Uyakuhlehlisa Yini?
Kuhlehlisa ini? Kugcwalisa likhadi i-DPA (durable power of attorney) leliniketwa bonkhe boFakazi lababhajatisiwe. Njengobe ‘ungalati likusasa lekuphila kwakho kutsi litawuba yini,’ kubaluleke kakhulu kutsi uncume nyalo futsi ubhale phansi kutsi ngutiphi tinhlobo tekwelashwa kanye netinchubo tako lotawutemukela lapho kuvela simo lesiphutfumako setemphilo. (Jak 4:14; Imi 15:28, 29) Kute utfole lusito, kuye kwakhishwa i-video letsi-Transfusion-Alternative Health Care—Meeting Patient Needs and Rights. Yibukele, futsi ngemthandazo uyibukete usebentisa lemibuto lengentasi.—Caphela: Ngenca yekutsi le-video ihlanganisa netinkhundla tekuhlindvwa, batali kufanele bancume kutsi batawuyibukela yini nebantfwana labancane.
(1) Kungani labanye bodokotela kanye nabocwephesha betekwelapha sebakuhlolisisa kabusha kumpontjelwa kwengati? (2) Niketa tibonelo letintsatfu tekuhlindvwa lokuyinkimbinkimbi lokuye kwentiwa ngaphandle kwekumpontjelwa ingati. (3) Bangakhi bodokotela emhlabeni wonkhe labaye baveta sifiso sabo sekwelapha tigulane tabo ngaphandle kwekutimpompela ingati? Kungani banesifiso lesinjalo? (4) Luhlolo lwetibhedlela lwakamuva luveteni ngekusetjentiswa kwengati? (5) Ngutiphi tingoti tetemphilo letibangelwa kumpontjelwa ingati? (6) Bodokotela labanyenti bafinyelele kusiphi siphetfo mayelana netinzuzo tekusebentisa tindlela (transfusion alternatives) letitawubenta bagweme kumpompela ingati? (7) Yini lebangela umphelangati (anemia)? Uyingoti kangakanani kubantfu? Yini lengentiwa kute kusitwe sigulane lesiphetfwe ngulesifo? (8) Tinhlayiya letibovu tingakhicitwa njani emtimbeni wesigulane? (9) Ngutiphi tindlela letisetjentiswako kute kuncishiswe kopha lapho kuhlindvwa? (10) Letindlela tekungayimpompeli ingati (transfusion alternatives) tingasebenta yini kubantfwana nobe kumuntfu losesimeni lesibucayi? (11) Ngusiphi lesinye simiso lesiyinhloko sekunakekelwa kwemphilo lokuhle? (12) Kungani kubalulekile kutsi emaKhristu ente sincumo kusesenesikhatsi sekutsi ngutiphi tinhlobo tekwelapha letingahlanganisi kusetjentiswa kwengati latawutemukela? Singakwenta njani loko?
Kutsi umuntfu utawutemukela yini letinye taletindlela letivetwe kule-video, kusincumo lekufanele atentele sono asebentisa nembeza wakhe loceceshwe liBhayibheli. Sewusentile yini sincumo sekutsi ngukuphi kwelashwa kanye netinchubo tako wena nebantfwana bakho lenitawukwemukela, futsi sewuligcwalisile yini likhadi i-DPA? Kute ufundze kabanti ngalendzaba, buketa ngekucaphelisisa sehluko 7 sencwadzi letsi “Elutsandvweni LwaNkulunkulu” kanye nemitfombo levetwe kuyo. Fundza sengeto lesinesihloko lesitsi: “Kufanele Ngizibheke Kanjani Izingxenyana Zegazi Nezinqubo Zokwelapha Ezihilela Ukusetshenziswa Kwegazi Lami?” lesiku-Msebenti Wetfu WeMbuso wa-January 2007, ngelulwimi lwesiZulu. Kwekugcina, ciniseka kutsi loko lokukhetsako ukugcwalise kahle kulelikhadi i-DPA. Kufanele uciniseke kutsi uyabachazela ngesincumo sakho labo lobakhetsile kutsi babe ngema-health-care agents, kanye nemalunga emndeni wakho langasibo boFakazi.
[Box on page 3]
• Sewuncumile yini kutsi ngukuphi kwelashwa kanye netinchubo tako wena nebantfwana bakho lenitawukwemukela?
• Uyaliphatsa yini likhadi i-DPA leligcwalisiwe kute likusite lapho kuvela simo lesiphutfumako?