Lisebentise Kahle Ngaso Sonkhe Sikhatsi
1. Lipheshana lelitsi Kwati Liciniso lisisita kutsi senteni?
1 Lipheshana lelitsi Ungatsandza Yini Kwati Liciniso? lentelwe kutsi lisisite sicalise tifundvo teliBhayibheli. Liphindze libe lithulusi leliphumelelako lekusakata inhlanyelo yeliciniso. (Shu. 11:6) Nati letinye tindlela letitawusisita sikwati kulisebentisa kahle.
2. Singalisebentisa njani lelipheshana kute sicale kukhuluma nebantfu?
2 Indlela Yekucala Kukhuluma: Ungase unikete umnikati welikhaya lelipheshana, umkhombise imibuto lesitfupha lesekucaleni kwalo, bese utsi: “Ngumuphi umbuto kulena lelapha loke watibuta wona?” Nasekaphendvulile, khulumela imphendvulo lesekelwe eBhayibhelini lekulelipheshana lephendvula umbuto wakhe, bese ufundza umBhalo lowodvwa lokhonjiwe. Fundza nobe ukhulumele kwatiswa lokusekhasini lelingemuva, bese uhambisa incwadzi letsi Lokufundziswa LiBhayibheli. Ngisho nobe kungenteka angayitsatsi lencwadzi, kodvwa utawube alitsatsile lelipheshana futsi loku kungenta liciniso lihlale enhlitiyweni yakhe.—Mat. 13:23.
3. Nangabe umnikati welikhaya amatasatasa, yini lesingayenta?
3 Nangabe Umnikati Welikhaya Amatasatasa: Ungase utsi: “Ngesizatfu sekutsi umatasatasa, ngicela kukushiyela nali lipheshana. Linemibuto lesitfupha bantfu labanyenti labatibuta yona, futsi lisiniketa timphendvulo leticacile tayo letivela eBhayibhelini. Esikhatsini lesitako ngitawutsandza kwati loko wena lokucabangako.”
4. Nasishumayela emgwacweni, singalihambisa njani lelipheshana?
4 Nasishumayela Emgwacweni: Ungase utsi: “Sawubona. Wake watibuta yini lomunye walemibuto? [Lindzela imphendvulo.] Lelipheshana lisiniketa timphendvulo letivela eBhayibhelini, leticacile futsi letenetisako.” Nangabe lomuntfu angakajaki, ungase ukhulumele imphendvulo leyodvwa lekulelipheshana, futsi uhambise incwadzi letsi Lokufundziswa LiBhayibheli.
5. Ngaletinye tikhatsi, singalisebentisa njani lelipheshana emakhaya lete muntfu?
5 Emakhaya Lete Muntfu: Kulamanye emasimi, bamemeteli bavame kushiya tincwadzi endzaweni lengadvonsi emehlo emakhaya lete muntfu. Nangabe loku kwetayelekile ebandleni lakini, kungani ngaletinye tikhatsi ungalishiyi lelipheshana? Nasewuphindze ubuya, ungase utsi: “Ngalesikhatsi sifika ekucaleni asizange sikutfole, ngako-ke, sashiya nali lipheshana ngaphansi kwemnyango wakho. Ngumuphi umbuto kulena lelapha longatsandza kutfola imphendvulo yawo?”
6. Yini leyenta lelipheshana lelitsi Kwati Liciniso libe lithulusi leliphumelelako ensimini?
6 Lelipheshana lelitsi Kwati Liciniso lendlulisa emaciniso ngendlela lemelula futsi lecondzile. Likhanga bantfu bato tonkhe tinkholo kanye nemasiko. Kumelula kulihambisa; ngisho nebamemeteli labasebancane kanye nalabasandza kucala bangalihambisa. Uyalisebentisa yini lelipheshana ngaso sonkhe sikhatsi?