Bufakazi Lobunemandla Butawuniketwa
1. Yini lenye lengajabulisa labavakashe eSikhumbutweni ngaphandle kwenkhulumo? Chaza.
1 Nini? Ngebusuku beSikhumbuto. Mikhulu imetamo leyentiwe kute kumenyelwe bantfu kuso. Akusiko kuphela loko tivakashi letitakuva lokutawutijabulisa. Ngemuva kwekuvakasha eSikhumbutweni, lomunye make wakhuluma ngaloko lakubona—bungani bawonkhe wonkhe, sakhiwo lesihle, lesihlobile nalesakhiwa futsi sinakekelwa ngemavolontiya. Kungako-ke sisonkhe hhayi nje kuphela sikhulumi, singabambisana ekuniketeni bufakazi kulomhlangano lobaluleke kwendlula yonkhe emnyakeni.—Efe 4:16.
2. Ngamunye wetfu angase abunikete njani bufakazi etivakashini?
2 Bingelela Tivakashi Ngekufudvumala: Kumamatseka kwetfu lokufudvumele kanye nekubingelela tivakashi ngenjabulo, kutawuniketa bufakazi. (Joh 13:35) Nangabe ungakakhoni kukhuluma nabo bonkhe bantfu labatawube bakhona, ngemusa ungatetfula kulabaseceleni kwakho. (Heb 13:1, 2) Hlala uphaphamele kubona tivakashi lokubonakala tingati muntfu. Kungenteka tatfola timemo ngesikhatsi semkhankaso weSikhumbuto. Ungase utsi kuto: “Kwekucala yini uba khona lapha?” Ticele kutsi tihlale eceleni kwakho futsi utitjele kutsi utayiphendvula imibuto letingaba nayo. Nangabe libandla lokulo kutawudzingeka kutsi liphume ngekushesha kute lidedele lelinye libandla kutsi lisebentise lesakhiwo, ungase utsi: “Ngingajabula kuva kutsi ukuphetse njani lomhlangano? Ngingachumana njani nawe?”
3. Singase sibemukele njani labapholile?
3 Yemukela Labapholile: Asingabati kutsi bamemeteli labapholile batawuba khona, lokufaka ekhatsi labanye labatihlanganisa natsi ngeSikhumbuto kuphela. Bemukele uphindze ubatjele kutsi ujabula kakhulu kubabona. (Rom 15:7) Labadzala bangaya ngisho nasemakhaya abo ngemuva kweSikhumbuto kute babakhutsate kutsi bachubeke beta emihlanganweni yebuKhristu. Sithandazela kutsi labanyenti labatawuba khona eSikhumbutweni bakhutsateke kutsi badvumise Nkulunkulu hhayi kuphela ngalabatawukuva, kodvwa nangalabatakubona ‘lokuyimisebenti yetfu lemihle.’—1 Phet 2:12.