Idlela Yekucala Incociswano Usebentisa Emapheshana

Kusukela ngaJanuary 2018, likhasi lekucala Lencwajana Yekubhalela Emihlanganweni YeKuphila KwemaKhristu Nemsebenti Wawo belisolo liveta tincociswano letisibonelo. Besisolo sikhutsatwa kutsi sinake kakhulu kucoca nebantfu kunekutsi sibanikete tincwadzi tetfu. Kute kusitwe bamemeteli bashintje indlela labacalisa ngayo inshumayelo yabo, ema-video etincociswano letisibonelo akhombisa indlela yekucalisa incociswano usebentisa liBhayibheli nje kuphela. Kambe loku kusho kutsi akusafaneli yini sishumayele emtini ngemuti sisebentisa tincwadzi? Cha, akusho njalo! Sibonelo nje, emapheshana angaba yindlela lekahle yekucalisa incociswano. Singasebentisa lendlela lelandzelako nasishumayela sisebentisa nome nguliphi lipheshana:

1. Buta umbuto losekucaleni kwelipheshana umuntfu langatikhetsela yena imphendvulo.

2. Mkhombise imphendvulo leseBhayibhelini lesetulu ekhasini lesibili kulelipheshana. Nangabe sikhatsi sisekhona, ningacoca nangalokunye lokungekhatsi kwalelipheshana.

3. Niketa umnikati welikhaya lelipheshana, bese umkhutsata kutsi alifundze lonkhe nakatfola sikhatsi.

4. Ngaphambi kwekutsi uhambe, mkhombise umbuto longephasi kwesihloko lesitsi “Longacabanga Ngako,” bese uhlela kutsi nicoce ngawo nawubuya.

Nawubuyela, cocani ngemphendvulo bese ushiya lomunye umbuto lenitawucoca ngawo nawuphindze ubuya. Ungahle ukhetse umbuto ku-website yetfu nobe encwadzini levetwe ngemuva kwalelipheshana. Ngesikhatsi lesifanele, Yetfula incwadzi letsi Tindzaba Letimnandzi Letivela KuNkulunkulu! nobe lenye yetincwadzi tekufundza nemuntfu liBhayibheli lekhona emaThulusini Etfu Ekufundzisa.