Bani Lusito Enkonzweni Yasensimini
1. Sizuza njani ngekusebenta nalotsite enkonzweni yasensimini?
1 Ngalesinye sikhatsi, Jesu watfumela bafundzi labangu-70 kutsi bayewushumayela, ‘wabatfuma ngababili.’(Luk. 10:1, NW.) Lelilungiselelo belentelwe kutsi bafundzi basitane futsi bakhutsatane njengobe bebashumayela. Tsine singaba njani lusito nasihamba nalomunye ummemeteli enkonzweni yasensimini?
2. Ngesikhatsi lona lohamba naye akhuluma nemnikati welikhaya, kufanele ulalele ngayiphi indlela, futsi kungani kufanele wente kanjalo?
2 Ngekulalela: Lalelisisa ngesikhatsi lona lohamba naye akhuluma nemnikati welikhaya. (Jak. 1:19) Nangabe afundza umbhalo, nawe hambisana naye eBhayibhelini lakho. Buka loyo losuke akhuluma, kungaba ngulona lohamba naye nobe umnikati welikhaya. Nangabe ulalelisisa nakukhulunywa, utawusita nemnikati welikhaya kutsi naye ente lokufananako.
3. Kunini lapho loyo lesihamba naye angasicela kutsi sikhulume?
3 Ngekusati Sikhatsi Sekukhuluma: Nangabe ummemeteli lesihamba naye kunguye lowetfula inshumayelo, sibonisa kumhlonipha ngekuvumela kutsi kube nguye loholako. (Rom. 12:10) Kufanele singaphatamisi. Nangabe lona lesihamba naye akhohlwa loko lokufanele akusho, nobe umnikati welikhaya aphikisa nobe aphakamisa umbuto, futsi lona lesihamba naye acela lusito lwetfu, sitawetama kusekela loko labesakushito kunekutsi setame kucala indzaba lensha. (Taga 16:23; Shu. 3:1, 7) Nasikhuluma, emavi etfu kufanele ahambisane nebufakazi lesibuniketako.—1 Khor. 14:8.
4. Yini letawukhulisa injabulo kanye nemphumelelo yetfu enkonzweni yasensimini?
4 Ngesikhatsi bafundzi labangu-70 labebahambe ngababili sebacedzile kushumayela, “babuya bajabule kakhulu.”(Luk. 10:17) Natsi sitawuba nenjabulo nemphumelelo enkonzweni nasilalela futsi sicondza kutsi kunini lapho kudzingeke khona kutsi sibasite labo lesihamba nabo enkonzweni yasensimini.