Likusasa Lakho, Lisetandleni Takho!
UNGATIKHETSELA YINI KUTSI UFUNA LIBE NJANI LIKUSASA LAKHO? Labanye bantfu bakholelwa kutsi kwahlelwa kutsi kufanele baphile njani hhayi kutsi bayatikhetsela. Nangabe behlulekile kwenta intfo letsite, bavele balahle litsemba. Batsi: “Bekuvele kuhleliwe kutsi ngeke ngize ngikhone kukwenta loko.”
Labanye bayadvumateka nangabe bangaboni kutsi kufanele bente njani kulelive lelicindzetelako nalelingakalungi. Kungenteka bake betama kwenta kuphila kwabo kube ncono, kodvwa timphi, bugebengu, tehlakalo temvelo, nekugula kwenta labakuhlelile kungaphumeleli. Babese batibuta kutsi ‘ngitihluphelani nje?’
Kuliciniso kutsi timo letitsite ekuphileni tingakuphatamisa loko lesikuhlelile. (Umshumayeli 9:11) Nanobe kunjalo, nakutiwa endzabeni yelikusasa lakho ungatikhetsela. Ecinisweni liBhayibheli lisitjela kutsi likusasa lakho lisetandleni takho. Cabanga ngaloko lelikushoko.
Ngesikhatsi sive sema-Israyeli sesitawungena eVeni Lesetsembiso, Mosi umholi waso watsi: “Ngibeke embikwenu kufa nekuphila, tibusiso neticalekiso. Ngako khetsani kuphila, kuze niphile nine kanye nebantfwabenu, kuze nitsandze Simakadze Nkulunkulu wenu, nive liphimbo lakhe, ninamatsele kuye.”—Dutheronomi 30:15, 19, 20.
“Lamuhla ngibita lizulu nemhlaba kutsi kube ngufakazi kini kutsi ngibeke embikwenu kufa nekuphila, tibusiso neticalekiso. Ngako khetsani kuphila, kuze niphile nine kanye nebantfwabenu.”—Dutheronomi 30:19
Kuliciniso kutsi Nkulunkulu wawakhulula ema-Israyeli ekugcilatweni eGibhithe futsi wawetsembisa imphilo lenekuthula nalejabulisako eVeni Lesetsembiso. Loko bekungeke kutentakalele nje. Kute batfole letibusiso, bekufanele ‘bakhetse kuphila.’ Kanjani? ‘Ngekutsandza Simakadze Nkulunkulu wabo, beve liphimbo lakhe, futsi banamatsele kuye.’
Kuyafana nalamuhla, loko lesikukhetsako ngiko lokutawusho kutsi likusasa letfu litawuba njani. Nasitsandza Nkulunkulu, silalele loko lasitjela kona siphindze sinamatsele kuye, sitawube sikhetsa kuphila lokuphakadze emhlabeni lolipharadisi. Kodvwa yini lokulindzeleke kutsi siyente kuletinyatselo lesisandza kutibala?
TSANDZA NKULUNKULU
Incenye leyinhloko yebuntfu baNkulunkulu lutsandvo. Umphostoli Johane waphefumulelwa kutsi abhale lamavi latsi: “Nkulunkulu ulutsandvo.” (1 Johane 4:8) Ngenca yalesizatfu, Jesu nakabutwa kutsi ngumuphi umtsetfo lomkhulu watsi: “Kufanele utsandze Jehova Nkulunkulu wakho ngayo yonkhe inhlitiyo yakho, nangawo wonkhe umphefumulo wakho, nangayo yonkhe ingcondvo yakho.” (Matewu 22:37) Kuze sibe nebuhlobo lobuhle naNkulunkulu Jehova kufanele simtsandze singamesabi. Kungani-ke sikhetsa kumtsandza?
Indlela Jehova latsandza ngayo bantfu ifana nendlela batali labatsandza ngayo bantfwana babo. Ngisho nobe banesono, batali labanelutsandvo bayabayala bantfwana babo, babakhutsate, babasekele baphindze babekhute kute bajabule futsi baphumelele. Batali basuke bafise kutsi benteni bantfwana babo ngaloku? Bafuna kutsi babatsandze baphindze bakulalele loko lababafundzise kona kute bazuze. Ngendlela lefanako, natsi kufanele sikhombise kubonga ngako konkhe Babe wetfu losezulwini lasentele kona.
LALELA LIVI LAKHE
Etilwimini tekucala liBhayibheli lelabhalwa ngato, ligama lelitsi “lalela” lifaka ekhatsi “kwenta.” Nguloko lesisuke sikusho nasitsi, ‘bantfwana, lalelani batali benu.’ Ngendlela lefanako, kulalela livi laNkulunkulu kusho kufundza nekukwenta loko lakushoko. Njengobe singeke sikhone kumuva Nkulunkulu akhuluma, singamlalela ngekutsi sifundze liVi lakhe liBhayibheli siphindze sekusebentise loko lesikufundzako.—1 Johane 5:3.
Kute Jesu akhombise kutsi kubalulekile kulalela livi laNkulunkulu, watsi: “Umuntfu ngeke aphile ngesinkhwa sodvwa, kodvwa ngawo onkhe emavi laphuma emlonyeni waJehova.” (Matewu 4:4) Njengobe kubalulekile kudla lesikudlako, nekufundza ngaNkulunkulu kubaluleke kakhulu. Kungani? INkhosi lehlakaniphile Solomoni yachaza yatsi: “Kuhlakanipha kuyintfo yekukhosela njengobe nemali kuyintfo yekukhosela, kodvwa buhle belwati kutsi: Kuhlakanipha kuyawulondvolota kuphila kwemnikati wako.” (Umshumayeli 7:12) Lwati nekuhlakanipha lokuvela kuNkulunkulu kungasivikela kuphindze kusisite sitsatse tincumo letihlakaniphile letitasenta sitfole kuphila lokuphakadze.
NAMATSELA KUYE
Khumbula umfanekiso waJesu lesikhulume ngawo esihlokweni lesendlulile, lapho atsi: “Lincane lisango kanye nendlela leya ekuphileni, futsi bambalwa labayitfolako.” (Matewu 7:13, 14) Njengobe sihamba kulendlela kutasizuzisa kulalela ticondziso taloyo loyati kahle lendlela futsi sinamatsele kuye nasifuna kufika lapho siya khona, lokukutfola kuphila lokuphakadze. Kungako kubalulekile kutsi sinamatsele kuNkulunkulu. (Tihlabelelo 16:8) Singakwenta kanjani-ke loko?
Tinyenti tintfo lokufanele sitente nalesingatsandza kutenta onkhe malanga. Letinye taletintfo tingasenta sihlale simatasatasa size sibe bete ngisho nesikhatsi sekwenta loko Nkulunkulu lakufunako kitsi. Kungako liBhayibheli lisikhumbuta nganaku: “Caphelisisani kutsi indlela lenihamba ngayo ayifani neyebantfu labangakahlakaniphi kodvwa ifana neyebantfu labahlakaniphile, nisisebentise kahle sikhatsi senu, ngobe emalanga mabi.” (Efesu 5:15, 16) Sitawuhlala sisondzelene naNkulunkulu ngekutsi sente buhlobo betfu naye bute kucala ekuphileni kwetfu.—Matewu 6:33.
KUKUWE KUTSI UKHETSANI
Kute lesingakwenta kute sishintje limuva letfu, kodvwa kukhona lesingakwenta kute sente likusasa letfu kanye nelalabo lesibatsandzako libe lihle. LiBhayibheli liveta kutsi Babe wetfu losezulwini Jehova usitsandza kakhulu futsi uyasitjela nekutsi yini lafuna siyente. Naka nankha emavi emphrofethi Mikha:
“Cha, Simakadze usitjelile lokungukona kukuhle. Lakufunako kitsi ngunaku: Ufuna sente kulunga, siphatsane ngemusa, siphilele Nkulunkulu ngentfobeko.”—Mikha 6:8.
Utasemukela yini lesimemo saJehova sekutsi uhambe naye futsi utfole tibusiso letihlala njalo letitfolwa ngulabo labasemukelako? Kukuwe kutsi ukhetsani.