Indlela Lekhangako Emapheshana Lamasha Lakhiwe Ngayo
1. Ngumaphi emathulusi lakhiwe ngendlela lensha lekhangako lesitawasebentisa ensimini?
1 Kwakhululwa emapheshana lasihlanu lamasha eMihlanganweni Yesigodzi yanga-2013 leyayinesihloko lesitsi “LiVi LaNkulunkulu Liliciniso!” Ngetulu kwaloko, i-Kingdom News No. 38, lenesihloko lesitsi “Vele Bangaphindze Baphile Yini Bantfu Labafile?” nayo seyifakwe kutsi ibe ngulelinye lalamapheshana. Onkhe lamapheshana lasitfupha akhiwe ngendlela lensha lekhangako. Kungani entiwe ngalendlela lensha? Nasiwahambisa emutini ngemuti, singawasebentisa njani ngekuvumelana nendlela lakhiwe ngayo?
2. Kungani lamapheshana entiwe ngalendlela lensha?
2 Kungani Akhiwe Ngalendlela Lensha?: Indlela lephumelelako yekushumayela emutini ngemuti ivame kufaka ekhatsi letintfo letine letilandzelako: (1) Kute ucale incociswano, buta umbuto lotamenta avete umbono wakhe. (2) Mkhombise lokushiwo liBhayibheli. (3) Mshiyele latakufundza. (4) Shiya umbuto lotawuphendvula nawuphindze ubuya bese uhlela kubuya. Lendlela lensha lamapheshana lentiwe ngayo, itasisita kutsi sikhone kutenta kalula letintfo letine.
3. Singalihambisa kanjani lelinye lalamapheshana ensimini?
3 Singawasebentisa Njani?: (1) Ngemuva kwekubingelela, khombisa lococa naye umbuto lotawudzinga kutsi akhetse imphendvulo yinye kuleti letibekiwe ekucaleni kwalelipheshana, bese umcela kutsi avete umbono wakhe. (2) Vula lipheshana bese nicoca ngencenye letsi “Loko Lokushiwo LiBhayibheli.” Fundza umbhalo ngalokucondzile eBhayibhelini nangabe timo tivuma. Nangabe loyo muntfu anesikhatsi, cocani ngencenye lekulelipheshana lekhulumela tinzuzo tekukholelwa kuloko. (3) Mnikete lipheshana umkhutsate kutsi ngesikhatsi sakhe alifundze alicedze. (4) Ngaphambi kwekutsi uhambe, mkhombise incenye lengemuva letsi “Longacabanga Ngako” bese uhlela kubuya nitococa ngemphendvulo levela eBhayibhelini yaloko.
4. Singawasebentisa kanjani lamapheshana lamasha nasibuyela kuloyo lesike sacoca naye?
4 Kuphindze kube lula kulisebentisa ngisho sewubuyela kuloke wacoca naye. Vele usebentise lemibhalo lengemuva kwalelipheshana kute uphendvule umbuto lowawushiye ulenga. Ngaphambi kwekutsi uhambe, mkhombise sitfombe salencwajana letsi Tindzaba Letimnandzi, umlayele sihloko lesicuketse kwatiswa lokubanti ngalendzaba lebenicoca ngayo bese umshiyela lencwajana. Nakayemukela, hlela kutsi nicoce ngayo nawuphindze ubuya. Nawente njalo, utawube sewusicalisile sifundvo seliBhayibheli. Nobe kunekutsi umnikete lencwajana, ungamniketa lelinye lipheshana uphindze uhlele kubuya nitococa ngalo.
5. Nguyiphi indzima lebalulekile lefezwa ngemapheshana emsebentini wekushumayela?
5 Sekwendlule iminyaka lengetulu kwa-130 kusetjentiswa emapheshana emsebentini wekushumayela. Abesolo alithulusi leliphumelela kakhulu ekushumayeleni, nanobe angalingani futsi abhalwe ngendlela lengafani. Shengatsi singawasebentisa kahle lamapheshana lakhiwe ngendlela lensha kute sichubeke nekusakata lwati loluseBhayibhelini emhlabeni wonkhe.—Taga 15:7a.