SIHLOKO LESINGUMGOGODLA | BABOBANI BOFAKAZI BAJEHOVA?
Yini lesenta sishumayele?
Lokusenta sehluke kuletinye tinkholo kutsi siyashumayela. Sishumayela emtini ngemuti, etindzaweni letiphitsitelako nanome ngabe ngukuphi lakutfolakala khona bantfu. Yini vele lesenta sishumayele?
Sishumayela ngobe sidvumisa Nkululunkulu futsi sifuna bantfu balati ligama lakhe. (Hebheru 13:15) Lesinye sizatfu kutsi silalela umyalo waJesu lotsi: “Ngako-ke hambani nente bantfu bato tonkhe tive babe bafundzi bami, . . . nibafundzise kugcina konkhe lenginitjele kona.”—Matewu 28:19, 20.
Kantsi lesinye kutsi siyabatsandza bomakhelwane betfu. (Matewu 22:39) Siyati kutsi bantfu banetinkholo tabo nekutsi akusibo bonkhe labawutsakaselako umlayeto wetfu. Nanobe kunjalo, sikholelwa kutsi umlayeto loseBhayibhelini usindzisa kuphila. NjengemaKhristu angelikhulu lekucala ‘asiyekeli kufundzisa nekumemetela tindzaba letimnandzi ngaKhristu Jesu.’—Imisebenti 5:41, 42.
Antonio Cova Maduro losati sesayensi wabhala watsi: “BoFakazi BaJehova bayatikhandla kuze tindzaba letimnandzi tishunyayelwe emhlabeni wonkhe.”—El Universal newspaper, Venezuela
Bantfu labanyenti labafundza tincwadzi tetfu abasibo BoFakazi BaJehova. Futsi tigidzi tebantfu lesifundza nato liBhayibheli tikuletinye tinkholo. Kepha tiyakutsakasela kufundza liBhayibheli naBoFakazi BaJehova.
Kungenteka unaleminye imibuto ngaBoFakazi BaJehova. Ungatitfola timphendvulo ngekutsi
Ubute BoFakazi BaJehova.
Ungene ku-website yetfu, www.jw.org/ss.
Uye emihlanganweni yelibandla, bonkhe bantfu bavumelekile kuta futsi kungenwa mahhala.