹¹ Pawula wasibekela sibonelo lesihle mayelana nekuhlonipha lilungelo lebazalwane lekutikhetsela. (Fundza 2 Khorinte 1:24.) Nalamuhla, bazalwane labadzala nabeluleka lotsite etindzabeni letimayelana netincumo temuntfu ngamunye, kufanele balingise lesibonelo saPawula. Bayakujabulela kucocela labanye ebandleni loko lokushiwo tincwadzi letisekelwe eBhayibhelini. Nanobe kunjalo, labadzala bashiyela kumuntfu ngamunye kutsi atentele tincumo. Loku kunengcondvo ngobe umuntfu ngamunye utawutetfwalela yena imiphumela yaloko lakuncumile. Nasi sifundvo lesibalulekile: Singakhombisa kutsi siyafuna kubasita labanye ngekutsi sibatjengise simiso lesiseBhayibhelini. Bantfu banelilungelo lekutentela tincumo. Nangabe balisebentisa kahle lelilungelo labo kuba nemiphumela lemihle. Ngako kusebaleni kutsi kufanele sikubalekele kucabanga kutsi sinelilungelo lekwentela lamanye emaKhristu tincumo.

KWENTA TINCUMO NAWUTFUKUTSELE

12, 13. Kungani kuyingoti kwenta loko lokufunwa yinhlitiyo yetfu nangabe sitfukutsele noma sidvumatekile?

¹² Umbono lovamile nalotsandvwa bantfu labanyenti utsi: Yenta lokufunwa yinhlitiyo yakho. Kodvwa kwenta kanjalo kungaba yingoti. NeliBhayibheli alihambisani nalombono. LiBhayibheli lisicwayisa ngekutsi singayivumeli inhlitiyo yetfu lenesono nobe indlela lesitiva ngayo kutsi isibuse nasenta tincumo. (Taga 28:26) Ngetulu kwaloko, liBhayibheli linetindzaba letikhombisa kutsi kunemiphumela lemibi nangabe senta loko lokufunwa tinhlitiyo tetfu. Inkinga lenkhulu kutsi kubantfu labanesono, “inhlitiyo iyayengana ngetulu kwato tonkhe tintfo, futsi yonakele ngalokwengcile.” (Jer. 3:17; 13:10; 17:9; 1 Khos. 11:9) Ngako, yini lengenteka kitsi nangabe sivele nje sente loko lokufunwa tinhlitiyo tetfu?

¹³ Kumutfu longumKhristu inhlitiyo ibalulekile ngoba uyalwa kutsi atsandze Jehova ngenhlitiyo yakhe yonkhe futsi atsandze makhelwane wakhe njengoba atitsandza yena. (Mat. 22:37-39) Kodvwa lemiBhalo levetwe langenhla ikhombisa kutsi kuyingoti kuvumela indlela lesitiva ngayo kutsi ilawule indlela lesicabanga ngayo kanye netento tetfu. Nasi sibonelo: Yini lengenteka nasingatsatsa tincumo nasitfukutsele? Imphendvulo isebaleni nangabe sike swakwenta loko ngaphambili. (Taga 14:17; 29:22) Singakhona yini kwenta tincumo letihlakaniphile nangabe sidvumatekile? (Num. 32:6-12; Taga 24:10) Khumbula kutsi liVi laNkulunkulu litsi kukuhlakanipha kuba “sigcili semtsetfo waNkulunkulu.” (Rom. 7:25) Ngako-ke, kungaba melula kutsi siyengwe yindlela lesitiva ngayo nangabe siyivumela kutsi isilawule nasenta tincumo letibalulekile.

LAPHO KUFANELE SISHINTJE KHONA TINCUMO

14. Sati njani kutsi kushintja tincumo lebesesititsetse kungaba yintfo lenhle?

¹⁴ Sidzinga kwenta tincumo letihlakaniphile. Noma kunjalo, loku akusho kutsi kufanele singasatishintji tincumo lesesitentile nakufanele sente kanjalo. Kunetikhatsi lapho kutawuba kuhlakanipha kucabangisisa ngesincumo lesesisentile futsi sisishintje nangabe kudzingeka. Cabanga ngesibonelo saJehova endzabeni yebantfu baseNineve ngesikhatsi saJona. LiBhayibheli litsi: “Watsi kube Nkulunkulu abone loko labasebakwentile, kutsi batishiye tindlela tabo letimbi, watisola ngalokubi labeshito kutsi utabehlisela kona. Akazange abajezise.” (Jona 3:10) Ngemuva kwekutsi bantfu baseNineve baphendvuke futsi bashintje tindlela tabo letimbi, Jehova wasigucula sincumo sakhe ngabo. Ngekwenta kwakhe kanjalo, wakhombisa kutsi uyacabangela, utfobekile futsi uneluvelo. Ngetulu kwaloko, Nkulunkulu akasekeli tincumo takhe entfukutselweni, lokuyintfo bantfu labanyenti labayentako.

15. Yini lengasenta kutsi sishintje tincumo lebesesititsetse?

¹⁵ Kunetikhatsi lapho kungaba kuhle khona kucabangisisa ngesincumo lesesisentile. Loko singakwenta nangabe sekunetimo letishintjako. Jehova bekatigucula tincumo takhe nangabe timo setishintjile. (1 Khos. 21:20, 21, 27-29; 2 Khos. 20:1-5) Mhlawumbe imininingwane lemisha ingasiniketa sizatfu lesinengcondvo sekugucula tincumo lebesesititsetse. Inkhosi Davide yatjelwa imininingwane lengemanga ngemtukulu waSawula longuMefiboshethi. Ngesikhatsi Davide atfola imininingwane leliciniso, wasishintja sincumo sakhe. (2 Sam. 16:3, 4; 19:24-29) Ngaletinye tikhatsi kungaba kuhlakanipha ngatsi kutsi sente lokufanako.

16. (a) Ngutiphi ticondziso letingasisita kute sente tincumo letihlakaniphile? (b) Kungani kufanele sicabangisise ngetincumo lesesitentile futsi singakwenta kanjani loko?

¹⁶ LiVi laNkulunkulu liseluleka kutsi singatatateli nakufanele sente tincumo letibalulekile. (Taga 21:5) Nangabe sitinika sikhatsi sekucatsanisa kahle onkhe emaciniso laphatselene nesincumo lesifuna kusitsatsa, asingabati kutsi sitawuphumelela. (1 Thes. 5:21) Ngaphambi kwekutsi inhloko yemindeni itsatse sincumo lesitsite, icale icwaninge loko lokushiwo yimiBhalo kanye netincwadzi letisekelwe eBhayibhelini, iphindze icabangisise ngemibono yalamanye emalunga emindeni. Khumbula kutsi Nkulunkulu watjela Abrahama kwekutsi akalalele loko lebekushiwo ngumkakhe. (Gen. 21:9-12) Nalabadzala kufanele batinikete sikhatsi sekucwaninga. Emadvodza latfobekile ngeke esabe kulahlekelwa sitfunti nangabe kuvela imininingwane lemisha letawudzinga kutsi bashintje sincumo lebesebavele basitsetse. Ngalesinye sikhatsi kufanele bakulungele kugucula indlela lebebacabanga ngayo kanye nesincumo lebebavele basitsetse futsi natsi sitawube senta kahle nasilandzela sibonelo sabo. Loku kungaletsa kuthula kanye nekuhleleka ebandleni.​—Imis. 6:1-4.

VUMELANA NETINCUMO LESETITSETFWE

17. Yini lengasisita kute siphumelele nasenta tincumo?

¹⁷ Tincumo lesitentako atilingani. Letinye tincumo tidzinga kucatjangelwa kakhudlwana futsi sithantaze ngato, lokuyintfo lengatsatsa sikhatsi. Lamanye emaKhristu kufanele ente tincumo tekutsi atawushada yini futsi atawushada nabani. Lesinye sincumo lesibalulekile lesinetibusiso letinyenti sekutsi kunini lapho umuntfu angangenela khona umsebenti wasikhatsi sonkhe futsi kanjani. Kuto totimbili letincumo, kubalulekile kwetsemba Jehova kutsi angasiniketa ticondziso letihlakaniphile. (Taga 1:5) Ngako, kukuhlakanipha kujwayelana neliBhayibheli njengoba lingumtfombo loncono weseluleko futsi kufanele sifune sicondziso saJehova ngemthantazo. Kufanale sikhumbule kutsi Jehova angasiniketa buntfu lesibudzingako kuze sente tincumo letivumelana nentsandzo yakhe. Nangabe kufanele wente tincumo letibalulekile kwente umkhuba kutibuta lemibuto letsi: ‘Ngabe lesincumo lengisentako sitawukhombisa yini kutsi ngiyamtsandza Jehova? Lesincumo sitayiletsa yini injabulo emndenini wami? Nekutsi sitawukhombisa yini kutsi ngiyabeketela futsi nginemusa?’

18. Kungani Jehova alindzele kutsi sitentele tincumo?

¹⁸ Jehova akasicindzeteli kutsi simkhonte futsi simtsandze. Siyatikhetsela. Ngekuvumelana nenkhululeko yekutikhetsela lasiniketa yona, Nkulunkulu uyalihlonipha lilungelo letfu ‘lekutikhetsela’ kungakhatsaliseki kutsi sitamkhonta yini noma cha. (Josh. 24:15; Shu. 5:4) Noma kunjalo, ulindzele kutsi sivumelane netincumo letisekelwe esicondzisweni sakhe. Nangabe sinekukholwa endleleni yaJehova yekwenta tintfo kanye netimiso takhe lasinika tona, singakhona kwenta tincumo letihlakaniphile futsi sikhombise kutsi setsembekile kuto tonkhe tintfo.​—Jak. 1:5-8; 4:8.