Bani Lusito Kulohamba Naye
1. Singamlingisa njani umphostoli Pawula nasisebenta nalabanye emsebentini wekushumayela?
1 Umphostoli Pawula wabona sikhatsi labesicitsa nemakholwa labekanye nawo njengelitfuba ‘lekukhutsatana.’ (Rom. 1:12) Nawunalomunye ummemeteli emsebentini wekushumayela, uyasisebentisa yini leso sikhatsi kuze umkhutsate uphindze umsite? Kunekutsi ungabi lusito lwalutfo kuloyo lohamba naye, kungete kwaba kuhle yini kumcocela kutsi wena uphumelela njani ensimini?
2. Yini lesingayenta kute sente loyo lesisebenta naye ensimini atetsembe, futsi kubaluleke ngani loko?
2 Msite Atetsembe: Labanye bamemeteli abatetsembi. Loko kungase kubonakale ebusweni noma kuvakale evini labo. Singatfutfukisa lizinga labo lekutetsemba ngekubancoma ngalokusuka enhlitiyweni. Ngutiphi letinye tetindlela tekubasita kutsi batetsembe? Lomunye umbonisi lojikeletako uvele atjele loyo lahamba naye ngaloko yena lakwesabako nangendlela lathantaza kanyenti ngayo kuze ancobe loko kwesaba. Lomunye umzalwane waphawula loku mayelana naloko lokumsita kutsi atetsembe: “Mine ngicala ngekumamatseka. Ngalesinye sikhatsi kudzingeka ngithantazele lusito lekutsi ngikhone kwenta intfo lelula njengaleyo.” Kukhona yini wena lokukusitile kute utetsembe nawusemsebentini wekushumayela? Kucocele loyo lohamba naye ensimini.
3. Yini lesingayicocela loyo lesihamba naye ensimini lengamsita aphumelele kakhudlwana emsebentini wekushumayela?
3 Coca Ngetindlela Lotisebentisako: Akhona yini emavi nome umbuto lomelula, mhlawumbe-ke lokutsite lokwenteke endzaweni, lokubone kuphumelela ekucaleni incociswano? Kukhona yini lotsite nawukwengeta enshumayelweni lesibonelo kwaba nemiphumela lemihle? Kucocele loyo lohamba naye ensimini. (Taga 27:17) Nanisahamba niya kuloyo lococe naye esikhatsini lesengcile, ungamcocela loyo lohamba naye mayelana naloko lotimisele kuyokufeza nekutsi uhlele kwenta njani kuze uphumelele. Ngemuva kwekuchuba sifundvo seliBhayibheli, ungamchazela loyo lohamba naye kutsi yini lekwente wakhetsa liphuzu lelitsite, umBhalo, nome indlela letsite yekufundzisa nawuzama kusita loyo lomfundzelako.
4. Kungani kufanele sibe nesifiso sekusita bamemeteli lesikanye nabo?
4 Bavangeli besikhatsi sebaphostoli bebangafisi nje kuphela kusita bantfu lebebangakholwa. Baphindze bacaphela kutsi kumcoka kukhutsatana nekucinisana nalabo labebakholwa nabo. (Imis. 11:23; 15:32) Umphostoli Pawula wacecesha Thimothi lobekasemncane wase sewumkhutsata kutsi akucocele labanye loko lebesekakufundzile. (2 Thim. 2:2) Nasingakhohlwa kuwentela lokuhle emaKhristu lesikanye nawo nasisemsebentini wekushumayela, siyobe asigcini nje ngekukhulisa injabulo kanye nemphumelelo yawo, kodvwa siyobe sijabulisa naBabe wetfu losezulwini.—Heb. 13:15, 16.