Uyakwati Yini Longakukhetsa?

Kuhlindvwa ngaphandle kwekusetjentiswa kwengati sekwentiwa etibhedlela letinyenti emhlabeni wonkhe. Utati kahle yini tindlela tekwelashwa ngaphandle kwekumpontjelwa ingati longakhetsa kuto? Kudzingeka utati kute utewukwati kwenta tincumo letihlakaniphile mayelana nendlela yekwelashwa kanye nekuhlindvwa. Bukela i-video letsi “No Blood—Medicine Meets the Challenge.” Ngemuva kwaloko, thandaza bese ubuketa loko lokufundzile ngelusito lwalemibuto lengentansi.—Caphela: Ngesizatfu sekutsi le-video inetincenye lapho kuhlindvwa khona, batali kufanele bancume kutsi batawubavumela yini bantfwana babo kutsi bayibukele le-video.

(1) Ngusiphi sizatfu lesiyinhloko lesenta boFakazi BaJehova bangavumi kumpontjelwa ingati? (2) Nakutiwa etindzabeni tekwelashwa, yini boFakazi BaJehova labayifisako? (3) Nguliphi lilungelo lelisisekelo tigulane letinalo? (4) Kungani kukuhlakanipha futsi kufaneleka kutsi ukhetse tindlela tekwelashwa letingahlanganisi kumpontjelwa ingati? (5) Nakwenteka umuntfu opha kakhulu, ngutiphi tintfo letimbili bodokotela labangatenta ngekushesha? (6) Ngutiphi timiso letine tekwelashwa ngaphandle kwekumpontjelwa ingati letingase tisetjentiswe? (7) Bodokotela (a) bangakunciphisa njani kopha, (b) bangatonga njani tinhlayiya letibovu, (c) bangawukhulisa njani umkhicito wengati, futsi (d) bangayibuyisa njani ingati lelahlekile? (8) Chaza tinchubo letatiwa ngekutsi (a) yi-hemodilution kanye (b) ne-cell salvage. (9) Yini lokufanele ufune kuyati mayelana nanobe ngutiphi tindlela tekwelashwa ngaphandle kwekumpontjelwa ingati? (10) Kuhlindvwa lokukhulu nalokuyinkimbinkimbi kungentiwa yini ngaphandle kwekumpontjelwa ingati? (11) Nguyiphi intfutfuko leyentiwako kutekwelapha?

Kutsi umuntfu utawutemukela yini letinye taletindlela letivetwe kule-video, kusincumo lokufanele atitsatsele sona ngansense asebentisa nembeza wakhe loceceshwe liBhayibheli. Sewusitsatsile yini sincumo sekutsi ngukuphi kwelashwa kanye netinchubo tako wena nebantfwana bakho lenitawukwemukela, futsi sewuligcwalisile yini likhadi lelisha i-Advance Medical Directive (AMD)?a Kute ufundze kabanti ngalendzaba, buketa ngekucaphelisisa sihloko lesitsi “Imibuzo Evela Kubafundi,” ku-Sicongosekulindza sa-June 15, 2004, kanye nesa-October 15, 2000, ngesiZulu. Kute utitsatsele tincumo mayelana netindlela longatemukela kanye naleto longeke utemukele, fundza sengeto lesitfolakala ku-Msebenti Wetfu WeMbuso wa-November 2006, ngesiZulu, lesitsi: “Kufanele Ngizibheke Kanjani Izingxenyana Zegazi Nezinqubo Zokwelapha Ezihilela Ukusetshenziswa Kwegazi Lami?” Ekugcineni, ciniseka kutsi loko lokukhetsako ukugcwalise kahle ekhadini lakho i-AMD. Kufanele uciniseke kutsi uyabachazela ngesincumo sakho labo lobakhetsile kutsi babe ngema-health-care agents, kanye nemalunga emndeni wakho langasibo boFakazi.

[Umbhalo longentansi]