Ungatikhetsela Likusasa Lofuna Kuba Nalo

Eminyakeni lecishe ibe ngu-3 500 leyendlulile, Jehova Nkulunkulu watjela tikhonti takhe lebekufanele tikwente kuze tibe nelikusasa lelijabulisako: “Ngibeke kuphila nekufa embikwenu, sibusiso nesicalekiso; nibokhetsa kuphila kute niphile, nine nebantfwana benu.”​—Dutheronomi 30:19.

Kuze babe nelikusasa lelihle, labo bantfu bekufanele bente tincumo letikahle. Nalamuhla kufanele sitikhetsele. LiBhayibheli liyachaza kutsi singalikhetsa njani likusasa lelijabulisako: “Ngekutsi nitsandze Jehova Nkulunkulu wenu, nilalele livi lakhe.”​—Dutheronomi 30:20.

SINGAMTSANDZA NJANI JEHOVA FUTSI SILALELE LIVI LAKHE?

TFOLA SIFUNDVO KULOKO LOKUSEBHAYIBHELINI: Kuze utsandze Jehova, kudzingeka ucale ufundze ngaye eBhayibhelini. Nawenta njalo, utawutfola kutsi unguNkulunkulu lonelutsandvo lokufunela lokuncono. Ukumema kutsi uthantaze kuye ‘ngobe uyakukhatsalela.’ (1 Phetro 5:7) LiBhayibheli letsembisa kutsi nawenta imetamo yekusondzela kuye, ‘naye utawusondzela kuwe.’​—Jakobe 4:8.

KUSEBENTISE LOKO LOKUFUNDZAKO: Kulalela Nkulunkulu kusho kulandzela sicondziso sakhe lesihlakaniphile lesitfolakala eBhayibhelini. Nawenta njalo, “utawuphumelela futsi utawenta tintfo ngekuhlakanipha.”​—Joshuwa 1:8.