Ungakwenta Njani Kudadisha Kwakho LiBhayibheli Kuzuzise Futsi Kujabulise?

Joshuwa ufundza uMtsetfo; tindvonga taseJerikho tiyawa, kodvwa Rahabi uyasindza; Joshuwa uthantaza aphakamisele tandla takhe etulu

JOSHUWA bekufanele aholi sive sema-Israyeli asiyise eveni lesetsembiso, futsi lona bekungumsebenti lomatima. Noma kunjalo, Jehova wamcinisekisa kutsi utawuphumelela, futsi wamkhutsata watsi: ‘Cina kakhulu, ube nesibindzi. Uyilalele yonkhe imitsetfo yami. Emavi alencwadzi yemtsetfo angesuki emlonyeni wakho; uyawucabangisisa ujule kuwo busuku nemini, kuze ukhone kukwenta konkhe loku lokubhalwe kuwo; khona-ke uyawuphumelela kube kuhle kuwe.’—Josh. 1:7, 8.

Njengobe siphila ‘kuletikhatsi letibucayi lokumatima kubhekana nato,’ sihlangabetana netinkinga letimatima. (2 Thim. 3:1) NjengaJoshuwa, natsi singaphumelela nasilalela seluleko Jehova lamniketa sona. Singafundza liBhayibheli njalo, futsi sisebentise timiso letikulo nasenta tincumo.

Noma kunjalo, labanyenti betfu bayavuma kutsi abayati indlela lekahle yekudadisha futsi abakujabuleli. Kepha kudadisha liBhayibheli kubaluleke kakhulu. Nawufundza libhokisi lelitsi “Longakwenta,” utawutfola lokunyenti lokungakusita uzuze futsi ujabule nawufundza liBhayibheli.

Umhlabeleli wahlabela watsi: “Ngiholele endleleni yemiyalo yakho, ngobe lendlela iyinjabulo yami.” (Hla. 119:35) Kudadisha liBhayibheli kungakwenta ujabule kakhulu. Utawutfola emaphuzu lamahle kakhulu nawuchubeka ulidadisha.

Lamuhla asiholi sive njengobe bekwenta Joshuwa, kodvwa tikhona tinkinga lesibhekana nato ekuphileni. Ngako njengaJoshuwa, dadisha liVi laNkulunkulu futsi ukwente loko lelikushoko. Nawenta njalo utawuphumelela futsi utawuhlakanipha.

LONGAKWENTA

Thantaza ngaphambi kwekutsi udadishe. LiBhayibheli linemicabango yaNkulunkulu lebhalelwe kutsi izuzise wena. Ngako nangabe ufundza liBhayibheli, cela lusito lwaJehova kuze ulicondze, ungakukhohlwa loko lokufundzako futsi ukusebentise ekuphileni kwakho.—Ezra 7:10.
Tibute imibuto nawusafundza liBhayibheli noma tincwadzi letisekelwe kulo. Ungatibuta kutsi: ‘Loku lengikufundzako kungitjelani ngaJehova? Loku kuwutfutfukisa njani umlayeto loyinhloko weliBhayibheli? Ngingakusebentisa njani loku lengikufundzako kuze ngisite labanye?’
Zindla ngaloko lokufundzako. Nawusafundza, tinikete sikhatsi sekuzindla. Tibute kutsi: ‘Loku lengikufundzako kungenta ngitive njani? Kungani kungenta ngitive ngalendlela? Kukutsintsa njani lokwenteka ekuphileni kwami esikhatsini lesendlulile, lokwenteka nyalo noma lokungahle kwenteke esikhatsini lesitako? Ngingasisebentisa njani lesimiso seliBhayibheli naleseluleko ekuphileni kwami?’ (Jobe 23:5; Hla. 49:3) Cabanga ngekutsi ungabachazela njani labanye kutsi kungani Jehova akhutsata bantfu bakhe kutsi bakubalekele kwenta imikhuba letsite noma kutsi kungaba namiphi imiphumela kungakwenti loku lengikufundzako.—Dut. 32:28, 29.
Sebentisa likhono lekucabanga nangabe ufundza indzaba lechaza lokutsite. Ungasibona yini ngeliso lengcondvo simo lesaba khona ngesikhatsi banakabo Josefa bamtsengisa esiveni saka-Ishmayeli? (Gen. 37:18-28) Yini loyibonako, loyivako naloyihogelako? Tifake eticatfulweni tebalingiswa. Yini labayicabangako nalabayivako? Kucabanga ngalendlela kungenta kudadisha kwakho liBhayibheli kucace futsi kube nenjongo.
Sebentisa emathuluzi ekudadisha lentelwe kukusita nawucwaninga. Tayela kusebentisa emathuluzi latfolakala ngelulwimi lwakho, kungaba tincwadzi noma latfolakala ku-internet. Ungangabati kucela labanye bakusite ukhone kusebentisa lamathuluzi ngalokuphumelelako. I-Watch Tower Publications Index kanye ne-Lithuluzi Lekucwaninga LaBoFakazi BaJehova lingakusita utfole lokubhaliwe ngesihloko lesitsite kanye netinchazelo temavesi lamanyenti. Sebentisa Lithulusi Lekutadisha LiVi LaNkulunkulu lelinemininingwane lelusito mayelana netindzawo, umlandvo, sisindvo netikali kanye nalokunye.
Buketa emaphuzu layinhloko. Loko kutakusita ukukhumbule loko lokudadishile. Cocela labanye ngaloko lokufundzile. Kukhona yini longakusebentisa nawushumayela? Ngekwenta letintfo, utawukhumbula emaphuzu labalulekile futsi nalabanye batawuzuza ekudadisheni kwakho liBhayibheli.