Sebentisa Emapheshana Kuze Usakate Tindzaba Letimnandzi
1. Bantfu baNkulunkulu bawasebentise njani emapheshana?
1 Sesikhatsi lesidze bantfu baJehova basebentisa emapheshana lasekelwe eBhayibhelini kuze basakate tindzaba letimnandzi. Nga-1880, C. T. Russell nalabebanaye bacala kushicilela emapheshana labebitwa ngekutsi “Bible Students’ Tracts,” bawaniketa bafundzi be-Sicongosekulindza kuze bawahambise. Emapheshana bewatsatfwa njengalabaluleke kakhulu kangangekutsi ngalesikhatsi C. T. Russell abhalisa inhlangano lengenti inzuzo emtsetfweni ngenjongo yekusakata tindzaba teMbuso, ligama lelitsi “tract” lafakwa egameni layo lebelitsi Zion’s Watch Tower Tract Society, nyalo leseyibitwa ngekutsi yi-Watch Tower Bible and Tract Society of Pennsylvania. Ngabo-1918, Bafundzi BeliBhayibheli bahambisa emapheshana langetulu kwetigidzi letingu-300. Emapheshana solo alithuluzi leliphumelelako lekufakaza.
2. Yini leyenta emapheshana atsandzeke?
2 Lokuwenta Aphumelele: Emapheshana anetitfombe letikhangako. Umlayeto wawo lomfishane uyajabulisa futsi anemininingwane lelusito. Ayakhanga kubantfu labangase bangatsandzi kutsatsa magazini nobe incwadzi. Kulula kuwahambisa, ngisho nakubamemeteli labasandza kucala nakubantfwana. Ngetulu kwaloko, mancane futsi kulula kuwaphatsa.
3. Shano lokuhlangenwenako lokuveta kubaluleka kwemapheshana.
3 Labanyenti bacala kutfola liciniso ngelipheshana. Nasi sibonelo, lomunye make eHaiti wabona lelinye lemapheshana etfu esitaladini. Walibutsa walifundza wase utsi “sengilitfolile liciniso.” Ngekuhamba kwesikhatsi waya eHholweni LeMbuso, wacala kufundza liBhayibheli futsi wabhajatiswa ngenca yemandla eliVi laNkulunkulu lalifundza epheshaneni.
4. Nangabe emapheshana asipho senyanga, uyini umgomo wetfu?
4 Emtini Ngemuti: Njengobe emapheshana alithuluzi leliphumelelako lekuniketa bufakazi, kusukela nga-November sekatawuba sipho saletinye tinyanga. Umgomo wetfu akusiko kumane siwahambise nje kodvwa ukuwasebentisa kuze sicale incociswano. Nangabe umuntfu anesifiso sekufundza ekuhambeleni kwekucala nobe nasesibuyela kuye, singamkhombisa indlela lesisichuba ngayo sifundvo seliBhayibheli sisebentisa incwadzi letsi Lokufundziswa LiBhayibheli nome lenye incwadzi yekuchuba sifundvo. Singawahambisa njani emapheshana emtini ngemuti? Emapheshana ehlukahlukene, ngako kudzingeka sati kutsi sitowahambisa njani emapheshana lasipho senyanga.
5. Singawahambisa njani emapheshana emtini ngemuti?
5 Setfulo setfu kufanele sivumelane nensimi nelipheshana lesilihambisako. Singacala incociswano ngekuliniketa lesicoca naye. Sitfombe lesingephandle singamenta alangatelele kuva kabanti. Lenye indlela kungaba kumkhombisa emapheshana lambalwa simcele akhetse lalitsandzako. Nasisebenta insimi yebantfu labangangenisani endlini, singabamba lipheshana ngendlela yekutsi umuntfu akhone kubona sitfombe lesikulo nobe sicele kulifaka ngephansi kwemnyango sisho kutsi singatsandza kuva umbono wakhe ngalo. Nangabe sihloko salelipheshana singumbuto, singamcela asho lakucabangako ngalombuto nobe sitakhele wetfu umbuto longamenta afise kwati. Singafundza naye sigaba lesikulelipheshana bese kutsi lapho kunembuto khona sihlabe likhefu simcele asho lakucabangako. Imibhalo leyinhloko ingafundvwa eBhayibhelini. Nase sicedzile kucoca ngalelipheshana singaphetsa incociswano yetfu bese sibeka lilanga nesikhatsi sebuyela kuye. Nangabe libandla letayele kushiya kwekufundza emakhaya langenabantfu, singase sishiye lipheshana lapho bangeke balibone khona labendlulako.
6. Emapheshana angasetjentiswa njani nawushumayela emgwacweni?
6 Kushumayela Emgwacweni: Uke walisebentisa yini lipheshana nawushumayela emgwacweni? Labanye bantfu labendlulako basuke bajakile futsi bangeke bakhone kuma bacoce natsi. Kungase kube matima kubona kutsi bayatsandza yini kulalela. Kunekutsi ubanike magazini lomusha ungaciniseki ngekutsi bayawutsandza yini, kuncono kubaniketa lipheshana. Ngenca yekutsi sitfombe lesingephandle siyakhanga futsi nemlayeto mfishane, sifiso sekufuna kwati singenta bantfu balifundze lelipheshana nabatfola sikhatsi. Nangabe bangakajaki, singakhona kucocisana nabo ngalelipheshana.
7. Shano lokuhlangenwe nako lokuveta indlela lesingawasebentisa ngayo emapheshana nasifakaza singakahleli.
7 Kufakaza Ungakahleli: Kulula kufakaza ungakahleli usebentisa emapheshana. Lomunye umzalwane uphatsa emapheshana lambalwa njalo nakahamba. Nakahlangana nalotsite, njengemuntfu losebenta esitolo uvele acele kumupha lokutsite kwekufundza bese umupha lipheshana. Ngalesikhatsi lomunye umzalwane nemkakhe bahamba bayovakasha eMelika, bakhumbula kutsi batawuhlangana nebantfu labavela emaveni lehlukehlukene. Ngaleso sizatfu baphatsa bhukwana lotsi “Nations” nemapheshana lamanyenti etilwimi letehlukehlekene. Bebatsi nabeva umuntfu lotsengisela eceleni kwendlela akhuluma lulwimi lwakhe nobe lohleti eceleni kwabo epaki nome endzaweni yekudlela, bamuphe lipheshana ngelulwimi lalukhulumako.
8. Emapheshana afana nenhlanyelo ngayiphi indlela?
8 “Hlanyela Inhlayelo Yakho”: Emapheshana angafaniswa nenhlanyelo. Umhlanyeli uhlanyela inhlanyelo yakhe yonkhe indzawo ngobe akati kutsi nguyiphi letawumila ikhule. Umshumayeli 11:6 utsi: “Ekuseni hlanyela inhlanyelo yakho, ungayekeli kusebenta lize liyewushona, ngobe awuyati lenguyona itawuphumelela, kutsi ngulena yini nome nguleyo, nome totimbili tiyawuphumelela kahle ngalokufananako.” Shengatsi singachubeka nekusakata lwati ngalelithuluzi lekufakaza leliphumelela kahle kangaka.—Taga 15:7.
[Blurb on page 3]
Njengobe emapheshana alithuluzi leliphumelelako lekuniketa bufakazi, kusukela nga-November sekatawuba sipho saletinye tinyanga